Il-Bibbja ssemmi ħafna nisa li spikkaw minħabba li kienu jħobbu u jaqdu lil Ġeħova. Huma kienu ‘bbilanċjati’ u ‘leali f’kollox.’ (1 Tim. 3:11) Anki fil-kongregazzjoni, it-tfajliet jistgħu jsibu eżempji tajbin t’aħwa nisa li jħobbu lil Ġeħova u li jistgħu jimitawhom. Tfajliet, aħsbu f’aħwa nisa li huma taʼ eżempju tajjeb u li tistgħu timitaw. Aħseb dwar il-kwalitajiet sbieħ li għandhom u ara kif tistaʼ timitahom. Kwalità importanti ħafna biex inkunu Kristjani aħjar hi l-umiltà. Jekk mara tkun umli se jkollha ħbiberija tajba maʼ Ġeħova u m’oħrajn. Pereżempju, oħt li tħobb lil Ġeħova se tkun umli u taċċetta dak li jgħid l-​1 Korintin 11:​3, fejn jgħidilna min hu l-kap tal-kongregazzjoni u min hu l-kap tal-familja. w23.12 18-19 ¶3-5

Ġeħova jrid li r-raġel iħobb lill-mara tiegħu, jieħu ħsiebha, ikun ħabib tajjeb, u jgħinha tibqaʼ qrib t’Alla. Li taħseb bħal Ġeħova, tirrispetta lin-nisa, u tkun taʼ min jafdak huma kwalitajiet li se jgħinuk tkun raġel miżżewweġ aħjar. Wara li tiżżewweġ tistaʼ ssir missier. X’tistaʼ titgħallem minn Ġeħova biex issir missier tajjeb? (Efes. 6:4) Ġeħova ma żammx lura milli jgħid quddiem oħrajn li jħobb lil Ibnu Ġesù u li ferħan bih. (Mt. 3:17) Jekk ikollok it-tfal, kun ċert li b’mod regolari tgħidilhom li tħobbhom. Faħħarhom spiss għall-affarijiet tajbin li jagħmlu. Missirijiet li jimitaw lil Ġeħova jgħinu lit-tfal tagħhom isiru aħwa maturi. Minn issa, tistaʼ tipprepara biex issir missier tajjeb billi turi lill-familja u lill-aħwa kemm tħobbhom u billi tieħu ħsiebhom. Idra għidilhom li tħobbhom u tapprezzahom.—Ġw. 15:9. w23.12 28-29 ¶17-18

Avolja aħna qaddejja leali taʼ Ġeħova, xorta jkollna l-problemi u nimirdu, eżatt bħal nies oħrajn. Barra minn hekk, jistaʼ jkun li nies li huma kontra tagħna jagħmluhielna diffiċli u jittrattawna ħażin. Għalkemm Ġeħova jħallina ngħaddu mill-problemi, hu jwegħedna li se jgħinna. (Is. 41:10) Bl-għajnuna tiegħu, aħna nistgħu nibqgħu ferħanin, nieħdu deċiżjonijiet tajbin, u nibqgħu naqduh anke meta nkunu għaddejjin minn problemi kbar. Ġeħova jwiegħed li se jtina dak li l-Bibbja tgħid li hu “l-paċi t’Alla.” (Flp. 4:​6, 7) Din il-paċi tirreferi għall-kalma li ħa nħossu minħabba l-ħbiberija tajba li jkollna maʼ Ġeħova. Din il-paċi “tisboq kull ħsieb,” allura hi isbaħ minn kull ħaġa oħra li nistgħu nimmaġinaw. Pereżempju, ġieli tlabt lil Ġeħova mill-qalb u wara ħassejtek vera kalm? Int ħassejtek hekk għax Ġeħova tak “il-paċi t’Alla.” w24.01 20 ¶2; 21 ¶4