Jistgħu l-Affarijiet li Tgħallimt mill-Bibbja fil-Bidu Jgħinuk Illum?

1. L-affarijiet li tgħallimt meta bdejt tistudja l-Bibbja kif effettwawk?

L-AFFARIJIET bażiċi li tgħallimna mill-Bibbja meta bdejna nistudjaw biddlulna ħajjitna. Pereżempju, meta tgħallimna li l-isem t’Alla hu Ġeħova bdejna nsiru l-ħbieb tiegħu. (Isa. 42:8) Meta tgħallimna x’jiġri meta mmutu, ma bqajniex ninkwetaw jekk il-maħbubin tagħna humiex qed ibatu. (Ekk. 9:10) U meta tgħallimna dwar il-wegħda t’Alla li se jġib Ġenna tal-art, ma bqajniex ninkwetaw dwar il-futur. Sirna konvinti li stajna ngħixu mhux biss għal 70 jew 80 sena, imma għal dejjem.—Slm. 37:29; 90:10.

2. It-​2 Pietru 1:​12, 13 kif juri li anki Kristjani maturi m’għandhomx jinsew kemm hu importanti t-tagħlim bażiku tal-Bibbja?

² Qatt m’għandna ninsew kemm hu importanti dak li tgħallimna mill-Bibbja fil-bidu. Fit-tieni ittra tiegħu, l-appostlu Pietru kiteb lil Kristjani li kienu “konvinti sew mill-verità.” (Aqra 2 Pietru 1:​12, 13.) Però, dak iż-żmien kien hemm nies ħżiena fil-kongregazzjoni li riedu jbiegħdu lill-aħwa mill-verità. (2 Pt. 2:​1-3) Allura, Pietru ried isaħħaħ lill-aħwa ħalli jkunu jistgħu jipproteġu lilhom infushom mill-gideb li dawn in-nies kienu qed jgħallmu. Biex jagħmel dan, hu fakkarhom dwar ċerti affarijiet li kienu diġà tgħallmu. Dawn it-tfakkiriet kienu se jgħinuhom jibqgħu leali lejn Ġeħova sal-aħħar.

3. Għala għandhom il-Kristjani kollha jimmeditaw dwar dak li tgħallmu meta bdew jistudjaw il-Bibbja? Agħti eżempju.

³ Hekk kif nimmaturaw bħala Kristjani, xorta nistgħu nibbenefikaw mit-tagħlim bażiku tal-Bibbja. Bħala eżempju, aħseb f’chef tal-esperjenza u xi ħadd li għadu jibda jitgħallem isajjar. Huma jaf jużaw l-istess ingredjenti biex jagħmlu ikla. Imma maż-żmien, ix-chef tal-esperjenza tgħallem juża l-istess ingredjenti b’modi differenti biex jagħmel riċetti ġodda u tajbin. Bl-istess mod, dawk li ilhom jaqdu lil Ġeħova jaf jitgħallmu lezzjonijiet differenti mill-istess skritturi li qed jitgħallem xi ħadd li qed jistudja l-Bibbja. Għala? Għax wara li nitgħammdu, iċ-ċirkustanzi tagħna jew il-mod kif naqdu lil Ġeħova jaf jinbidel. Allura, l-iskritturi li nkunu tgħallimna snin ilu se nużawhom għaċ-ċirkustanzi l-ġodda tagħna. Ejja naraw x’jistgħu jitgħallmu Kristjani maturi minn tliet affarijiet li tgħallmu meta bdew jistudjaw il-Bibbja.

ĠEĦOVA HU L-ĦALLIEQ

4. Meta tgħallimna li Ġeħova hu l-Ħallieq, kif inbidlet ħajjitna?

⁴ Verità li tgħallimna hi li “dak li bena kollox hu Alla.” (Lhud 3:4) Fil-fatt, aħna nafu li d-dinja u kulma fiha ħalaqhom xi ħadd b’saħħtu u għaref ħafna. Imma hemm ħafna iktar affarijiet x’nistgħu nitgħallmu minn din il-verità. Nitgħallmu li peress li Ġeħova ħalaqna, hu jafna sew, jimpurtah minna, u jaf x’inhu l-aħjar għalina. Mela li nafu li Ġeħova hu l-Ħallieq tagħna biddlilna ħajjitna b’ħafna modi u anki tana tama.

