Ħajja Wara l-​Mewt—Il-​Bibbja x’Tgħid?

“Għax trab int, u fit-​trab terġaʼ tmur.”—ĠENESI 3:19.

1, 2. (a) Liema ideat differenti jeżistu dwar id-​Dinja l-​oħra? (b) X’irridu neżaminaw sabiex niddeterminaw dak li tgħallem il-​Bibbja dwar ir-​ruħ?

“IT-​TEORIJA taʼ tbatija għal dejjem hija inkonsistenti mat-​twemmin fl-​imħabba t’Alla għall-​ħlejjaq tiegħu. . . . Li temmen fil-​kastig etern tar-​ruħ għall-​iżbalji taʼ ftit snin, mingħajr ma din tingħata ċ-​ċans għal korrezzjoni, ifisser li tmur kontra l-​prinċipji kollha tar-​raġuni,” osserva Nikhilananda, il-​filosfu Ħindu.

² Bħal Nikhilananda, ħafna llum iħossuhom skomdi bit-​tagħlim taʼ turment etern. Fuq l-​istess kriterju, oħrajn isibuha diffiċli biex jifhmu konċetti bħalma huma li wieħed jilħaq in-​Nirvana u li wieħed ikun ħaġa waħda man-​natura. Saħansitra fost dawk li jgħidu li jibbażaw it-​twemmin tagħhom fuq il-​Bibbja, hemm ideat li jvarjaw dwar x’inhi r-​ruħ u x’jiġrilha meta mmutu. Imma l-​Bibbja x’tgħallem verament dwar ir-​ruħ? Biex insiru nafu, għandna bżonn neżaminaw it-​tifsir tal-​kliem Ebrajk u Grieg li jiġi tradott “ruħ” fil-​Bibbja.

Ir-​Ruħ Skond il-​Bibbja

3.(a) Liema kelma hija tradotta “ruħ” fl-​Iskrittura Ebrajka, u x’inhi t-​tifsira bażika tagħha? (b) Ġenesi 2:7 kif jikkonferma li l-​kelma “ruħ” tistaʼ tirreferi għal persuna kollha kemm hi?

³ Il-​kelma Ebrajka tradotta “ruħ” hija neʹphesh, u tidher 754 darba fl-​Iskrittura Ebrajka. Xi tfisser neʹphesh? Skond The Dictionary of Bible and Religion, din “normalment tirreferi għall-​esseri ħaj intier, għall-​individwu kollu kemm hu.” Dan huwa kkonfermat mid-​deskrizzjoni tar-​ruħ fil-​Bibbja, f’Ġenesi 2:7 (Għaqda Biblika, 1984): “Il-​Mulej Alla sawwar il-​bniedem mit-​trab taʼ l-​art u nefaħlu fi mnifsejh nifs il-​ħajja, u l-​bniedem sar ruħ ħajja.” Innota li l-​ewwel raġel “sar” ruħ. Fi kliem ieħor, Adam ma kellux ruħ; hu kien ruħ​—bħalma xi ħadd li jsir tabib hu tabib. Il-​kelma “ruħ” allura, hawn tiddeskrivi lill-​persuna kollha kemm hi.

