Ipprepara għat-Tifkira b’Qalb Ferriħija
1. L-istaġun tat-Tifkira hu żmien speċjali biex nagħmlu xiex?
1 It-Tifkira, li se ssir nhar it-Tlieta, 26 taʼ Marzu, tipprovdi opportunità mill-aqwa biex nifirħu b’dak li għamel Ġeħova biex isalvana. (Is. 61:10) Spirtu ferrieħi se jgħinna nkunu preparati sew saħansitra qabel it-Tifkira. Kif?
2. Xi jqanqalna nippreparaw għall-osservanza tat-Tifkira?
2 Nippreparaw għall-Osservanza: L-Ikla taʼ Filgħaxija tal-Mulej hi osservanza solenni imma sempliċi. Xorta waħda, tirrikjedi li nippjanaw minn qabel ħalli ma ninsewx dettalji importanti. (Prov. 21:5) Iridu jintgħażlu l-ħin u l-post adattati u jridu jinkisbu l-emblemi xierqa. Il-post fejn se ssir il-laqgħa jrid ikun nadif u lest minn kollox. Il-kelliemi li ngħata l-inkarigu jrid jipprepara bir-reqqa, u dawk li se jdawru l-emblemi u l-attendants iridu jkunu organizzati. Żgur li ħafna minn dan ix-xogħol diġà sar. Nippreparaw sew għal din l-okkażjoni sagra għax qalbna timtela b’apprezzament għall-fidwa.—1 Pt. 1:8, 9.
3. Kif nistgħu nħejju qalbna għall-Ikla taʼ Filgħaxija tal-Mulej?
3 Inħejju Qalbna: Hu essenzjali wkoll li nħejju qalbna biex nifhmu bis-sħiħ is-sinifikat kollu tat-Tifkira. (Esd. 7:10) Għal dan l-għan, għandna nwarrbu l-ħin biex nikkunsidraw il-qari tal-Bibbja speċjali li jkollna għat-Tifkira u mbagħad nimmeditaw dwar l-aħħar jiem taʼ Ġesù hawn fuq l-art. Jekk nimmeditaw fuq l-attitudni mhix egoistika taʼ Ġesù se nitqanqlu biex nimitawh.—Gal. 2:20.
4. Liema benefiċċju tal-fidwa jferrħek l-iktar?
4 Il-mewt taʼ Kristu turi li Ġeħova għandu kull dritt li jkun is-Sovran. Din teħlisna mid-dnub u l-mewt. (1 Ġw. 2:2) Tiftaħ it-triq għal relazzjonijiet paċifiċi m’Alla u għall-ħajja eterna. (Kol. 1:21, 22) Ukoll, tgħinna nsaħħu d-determinazzjoni li ngħixu fi qbil mad-dedikazzjoni tagħna lil Ġeħova u li nibqgħu sodi bħala dixxipli taʼ Kristu. (Mt. 16:24) Hekk kif tipprepara għat-Tifkira li ġejja u tattendiha, jalla l-ferħ tiegħek joktor!