Kampanja li Tirnexxi

Tliet ġimgħat qabel ma tibda l-​konvenzjoni, il-​kongregazzjonijiet għal darb’oħra se jieħdu sehem f’kampanja biex jistiednu lil dawk li fit-​territorju tagħhom juru interess biex jattendu. Hemm raġuni tajba għala din il-​kampanja ssir kull sena. Dawk li jaċċettaw l-​invit u jiġu l-​konvenzjoni spiss jibqgħu impressjonati bit-​taħditiet Skritturali, bid-​dipartimenti organizzati tajjeb minn volontieri, u bl-​imġiba tajba u l-​unità li nuru. (Salm 110:3; 133:1; Is. 65:13, 14) Minkejja dan, tirnexxi il-​kampanja tagħna, speċjalment fi nħawi fejn l-​uħud interessati jkollhom jivvjaġġaw distanzi twal biex jattendu?

Wara l-​konvenzjoni distrettwali tal-​2011, uffiċċju tal-​fergħa rċieva ittra mingħand mara li kienet sabet l-​invit imdaħħal fil-​bieb tagħha. Normalment kienet tistaħba meta x-​Xhieda taʼ Ġeħova kienu jħabbtulha. Hi kitbet: “Jien kelli dar mill-​isbaħ, raġel mill-​aħjar, u ħsibt li kelli kulma neħtieġ biex inkun ferħana. B’dispjaċir, xorta ma kontx ferħana, u ħajti verament ma kellhiex skop. Għalhekk iddeċidejt li nsuq 320 kilometru biex nattendi l-​programm tas-​Sibt.” Tant ħadet pjaċir fil-​konvenzjoni li ċemplet lil żewġha biex tgħidlu li kienet se tibqaʼ hemm dak il-​lejl biex tattendi l-​Ħadd ukoll. “Smajt it-​taħditiet kollha, iltqajt maʼ ħafna Xhieda taʼ Ġeħova, u ridt li nkompli nesperjenza dan.” Wara li marret lura d-​dar, hi bdiet tistudja u wara erbaʼ xhur saret pubblikatriċi mhix mgħammda. “Kemm jien grata li sibt l-​invit fil-​bieb għax issa ħajti verament għandha skop!”

Xi wħud li jirċievu l-​invit se jattendu. Għalhekk, ħu sehem b’mod żeluż f’din il-​kampanja importanti. Ġib l-​inviti li jkun fadallek miegħek fejn tattendi l-​konvenzjoni u użahom biex tagħti xhieda informali.

[Stampa f’paġna 9]

Kif Se Noffru l-​Invit?

Sabiex inkopru t-​territorju tagħna, għandna nżommu l-​istedina fil-​qosor. Nistgħu ngħidu xi ħaġa hekk: “Hello. Qed nieħu sehem fi sforz li qed isir madwar id-​dinja biex jitqassam dan l-​invit. Din hi l-​kopja tiegħek. Se ssib iktar dettalji fuq l-​invit.” Kun entużjast. Meta nieħdu sehem f’din il-​kampanja fi tmiem il-​ġimgħa, jekk ikun xieraq għandna noffru r-​rivisti wkoll.