Ibqaʼ Qrib taʼ Jehovah

“Ipperseveraw fit-​talb.”−RUMANI 12:12.

1. X’inhi r-​rieda taʼ Jehovah rigward it-​talb, u l-​appostlu Pawlu liema inkuraġġiment ta dwar it-​talb?

JEHOVAH huwa “dak Alla li jagħti t-​tama” lin-​nies leali kollha tiegħu. Bħala “Semmiegħ it-​talb,” hu jismaʼ t-​talbiet tagħhom għall-​għajnuna biex jaslu għat-​tama ferrieħa li hu jqiegħed quddiemhom. (Rumani 15:13; Salm 65:2) U permezz tal-​Kelma tiehħu, il-​Bibbja, hu jinkuraġġixxi lill-​qaddejja kollha tiegħu biex jiġu għandu kull x’ħin iridu. Hu dejjem hemm, billi jixtieq li jirċievi t-​tħassib l-​iktar ġewwieni tagħhom. Fil-​fatt, hu jinkuraġġihom biex “jipperseveraw fit-​talb” u biex ‘jitolbu bla ma jaqtgħu.’a (Rumani 12:12; 1 Tessalonkin 5:17) Hija r-​rieda taʼ Jehovah li l-​Kristjani kollha l-​ħin kollu jsejħulu bit-​talb, billi jferrgħu lil qlubhom lilu u jagħmlu dan f’isem l-​Iben maħbub tiegħu, Ġesù Kristu.—Ġwann 14:6, 13, 14.

2, 3. (a) Pawlu għala ħeġġiġna biex ‘nipperseveraw fit-​talb’? (b) Liema assigurazzjoni għandna li Alla jridna nitolbu?

² Alla għala jagħtina dan it-​tħeġġiġ? Għaliex il-​pressjonijiet u r-​responsabbiltajiet tal-​ħajja jistgħu jtaqqluna tant li nistgħu ninsew nitolbu. Jew il-​problemi jistgħu jegħlbuna u jġagħluna nieqfu milli nifirħu bit-​tama u ma nitolbux. Minħabba f’dawn l-​affarijiet, għandna bżonn tfakkiriet li jinkuraġġuna biex nitolbu u biex nersqu qrib ferm lejn is-​sors taʼ għajnuna u faraġ, Jehovah Alla tagħna.

³ Id-​dixxiplu Ġakbu kiteb: “Ersqu qrib lejn Alla, u hu se jersaq qrib lejkom.” (Ġakbu 4:8) Iva, Alla la hu fil-​għoli wisq u lanqas ’il bogħod minna wisq biex jismaʼ l-​espressjonijiet tagħna li nagħmlulu, minkejja l-​kundizzjoni umana imperfetta tagħna. (Atti 17:27) Iktar minn hekk, hu mħux indifferenti jew ma jimportahx. Igħid is-​salmista: “Għajnejn Jehovah huma lejn it-​twajbin, u widnejh huma lejn il-​għajta tagħhom għall-​għajnuna.”−Salm 34:15; 1 Pietru 3:12.

4. Li Jehovah hu attent għat-​talb kif jistaʼ jiġi muri b’tixbieha?

⁴ Iva, Jehovah jistieden it-​talb. Nistgħu nqabblu dan maʼ laqgħa soċjali fejn għadd taʼ nies qegħdin flimkien jitkellmu. Int qiegħed hemm, tismaʼ lill-​oħrajn jitkellmu. L-​irwol tiegħek huwa dak taʼ osservatur. Imma mbagħad xi ħadd idur lejk, isemmi ismek, u jidderieġi l-​kliem tiegħu lejk. Dan jiġbed l-​attenzjoni tiegħek b’mod speċjali. Bl-​istess mod, Alla huwa dejjem attent għan-​nies tiegħu, huma fejn huma. (2 Kronaki 16:9; Proverbji 15:3) Mela hu jismaʼ l-​kliem tagħna, billi josserva b’mod protettiv u b’interess, bħal li kieku. Meta nsejħu isem Alla fit-​talb, madankollu, l-​attenzjoni tiegħu tiġi miġbuda, u hu issa ffokat fuqna b’mod espliċitu. Bil-​qawwiet tiegħu, Jehovah jistaʼ saħansitra jagħraf u jifhem il-​petizzjoni mhix imlissna tal-​bniedem offruta ġewwa l-​partijiet moħbijin taʼ qalbu u moħħu. Alla jassigurana li se jersaq qrib lejn dawk kollha li qegħdin isejħu lil ismu bis-​sinċerità u qegħdin ifittxu biex jibqgħu qrib tiegħu.—Salm 145:18.