5. Liema verità se tgħinna nkunu umli? (Isaija 45:​9-12)

⁵ Il-verità li Ġeħova hu l-Ħallieq tagħna tgħallimna wkoll li għandna nkunu umli. Pereżempju, għal xi żmien, Ġob nesa x’kien l-iktar importanti. Minflok iffoka fuq Ġeħova, hu beda jiffoka fuqu nnifsu u jiġġustifika lilu nnifsu. Imma Ġeħova fakkru li hu l-Ħallieq li jistaʼ kollox. (Ġob 38:​1-4) Dan għen lil Ġob jirrealizza li l-mod kif Ġeħova jagħmel l-affarijiet hu dejjem aħjar mill-mod kif jagħmilhom il-bniedem. Fi qbil ma’ dan, Isaija iktar tard kiteb: “Għandu t-tafal jgħid lil Dak li jagħmel il-fuħħar: ‘X’qed tagħmel?’”—Aqra Isaija 45:​9-12.

6. Meta jkun tajjeb li nimmeditaw dwar kemm hu għaref u b’saħħtu l-Ħallieq tagħna? (Ara wkoll l-istampi.)

⁶ Kristjan li jkun ilu jaqdi lil Ġeħova jistaʼ jibda jistrieħ wisq fuq dak li jaħseb hu minflok jara x’jaħseb Ġeħova u x’tgħid il-Kelma tiegħu. (Ġob 37:​23, 24) Allura, li jimmedita dwar kemm hu għaref u b’saħħtu Ġeħova kif jistaʼ jgħinu? (Isa. 40:22; 55:​8, 9) Din il-verità bażika tistaʼ tgħinu jibqaʼ umli u jiftakar li l-mod kif jaħseb Ġeħova hu aħjar mill-mod kif jaħseb hu.

7. Rahela x’għamlet biex taċċetta bidla li saret fl-organizzazzjoni?

⁷ Rahela, li tgħix is-Slovenja, sabet li meta mmeditat dwar Ġeħova bħala l-Ħallieq, setgħet taċċetta bidliet li saru fl-organizzazzjoni. Hi tammetti: “Ġieli ma kienx faċli għalija li naċċetta bidliet li għamlu l-aħwa li qed imexxu. Pereżempju, wara li rajt ir-rapporta dwar li l-aħwa rġiel jistgħu jħallu d-daqna, xorta rajtha stramba meta telaʼ ħu jagħti taħdita bid-daqna. Allura, tlabt lil Ġeħova biex jgħinni naddatta ma’ din il-bidla.” Rahela fehmet li bħala l-Ħallieq tas-sema u l-art, Ġeħova dejjem jaf liema hu l-aħjar mod kif imexxi l-organizzazzjoni tiegħu. Jekk qed issibha diffiċli biex tadatta ma’ xi bidla jew direzzjoni ġdida fl-organizzazzjoni, kun umli u mmedita sew dwar kemm hu għaref u b’saħħtu l-Ħallieq tiegħek, Ġeħova.—Rum. 11:​33-36.

ALLA GĦALA JIPPERMETTI T-TBATIJA

8. Il-verità dwar għala Alla jippermetti t-tbatija kif għenitek?

⁸ Alla għala jippermetti t-tbatija? Xi wħud li ma jafux it-tweġiba jirrabjaw għal Alla jew jispiċċaw ma jemmnux li jeżisti! (Prov. 19:3) Imma int tgħallimt li n-nies ibatu u jmutu minħabba d-dnub u l-imperfezzjoni, mhux għax Ġeħova jġegħelhom ibatu. Tgħallimt ukoll li grazzi għall-paċenzja taʼ Ġeħova, miljuni taʼ nies qed ikollhom iċ-ċans jitgħallmu dwaru u jifhmu kif hu se jeqred it-tbatija darba għal dejjem. (2 Pt. 3:​9, 15) Din il-verità tatek il-faraġ u ressqitek eqreb taʼ Ġeħova.

9. Meta l-iktar irridu niftakru għala Ġeħova qed jippermetti t-tbatija?

⁹ Aħna nafu li sakemm Ġeħova jneħħi t-tbatija rridu nkunu paċenzjużi. Imma meta xi ħadd li nħobbu jmut, jew aħna jew xi ħadd tal-familja jbati jew jiġi trattat b’mod inġust, xorta jaf nibdew naħsbu għala Ġeħova qed idum biex jaġixxi. (Ħab. 1:​2, 3) F’mumenti bħala dawn, ikun tajjeb li niftakru r-raġunijiet għala Ġeħova qed jippermetti li n-nies tajbin jgħaddu minn diffikultajiet.b (Slm. 34:19) Ukoll, nistgħu nimmeditaw dwar l-iskop tiegħu li jneħħi t-tbatija għal dejjem.

