Obdi lil Alla u Bbenefika mill-Wegħdi li Ħalef li Jwettaq
“Billi ma setax jaħlef b’xi ħadd akbar minnu, [Alla] ħalef bih innifsu.”—EBR. 6:13.
ARA JEKK TISTAX TWIEĠEB:
Għala nistgħu nkunu ċerti li l-iskopijiet t’Alla se jitwettqu?
Alla liema wegħda għamel wara li dinbu Adam u Eva?
Kif nibbenefikaw mill-wegħda b’ħalfa li Alla għamel lil Abraham?
1. Il-kelma taʼ Ġeħova kif inhi differenti minn dik tal-bnedmin midinbin?
ĠEĦOVA hu “l-Alla tal-verità.” (Salm 31:5) Il-bnedmin midinbin mhux dejjem jistgħu jiġu fdati, filwaqt li “hu impossibbli li Alla jigdeb.” (Ebr. 6:18; aqra Numri 23:19.) Alla dejjem iwettaq dak li jwiegħed li se jagħmel għall-bnedmin. Pereżempju, kulma Alla qal li kien se jagħmel fil-bidu taʼ kull epoka tal-ħolqien, “hekk sar.” B’hekk, sa tmiem is-sitt jum tal-ħolqien, “Alla ra kulma kien għamel, u, ara, kien tajjeb ħafna.”—Ġen. 1:6, 7, 30, 31.
2. X’inhu l-jum taʼ mistrieħ t’Alla, u għala “qaddsu”?
2 Wara li qal li l-ħolqien kollu tiegħu kien tajjeb ħafna, Alla Ġeħova ħabbar il-bidu tas-sebaʼ jum—mhux jum taʼ 24 siegħa, imma perijodu twil taʼ żmien li matulu Hu straħ milli joħloq xi ħaġ’oħra fuq l-art. (Ġen. 2:2) Il-jum taʼ mistrieħ t’Alla għadu ma spiċċax. (Ebr. 4:9, 10) Il-Bibbja ma tirrivelax eżattament meta beda. Beda f’xi żmien wara li nħalqet Eva, mart Adam, xi 6,000 sena ilu. L-elf sena tar-renju taʼ Kristu dalwaqt jibdew, u matul dan iż-żmien Alla se jwettaq l-iskop tiegħu għall-art. Alla jrid li l-art tkun ġenna fejn il-bnedmin perfetti jkunu jistgħu jgħixu għal dejjem. (Ġen. 1:27, 28; Riv. 20:6) Tistaʼ int tkun żgur li se jkollok futur hieni bħal dan? Dażgur li tistaʼ! Għax “Alla bierek is-sebaʼ jum u qaddsu.” Din kienet garanzija li jkunu xi jkunu l-problemi li jistgħu jinqalgħu bla mistenni, Alla kien se jagħmel ċert li l-iskop tiegħu kellu jitwettaq sat-tmiem tal-jum taʼ mistrieħ tiegħu.—Ġen. 2:3.
3. (a) Wara li beda l-jum taʼ mistrieħ t’Alla, liema ribelljoni seħħet? (b) Ġeħova kif spjega kif kellu jsolvi din il-problema?
3 Madankollu, wara li beda l-jum taʼ mistrieħ t’Alla, xi wħud mill-ħlejjaq tiegħu rribellaw kontrih. Satana, iben anġeliku t’Alla, ipprova jġiegħel lil oħrajn iqimu lilu minflok ma jqimu lil Alla. Hu lissen l-ewwel gidba u qarraq b’Eva, u b’hekk hi m’obdietx lil Ġeħova. (1 Tim. 2:14) Imbagħad Eva ġiegħlet lil żewġha jingħaqad magħha fir-ribelljoni. (Ġen. 3:1-6) Din ir-ribelljoni kienet l-agħar ħaġa li qatt kienet ġrat. Imma avolja Satana akkuża lil Ġeħova li ma kienx qed jgħid il-verità, Ġeħova ma rax il-bżonn li jaħlef biex juri li l-iskop tiegħu għall-art xorta waħda kien se jitwettaq. Minflok, bi kliem li kellu jiġi mifhum fiż-żmien xieraq t’Alla, hu qal sempliċement kif kellha tintemm ir-ribelljoni: “Inqanqal għadwa bejnek [Satana] u bejn il-mara u bejn nislek u nisilha. Hu [n-Nisel imwiegħed] jisħaqlek rasek u int tisħaqlu għarqubu.”—Ġen. 3:15; Riv. 12:9.
