X’Inhu s-Sinjal tal-“Aħħar Jiem,” jew “Żmien it-Tmiem”?
It-tweġiba tal-Bibbja
Il-Bibbja ssemmi affarijiet li għandhom jiġru, kif għandha tkun il-ħajja, u l-attitudni tan-nies. Dawn juruna li qed ngħixu fil-“konklużjoni tas-sistema,” jew “tmiem id-dinja.” (Mattew 24:3; Il-Bibbja, Għaqda Biblika Maltija) Il-Bibbja ssejjaħ dan iż-żmien “l-aħħar jiem” jew ‘iż-żmien tat-tmiem.’—2 Timotju 3:1; Danjel 8:19.
Il-Bibbja x’qalet li se jiġri “fl-aħħar jiem”?
Il-Bibbja qalet minn qabel affarijiet li kellhom jiġru fl-istess żmien. Dawn huma “s-sinjal” tal-aħħar jiem. (Luqa 21:7) Ejja naraw xi ftit minnhom:
Gwerer mad-dinja kollha. Ġesù qal li “ġens iqum kontra ġens u saltna kontra saltna.” (Mattew 24:7) Ukoll, il-profezija f’Rivelazzjoni 6:4 tkellmet dwar żiemel li jirrappreżenta l-gwerer li kellu “jneħħi l-paċi minn fuq l-art.”
Ġuħ. Ġesù semma li se “jkun hemm nuqqas taʼ ikel.” (Mattew 24:7) Il-ktieb tar-Rivelazzjoni semma żiemel ieħor li jirrappreżenta ġuħ f’ħafna postijiet madwar id-dinja.—Rivelazzjoni 6:5, 6.
Terremoti kbar. Ġesù qal li se jkun hemm “terremoti f’post wara l-ieħor.” (Mattew 24:7; Luqa 21:11) Minħabba dawn it-terremoti kbar, ħafna nies madwar id-dinja kienu se jbatu u jitilfu ħajjithom iktar minn qatt qabel.
Mard. Ġesù qal li kien se jkun hemm “mard li jittieħed,” jew epidemiji.—Luqa 21:11.
Kriminalità. Għalkemm il-kriminalità ilha teżisti għal mijiet taʼ snin, Ġesù qal li fl-aħħar jiem, kellu “jiżdied il-ħażen.”—Mattew 24:12.
Jeqirdu l-art. Il-profezija f’Rivelazzjoni 11:18 turi li n-nies kellhom “jeqirdu l-art.” Dan kellhom jagħmluh b’ħafna modi, billi jagħmlu affarijiet ħżiena u jeqirdu l-ambjent.
L-attitudni tan-nies kellha tmur għall-agħar. Fit-2 Timotju 3:1-4, il-Bibbja qalet li l-biċċa l-kbira tan-nies kellhom ikunu ‘ingrati, ma jkunux leali, ma jkunux iridu jiftiehmu, kalunnjaturi, ma jikkontrollawx lilhom infushom, feroċi, mingħajr imħabba għat-tajjeb, tradituri, rashom iebsa, u mkabbrin.’ L-attitudni tan-nies se tkun ħażina ħafna. Mhux taʼ b’xejn li l-Bibbja tgħid li dan iż-żmien hu ‘kritiku li diffiċli ssib tarfu.’
Familji mkissrin. Fit-2 Timotju 3:2, 3, il-Bibbja qalet li ħafna nies kellhom ikunu “mingħajr imħabba naturali” mal-familji tagħhom. U t-tfal kellhom ikunu “diżubbidjenti lejn il-ġenituri.”
L-imħabba għal Alla kellha tonqos. Ġesù qal: “Tibred l-imħabba tal-biċċa l-kbira min-nies.” (Mattew 24:12) Ġesù ried ifisser li ħafna nies ma kinux se juru mħabba lejn Alla. Ukoll, it-2 Timotju 3:4 jgħid, li fl-aħħar jiem dawn in-nies kienu se “jħobbu l-pjaċiri minflok ma jħobbu lil Alla.”
Jemmnu ħaġa u jagħmlu oħra. Fit-2 Timotju 3:5, il-Bibbja qalet li n-nies kienu se jgħidu li jqimu lil Alla imma ma jgħixux kif irid hu.
Il-profeziji tal-Bibbja kellhom ikunu iktar ċari biex nifhmuhom. Il-ktieb taʼ Danjel qal li fi “żmien it-tmiem,” ħafna kienu se jitgħallmu l-veritajiet u jifhmu ċar il-profeziji tal-Bibbja.—Danjel 12:4.
It-tagħlim tal-Bibbja kellu jiżdied mad-dinja kollha. Ġesù qal li “din l-aħbar tajba tas-saltna tiġi pridkata fl-art abitata kollha.”—Mattew 24:14.
Ħafna nies ma jurux interess u jwaqqgħu għaċ-ċajt. Ġesù qal li ħafna nies kienu se jinjoraw l-evidenza li t-tmiem kien qed joqrob. (Mattew 24:37-39) Iktar minn hekk, fit-2 Pietru 3:3, 4 l-Bibbja tgħid li oħrajn kellhom iwaqqgħu kollox għaċ-ċajt u jgħidu li dawn l-affarijiet ma jfissru xejn.
Il-profeziji kollha qed iseħħu. Ġesù qal li ħa nkunu nafu li qegħdin fl-aħħar jiem meta l-profeziji kollha jkunu qegħdin jiġru fl-istess żmien.—Mattew 24:33.
Qegħdin ngħixu “fl-aħħar jiem”?
Iva. L-aħħar jiem bdew fl-1914, is-sena li bdiet l-Ewwel Gwerra Dinjija. Dan nafuh mill-affarijiet li qed jiġru fid-dinja u mill-profeziji tal-Bibbja. Ara dan il-vidjow li juri li qegħdin ngħixu fl-aħħar jiem:
Fl-1914, is-Saltna t’Alla bdiet tmexxi fis-sema. Waħda mill-affarijiet li għamlet kienet li keċċiet lil Satana u lid-demonji mis-sema. Dan ifisser li issa lid-dinja biss setgħu jeffettwaw. (Rivelazzjoni 12:7-12) L-effett ikrah taʼ Satana fuq in-nies huwa ovvju meta naraw l-attitudni u l-azzjonijiet ħżiena tagħhom. Mhux taʼ b’xejn qegħdin ngħixu fi “żminijiet kritiċi li diffiċli biex issib tarfhom.”—2 Timotju 3:1.
Ħafna nies huma inkwetati meta jaraw dawn l-affarijiet. Huma jibżgħu li n-nies m’għadhomx jafu jgħixu flimkien. Xi nies anki qed jibżgħu li se neqirdu lil xulxin.
Imma oħrajn li wkoll huma inkwetati b’dak li qed jiġri fid-dinja, għandhom tama għall-futur. Huma konvinti li s-Saltna t’Alla dalwaqt se tagħmel xi ħaġa u tneħħi dawn il-problemi li hawn fid-dinja. (Danjel 2:44; Rivelazzjoni 21:3, 4) Bil-paċenzja qed jistennew lil Alla jagħmel dak li wegħedna. Ukoll, jiġu inkuraġġiti mill-kliem taʼ Ġesù: “Min jissaporti sat-tmiem jiġi salvat.”—Mattew 24:13; Mikea 7:7.