10. X’għen lil Anne tkampa meta mietet ommha?

¹⁰ Li nafu l-verità dwar għala Alla jippermetti t-tbatija jgħinna nissaportu. Anne, li tgħix fil-gżira taʼ Mayotte, fl-Oċean Indjan, tgħid: “Ftit tas-snin ilu mietet ommi u vera ħassejtni mdejqa. Però, kull meta nħossni hekk niftakar li dan mhux minn Ġeħova. Ġeħova għandu sebaʼ mitt sena biex ineħħi t-tbatija u jqajjem lill-maħbubin tagħna li mietu. Meta nimmedita fuq dawn il-veritajiet, avolja nimmissjaha lil ommi, inħoss kalma li naf li Ġeħova biss jistaʼ jtini.”

11. X’inhuma xi raġunijiet għala Ġeħova jippermetti t-tbatija, u dan kif jistaʼ jimmotivana nkomplu nippritkaw?

¹¹ Li nafu l-verità għala Alla jippermetti t-tbatija jistaʼ jimmotivana nkomplu nippritkaw. Wara li spjega li Ġeħova hu paċenzjuż għax jixtieq li n-nies jindmu u ma jinqerdux, Pietru kiteb: “Aħsbu dwar x’tip taʼ nies għandkom tkunu. Aġixxu b’mod qaddis u agħtu prova li intom leali lejn Alla b’dak li tagħmlu.” (2 Pt. 3:11) Mod wieħed kif ‘nagħtu prova li aħna leali lejn Alla b’dak li nagħmlu’ hu billi nippritkaw. Bħal Missierna, aħna nħobbuhom lin-nies u nixtiquhom jgħixu għal dejjem fid-dinja l-ġdida t’Alla. Ġeħova bil-paċenzja qed jagħti ċ-ċans lin-nies tat-territorju tagħna jkollhom l-opportunità li jaqduh. Kemm hu privileġġ sabiħ li naħdmu m’Alla u ngħinu lil kemm jistaʼ jkun nies jitgħallmu dwaru qabel jiġi t-tmiem!—1 Kor. 3:9.

QED NGĦIXU “FL-AĦĦAR JIEM”

12. Il-verità li qed ngħixu “fl-aħħar jiem” kif għenitna?

¹² Il-Bibbja qalet eżatt kif se jkunu n-nies “fl-aħħar jiem.” (2 Tim. 3:​1-5) Meta nħarsu madwarna u naraw kif in-nies jaġixxu, naraw b’mod ċar li dak li tgħid il-Bibbja hu veru. Meta naraw l-attitudni tan-nies tmur għall-agħar, nikkonvinċu lilna nfusna iktar li dak li tgħid il-Kelma t’Alla nistgħu nafdawh.—2 Tim. 3:​13-15.

13. L-eżempju li qal Ġesù f’​Luqa 12:​15-21 xi jġegħelna nsaqsu lilna nfusna?

¹³ Aqra Luqa 12:​15-21. Li nafu li qed ngħixu fl-aħħar jiem jgħinna nużaw il-ħin tagħna bl-aħjar mod biex naqdu lil Ġeħova. L-eżempju li qal Ġesù jurina għala dan hu importanti. Alla qal li r-raġel sinjur kien “bla raġuni” mhux għax kellu l-ġid, imma għax kellu l-prijoritajiet tiegħu ħżiena. Hu kien refaʼ “ħafna affarijiet taʼ valur għalih innifsu imma [ma kienx] sinjur f’affarijiet li huma importanti għal Alla.” Il-mod kif uża l-ħin tiegħu kien ħażin, għax fil-fatt Alla qallu: “Dan il-lejl int se tmut.” Din l-istorja kif tistaʼ tgħinna llum? M’għadx fadal ħafna żmien qabel jiġi t-tmiem, allura jkun tajjeb li nistaqsu lilna nfusna: ‘Il-miri tiegħi juru li qed nuża l-ħin tiegħi bl-aħjar mod biex naqdi lil Ġeħova? X’miri qed inħeġġiġhom jagħmlu lit-tfal tiegħi? Qiegħed nuża s-saħħa, il-ħin, u l-flus tiegħi biex inkun sinjur f’affarijiet li huma importanti għal Alla jew qed niffoka fuq affarijiet li jogħġbu lili?’

14. Bħalma rajna fl-esperjenza taʼ Miki, għala hu importanti li nimmeditaw sew dwar l-evidenza li qed ngħixu fl-aħħar jiem?