ĦALFA—MEZZ LEGALI U UTLI
4, 5. Abraham kultant minn liema mezz legali għamel użu?
4 Sa dak iż-żmien, x’aktarx li qatt ma kien hemm bżonn li xi ħadd jaħlef li xi ħaġa kienet vera. Ħlejjaq perfetti li jħobbu lil Alla u li jimitawh m’għandhomx bżonn jaħilfu; huma dejjem jgħidu l-verità u għandhom fiduċja sħiħa f’xulxin. Imma l-affarijiet tbiddlu meta daħal id-dnub u l-bnedmin saru imperfetti. Eventwalment, meta l-gideb u l-qerq kienu komuni fost il-bnedmin, dawn kellhom bżonn jaħilfu li stqarrija importanti kienet vera.
5 Il-ħalf kien mezz legali li minnu l-patrijarka Abraham għamel użu tajjeb f’minn tal-inqas tliet darbiet. (Ġen. 21:22-24; 24:2-4, 9) Pereżempju, dan seħħ meta ġie lura mir-rebħa li kellu fuq is-sultan taʼ Għelam u l-alleati tiegħu. Is-slaten taʼ Salem u Sodoma ħarġu biex jiltaqgħu m’Abraham. Melkisedek, is-sultan taʼ Salem, ukoll kien “qassis taʼ l-Alla l-Iktar Għoli.” Bħala tali, hu bierek lil Abraham u faħħar lil Alla talli ħareġ lil Abraham rebbieħ fuq l-għedewwa tiegħu. (Ġen. 14:17-20) Imbagħad, meta s-sultan taʼ Sodoma ried jippremja lil Abraham talli salva lin-nies tas-sultan mill-armati li invadewhom, Abraham ħalef: “Ngħolli idi b’ħalfa lil Ġeħova l-Alla l-Iktar Għoli, Dak li għamel is-sema u l-art, li, la ħajta u lanqas qafla taʼ sandli, xejn ma nieħu minn dak li hu tiegħek, li ma tmurx tgħid, ‘Kont jien li lil Abram għamiltu għani.’”—Ġen. 14:21-23.
IL-WEGĦDA B’ĦALFA TAʼ ĠEĦOVA LIL ABRAHAM
6. (a) Abraham liema eżempju ħallielna? (b) Kif se nibbenefikaw minn dak li għamel Abraham?
6 Għall-benefiċċju tal-bnedmin midinbin, Alla Ġeħova uża wkoll il-ħalf billi lissen espressjonijiet bħal “‘Daqskemm jien ħaj,’ hija l-kelma tal-Mulej Sovran Ġeħova.” (Eżek. 17:16) Il-Bibbja tiddeskrivi iktar minn 40 okkażjoni differenti meta Alla Ġeħova għamel il-ħalf. Eżempju magħruf sew kien dak li Alla ħalef lil Abraham. Ġeħova għamel diversi pattijiet, jew wegħdi, matul il-ħajja taʼ Abraham. Minn dawn il-pattijiet, Abraham sar jaf li n-Nisel imwiegħed kien se jiġi mill-familja tiegħu permezz taʼ ibnu Iżakk. (Ġen. 12:1-3, 7; 13:14-17; 15:5, 18; 21:12) Imbagħad Ġeħova għadda lil Abraham minn prova ħarxa billi kkmandah joffri lil ibnu l-maħbub bħala sagrifiċċju. Abraham obda bla dewmien u kien kważi se jissagrifika lil Iżakk meta anġlu t’Alla waqqfu. Imbagħad Alla għamel din il-ħalfa: “Bija nnifsi naħlef . . . li minħabba l-fatt li int għamilt din il-ħaġa u ma ċaħħadtnix minn ibnek, l-uniku wieħed li għandek, jien żgur li nbierkek u żgur li nkattar lil nislek bħall-kwiekeb tas-smewwiet u bħar-ramel li hemm f’xatt il-baħar; u nislek għad jieħu f’idejh bieb l-għedewwa tiegħu. U permezz taʼ nislek il-ġnus kollha taʼ l-art se jitbierku minħabba l-fatt li int smajt minn kliemi.”—Ġen. 22:1-3, 9-12, 15-18.