4. Liema kelma hija tradotta “ruħ” fl-​Iskrittura Griega Kristjana, u x’inhi t-​tifsira bażika taʼ din il-​kelma?

⁴ Il-​kelma tradotta “ruħ” (psy·kheʹ) tidher iktar minn mitt darba fl-​Iskrittura Griega Kristjana. Bħal neʹphesh, din il-​kelma taʼ spiss tirreferi għall-​persuna kollha kemm hi. Per eżempju, ikkunsidra l-​istqarrijiet li ġejjin: “Qiegħed inħoss ruħi mħawwda.” (Ġwann 12:27) “Waqaʼ mbagħad il-​biżaʼ fuq kulħadd (“kull ruħ,” NW).” (Atti 2:43) “Kull bniedem (“ruħ,” NW) għandu jobdi lill-​awtorità taʼ fuqu.” (Rumani 13:1) “Lissnu kliem li jikkonsla lill-​erwieħ dipressi.” (1 Tessalonikin 5:​14, NW) “Ftit, jiġifieri tmienja biss (“tmien erwieħ,” NW), salvaw bis-​saħħa taʼ l-​ilma.” (1 Pietru 3:20) Biċ-​ċar, psy·kheʹ, bħal neʹphesh, tirreferi għall-​persuna kollha kemm hi. Skond l-​istudjuż Nigel Turner, din il-​kelma “tissinjifika dak li hu karatteristikament uman, l-​individwu nnifsu, il-​ġisem materjali bir-​rûaḥ [spirtu] li Alla nefaħlu ġewwa fih. . . . L-​enfasi qegħda fuq l-​individwu kollu kemm hu.”

5. L-​annimali huma erwieħ? Spjega.

⁵ Huwa taʼ interess li fil-​Bibbja l-​kelma “ruħ” tapplika mhux biss għall-​bnedmin imma anki għall-​annimali. Per eżempju, waqt li jiddeskrivi l-​ħolqien tal-​ħlejjaq tal-​baħar, Ġenesi 1:20 jgħid li Alla kkmanda: “Jiżgħed l-​ilma b’kotra taʼ ħlejjaq (“erwieħ,” NW) ħajjin.” U fil-​jum kreattiv taʼ wara, Alla qal: “Ħa tnissel l-​art ħlejjaq ħajja (“erwieħ ħajjin,” NW) skond ġenshom: bhejjem tad-​dar, annimali li jitkaxkru, u bhejjem selvaġġi skond ġenshom.”—Ġenesi 1:24; qabbel Numri 31:28, NW.

6. X’jistaʼ jingħad dwar il-​mod kif il-​Bibbja tuża l-​kelma “ruħ”?

⁶ Għalhekk, il-​kelma “ruħ” kif użata fil-​Bibbja tirreferi għal persuna jew annimal jew għall-​ħajja li jgawdu persuna jew annimal. (Ara l-​kaxxa t’hawn fuq.) Il-​mod kif il-​Bibbja tiddefinixxi r-​ruħ huwa sempliċi, konsistenti, u mhux imxekkel mill-​filosofiji u s-​superstizzjonijiet ikkomplikati tal-​bnedmin. Ladarba dan huwa l-​każ, il-​mistoqsija urġenti li trid issir hi, Skond il-​Bibbja, x’jiġrilha r-​ruħ mal-​mewt?

Il-​Mejtin M’huma Konxji taʼ Xejn

7, 8. (a) L-​Iskrittura x’tirrivela dwar il-​kundizzjoni tal-​mejtin? (b) Agħti eżempji mill-​Bibbja li juru li r-​ruħ tistaʼ tmut.

⁷ Il-​kundizzjoni tal-​mejtin tintgħamel ċara f’Koħèlet 9:5, 10, fejn naqraw: “[I]l-mejtin ma jafu xejn . . . Ma jkunx hemm ħidma jew ħsieb, xjenza jew għerf, f’Art l-​Imwiet fejn inti sejjer.” Il-​mewt, għalhekk, hija stat taʼ ineżistenza. Is-​salmista kiteb li meta bniedem imut, “lejn l-​art jerġaʼ jmur; jintemmu dakinhar ħsibijietu.” (Salm 146:4) Il-​mejtin m’huma konxji taʼ xejn; huma inattivi.