Rispons Skond il-​Għan t’Alla

5. (a) Il-​parir “ipperseveraw fit-​talb” x’jindika rigward it-​talb tagħna? (b) Alla kif iwieġeb it-​talb?

⁵ Il-​parir biex nipperseveraw fit-​talb jindika li Jehovah kultant jistaʼ jħallina nibqgħu nitolbu dwar kwistjoni għal xi żmien qabel ma t-​tweġiba tiegħu ssir apparenti. Jistaʼ saħansitra jkollna t-​tendenza li ngħejjew nitolbu lil Alla għal xi favur jew għal qalb tajba bl-​imħabba li tistaʼ tidher li hi meħtieġa ferm imma li se ddum ma tiġi. B’hekk, Alla Jehovah jitlobna bil-​ħrara biex ma nċedux għal raġunar bħal dan imma biex nibqgħu nitolbu. Għandna nkomplu nitolbuh bil-​ħniena dwar it-​tħassib tagħna, fiduċjużi li hu jirrispetta t-​talba tagħna u se jissodisfa l-​ħtieġa reali tagħna, mhux sempliċement dak li stajna rraġunajna. Alla Jehovah bla dubju jibbilanċja l-​petizzjonijiet tagħna skond il-​għan tiegħu. Per eżempju, oħrajn jistgħu jiġu effettwati bit-​talba tagħna. Nistgħu nxebbhu l-​kwistjoni maʼ dik taʼ missier li ibnu jitolbu rota. Il-​missier jaf li jekk jixtri rota lil dak l-​iben, ibnu l-​ieħor ikun irid waħda wkoll. Ladarba iben wieħed jistaʼ jkun żgħir wisq biex jirkeb rota, il-​missier jistaʼ jiddeċiedi biex ma jixtri xejn f’dak iż-​żmien partikulari. Bl-​istess manjiera, fid-​dawl tal-​għan tieġħu u taʼ kif jikkalkula l-​ħin taʼ kollox, Missierna tas-​sema jiddeċiedi x’inhu verament l-​aħjar għalina u għal oħrajn.—Salm 84:8, 11; qabbel Ħabakkuk 2:3.

6. Ġesù ta liema tixbieha rigward it-​talb, u l-​perseveranza fit-​talb x’turi?

⁶ Taʼ min jinnotaha hija t-​tixbieha li Ġesù ta dwar il-​bżonn għad-​dixxipli tiegħu “dejjem biex jitolbu u biex ma jċedux.” Armla, li ma setgħetx tikseb ġustizzja, ipperseverat fit-​talba tagħha lil imħallef uman sakemm sa fl-​aħħar irċeviet ġustizzja. Ġesù żied: “Ċertament, allura, sejjer Alla ma jġigħelx li ssir ġustizzja mal-​magħżulin tiegħu?” (Luqa 18:1-7) Il-​perseveranza fit-​talb turi l-​fidi tagħna, kemm niddependu minn Jehovah, kemm aħna lesti li nibqgħu qrib tiegħu u nagħmlu l-​petizzjoni tagħna, billi nħallu r-​riżultat f’idejh.—Ebrej 11:6.

Eżempji taʼ li Wieħed Jibqaʼ Qrib taʼ Jehovah

7. Kif nistgħu aħna nimitaw il-​fidi taʼ Abel f’li nibqgħu qrib taʼ Jehovah?

⁷ Il-​Bibbja miżgħuda b’rakkonti taʼ talb imlissen mill-​qaddejja t’Alla. Dawn “inkitbu għat-​tagħlim tagħna, biex permezz tas-​sabar tagħna u permezz tal-​faraġ mill-​Iskrittura nistgħu jkollna t-​tama.” (Rumani 15:4) It-​tama tagħna tiġi msaħħa billi nikkunsidraw xi eżempji taʼ dawk li baqgħu qrib taʼ Jehovah. Abel offra sagrifiċċju aċċettabbli lil Alla, u għalkemm ebda talba ma hi rrapportata, hu bla dubju appella bit-​talb lil Jehovah biex l-​offerta tiegħu tistaʼ tkun aċċettata. Ebrej 11:4 igħid: “Bil-​fidi Abel offra ’l Alla sagrifiċċju li jiswa iktar minn taʼ Kajjin, permezz taʼ liema fidi kellu xiehda mogħtija lilu li hu kien twajjeb.” Abel kien jaf bil-​wegħda t’Alla f’​Ġenesi 3:15, imma mqabbel maʼ dak li aħna nafu issa, hu kien jaf ftit ferm. Madankollu, Abel aġixxa fuq il-​għarfien li kellu. Hekk ukoll illum, xi wħud minn dawk li huma ġodda f’dak li hu interess fil-​verità t’Alla għad m’għandhomx ħafna għarfien. Imma jitolbu u jieħdu li jistgħu mill-​għarfien li għandhom, kif għamel Abel. Iva, huma jaġixxu bil-​fidi.