¹⁴ Li nimmeditaw fuq l-evidenza li qed ngħixu fl-aħħar jiem jistaʼ jeffettwa d-deċiżjonijiet li nieħdu f’ħajjitna. Dan hu dak li ġara lil oħt jisimha Miki. Hi tgħid: “Meta spiċċajt is-sekondarja, vera xtaqt immur l-università biex nistudja dwar l-annimali u wara nsib xogħol fuq hekk. Imma kelli wkoll il-mira li nkun pijuniera regulari u mmur naqdi fejn hemm iktar bżonn. Aħwa maturi fil-kongregazzjoni qaluli biex naħseb sew jekk kienx se jirnexxili nagħmilhom it-tnejn, jiġifieri jkolli l-karriera li xtaqt u fl-istess ħin nilħaq il-miri spiritwali tiegħi. Fakkruni li din is-sistema dalwaqt se tispiċċa, imma fakkruni wkoll li fid-dinja l-ġdida se jkolli l-eternità biex nistudja dwar l-annimali kollha. Allura, għażilt li nieħu korsijiet qosra li ma jiħdulix ħafna mill-ħin tiegħi u li bihom stajt nitgħallem abbiltajiet differenti. Dan għenni biex insib xogħol li bih stajt nieħu ħsieb lili nnifsi, ikolli l-ħin biex inkun pijuniera regulari, u biex iktar ’il quddiem immur l-Ekwador u naqdi fejn hemm iktar bżonn.” Issa, Miki u r-raġel tagħha qed jaqdu fix-xogħol tas-circuit fl-Ekwador.

15. L-eżempju taʼ Ġakbu kif jgħinna ma naqtgħux qalbna minn uħud li jgħidu li mhux interessati fl-aħbar tajba? (Ara wkoll l-istampi.)

¹⁵ Jekk in-nies għall-ewwel ma jkunux iridu jisimgħu l-aħbar tajba, m’għandniex niħduha bi kbira għax dawn jaf jinbidlu. Fil-fatt hekk ġara lil Ġakbu, ħu Ġesù mill-omm. Hu ra lil Ġesù jikber, isir il-Messija, u jsir l-aqwa għalliem li qatt eżista. Minkejja dan, għal snin sħaħ, Ġakbu m’emminx f’Ġesù. Kien biss wara li Ġesù ġie rxoxtat li hu sar dixxiplu żeluż tiegħu!c (Ġw. 7:5; Gal. 2:9) Mela ibqaʼ pprietka lil uħud tal-familja u nies li jgħidu li mhumiex interessati. Taqtax qalbek minnhom! Ftakar, aħna qed ngħixu fl-aħħar jiem. Allura, ix-xogħol tal-ippritkar huwa urġenti. Dak li tgħidilhom illum jistaʼ jeffettwahom iktar tard, forsi anki meta jibda ż-żmien taʼ tbatija kbira.d

IBQAʼ APPREZZA T-TFAKKIRIET TAʼ ĠEĦOVA

16. Kif ibbenefikajt mit-tfakkiriet taʼ Ġeħova? (Ara wkoll il-kaxxa “Uża Veritajiet tal-Bibbja Biex Tgħin lil Oħrajn.”)

¹⁶ Xi ikel spiritwali li l-organizzazzjoni tipprovdi hu għan-nies li jafu ftit dwar il-Bibbja. Pereżempju, it-taħditiet pubbliċi taʼ kull ġimgħa, ċerti artikli u vidjows fuq jw.org, u r-rivisti għall-pubbliku huma ddisinjati għal min mhuwiex Xhud. Minkejja dan, aħna xorta nibbenefikaw mit-tfakkiriet li jkun hemm fihom. Dawn ikabbru l-imħabba tagħna għal Ġeħova, isaħħulna l-fidi tagħna fil-Kelma t’Alla, u jgħinuna nkunu iktar kapaċi ngħallmu l-veritajiet tal-Bibbja lil oħrajn.—Slm. 19:7.

17. F’liema sitwazzjonijiet jaf ikun tajjeb niftakru dak li tgħallimna mill-Bibbja fil-bidu?

¹⁷ Aħna li ilna naqdu lil Ġeħova għal ħafna snin nieħdu gost meta nifhmu aħjar ċerti versi mill-Bibbja. Imma aħna xorta grati għat-tagħlim li tgħallimna fil-bidu u li għenna nersqu qrib Ġeħova. Kif tgħallimna, dawn il-veritajiet mill-Bibbja jistgħu jkomplu jgħinuna. Meta nirċievu direzzjoni mill-organizzazzjoni li nħossu li ma taqbilx ma’ dak li naħsbu, aħna b’umiltà rridu niftakru li Ġeħova, il-Ħallieq għaref u b’saħħtu, qed imexxi l-organizzazzjoni. Meta aħna jew xi ħadd li nħobbu jkun qed ibati, irridu nkunu paċenzjużi u niftakru għala Alla qed jippermetti t-tbatija. U meta niġu biex niddeċiedu kif se nużaw il-ħin u l-enerġija tagħna, irridu niftakru li qed ngħixu fl-aħħar jiem u m’għadx fadal ħafna żmien sakemm tispiċċa din is-sistema. Jalla t-tfakkiriet taʼ Ġeħova jkomplu jgħinuna nieħdu deċiżjonijiet tajbin u nibqgħu naqduh b’lealtà.