⁸ Meta ppronunzja s-​sentenza fuq Adam, Alla stqarr: “Għax trab int, u fit-​trab terġaʼ tmur.” (Ġenesi 3:19) Qabel ma Alla fformah mit-​trab taʼ l-​art u tah il-​ħajja, Adam ma kienx jeżisti. Meta miet, hu rritorna għal dak l-​istat. Il-​kastig tiegħu kien il-​mewt​—mhux trasferiment għal ġo xi qasam ieħor. Allura, xi ġralha ruħu? Ladarba fil-​Bibbja l-​kelma “ruħ” taʼ spiss sempliċement tirreferi għal xi persuna, meta ngħidu li Adam miet, inkunu qegħdin ngħidu li r-​ruħ bl-​isem taʼ Adam mietet. Dan għandu mnejn jinstemaʼ stramb għal xi ħadd li jemmen fl-​immortalità tar-​ruħ. Madankollu, il-​Bibbja tistqarr: “Ir-​ruħ li tidneb, tmut.” (Eżekjel 18:4, KŻ) Levitiku 21:1 jitkellem dwar “mejjet” (“ruħ mejta,” NW). U lin-​Nażrin intqalilhom biex ma jersqu qrib taʼ “ebda mejjet” (“ebda ruħ mejta,” NW).—Numri 6:6.

9. Xi trid tfisser il-​Bibbja meta tgħid li ruħ Rakel kienet “ħierġa”?

⁹ Iżda xi ngħidu dwar l-​istqarrija f’Ġenesi 35:18 rigward il-​mewta traġika taʼ Rakel, li seħħet waqt li welldet lit-​tieni iben tagħha? Hemmhekk naqraw: “Hi u ħierġa ruħha – għax kienet qiegħda tmut – sejjħet ismu Benoni, iżda missieru semmieh Benjamin.” Timplika din is-​silta li Rakel kellha xi esseri ġewwieni li telaqha meta mietet? Xejn affattu. Ftakar, il-​kelma “ruħ” tistaʼ wkoll tirreferi għall-​ħajja li persuna tippossiedi. Mela f’dan il-​każ “ruħ” Rakel kienet sempliċement tfisser ‘ħajjitha.’ Huwa għalhekk li Bibbji oħrajn jittraduċu l-​frażi “ħierġa ruħha” bħala “ħajjitha kienet qegħda tmajna” (Knox), “ħadet l-​aħħar nifs tagħha” (Jerusalem Bible), u “ħajjitha ħallietha” (Bible in Basic English). M’hemm ebda indikazzjoni li xi parti misterjuża minn Rakel baqgħet ħajja wara mewtha.

10. Ruħ l-​iben irxoxtat taʼ l-​armla b’liema mod “reġgħet lura fih”?

¹⁰ Huwa simili dwar l-​irxoxt taʼ bin waħda armla, iddokumentat fl-​1 Slaten kapitlu 17. Fil-​vers 22, naqraw li waqt li Elija kien qed jitlob fuq it-​tfajjel, “[i]l-Mulej samaʼ leħen Elija, u ruħ it-​tifel reġgħet lura fih, u ħa l-​ħajja.” Għal darb’oħra, il-​kelma “ruħ” tfisser “ħajja.” B’hekk, in-​New American Standard Bible tinqara: “Il-​ħajja tat-​tifel reġgħet ġiet għandu u stejqer.” Iva, kienet il-​ħajja, mhux xi ħaġa bħal ombra, li reġgħet ġiet għand it-​tifel. Dan huwa f’armonija maʼ dak li Elija qal lil omm it-​tifel: “Ara, ibnek [il-persuna kollha kemm hi] ħaj.”—1 Slaten 17:23.

Xi Ngħidu dwar l-​Ispirtu?

11. Il-​kelma “spirtu” għala ma tistax tirreferi għal xi parti bla ġisem minn persuna li tibqaʼ ħajja wara l-​mewt?

¹¹ Il-​Bibbja tgħid li meta bniedem imut, “l-​ispirtu tiegħu joħroġ, hu jerġaʼ lura lejn l-​art tiegħu.” (Salm 146:4, NW) Ifisser dan li spirtu bla ġisem litteralment jitlaq u jibqaʼ jgħix wara l-​mewt tal-​persuna? Dak ma jistax ikun, għax is-​salmista jissokta jgħid: “F’dak il-​jum ħsibijietu tassew jgħibu” (“ħsibijietu jintemmu,” KŻ). X’inhu, mela, l-​ispirtu, u dan kif “joħroġ” minn ġo persuna mal-​mewt?