8. Għala nistgħu nkunu ċerti li Abraham baqaʼ qrib taʼ Jehovah, u liema mistoqsija għandna nistaqsu lilna nfusna?

⁸ Qaddej leali ieħor t’Alla kien Abraham, “il-​missier taʼ dawk kollha li għandhom il-​fidi.” (Rumani 4:11) Illum, iktar minn qatt qabel, aħna għandna bżonn fidi qawwija, u għandna bżonn li nitolbu bil-​fidi, bħalma għamel Abraham. Ġenesi 12:8 igħid li hu bena artal “lil Jehovah u beda jsejjaħ isem Jehovah.” Abraham kien jafu l-​isem t’Alla u wżah fit-​talb. Darba wara l-​oħra hu b’mod sinċier ippersevera fit-​talb, billi sejjaħ “l-​isem taʼ Jehovah dak Alla li jdum b’mod indefinit.” (Ġenesi 13:4; 21:33) Abraham kien qiegħed isejjaħ lil Alla bil-​fidi li għaliha sar famuż. (Ebrej 11:17-19) It-​talb għen lil Abraham biex jibqaʼ jifraħ ħafna bit-​tama tas-​Saltna. Qegħdin aħna nsegwu l-​eżempju taʼ Abraham taʼ perseveranza fit-​talb?

9. (a) It-​talb taʼ David għala hu taʼ benefiċċju kbir għan-​nies t’Alla llum? (b) X’jistaʼ jirriżulta milli aħna nitolbu bħalma għamel David biex nibqgħu qrib taʼ Jehovah?

⁹ David kien jispikka f’dik li hi perseveranza fit-​talb, u s-​salmi tiegħu juru x’għandu jkun fih it-​talb. Per eżempju, il-​qaddejja t’Alla jistgħu jitolbu b’mod xieraq għal affarijiet bħalma huma s-​salvazzjoni jew il-​ħelsien (Sa 3:7, 8; 60:5), il-​gwida (Sa 25:4, 5), il-​protezzjoni (Sa 17:8), il-​maħfra tad-​dnubiet (Sa 25:7, 11, 18), u l-​qalb pura (Sa 51:10). Meta David ħassu milqut, hu talab: “Ġiegħel lill-​qalb tal-​qaddej tiegħek tifraħ.” (Sa 86:4) Aħna nistgħu nitolbu bl-​istess mod għal ferħ tal-​qalb, billi nafu li Jehovah jixtieq li nifirħu bit-​tama tagħna. David baqaʼ qrib taʼ Jehovah u talab: “Ruħi segwietek mill-​qrib; fuqi idek il-​leminija żżomm qabda soda.” (Sa 63:8) Sejrin aħna nibqgħu qrib taʼ Jehovah, kif għamel David? Jekk iva, hu se jappoġġjana wkoll.

10. Is-​salmista Asaf liema ħsibijiet żballjati kellu darba minnhom, imma x’sar jirrealizza?

¹⁰ Jekk irridu nibqgħu qrib taʼ Jehovah, għandna bżonn li ma ngħirux għal dawk li huma mill-​agħar minħabba l-​ħajjiet komdi u materjalistiċi tagħhom. Is-​salmista Asaf darba minnhom ħass li ma kien taʼ ebda valur li wieħed jaqdi lil Jehovah, għax dawk li huma mill-​agħar “huma komdi b’mod indefinit.” Imma hu nduna li r-​raġunar tiegħu kien żballjat u li dawk li huma mill-​agħar qegħdin “fuq art tiżloq.” Hu rrealizza li ma kien hemm xejn aħjar milli wieħed jibqaʼ qrib taʼ Jehovah, u hu esprima ruħu lil Alla b’dan il-​mod: “Jien il-​ħin kollu miegħek; int qbadt lil idi l-​leminija. Għax, ħares! dawk stess li qegħdin iżommu ’l bogħod minnek se jgħibu.... Imma nkwantu għalija, li nersaq qrib lejn Alla huwa tajjeb għalija. Fil-​Mulej Sovran Jehovah jien qigħedt il-​kenn tiegħi, biex niddikjara x-​xogħlijiet kollha tiegħek.” (Salm 73:12, 13, 18, 23, 27, 28) Minflok ma ngħiru għall-​ħajjiet tan-​nies mill-​agħar li ma jimportahom minn xejn, in-​nies taʼ mingħajr tama, ejjew nimitaw lil Asaf f’li nibqgħu qrib taʼ Jehovah.