7, 8. (a) Alla għal liema raġuni ħalef lil Abraham? (b) In-“nagħaġ oħrajn” taʼ Ġesù kif se jibbenefikaw mill-wegħda b’ħalfa t’Alla?
7 Alla għala ħalef lil Abraham li kien se jżomm il-wegħdi Tiegħu? Biex jassigura lil dawk li kellhom isiru werrieta sħab maʼ Kristu, li jifformaw il-parti sekondarja tan-“nisel” imwiegħed, u biex isaħħilhom il-fidi. (Aqra Ebrej 6:13-18; Gal. 3:29) Bħalma spjega l-appostlu Pawlu, Ġeħova “kkonferma dan b’ħalfa, sabiex, b’żewġ affarijiet li ma jinbidlux [il-wegħda u l-ħalfa tiegħu] u li hu impossibbli li Alla jigdeb dwarhom, aħna . . . jkollna inkuraġġiment qawwi biex naqbdu mat-tama mqiegħda quddiemna.”
8 Il-Kristjani midlukin mhumiex l-uniċi wħud li jibbenefikaw mill-ħalfa t’Alla lil Abraham. Permezz taʼ “nisel” Abraham, Ġeħova ħalef li nies mill-“ġnus kollha taʼ l-art [kienu] se jitbierku.” (Ġen. 22:18) Uħud imberkin bħal dawn jinkludu n-“nagħaġ oħrajn” ubbidjenti taʼ Kristu, li għandhom quddiemhom it-tama taʼ ħajja taʼ dejjem f’ġenna tal-art. (Ġw. 10:16) Kemm jekk it-tama tiegħek hi għas-sema u kemm jekk hi għall-art, ‘aqbadha’ billi tkompli tgħix ħajja taʼ ubbidjenza lejn Alla.—Aqra Ebrej 6:11, 12.
ĦALF IEĦOR T’ALLA RELATAT M’ABRAHAM
9. Alla liema ħalfa għamel meta d-dixxendenti t’Abraham kienu fil-jasar fl-Eġittu?
9 Sekli wara, Ġeħova reġaʼ ħalef rigward il-wegħdi li ssemmew diġà meta bagħat lil Mosè biex jitkellem mad-dixxendenti t’Abraham, li f’dak iż-żmien kienu fil-jasar fl-Eġittu. (Eżo. 6:6-8) Meta rrefera għal din l-okkażjoni, Alla qal: “Dakinhar li għażilt lil Israel, . . . għollejt idi biex naħilfilhom li noħroġhom mill-art taʼ l-Eġittu lejn art li kont tkixxiftilhom, art li tnixxi ħalib u għasel.”—Eżek. 20:5, 6.
10. Alla liema wegħda għamlilhom lil Iżrael wara li ħelishom mill-Eġittu?
10 Imbagħad, wara l-ħelsien taʼ Iżrael mill-Eġittu, Ġeħova għamlilhom wegħda oħra b’ħalfa billi qalilhom: “Jekk tassew tobdu kliemi u tħarsu l-patt tiegħi, imbagħad issiru l-proprjetà speċjali tiegħi mill-popli l-oħrajn kollha, għax l-art kollha hi tiegħi. U ssiru għalija saltna taʼ qassisin u ġens qaddis.” (Eżo. 19:5, 6) X’pożizzjoni privileġġata offrielhom Alla lil Iżrael! Kienet tfisser li jekk ikunu ubbidjenti, individwi minn dan il-ġens setaʼ jkollhom it-tama li jintużaw minn Alla bħala saltna taʼ qassisin biex titbierek il-bqija tal-umanità. Iktar tard, meta ddeskriva dak li kien għamel għal Iżrael f’dik l-okkażjoni, Ġeħova stqarr: “Għamiltlek ħalfa u dħalt f’patt miegħek.”—Eżek. 16:8.