12. X’inhu implikat mill-​kelmiet bl-​Ebrajk u bil-​Grieg tradotti “spirtu” fil-​Bibbja?

¹² Fil-​Bibbja l-​kelmiet tradotti “spirtu” (Ebrajk, ruʹach; Grieg, pneuʹma) bażikament ifissru “nifs.” B’hekk, minflok “l-​ispirtu tiegħu joħroġ,” it-​traduzzjoni taʼ R. A. Knox tuża l-​frażi, “in-​nifs jitlaq minn ġismu.” (Salm 145:4) Imma l-​kelma “spirtu” timplika ferm iżjed milli wieħed jieħu n-​nifs. Per eżempju, meta jiddeskrivi l-​qerda tal-​ħajja tal-​bnedmin u taʼ l-​annimali fi żmien l-​Għarqa globali, Ġenesi 7:22 (NW) jgħid: “Kull ħaġa li ġo fiha n-​nifs tal-​forza [jew spirtu; Ebrajk, ruʹach] tal-​ħajja kien attiv f’imnifsejha, jiġifieri, dawk kollha li kienu fuq l-​art niexfa, mietet.” Mela, “spirtu” jistaʼ jirreferi għall-​forza tal-​ħajja li hija attiva fil-​ħlejjaq ħajjin kollha, kemm bnedmin u kemm annimali, u li hija sostnuta bin-​nifs.

13. L-​ispirtu kif jirritorna lejn Alla mal-​mewt taʼ persuna?

¹³ X’ifisser, allura, meta Koħèlet 12:7 jgħid li meta persuna tmut, “[i]n-nifs tal-​ħajja [“l-​ispirtu,” NW] jitlaq lejn Alla, minn fejn ġie”? Ifisser dan li l-​ispirtu jivvjaġġa litteralment minn ġo l-​ispazju għal quddiem il-​preżenza t’Alla? Xejn minn dan m’hu implikat. Ladarba l-​ispirtu huwa l-​forza tal-​ħajja, dan “jitlaq lejn Alla” fis-​sens li kwalunkwe tama taʼ ħajja futura għal dik il-​persuna issa tiddependi totalment minn Alla. Alla biss jistaʼ jirrestawra l-​ispirtu, jew forza tal-​ħajja, billi jġiegħel lil persuna terġaʼ tieħu l-​ħajja. (Salm 104:30) Imma huwa l-​iskop t’Alla li jagħmel dan?

“Jerġaʼ Jqum”

14. X’qal u x’għamel Ġesù biex iġib serħan u faraġ lil ħut Lazzru wara t-​telfa taʼ ħuhom?

¹⁴ Fil-​belt żgħira taʼ Betanja, madwar tliet kilometri lejn il-​lvant taʼ Ġerusalemm, Marija u Marta kienu mnikktin minħabba ħuhom Lazzru, li miet f’qasir il-​għomor. Ġesù tnikket bħalhom, għax kellu affezzjoni lejn Lazzru u ħutu. Kif setaʼ Ġesù jikkonslahom lil dawn in-​nisa? Mhux billi jgħidilhom xi storja kkumplikata, imma billi jgħidilhom il-​verità. Ġesù sempliċement qal: “Ħuk jerġaʼ jqum!” Imbagħad, Ġesù mar ħdejn il-​qabar, u qajjem lil Lazzru​—billi ta lura l-​ħajja lil raġel li kien ilu mejjet erbat ijiem!—Ġwann 11:18-23, 38-44.

15. X’kienet ir-​reazzjoni taʼ Marta għal dak li Ġesù qal u għamel?

¹⁵ Kienet Marta sorpriża bl-​istqarrija taʼ Ġesù li Lazzru kien se “jqum”? Milli jidher le, għax hi wieġbet: “Jiena naf li jerġaʼ jqum, fil-​qawmien mill-​imwiet fl-​aħħar jum.” Diġà kellha fidi fil-​wegħda taʼ l-​irxoxt. Imbagħad Ġesù qalilha: “Jien hu l-​qawmien u l-​ħajja. Kull min jemmen fija, ukoll jekk imut, jgħix.” (Ġwann 11:23-25) Il-​miraklu tar-​restawr taʼ Lazzru għall-​ħajja serva biex saħħaħ mill-​ġdid il-​fidi tagħha u biex nissel fidi f’oħrajn. (Ġwann 11:45) Iżda x’ifisser eżattament it-​terminu “rxoxt”?

