IŻ-ŻGĦAŻAGĦ JISTAQSU
Ħbiberija jew relazzjoni romantika?—L-1 parti: X’messaġġ qed nirċievi?
Dal-ġuvni vera jogħġbok, u tinsab ċerta li anke int togħġbu. Wara kollox, il-ħin kollu tibagħtu messaġġi ’l xulxin, sikwit f’get-togethers tispiċċaw titkellmu flimkien . . . , u xi ftit mill-messaġġi li jibgħatlek juru li jħobb jifflertja mhux ħażin.
Allura, tiddeċiedi li tistaqsih fejn se tasal din ir-relazzjoni, ħalli tkun ċerta jekk it-tnejn tħossukomx l-istess. It-tweġiba kienet: “Għalija inti sempliċement ħabiba—xejn iktar.”
Kif se tħossok?
“Irrabjajt ħafna—kont irrabjata għalih u miegħi nnifsi! Konna qed nibagħtu messaġġi ’l xulxin kuljum, u hu wera li jimpurtah minni. Naturalment, jien inġbidt lejh.”—Jasmine.
“Aħna t-tnejn konna nagħmluha taʼ chaperones taʼ koppja li nafu. Xi drabi, konna nkunu qisna żewġ koppji. Jien u dit-tfajla konna nitkellmu ħafna, u mbagħad bdejna nibagħtu ’l xulxin taʼ spiss. Kienet diffiċli ħafna biex inniżżilha meta qaltli li kienet tqisni bħala ħabib biss u meta sirt naf li kienet qed toħroġ maʼ xi ħadd fl-istess ħin.”—Richard.
“Żagħżugħ kien qed jibgħatli l-messaġġi kuljum, u xi drabi t-tnejn li aħna konna ‘nifflertjaw.’ Imma meta għedtlu kif inħossni dwaru, hu beda jidħaq u qalli, ‘Ma rrid noħroġ maʼ ħadd bis-serjetà għalissa!’ Bkejt fuq li bkejt.”—Tamara.
Ir-realtà hi: Meta taħseb li qiegħda f’relazzjoni romantika maʼ xi ħadd u mbagħad issir taf li inti biss qed tħossok hekk, huwa naturali li tkun irrabjata, imbarazzata u saħansitra diżappuntata. Żagħżugħ jismu Steven jgħid: “Meta dan ġara lili ħassejtni xxokkjat u mweġġaʼ ħafna. Għadda naqra żmien sakemm stajt nerġaʼ nafda lil xi ħadd ieħor.”
Għala jiġri dan
Is-social media u l-messaġġi jagħmluha faċli għalik biex tinġibed lejn xi ħadd li fir-realtà m’għandu l-ebda interess romantiku fik. Ikkunsidra x’jgħidu xi żgħażagħ.
“Xi ħadd forsi jibgħatlek messaġġi sempliċiment biex jgħaddi l-ħin, imma int tistaʼ taħseb li għandu xi interess fik. U jekk jibgħatlek kuljum, imbagħad b’mod żbaljat tibda taħseb li inti verament speċjali għalih.”—Jennifer.
“Jistaʼ jkun li jkollok interess ġenwin fi tfajla, waqt li hi tkun trid biss lil xi ħadd maʼ min titkellem, ħalli tħossha tajba dwarha nfisha.”—James.
“Sempliċi ‘good nightʼ mingħand ġuvni jistaʼ jġiegħlek taħseb li għandu grazzja miegħek, imma jistaʼ jkun li l-messaġġ bagħtu mingħajr intenzjoni taʼ xejn.”—Hailey.
“Smiley face jistaʼ jfisser jew ‘Qed inkun dħuli’ jew ‘Qed nifflertja.’ Xi kultant il-persuna li tirċievi l-messaġġ tistaʼ tassumi li dan hu flirting.”—Alicia.
Oqgħod attent: Tfixkilx l-attenzjoni mal-affezzjoni.
Hija daqshekk faċli? Le! Il-Bibbja tgħid: “Il-qalb qarrieqa iktar minn kull ħaġa oħra u hi ddisprata.” (Ġeremija 17:9) Tistaʼ ġġiegħlek tibni kastelli fl-arja li malajr jisparixxu hekk kif tirrealizza li kienu biss fl-immaġinazzjoni tiegħek.
X’tistaʼ tagħmel?
Ara l-fatti kollha. Ieqaf ftit u aħseb sew dwar ir-relazzjoni. Staqsi lilek innifsek, ‘Għandi raġunijiet validi għala qed naħseb li dan il-ġuvni qed jittrattani differenti minn oħrajn?’ Tħallix l-emozzjonijiet tiegħek jiġru bik, imma uża “l-qawwa tar-raġuni” tiegħek.—Rumani 12:1.
Kun għaqli. Avolja xi sinjali jistgħu jġegħluk taħseb li intom iktar minn ħbieb, tinjorax is-sinjali li ġieli jġegħluk tiddubita. Tistenniex li għax int qed tħossok hekk għal persuna, hi qed tħossha l-istess.
Kun paċenzjuż. Sakemm il-persuna ma tgħidlekx ċar u tond li hu jew hi tixtieq issir tafek b’mod romantiku, torbotx qalbek iżżejjed meta taf li jistaʼ jkun għal xejn.
Kun onest. Il-Bibbja tgħid li hemm “żmien li titkellem.” (Ekkleżjasti 3:7) Jekk trid tkun taf jekk intomx iktar minn ħbieb, tkellmu flimkien. “Jekk mhux it-tnejn tħossukom l-istess,” tgħid tfajla jisimha Valerie, “aħjar tweġġaʼ ftit issa milli wara xhur tinduna li l-ġuvni qatt ma kellu interess romantiku fik.”
Oqgħod attent: “Ħares lil qalbek,” jgħid Proverbji 4:23. Jekk qed tħossok miġbud lejn xi ħadd, sir af jekk hi tħosshiex l-istess lejk. Jekk tħalli l-emozzjonijiet romantiċi jqabbdu l-għeruq f’qalbek qabel ma tkun ċert, ikun bħallikieku qed tkabbar pjanta fuq il-blat.
Jekk issir taf li l-persuna l-oħra tħossha l-istess dwarek—u jekk għandek età biżżejjed u lest għal relazzjoni romantika—imbagħad f’idejk biex tiddeċiedi jekk tridx tkompli jew le. Imma ftakar, żwieġ b’saħħtu jiġi meta r-raġel u l-mara jkollhom l-istess miri spiritwali u meta t-tnejn ikunu sinċieri u onesti maʼ xulxin. (1 Korintin 7:39) Il-fatt hu li biex relazzjoni bejn żewġ persuni tirnexxi, huma jridu jibdew u jkomplu jkunu ħbieb tal-qalb.—Proverbji 5:18.