Kif tuża r-rekordings bl-awdjo?
1. Minbarra l-pubblikazzjonijiet bil-miktub, liema provvediment ieħor għandna li nibbenefikaw minnu?
1 Ħafna nies iħobbu jużaw jw.org biex jaqraw kliem pjaċevoli u korrett tal-verità. (Ekk. 12:10) Madanakollu, qed tuża r-rekordings bl-awdjo? Dawn jagħmluhielek possibbli li tismaʼ ftit mill-informazzjoni li għandna fuq il-Websajt tagħna. Kif nistgħu nibbenefikaw mir-rekordings bl-awdjo?
2. Kif nistgħu nużaw ir-rekordings bl-awdjo għall-istudju personali tagħna jew tal-familja?
2 Għall-istudju personali tagħna jew tal-familja: Jekk nisimgħu ir-rekordings bl-awdjo tal-qari drammatiku mill-Bibbja, browxers, jew xi pubblikazzjoni oħra waqt li nkunu qed nivvjaġġaw jew waqt li nkunu qed nieħdu sehem fl-attivitajiet taʼ kuljum, dan jistaʼ jgħinna nużaw il-ħin bl-aħjar mod. (Efes. 5:15, 16) Ukoll, jistaʼ jkollna iktar varjetà fil-qima bħala familja jekk nisimgħu l-qari taʼ materjal waqt li nsegwu mill-kopja tagħna tal-pubblikazzjoni. Jekk inkunu rridu ntejbu l-qari tagħna jew jekk qed nitgħallmu lingwa, il-fatt li nużaw ir-rekordings bl-awdjo matul l-istudju persunali se jkun speċjalment t’għajnuna.
3. Fit-territorju tagħna min jistaʼ jibbenefika mir-rekordings bl-awdjo?
3 Fil-ministeru: In-nies fit-territorju tagħna li jħossu li għandhom wisq x’jagħmlu biex joqogħdu jaqraw jafu jkunu lesti li jisimgħu r-rekordings bl-awdjo. Jew forsi niltaqgħu maʼ wħud li jitkellmu lingwa oħra u li x’aktarx iktar se jkunu lesti li jaċċettaw il-messaġġ tas-Saltna jekk jisimgħuh ‘bil-lingwa tagħhom stess.’ (Atti 2:6-8) F’xi nħawi, li tismaʼ hu parti importanti mill-kultura. Pereżempju fil-kultura Hmong, it-tradizzjoni hi li n-nies jgħidu l-istorja tal-kultura tagħhom lill-ġenerazzjonijiet taʼ warajhom, u dawn jiftakru ħafna minn dak li jisimgħu. Ħafna kulturi Afrikani jħobbu jitgħallmu permezz tal-irrakkontar.
4. Liema mistoqsijiet nistgħu nsaqsu lilna nfusna dwar li ngħinu lin-nies fit-territorju tagħna?
4 Fit-territorju tiegħek, taħseb li jkun taʼ ġid jekk issemmaʼ silta minn rekording bl-awdjo bil-lingwa tal-inkwilin? Jistaʼ xi ħadd jibbenefika jekk tibgħatlu pubblikazzjoni bl-awdjo permezz tal-e-mail? Nistgħu aħna nniżżlu pubblikazzjoni bl-awdjo fuq CD u nagħtuha lil inkwilin interessat, forsi flimkien mal-verżjoni stampata? Kull ktieb, browxer, rivista, jew fuljett elettroniku sħiħ li nħallu maʼ xi ħadd fil-ministeru jistaʼ jingħadd fir-rapport tagħna. Ir-rekordings bl-awdjo huma mħejjijin biex nużawhom fl-istudju persunali u wkoll biex niżirgħu ż-żerriegħa tal-verità tas-Saltna.—1 Kor. 3:6.