Vidjow ġdid biex nibdew studji tal-​Bibbja

Vidjow qasir intitolat Għala għandek tistudja l-​Bibbja? qed jilħaq udjenza ġmielha fuq jw.org. Dan il-​vidjow hu ddisinjat biex jimmotiva lil nies interessati jaċċettaw l-​offerta taʼ studju tal-​Bibbja b’xejn. Tistaʼ tarah billi tikklikkja fuq “Itlob Studju tal-​Bibbja” fuq in-​naħa t’isfel tal-​paġna tad-​dħul jew billi tiskenja l-​kodiċi QR stampat fuq wara taʼ kull wieħed mill-​fuljetti l-​ġodda tagħna. Dawn huma xi modi kif nistgħu nagħmlu użu tajjeb mill-​vidjow.

• Meta tagħmel żjara lura, għid lill-​inkwilin: “Nistaʼ nurik vidjow qasir li jispjega kif tistaʼ ssib tweġibiet għall-​mistoqsijiet dwar il-​Bibbja?” Jekk jaqbel, urih il-​vidjow fuq il-​mowbajl jew tablet tiegħek jew il-​kompjuter tiegħu stess.

• Jekk inħallu wieħed mill-​fuljetti l-​ġodda meta nkunu qed nagħtu xhieda informali jew f’postijiet pubbliċi, uri l-​kodiċi QR u inkuraġġixxi lill-​persuna tiskenjaha bil-​mowbajl jew tablet tagħha. Ladarba f’ħafna lingwi l-​kodiċi QR jieħdok direttament għall-​vidjow fuq il-​Websajt tagħna, ikun possibbli tara l-​vidjow fuq mowbajl jew tablet dak il-​ħin stess.

• Għid lil sħabek tax-​xogħol, lill-​qraba, u lil nies oħra li taf dwar il-​vidjow, u offri li turihulhom. Jew ibagħtilhom ħolqa tal-​vidjow bl-​e-​mail, u stidinhom jarawh waħedhom.

Bl-​użu taʼ dan il-​provvediment ġdid, għandna mnejn inkunu nistgħu nibdew iktar studji tal-​Bibbja, u ngħinu spiritwalment lil dawk li għandhom “attitudni xierqa lejn il-​ħajja taʼ dejjem.”—Atti 13:48.