Alla Għala Ma Jismax it-Talb Kollu?
Missierna tas-sema, Alla Ġeħova, irid u jieħu pjaċir jismaʼ t-talb sinċier tagħna. Imma hemm affarijiet li jżommuh milli jwieġeb it-talb tagħna. X’inhuma dawn l-affarijiet u xi rridu nżommu f’moħħna meta nitolbu? Dawn li ġejjin huma xi prinċipji mill-Bibbja.
“Meta titlob, toqgħodx tirripeti l-istess ħaġa.”—Mattew 6:7.
Ġeħova ma jridniex nirrepetu talb bl-amment jew naqrawh minn xi ktieb tat-talb. Minflok, iridna nitkellmu mill-qalb. Immaġina kemm ikun taʼ dwejjaq kieku ħabib dejjem jgħidlek l-istess ħaġa darba wara l-oħra. Ħbieb veri jitkellmu mill-qalb u b’mod sinċier. Meta nitolbu fi kliemna, inkunu qed ngħidu xi ħaġa personali lil Missierna tas-sema.
“Titolbu, iżda ma taqilgħux, għax qegħdin titolbu għal skop ħażin.”—Ġakbu 4:3.
Aħna żgur li ma nistennewx li Alla jwieġeb it-talb tagħna kieku kellna nitolbuh għal affarijiet li hu ma jridx li nagħmlu jew ikollna. Pereżempju, jekk xi ħadd jilgħab għall-flus u jitlob lil Alla biex jgħinu jirbaħ, Ġeħova se jwieġeb dik it-talba? Hu qalilna b’mod ċar biex ma nkunux egoisti u biex ma nemmnux fis-superstizzjoni, bħax-xorti. (Isaija 65:11; Luqa 12:15) Aħna żgur li ma nistennewx li Ġeħova jwieġeb talb bħal dan. Biex Alla jwieġeb it-talb tagħna, irridu nkunu ċerti li t-talb jaqbel maʼ dak li jgħidilna fil-Bibbja.
“Min idawwar widintu biex ma jismax il-liġi—anki t-talba tiegħu hi xi ħaġa mistkerrha.”—Proverbji 28:9.
Fiż-żminijiet Bibliċi, Alla ma weġibx lil dawk li ma obdewx il-liġijiet ġusti tiegħu. (Isaija 1:15, 16) Alla ma nbidilx. (Malakija 3:6) Jekk irridu li Alla jwieġeb it-talb tagħna, għandna nagħmlu dak kollu li nistgħu biex nobdu l-liġijiet tiegħu. Imma xi ngħidu jekk għamilna xi affarijiet ħżiena fil-passat? Ifisser dan li Ġeħova qatt mhu se jismagħna? Dażgur li le! Alla bi mħabba se jaħfrilna jekk nuruh li jiddispjaċina għall-ħażin li għamilna u jekk nagħmlu l-aħjar li nistgħu biex nogħġbuh.—Atti 3:19.