“Li Tibżaʼ mill-​Mulej Hu l-​Għerf”

“HAWN hu l-​qofol tad-​diskors wara li nstamaʼ kollox: ‘Ħobb lil Alla u ħares il-​kmandamenti tiegħu, għax f’dan jinġabar il-​bniedem kollu.’” (Koħèlet 12:13) Kemm kienet profonda din il-​konklużjoni li s-​Sultan Salamun taʼ Iżrael tal-​qedem wasal għaliha bl-​ispirazzjoni divina! Il-​patrijarka Ġob ukoll apprezza l-​valur tal-​biżaʼ t’Alla, għax qal: “Ara, li tibżaʼ mill-​Mulej hu l-​għerf, li titbiegħed mill-​ħażen, l-​għaqal.”​—Ġob 28:28.

Il-Bibbja titfaʼ importanza kbira fuq li jkollna l-​biżaʼ taʼ Ġeħova. Li nikkultivaw biżaʼ riverenzjali minn Alla għala huwa l-​aħjar triq għall-​għerf? B’liema mod jistaʼ l-​biżaʼ t’Alla jibbenefikana​—individwalment u bħala grupp taʼ qaddejja veri? Versi 26 sa 35 taʼ Proverbji kapitlu 14 iwieġbu dawn il-​mistoqsijiet.a

Sors taʼ “Tama Qawwija”

Salamun jgħid: “Tama qawwija jkollu min għandu l-​biżaʼ tal-​Mulej, u wliedu wkoll isibu l-​kenn.” (Proverbji 14:26) Is-​sors taʼ fiduċja taʼ wieħed li għandu l-​biżaʼ t’Alla huwa ħadd ħlief l-​Alla leali u li Jistaʼ Kollox, Ġeħova. Mhux taʼ b’xejn li raġel bħal dan jiffaċċja dak li jkollu quddiemu b’tama qawwija! Il-​futur tiegħu huwa wieħed twil u mbierek.

Madankollu, x’jistaʼ jingħad dwar il-​futur taʼ dawk li jittamaw fid-​dinja—il-​pjanijiet, l-​organizzazzjonijiet, l-​ideoloġiji, u l-​affarijiet materjali tagħha? Hu x’inhu l-​futur li jixtiequ dawn huwa wieħed qasir, għax il-​Bibbja tgħid: “Id-​dinja tgħaddi u x-​xewqa tagħha wkoll, imma min jagħmel ir-​rieda t’Alla jibqaʼ għal dejjem.” (1 Ġwanni 2:​17) Għalhekk, hemm xi raġuni għalina biex ‘inħobbu id-​dinja u dak li hemm fid-​dinja’?​—1 Ġwanni 2:​15.

Il-ġenituri li għandhom il-​biżaʼ t’Alla x’jistgħu jagħmlu biex ikunu ċerti li ‘wliedhom se jsibu kenn’? Is-​salmista kanta: “Ejjew uliedi, isimgħu lili: jiena l-​biżaʼ tal-​Mulej ngħallimkom.” (Salm 34:12 [34:​11, NW]) Meta t-​tfal jiġu mgħallmin il-​biżaʼ t’Alla bl-​eżempju u bl-​istruzzjoni tal-​ġenituri, hemm iktar probabbiltà li huma se jikbru biex isiru rġiel u nisa li jkollhom tama qawwija f’Ġeħova.​—Proverbji 22:6.

Salamun ikompli: “Il-​biżaʼ tal-​Mulej hu għajn tal-​ħajja, bih wieħed jeħles mix-​xibka tal-​mewt.” (Proverbji 14:27) Il-​biżaʼ taʼ Ġeħova huwa “għajn tal-​ħajja” għax l-​Alla veru huwa “l-​għajn taʼ l-​ilma ġieri.” (Ġeremija 2:​13) Li nieħdu l-​għarfien dwar Ġeħova u Ġesù Kristu jistaʼ jfisser ħajja taʼ dejjem għalina. (Ġwanni 17:3) Il-​biżaʼ t’Alla jbegħedna wkoll min-​nases tal-​mewt. Kif? Proverbji 13:14 jgħid: “Tagħlim l-​għaref hu għajn il-​ħajja għal min irid jeħles mix-​xibka tal-​mewt.” Meta jkollna l-​biżaʼ taʼ Ġeħova, nobdu l-​liġi tiegħu, u nħallu l-​Kelma tiegħu tiggwidalna l-​passi tagħna, ma niġux aħna protetti mill-​prattiċi u l-​emozzjonijiet taʼ ħsara li jistgħu jwassluna biex immutu qabel il-​waqt?