11. Iżrael kif irrispondew għall-istedina t’Alla biex jidħlu f’relazzjoni taʼ patt miegħu bħala l-poplu magħżul tiegħu?
11 F’dak iż-żmien, Ġeħova m’obbligax lil Iżrael biex jaħilfu li se jkunu ubbidjenti, u lanqas ma sforzahom biex jidħlu f’din ir-relazzjoni privileġġata. Minflok, huma qalu minn jeddhom: “Aħna lesti li nagħmlu kulma qalilna Ġeħova.” (Eżo. 19:8) Tlett ijiem wara, Alla Ġeħova għarraf lil Iżrael b’dak li kien jinħtieġ mill-ġens magħżul tiegħu. L-ewwel semgħu l-Għaxar Kmandamenti, u mbagħad Mosè tahom iktar kmandi li huma dokumentati fl-Eżodu 20:22 sa 23:33. X’kienet ir-risposta taʼ Iżrael? “In-nies kollha wieġbu b’leħen wieħed u qalu: ‘Aħna lesti li nagħmlu l-kliem kollu li qal Ġeħova.’” (Eżo. 24:3) Imbagħad Mosè niżżel bil-miktub il-liġijiet fil-“ktieb tal-patt” u qrahom b’leħen għoli sabiex il-ġens kollu kemm hu setaʼ jerġaʼ jismagħhom. Wara dan, għat-tielet darba, in-nies wiegħdu: “Aħna lesti li nagħmlu kulma qal Ġeħova u nobduh.”—Eżo. 24:4, 7, 8.
12. (a) Ġeħova x’għamel wara li wiegħed li jagħmel lil Iżrael il-ġens speċjali tiegħu? (b) In-nies kif aġixxew wara li għamlu l-wegħda tagħhom lil Alla?
12 Ġeħova immedjatament beda jwettaq dak li wiegħed fil-patt tal-Liġi tiegħu maʼ Iżrael. Hu għażel xi qassisin li kellhom jaqdu f’tinda speċjali għall-qima. Dan is-saċerdozju għamilha possibbli għal bnedmin midinbin biex jersqu lejn Alla. Mill-banda l-oħra, l-Iżraelin malajr insew id-dedikazzjoni tagħhom lil Alla u “weġġgħu lill-Qaddis taʼ Israel.” (Salm 78:41) Pereżempju, waqt li Mosè kien qed jirċievi iktar istruzzjonijiet fuq il-Muntanja Sinaj, l-Iżraelin tilfu l-paċenzja u l-fidi tagħhom f’Alla ddgħajfet għax ħasbu li Mosè kien ħalliehom lampa stampa. Għalhekk, huma għamlu xbieha taʼ għoġol tad-deheb u qalu lin-nies: “Dan hu Alla tiegħek, O Israel, li tellgħek mill-art taʼ l-Eġittu.” (Eżo. 32:1, 4) Imbagħad iċċelebraw dik li sejħulha “festa lil Ġeħova” u mielu quddiem ix-xbieha magħmula mill-bniedem u offrewlha s-sagrifiċċji. Malli ra dan, Ġeħova qal lil Mosè: “Huma malajr warrbu mit-triq li jien ikkmandajthom biex jimxu fiha.” (Eżo. 32:5, 6, 8) B’sogħba, minn dakinhar ’il quddiem l-Iżraelin ħaduha drawwa li jagħmlu wegħdi lil Alla li mbagħad ma jżommuhomx.—Num. 30:2.
ŻEWĠ ĦALFIET OĦRAJN
13. Alla liema wegħda b’ħalfa għamillu lis-Sultan David, u kif inhi relatata man-Nisel imwiegħed?
13 Matul ir-renju tas-Sultan David, Ġeħova għamel żewġ ħalfiet oħrajn għall-benefiċċju taʼ kull min jobdih. L-ewwel, hu ħalef lil David li t-tron tiegħu se jibqaʼ għal dejjem. (Salm 89:35, 36; 132:11, 12) Dan kien ifisser li n-Nisel imwiegħed kellu jissejjaħ “Bin David.” (Mt. 1:1; 21:9) Bl-umiltà, David indirizza bħala l-“Mulej” tiegħu lil dak li fil-futur kellu jkun dixxendent, għax il-Kristu kellu jokkupa pożizzjoni superjuri.—Mt. 22:42-44.
14. Ġeħova liema wegħda b’ħalfa għamel dwar in-Nisel imwiegħed, u kif nibbenefikaw minnha?