11. Danjel għala hu eżempju mill-​aħjar taʼ li wieħed jibqaʼ qrib taʼ Jehovah, u kif nistgħu nimitawh?

¹¹ Danjel ippersevera b’mod riżolut fit-​talb, saħansitra f’wiċċ il-​periklu taʼ li jitqiegħed fil-​ħofra tal-​iljuni minħabba li m’obdiex restrizzjonijiet uffiċċjali fuq it-​talb. Imma Jehovah “bagħat lill-​anġlu tiegħu u għalaq ħalq l-​iljuni,” u b’hekk ħeles lil Danjel. (Danjel 6:7-10, 22, 27) Danjel kien imbierek bil-​kbir bil-​perseveranza tiegħu fit-​talb. Nipperseveraw aħna wkoll fit-​talb, speċjalment meta niffaċċjaw oppożizzjoni għall-​ippridkar tagħna tas-​Saltna?

Ġesù, l-​Eżempju Tagħna

12. (a) Fil-​bidu tal-​ministeru tiegħu, Ġesù liema eżempju ta rigward it-​talb, u dan kif jistaʼ jibbenefika lill-​Kristjani? (b) It-​talba mudell taʼ Ġesù x’tirrivela dwar it-​talb?

¹² Dritt mill-​bidu tal-​ministeru tiegħu fuq l-​art, Ġesù huwa osservat qiegħed jitlob. L-​attitudni taʼ talb tiegħu waqt li kien qiegħed jiġi mgħammed kienet taʼ eżempju mill-​aħjar għal dawk li jitgħammdu bil-​magħmudija tal-​ilma llum. (Luqa 3:21, 22) Wieħed jistaʼ jitlob għall-​għajnuna t’Alla biex iwettaq dak li tissimbolizza l-​magħmudija tal-​ilma. Ġesù għen ukoll lil oħrajn biex jersqu lejn Jehovah bit-​talb. Darba minnhom meta Ġesù kien f’ċertu post jitlob, wieħed mid-​dixxipli tiegħu qallu wara: “Mulej, għallimna kif nitolbu.” Ġesù mbagħad irrakkonta dik li hi magħrufa maʼ kullimkien bħala t-​talba mudell, li fiha s-​sekwenza tas-​suġġetti turi li l-​isem u l-​għan t’Alla għandhom jingħataw prijorità. (Luqa 11:1-4) B’hekk, fit-​talb tagħna għandna bżonn inżommu l-​perspettiva u l-​bilanċ, u ma nittraskurawx “l-​affarijiet iktar importanti.” (Filippin 1:9, 10) M’għandniex xi ngħidu, hemm żminijiet meta jkun hemm xi bżonn speċjali jew meta xi problema speċifika jkollha bżonn li jsir talb għaliha. Bħal Ġesù, il-​Kristjani jistgħu jmorru għand Alla bit-​talb biex ifittxu s-​saħħa biex iwettqu ċerti inkarigi jew biex jiffaċċjaw provi jew perikli partikulari. (Mattew 26:36-44) Fil-​fatt, talb persunali jistaʼ jħaddan tistaʼ tgħid lil kull aspett tal-​ħajja.

13. Ġesù kif wera l-​importanza taʼ li nitolbu għal oħrajn, u b’liema effett taʼ ġid fuq it-​talb tagħna?

¹³ Bl-​eżempju mill-​aħjar tiegħu, Ġesù wera l-​importanza taʼ li wieħed jitlob għannom taʼ ħaddieħor. Hu kien jaf li d-​dixxipli tiegħu kellhom ikunu mibgħudin u ppersegwitati, saħansitra bħalma kien hu. (Ġwann 15:18-20; 1 Pietru 5:9) Hu, għalhekk, għamel petizzjoni lil Alla ‘biex igħasses fuqhom minħabba l-​wieħed mill-​agħar.’ (Ġwann 17:9, 11, 15, 20) U billi kien jaf bil-​prova speċjali li Pietru kellu quddiemu, hu qallu: “Jien għamilt tħannin għalik biex il-​fidi tiegħek ma tonqosx.” (Luqa 22:32) Kemm isir ġid jekk aħna wkoll nippersistu f’li nitolbu għal ħutna, billi naħsbu f’oħrajn u mhux biss fil-​problemi u l-​interessi tagħna stess!—Filippin 2:4; Kolossin 1:9, 10.