16. Xi tfisser il-​kelma “rxoxt”?

¹⁶ Il-​kelma “rxoxt” hija tradotta mill-​kelma Griega a·naʹsta·sis, li litteralment tfisser “li wieħed jerġaʼ jqum bil-​wieqfa.” Tradutturi Ebrej tal-​Grieg ittraduċew il-​kelma a·naʹsta·sis b’espressjoni li tfisser “ħajja mill-​ġdid tal-​mejtin.” (Ebrajk, techi·yathʹ ham·me·thimʹ).a B’hekk, l-​irxoxt jinvolvi li l-​persuna tittellaʼ mill-​kundizzjoni bla ħajja tal-​mewt​—billi jiġi rrestawrat u attivat mill-​ġdid il-​mod taʼ ħajja taʼ l-​individwu.

17. (a) L-​irxoxt taʼ individwi għala ma joħloq l-​ebda problema għal Alla Jehovah u għal Ġesù Kristu? (b) Ġesù liema wegħda għamel rigward dawk fl-​oqbra tal-​mafkar?

¹⁷ Billi għandu għerf infinit u memorja perfetta, Alla Jehovah jistaʼ faċilment jirxoxta persuna. Li jiftakar il-​mod taʼ ħajja taʼ wħud mejtin​—il-​karatteristiċi tal-​personalità tagħhom, l-​istorja persunali tagħhom, u d-​dettalji kollha taʼ l-​identità tagħhom—​m’hijiex problema għalih. (Ġob 12:13; qabbel Isaija 40:26.) Iktar minn hekk, bħalma tindika l-​esperjenza taʼ Lazzru, Ġesù Kristu hu kemm dispost, kif ukoll kapaċi jirxoxta lill-​mejtin. (Qabbel Luqa 7:11-17; 8:40-56.) Fil-​fatt, Ġesù Kristu qal: “Tiġi siegħa meta dawk kollha li jkunu fl-​oqbra [“tal-​mafkar,” “NW”] jisimgħu leħnu [taʼ Ġesù] u joħorġu.” (Ġwann 5:28, 29) Iva, Ġesù Kristu wiegħed li dawk kollha fil-​memorja taʼ Jehovah se jiġu rxoxtati. Jidher ċar li skond il-​Bibbja, ir-​ruħ tmut, u r-​rimedju għall-​mewt hu l-​irxoxt. Imma biljuni taʼ nies għexu u mietu. Min hemm fosthom fil-​memorja t’Alla, jistenna l-​irxoxt?

18. Min se jiġi rxoxtat?

¹⁸ Dawk li segwew korsa taʼ tjieba bħala qaddejja taʼ Jehovah se jiġu rxoxtati. Madankollu, miljuni taʼ nies oħrajn mietu mingħajr ma wrew jekk kinux se jgħixu fi qbil mal-​livelli taʼ tjieba t’Alla. Dawn jew kienu fl-​injoranza rigward il-​ħtiġijiet taʼ Jehovah jew ma kellhomx biżżejjed żmien biex jagħmlu l-​bidliet meħtiġin. Dawn l-​uħud ukoll jinsabu fil-​memorja t’Alla, u b’hekk se jiġu rxoxtati, għax il-​Bibbja twiegħed: “Kemm it-​tajbin u kemm il-​ħżiena [“dawk li m’humiex twajbin,” NW] għad iqumu minn bejn l-​imwiet.”—Atti 24:15.

19. (a) L-​appostlu Ġwanni liema viżjoni rċieva dwar l-​irxoxt? (b) Liema ħaġa ‘ġiet mixħuta fl-​għadira tan-​nar,’ u xi tfisser din l-​espressjoni?