“Tiżjin għal Sultan”

Tul il-​biċċa l-​kbira miż-​żmien li dam jaħkem, Salamun kien sultan li kellu l-​biżaʼ t’Alla u kien jobdi lil Ġeħova. Dan ikkontribwixxa għal ħakma taʼ suċċess. X’jiddetermina kemm sultan kien isaltan tajjeb? Proverbji 14:28 (NW) iwieġeb: “Fil-​kotra tan-​nies hemm tiżjin taʼ sultan, imma fin-​nuqqas taʼ popolazzjoni hemm ir-​rovina t’uffiċjal għoli.” Is-​suċċess taʼ sultan jitkejjel mill-​istat li jkunu fih il-​qaddejja tiegħu. Jekk kotra kbira taʼ nies jixtiequ li jibqgħu taħt it-​tmexxija tiegħu, dan juri li hu sultan tajjeb. Salamun kellu qaddejja ‘mill-​baħar [l-Aħmar] sal-​baħar [Mediterran], u mix-​Xmara [Ewfrat] sa truf l-​art.’ (Salm 72:​6-8) Is-​saltna tiegħu kienet immarkata minn paċi u prosperità li qatt ma kien hemm bħalhom qabel. (1 Slaten 4:​24, 25) Il-​ħakma taʼ Salamun kienet suċċess. Mill-​banda l-​oħra, nuqqas t’approvazzjoni mill-​poplu jindika diżunur għal uffiċjal għoli.

X’jistaʼ jingħad fuq din il-​ħaġa dwar il-​glorja taʼ Salamun Akbar, is-​Sultan Messjaniku, Ġesù Kristu? Aħseb dwar il-​qaddejja li għandu anki llum. Madwar id-​dinja kollha, iktar minn sitt miljun raġel u mara li għandhom biżaʼ t’Alla diġà għażlu li jgħixu taħt il-​ħakma taʼ Kristu. Huma jeżerċitaw fidi f’Ġesù u huma magħqudin fil-​qima vera taʼ l-​Alla l-​ħaj. (Ġwanni 14:1) Sat-​tmiem tal-​Ħakma Millennjali, dawk kollha fil-​memorja t’Alla se jkunu ġew irxoxtati. Imbagħad l-​art magħmula ġenna se tkun mimlija b’nies ferħanin u b’nies ġusti li wrew apprezzament għas-​Sultan tagħhom. X’xiehda se tkun dik għall-​ħakma b’suċċess taʼ Kristu! Ejja nżommu sod mat-​tama meraviljuża tagħna tas-​Saltna.

Benefiċċji Spiritwali u Fiżiċi

Biżaʼ riverenzjali t’Alla se jagħtina paċi tal-​qalb u tal-​moħħ. Dan minħabba li l-​aspetti differenti taʼ l-​għerf jinkludu li nużaw id-​dehen u nuru d-​dixxerniment. Proverbji 14:29 jgħid: “Min għandu s-​sabar jimxi b’għaqal kbir [“b’dixxerniment,” “NW”], min jisbel malajr bluhat kbar jagħmel.” Id-​dixxerniment jgħinna nirrealizzaw li r-​rabja mhix kontrollata għandha effetti devastanti fuq l-​ispiritwalità tagħna. “Il-​mibegħda, il-​ġlied, l-​għira, l-​għadab, [u] it-​tilwim” huma mniżżlin fost ix-​xogħlijiet li jistgħu jtellfuna milli ‘nirtu s-​saltna t’Alla.’ (Galatin 5:​19-21) Aħna mwissijin kontra li nżommu ġo fina anki rabja li hi ġustifikata. (Efesin 4:​26, 27) U meta ma nurux il-​paċenzja nistgħu ngħidu kliem bla sens u naġixxu b’tali mod li iktar tard jiddispjaċina.

Meta pponta lejn l-​effetti fiżiċi tar-​rabja, is-​sultan taʼ Iżrael qal: “Mistrieħ il-​moħħ hu ħajja għall-​ġisem, imma l-​għira tħassarlu l-​għadam.” (Proverbji 14:30) Mard li jirriżulta mir-​rabja u d-​dagħdigħa jinkludi problemi respiratorji, pressjoni għolja, problemi fil-​fwied, u ħsara lill-​frixa. It-​tobba jsemmu wkoll ir-​rabja u d-​dagħdigħa bħala emozzjonijiet li jiggravaw, jew saħansitra jikkaġunaw mard bħall-​ulċeri, l-​urtikarja, l-​ażżma, il-​mard tal-​ġilda, u problemi diġestivi. Mill-​banda l-​oħra, il-​“paċi tal-​qalb tagħti ħajja lill-​ġisem.” (Proverbji 14:​30, New International Version) Għalhekk, inkunu għaqlin jekk “niġru wara l-​affarijiet li jġibu l-​paċi u l-​affarijiet li bihom nibnu lil xulxin.”—Rumani 14:19.