14. Kif nafu li Ġesù baqaʼ qrib ferm taʼ Jehovah matul il-​ministeru tiegħu fuq l-​art, u kif nistgħu nimitawh?

¹⁴ Matul il-​ministeru tiegħu, Ġesù ppersevera fit-​talb, billi baqaʼ qrib ferm taʼ Jehovah. (Ebrej 5:7-10) L-​appostlu Pietru, f’​Atti 2:25-28, jikkwota Salm 16:8 u japplikah għall-​Mulej Ġesù Kristu: “David igħid dwaru, ‘Jien kelli lil Jehovah il-​ħin kollu quddiem għajnejja; għaliex hu qiegħed fuq il-​leminija tiegħi biex nistaʼ ma niġi mheżheż qatt.”ˈ Aħna nistgħu nagħmlu l-​istess ħaġa. Nistgħu nitolbu biex Alla jkun qrib tagħna, u nistgħu nuru l-​fiduċja tagħna f’Jehovah billi nżommuh il-​ħin kollu mentalment quddiem għajnejna. (Qabbel Salm 110:5; Isaija 41:10, 13.) Imbagħad se nevitaw kull xorta taʼ nkwiet, għax Jehovah se jappoġġjana, u qatt m’aħna se nixxenglu.

15. (a) Rigward liema ħaġa m’għandna qatt nonqsu li nipperseveraw fit-​talb? (b) Liema attenzjoni tingħata rigward ir-​radd il-​ħajr tagħna?

¹⁵ Jalla qatt ma nonqsu li nesprimu radd il-​ħajr lil Jehovah għat-​tjubija kollha tiegħu lilna, iva, “[i]l-qalb tajba mhix mistħoqqa li tisboq t’Alla,” li tinkludi r-​rigal taʼ Ibnu bħala sagrifiċċju taʼ rahan għal dnubietna. (2 Korintin 9:14, 15; Mark 10:45; Ġwann 3:16; Rumani 8:32; 1 Ġwann 4:9, 10) Tabilħaqq, f’isem Ġesù, kunu qegħdin “troddu ħajr dejjem għall-​affarijiet kollha lil Alla u Missier tagħna.” (Efesin 5:19, 20; Kolossin 4:2; 1 Tessalonkin 5:18) Irridu noqogħdu attenti biex ma nħallux ir-​radd il-​ħajr tagħna għal dak li għandna jsir taʼ togħma qarsa minħabba li nkunu tant preokkupati b’dak li m’għandniex jew bil-​problemi tagħna.

Nitfgħu t-​Tagħbijiet Tagħna Fuq Jehovah

16. Meta xi tagħbija tinkwetana, x’għandna nagħmlu?

¹⁶ Il-​persistenza fit-​talb turi kemm hi profonda d-​devozzjoni tagħna. Meta nsejħu lil Alla, l-​effett fuqna huwa tajjeb saħansitra qabel ma tiġi tweġiba mingħandu. Jekk xi tagħbija qiegħda tinkwieta lil moħħna, nistgħu nibqgħu qrib taʼ Jehovah billi nsegwu l-​parir: “Ixħet it-​tagħbija tiegħek fuq Jehovah innifsu, u hu nnifsu se jsostnik.” (Salm 55:22) Billi nixħtu t-​tagħbijiet kollha tagħna—l-​anzjetajiet, l-​inkwiet, id-​diżappunti, il-​biżaʼ, u nibqgħu sejrin—fuq Alla, b’fidi sħiħa fih, nirċievu kalma tal-​qalb, “[i]l-paċi t’Alla li tisboq kull ħsieb.”−Filippin 4:4, 7; Salm 68:19; Mark 11:24; 1 Pietru 5:7.