14 It-tieni, Ġeħova nebbaħ lil David biex ibassar li dan is-Sultan uniku kellu jaqdi wkoll bħala Qassis il-Kbir tal-umanità. F’Iżrael, l-istat taʼ sultan u s-saċerdozju kienu separati kompletament. Il-qassisin kienu mit-tribù taʼ Levi, u s-slaten kienu mit-tribù taʼ Ġuda. Imma dwar dak li fil-futur kellu jkun il-werriet grandjuż tiegħu, David bassar: “Din hi l-kelma taʼ Ġeħova lill-Mulej tiegħi: ‘Oqgħod bil-qiegħda fuq il-lemin tiegħi sakemm inqiegħed l-għedewwa tiegħek bħala banketta għal saqajk.’ Ġeħova ħalef (u ma jiddispjaċihx): ‘Int qassis għal dejjem bl-istess mod taʼ Melkisedek!’” (Salm 110:1, 4) Bi twettiq taʼ din il-profezija, Ġesù Kristu, in-Nisel imwiegħed, issa jaħkem mis-sema. Ukoll, hu jaqdi bħala l-Qassis il-Kbir tal-umanità billi jgħin lil uħud li jindmu biex jidħlu f’relazzjoni aċċettabbli m’Alla.—Aqra Ebrej 7:21, 25, 26.
L-IŻRAEL IL-ĠDID T’ALLA
15, 16. (a) Liema żewġ Iżrael issir referenza għalihom fil-Bibbja, u llum liema wieħed għandu l-barka t’Alla? (b) Ġesù liema kmand tahom lis-segwaċi tiegħu dwar li wieħed jagħmel il-wegħdi?
15 Peress li l-ġens taʼ Iżrael ċaħad lil Ġesù Kristu, Ġeħova eventwalment ċaħadhom, u b’hekk tilfu l-opportunità li xi darba jsiru “saltna taʼ qassisin.” Bħalma qal Ġesù lill-mexxejja Lhud: “Is-saltna t’Alla tittieħed mingħandkom u tingħata lil ġens li jagħti l-frott minnha.” (Mt. 21:43) Dan il-ġens ġdid twieled f’Pentekoste tas-sena 33 E.K. meta l-ispirtu t’Alla ssawwab fuq madwar 120 dixxiplu taʼ Ġesù miġburin f’Ġerusalemm. Dawn saru magħrufin bħala “l-Israel t’Alla” u n-numru tagħhom malajr żdied għal diversi eluf taʼ nies minn kull ġens tad-dinja taʼ dak iż-żmien.—Gal. 6:16.
16 Kuntrarju għal Iżrael naturali, il-ġens spiritwali ġdid t’Alla kompla jagħti frott tajjeb permezz tal-ubbidjenza kontinwa tiegħu lejn Alla. Wieħed mill-kmandi li jobdu l-membri tiegħu hu rigward il-ħalf. Meta Ġesù kien fuq l-art kien qed isir abbuż mill-ħalf għax in-nies kienu qed jagħmlu ħalf falz jew jaħilfu fuq iċ-ċuċati. (Mt. 23:16-22) Ġesù għallem lis-segwaċi tiegħu: “Taħilfu b’xejn . . . Iżda l-kelma tagħkom Iva ħa tfisser Iva, u l-Le, Le; għax dak li hu iżjed minn hekk ikun ġej mill-Ħażin.”—Mt. 5:34, 37.
17. Liema mistoqsijiet se jiġu kunsidrati fl-artiklu għall-istudju li jmiss?
17 Ifisser dan li hu dejjem ħażin li tagħmel ħalfa? Iktar importanti minn hekk, x’hemm involut f’li nħallu l-kelma tagħna Iva tfisser Iva? Dawn il-mistoqsijiet se jiġu kunsidrati fl-artiklu għall-istudju li jmiss. Hekk kif inkomplu nimmeditaw fuq il-Kelma t’Alla, jalla niġu mqanqlin biex inkomplu nobdu lil Ġeħova. Imbagħad hu se jitgħaxxaq iberikna għal dejjem fi qbil mal-wegħdi b’ħalfa prezzjużi tiegħu.
[Kumment f’paġna 26]
Ġeħova dejjem iżomm il-wegħdi tiegħu
[Stampa f’paġna 24]
Abraham dalwaqt jara l-wegħdi taʼ Ġeħova jitwettqu