Il-​Biżaʼ t’Alla Jgħinna Nkunu Imparzjali

“Min jgħakkes il-​fqir imaqdar lil min ħalqu,” jgħid Salamun, “imma min iħenn għall-​imsejken iweġġħu.” (Proverbji 14:31) Raġel li għandu l-​biżaʼ t’Alla jirrealizza li l-​bnedmin kollha għandhom l-​istess Ħallieq, Alla Ġeħova. Għalhekk, il-​wieħed fqir huwa bniedem bħalna, u kif jiġi trattat jirrifletti fuq il-​Ħallieq taʼ l-​umanità. Biex nagħtu glorja lil Alla, għandna naġixxu b’mod ġust u imparzjali m’oħrajn. Il-​Kristjan li huwa fqir għandu jirċievi attenzjoni spiritwali mingħajr parzjalità. Għandna nilħqu lill-​fqar u lill-​għonja bl-​istess mod bl-​aħbar tajba tas-​Saltna t’Alla.

Billi rrefera għal benefiċċju ieħor tal-​biżaʼ t’Alla, is-​sultan għaref qal: “Il-​ħażin jiġġarraf bi ħżunitu, it-​tajjeb jistkenn fi tjubitu [“fl-​integrità tiegħu,” “NW”].” (Proverbji 14:32) Il-​wieħed il-​ħażin kif jiġġarraf? Huwa suġġerit li dan ifisser li m’għandu l-​ebda possibbiltà li jirkupra meta jesperjenza kalamità. Mill-​banda l-​oħra, meta tolqtu l-​avversità, il-​wieħed li għandu l-​biżaʼ t’Alla jsib kenn fl-​integrità tiegħu f’Alla. Billi jkollu fidi sħiħa f’Ġeħova saħansitra sal-​mewt, juri l-​istess determinazzjoni li wera Ġob, li qal: “Ma jkun qatt li nagħtikom raġun, insostni sa ma mmut is-​sewwa [“l-​integrità,” NW] tiegħi.”—Ġob 27:5.

Li żżomm l-​integrità jirrikjedi għerf u li jkollok il-​biżaʼ t’Alla. U l-​għerf fejn jistaʼ jinsab? “Fil-​qalb taʼ dak li qed jifhem hemm jistrieħ l-​għerf, u f’nofs l-​istupidi dan isir magħruf,” iwieġeb Proverbji 14:33 (NW). Iva, l-​għerf jistaʼ jinsab fil-​qalb taʼ raġel li jifhem. Madankollu, b’liema mod isir magħruf f’nofs l-​istupidi? Skond xogħol taʼ referenza, “l-​istupidu, li jixtieq jidher għaref, jgħid dak li jaħseb li hu l-​għerf iżda matul dan il-​proċess jispiċċa biex jgħid bluhat.”

“Ikabbar Ġieħ il-​Poplu”

Billi jdawwar l-​attenzjoni tagħna minn kif individwu huwa effettwat mill-​biżaʼ t’Alla għal kif jeffettwa poplu sħiħ, is-​sultan taʼ Iżrael jgħid: “Is-​sewwa jkabbar ġieħ il-​poplu, imma d-​dnub iwaqqgħu fl-​għajb.” (Proverbji 14:34) Kemm deher ċar dan il-​prinċipju fil-​każ tal-​ġens taʼ Iżrael! Meta mexa mal-​prinċipji għoljin t’Alla, Iżrael ġie eżaltat fuq in-​nazzjonijiet l-​oħra. Madankollu, atti ripetuti taʼ diżubbidjenza wasslu għal diżunur, u eventwalment Iżrael ġie rifjutat minn Ġeħova. Dan il-​prinċipju japplika għall-​poplu t’Alla llum. Il-​kongregazzjoni Kristjana hija differenti mid-​dinja għax hi tobdi u żżomm mal-​prinċipji ġusti t’Alla. Madankollu, biex inżommu din il-​pożizzjoni għolja għandna nżommu ħajja safja individwalment. Jekk nipprattikaw id-​dnub dan iġib biss diżunur għalina personalment kif ukoll isem ħażin fuq il-​kongregazzjoni u fuq Alla.

Meta esprima dak li jġib l-​hena lil wieħed sultan, Salamun qal: “Is-​sultan jinġibed lejn il-​qaddej bil-​għaqal, imma jistmerr il-​qaddej bla ħila.” (Proverbji 14:35) U Proverbji 16:13 jgħid: “Kliem il-​ġust jogħġob lis-​slaten; huma jħobbu lil min jgħid is-​sewwa.” Iva, Ġesù Kristu, il-​Ħakkiem u s-​Sultan tagħna, ikun ferħan ħafna meta naġixxu b’mod ġust u bil-​għaqal u meta nużaw xofftejna fl-​ippridkar tas-​Saltna u fl-​attività taʼ li nagħmlu dixxipli. Tabilħaqq, ejja nibqgħu beżlin f’dan ix-​xogħol hekk kif ingawdu l-​barkiet li jiġu milli jkollna l-​biżaʼ taʼ l-​Alla l-​veru.

[Nota taʼ taħt]

[Stampa f’paġna 15]

Il-​biżaʼ t’Alla jistaʼ jiġi mgħallem