¹⁹ L-​appostlu Ġwanni kellu viżjoni eċċitanti taʼ wħud irxoxtati weqfin quddiem it-​tron t’Alla. Waqt li ddeskrivieha, hu kiteb: “Il-​baħar radd lura l-​mejtin li kien hemm ġo fih, u hekk ukoll il-​Mewt u l-​qiegħ taʼ l-​art [“Ħades,” NW] raddew lura l-​mejtin li kien hemm ġo fihom, u kull wieħed minnhom sar ħaqq minnu fuq l-​għemejjel tiegħu. Mbagħad il-​Mewt u Post il-​Mejtin [“Ħades,” NW] ġew mixħuta fil-​belliegħa tan-​nar – din l-​għadira tan-​nar hija t-​tieni mewt.” (Apokalissi 20:12-14) Aħseb ftit x’ifisser dan! Il-​mejtin kollha li jinsabu fil-​memorja t’Alla se jinħelsu minn Ħades, jew Xeol, il-​qabar komuni taʼ l-​umanità. (Salm 16:10; Atti 2:31) Imbagħad “il-​mewt u Ħades” se jinxteħtu f’dik li tissejjaħ “l-​għadira tan-​nar,” li tissimbolizza qerda kompleta. Il-​qabar komuni taʼ l-​umanità ma jibqax jeżisti.

Prospett Uniku!

20. Miljuni li bħalissa jinsabu mejtin, għal liema xorta taʼ ambjent se jiġu rxoxtati?

²⁰ Meta miljuni jiġu mqajmin fl-​irxoxt, dawn ma jinġibux lura għall-​ħajja fuq l-​art diżabitata. (Isaija 45:18) Huma se jistenbħu f’ambjent imsebbaħ u se jsibu li ġie ppreparat għalihom fejn joqogħdu, x’jilbsu, u abbundanza taʼ ikel. (Salm 67:7 [Salm 67:6, NW]; 72:16; Isaija 65:21, 22) Min se jagħmel dawn il-​preparazzjonijiet kollha? Ovvjament, se jkun hemm min ikun qed jgħix fid-​dinja l-​ġdida qabel ma jibda l-​irxoxt għal fuq l-​art. Imma min?

21, 22. Liema prospett uniku jistenna lil dawk li qed jgħixu “fl-​aħħar jiem”?

²¹ It-​twettiq tal-​profeziji tal-​Bibbja juri li qegħdin ngħixu “fl-​aħħar jiem” taʼ din is-​sistema t’affarijiet.b (2 Timotju 3:1, NW) Dalwaqt issa, Alla Jehovah se jindaħal fit-​tmexxija umana u jeqred għalkollox il-​ħażen mill-​art. (Salm 37:10, 11; Proverbji 2:21, 22) F’dak iż-​żmien, x’se jiġrilhom dawk li jkunu qegħdin jaqdu lil Alla fedelment?

²² Jehovah m’huwiex se jeqred lit-​twajbin flimkien maʼ dawk mill-​agħar. (Salm 145:20) Hu qatt ma għamel ħaġa bħal din, u m’huwiex se jagħmel dan meta jnaddaf l-​art mill-​ħażen kollu. (Qabbel Ġenesi 18:22, 23, 26.) Fil-​fatt, l-​aħħar ktieb tal-​Bibbja jitkellem dwar “kotra kbira li ħadd ma jistaʼ jgħoddha, minn kull ġens u tribù, minn kull poplu u lsien,” ħierġa mit-​“taħbit il-​kbir [“tribulazzjoni l-​kbira,” NW].” (Apokalissi 7:9-14) Iva, kotra kbira se tibqaʼ ħajja wara t-​tribulazzjoni l-​kbira li permezz tagħha tintemm id-​dinja preżenti mill-​agħar, u dawn se jidħlu fid-​dinja l-​ġdida t’Alla. Hemmhekk, l-​umanità ubbidjenti tistaʼ tibbenefika bis-​sħiħ mill-​provvediment meraviljuż t’Alla biex jeħles lill-​umanità mid-​dnub u l-​mewt. (Apokalissi 22:1, 2) B’hekk, il-​“kotra kbira” qatt ma se jkollha għalfejn tesperjenza l-​mewt. Xi prospett uniku!

