Kaxxa għall-​mistoqsija

◼ It-​tfal x’hemm bżonn jitgħallmu biex jimmaturaw spiritwalment?

Ġenituri Kristjani jagħmlu minn kollox biex irabbu lil uliedhom “fid-​dixxiplina u l-​gwida mentali [jew, l-​istruzzjoni] taʼ Ġeħova.” (Efes. 6:4) Pereżempju, il-​ġenituri sabuha taʼ benefiċċju li kull filgħodu jikkunsidraw l-​iskrittura tal-​jum maʼ wliedhom. Matul il-​qima tal-​familja u f’ħinijiet oħra, il-​familji jistgħu jaraw u jiddiskutu vidjow flimkien, jitkellmu dwar suġġetti speċifiċi minn artikli taż-​Żgħażagħ Jistaqsu, jirreċtaw xi rakkont Bibliku, jew jagħmlu sessjonijiet taʼ prattika. Madankollu, sabiex it-​tfal ‘jirsistu lejn il-​maturità,’ iridu wkoll jiġu mgħallmin veritajiet Bibliċi iktar profondi.—Ebr. 6:1.

Ikkunsidra dak li ngħallmu lil dawk li niltaqgħu magħhom fit-​territorju tagħna. Fl-​ewwel żjara jew f’xi żjara lura, aħna ġeneralment nipprovaw nibdew studju tal-​Bibbja minn fuq il-​ktieb Il-​Bibbja X’Tgħallem Verament? Wara li nispiċċaw din il-​pubblikazzjoni, nużaw il-​ktieb “Żommu Ruħkom fl-​Imħabba t’Alla.” Għala? Il-​ktieb Il-​Bibbja X’Tgħallem? jagħti lill-​istudenti għarfien bażiku tal-​Iskrittura. Il-​ktieb “Fl-​Imħabba t’Alla” jgħallimhom kif japplikaw prinċipji Bibliċi fil-​ħajja tagħhom taʼ kuljum. Meta wħud ġodda jistudjaw iż-​żewġ pubblikazzjonijiet jiġu megħjunin biex ‘jagħmlu l-​għeruq’ fi Kristu u ‘jissodaw fil-​fidi.’ (Kol. 2:6, 7) Ma jkunx dan il-​materjal taʼ benefiċċju għal uliedna wkoll? Anki huma għandhom bżonn jitgħallmu dwar il-​fidwa, is-​Saltna, u l-​kundizzjoni tal-​mejtin. It-​tfal jeħtieġu jkunu jafu wkoll dwar għala Alla jippermetti t-​tbatija u kif jidentifikaw l-​aħħar jiem taʼ din is-​sistema dinjija. Iridu jkunu konvinti li x-​Xhieda taʼ Ġeħova għandhom il-​verità. Hemm bżonn li t-​tfal jifhmu wkoll prinċipji Bibliċi u kif iħarrġu “s-​sensi tagħhom.” (Ebr. 5:14) Naturalment, il-​ġenituri jridu jżommu f’moħħhom l-​età taʼ wliedhom u kemm huma kapaċi jifhmu. Madankollu, ħafna tfal għandhom l-​abbiltà li jibdew jitgħallmu veritajiet Bibliċi iktar profondi anki meta jkunu għadhom żgħar.—Lq. 2:42, 46, 47.