17. Kif nistgħu aħna niksbu l-​paċi t’Alla?

¹⁷ Tigi din il-​paċi t’Alla minnufih? Għalkemm nistgħu niksbu xi serħan immedjatament, dak li Ġesù qal dwar li wieħed jitlob għall-​ispirtu qaddis igħodd għal hawnhekk ukoll: “Ibqgħu staqsu, u se jingħatalkom; ibqgħu fittxu, u se ssibu; ibqgħu ħabbtu, u se jinfetħilkom.” (Luqa 11:9-13) Ladarba l-​ispirtu qaddis huwa l-​mezz li bih inwarrbu l-​anzjeta, għandna bżonn nipperseveraw f’li nitolbu l-​paċi t’Alla u l-​għajnuna tiegħu rigward it-​tagħbijiet tagħna. Nistgħu nkunu żguri li bil-​persistenza fit-​talb, aħna se niksbu s-​serħan u l-​kalma tal-​qalb li nixtiequ.

18. Jehovah x’jagħmel għalina jekk ma nkunux nafu eżatt għal liema ħaġa se nitolbu f’ċerta sitwazzjoni?

¹⁸ Imma x’jiġri jekk ma nkunux nafu eżatt għal liema ħaġa se nitolbu? Il-​krib ġewwieni tagħna spiss jibqaʼ mhux imlissen għaliex ma nifhmux għalkollox is-​sitwazzjoni tagħna, jew ma nafux assolutament x’se nippreżentaw lil Jehovah. Huwa hawn li l-​ispirtu qaddis jistaʼ jinterċedi għalina. Pawlu kiteb: “Il-​problema taʼ x’għandna nitolbu skond ma neħtieġu ma nafux, imma l-​ispirtu nnifsu jidħol għalina bi krib mhux imlissen.” (Rumani 8:26) Kif? Fil-​Kelma t’Alla hemm profeziji mnebbħin u talb li għandhom x’jaqsmu mas-​sitwazzjoni tagħna. Hu jħalli lil dawn jinterċedu għalina, bħal li kieku. Hu jaċċetta dawn bħala li huma dak li aħna konna nitolbu għalih kieku biss konna nafu t-​tifsir tagħhom fil-​każ tagħna, u għaldaqstant hu jwettaqhom.

It-​Talb u t-​Tama se Jkomplu

19. It-​talb u t-​tama għala se jibqgħu għal dejjem?

¹⁹ It-​talb lil Missierna tas-​sema se jkomplu għal dejjem, speċjalment rigward ir-​radd il-​ħajr għad-​dinja l-​ġdida u l-​barkiet kollha tagħha. (Isaija 65:24; Rivelazzjoni 21:5) Aħna se nkomplu wkoll nifirħu bit-​tama, għax tama f’xi għamla se tibqaʼ għal dejjem. (Qabbel 1 Korintin 13:13.) Liema affarijiet ġodda Jehovah se joħloq meta ma jkunx għadu taħt il-​jum taʼ mistrieħ tas-​Sabat lejn l-​art li kien imponut fuqu minnu stess, lanqas nistgħu saħansitra nimmaġinaw. (Ġenesi 2:2, 3) Għall-​eternità kollha, hu se jkollu sorpriżi taʼ mħabba ’l quddiem għan-​nies tiegħu, u l-​futur joffri affarijiet grandjużi f’dak li għandu x’jaqsam maʼ li wieħed jagħmel ir-​rieda tiegħu.

20. X’għandha tkun id-​determinazzjoni tagħna, u għala?

²⁰ B’tama li tqanqal bħal din quddiemna jalla lkoll kemm aħna nibqgħu qrib taʼ Jehovah billi nipperseveraw fit-​talb. Jalla qatt ma nieqfu niżżu ħajr lil Missierna tas-​sema għall-​barkiet kollha tagħna. Fiż-​żmien xieraq l-​istennijiet tagħna se jiġu rrealizzati bil-​ferħ, saħansitra iktar milli stajna immaġinajna jew antiċipajna, għax Jehovah jistaʼ “jagħmel iktar bil-​kotra mill-​affarijiet kollha li nitolbu jew naħsbu.” (Efesin 3:20) Minħabba f’dan, allura, ejjew nagħtu t-​tifħir kollu u l-​glorja kollha u r-​radd il-​ħajr kollu għall-​eternità kollha lil Jehovah Alla tagħna, dak “Semmiegħ it-​talb”!

[Nota taʼ taħt]

Kif Twieġeb Int?

◻ Għala għandna bżonn nipperseveraw fit-​talb?

◻ X’nitgħallmu minn eżempji taʼ talb taʼ qabel l-​era Kristjana?

◻ L-​eżempju taʼ Ġesù x’igħallimna dwar it-​talb?

◻ Kif nistgħu nixħtu t-​tagħbijiet tagħna fuq Jehovah u b’liema riżultat?