Ħajja Mingħajr Mewt

23, 24. X’għandek tagħmel jekk trid tgawdi ħajja mingħajr mewt fil-​Ġenna fuq l-​art?

²³ Nistgħu aħna jkollna fiduċja f’din it-​tama taʼ l-​għaġeb? Assolutament! Ġesù Kristu nnifsu indika li kellu jkun hemm żmien meta n-​nies kienu se jgħixu mingħajr qatt ma jmutu. Ftit qabel ma rxoxta lil ħabibu Lazzru, Ġesù qal lil Marta: “Kull min jgħix u jemmen fija, dan ma jmut qatt.”—Ġwann 11:26.

²⁴ Trid int tgħix għal dejjem fil-​Ġenna fuq l-​art? Għandek xewqa kbira li tara lill-​maħbubin tiegħek mill-​ġdid? “[I]d-dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem,” jgħid l-​appostlu Ġwanni. (1 Ġwann 2:17) Issa hu ż-​żmien li titgħallem x’inhi r-​rieda t’Alla u tkun determinat li tgħix fi qbil magħha. Imbagħad int, flimkien maʼ miljuni t’oħrajn li diġà qed jagħmlu r-​rieda t’Alla, tistaʼ tgħix għal dejjem fil-​Ġenna fuq l-​art.

[Noti taʼ taħt]

Tiftakar Int?

◻ X’inhi t-​tifsira bażika tal-​kelmiet bil-​lingwi oriġinali li jiġu tradotti “ruħ”?

◻ X’jiġrilha r-​ruħ mal-​mewt?

◻ Skond il-​Bibbja, x’inhu r-​rimedju għall-​mewt?

◻ Liema prospett uniku jistenna lil uħud leali llum?

[Kaxxa f’paġna 15]

“Ruħ” Bħala l-​Ħajja taʼ Ħlejqa

Xi drabi, il-​kelma “ruħ” tirreferi għall-​ħajja li jgawdu persuna jew annimal. Dan ma jbiddilx id-​definizzjoni tal-​Bibbja dwar ir-​ruħ bħala persuna jew annimal. Biex nagħtu eżempju: Aħna ngħidu dwar xi ħadd li hu ħaj, li jfisser li hu persuna ħajja. Nistgħu ngħidu wkoll li hu jippossiedi l-​ħajja. Bl-​istess mod, persuna ħajja hija ruħ. Madankollu, dment li wieħed hu ħaj, jistaʼ jingħad li r-​“ruħ” hija xi ħaġa li hu jippossiedi.

Per eżempju, Alla qal lil Mosè: “In-​nies li kienu jfittxulek ħajtek (“ruħek,” NW) mietu lkoll.” Jidher ċar li l-​għedewwa taʼ Mosè kienu qed ifittxu li jneħħulu ħajtu. (Eżodu 4:19; qabbel Ġożwè 9:24; Proverbji 12:10.) Ġesù uża l-​kelma b’mod simili meta qal: “Bin il-​bniedem, ma ġiex biex ikun moqdi, imma biex jaqdi u biex jagħti ħajtu (“ruħu,” NW) b’fidwa għall-​kotra.” (Mattew 20:28; qabbel 10:28.) F’kull każ, il-​kelma “ruħ” tfisser “il-​ħajja taʼ xi ħlejqa.”

[Stampi f’paġna 15]

Dawn kollha huma erwieħ

[Sors]

Hummingbird: U.S. Fish and Wildlife Service, Washington, D.C./Dean Biggins

[Stampa f’paġna 17]

Ġesù wera li r-​rimedju għall-​mewt huwa l-​irxoxt

[Stampa f’paġna 18]

“Kull min jgħix u jemmen fija, dan ma jmut qatt.”—Ġwann 11:26