Kapitlu Sitta

Għin lill-​Adolexxent Tiegħek Biex Jiffjorixxi

1, 2. Liema sfidi u liema ferħ jistgħu jġibu s-​snin taʼ l-​adolexxenza?

LI JKOLLOK adolexxent fid-​dar huwa ferm differenti milli jkollok tifel jew tifla taʼ ħames jew saħansitra t’għaxar snin. Is-​snin taʼ l-​adolexxenza jġibu magħhom l-​isfidi u l-​problemi tagħhom stess, imma jistgħu jġibu wkoll ferħ u premji. Eżempji bħalma huma Ġużeppi, David, Ġosija, u Timotju juru li ż-​żgħażagħ jistgħu jaġixxu b’mod responsabbli u jkollhom relazzjoni mill-​aħjar maʼ Jehovah. (Ġenesi 37:​2-11; 1 Samwel 16:​11-13; 2 Slaten 22:​3-7; Atti 16:​1, 2) Ħafna adolexxenti llum jagħtu prova li huma bħalhom. X’aktarx li int taf lil xi wħud minnhom.

² Madankollu, għal xi wħud is-​snin taʼ l-​adolexxenza huma mimlijin taqlib. L-​adolexxenti jbatu bil-​burdati. Subjien u bniet adolexxenti għandhom mnejn iridu jkunu iktar indipendenti, u jistgħu ma jiħdux pjaċir bil-​limiti imposti fuqhom mill-​ġenituri tagħhom. Madankollu, żgħażagħ bħal dawn għad m’għandhomx l-​esperjenza meħtieġa u għandhom bżonn għajnuna bl-​imħabba u bil-​paċenzja mill-​ġenituri tagħhom. Iva, is-​snin taʼ l-​adolexxenza jistgħu jkunu eċċitanti, imma jistgħu jkunu wkoll taʼ konfużjoni​—kemm għall-​ġenituri u kemm għall-​adolexxenti. Iż-​żgħażagħ kif jistgħu jiġu mgħejjunin matul dawn is-​snin?

3. Il-​ġenituri b’liema mod jistgħu jagħtu lill-​ulied adolexxenti tagħhom opportunità mill-​aħjar fil-​ħajja?

³ Ġenituri li jsegwu l-​pariri tal-​Bibbja jagħtu lill-​ulied adolexxenti tagħhom l-​aqwa opportunità possibbli biex jgħaddu b’suċċess minn dawk il-​provi għal stat t’adult responsabbli. Fil-​pajjiżi kollha u matul kull perijodu taʼ żmien, il-​ġenituri u l-​adolexxenti li flimkien applikaw il-​prinċipji tal-​Bibbja ġew imberkin b’suċċess.​—Salm 119:1.

KOMUNIKAZZJONI ONESTA U BIL-​MIFTUĦ

4. Diskors kunfidenzjali għala huwa speċjalment importanti matul is-​snin taʼ l-​adolexxenza?

⁴ Il-​Bibbja tgħid: “Tifsil taʼ xogħol [“diskors kunfidenzjali,” NW] bla ħsieb jisfa fix-​xejn.” (Proverbji 15:22) Jekk diskors kunfidenzjali kien neċessarju meta t-​tfal kienu iżgħar, dan huwa speċjalment vitali matul is-​snin taʼ l-​adolexxenza​—meta ż-​żgħażagħ x’aktarx li jqattgħu inqas ħin id-​dar u iktar ħin mal-​ħbieb taʼ l-​iskola jew kumpanni oħrajn. Jekk m’hemm ebda diskors kunfidenzjali​—ebda komunikazzjoni onesta u bil-​miftuħ bejn it-​tfal u l-​ġenituri—​l-adolexxenti jistgħu jsiru stranġieri fid-​dar. Mela l-​linji taʼ komunikazzjoni kif jistgħu jinżammu miftuħin?

5. L-​adolexxenti kif huma inkuraġġiti biex iqisu l-​kwistjoni taʼ li jikkomunikaw mal-​ġenituri tagħhom?

⁵ Kemm l-​adolexxenti u kemm il-​ġenituri jridu jagħtu sehemhom f’dan. Veru, l-​adolexxenti jistgħu jsibuha iktar diffiċli li jitkellmu mal-​ġenituri tagħhom milli kienu jsibuha meta kienu iżgħar. Minkejja dan, ftakar li “fejn m’hemmx min imexxi sewwa [“direzzjoni bis-​sengħa,” NW] jaqaʼ l-​poplu; fejn hemm ħafna mexxejja tajba, hemm il-​kwiet.” (Proverbji 11:14) Dan il-​kliem japplika għal kulħadd, kemm żgħażagħ u kemm xjuħ. L-​adolexxenti li jirrealizzaw dan se jifhmu li huma għadhom jeħtieġu direzzjoni bis-​sengħa, ladarba qegħdin jiffaċċjaw kwistjonijiet iktar komplessi minn qabel. Għandhom jirrikonoxxu li l-​ġenituri kredenti tagħhom huma kkwalifikati sewwa bħala wħud li jagħtu l-​pariri għaliex għandhom iktar esperjenza fil-​ħajja u wrew bil-​provi t-​tħassib bl-​imħabba tagħhom matul is-​snin. Għalhekk, f’dan l-​istadju fil-​ħajja tagħhom, adolexxenti għaqlin m’humiex se jinjoraw lill-​ġenituri tagħhom.

6. Liema attitudni se jkollhom ġenituri għaqlin u li jħobbu inkwantu għal li jikkomunikaw maʼ l-​adolexxenti tagħhom?

⁶ Komunikazzjoni bil-​miftuħ tfisser li l-​ġenitur se jagħmel ħiltu biex ikun disponibbli meta l-​adolexxent iħoss il-​bżonn li jitkellem. Jekk int ġenitur, kun ċert li l-​komunikazzjoni hija miftuħa għall-​inqas min-​naħa tiegħek. Dan jistaʼ ma jkunx faċli. Il-​Bibbja tgħid li hemm “żmien li tiskot, u żmien li titkellem.” (Koħelet 3:7) Meta l-​adolexxent tiegħek iħoss li huwa żmien li jitkellem, jistaʼ jkun iż-​żmien tiegħek li tibqaʼ sieket. Forsi kont warrabt dak il-​ħin għal studju persunali, mistrieħ, jew xogħol fid-​dar. Xorta waħda, jekk l-​adolexxent tiegħek irid ikellmek, ipprova aġġusta l-​pjani tiegħek u agħti widen. Inkella, jistaʼ ma jerġax jipprova. Ftakar fl-​eżempju taʼ Ġesù. Darba minnhom, kien ippjana ħin biex jistrieħ. Imma meta n-​nies ġew jiffollaw madwaru biex jisimgħuh, hu ħalla l-​mistrieħ għal ħin ieħor u beda jgħallimhom. (Mark 6:​30-34) Il-​biċċa l-​kbira mill-​adolexxenti jirrealizzaw li l-​ġenituri tagħhom għandhom ħajja mgħaġġla, imma jeħtieġu assiguranza li l-​ġenituri tagħhom qegħdin hemmhekk għalihom jekk ikun hemm bżonnhom. Għalhekk, kun disponibbli u kun komprensiv.

7. Il-​ġenituri x’jeħtieġ li jevitaw?

⁷ Ipprova ftakar kif kont tħossok int meta kont adolexxent, u titlifx is-​sens t’umoriżmu tiegħek! Il-​ġenituri għandhom bżonn jieħdu gost li jkunu mat-​tfal tagħhom. Meta jkun hemm xi ħin liberu disponibbli, il-​ġenituri kif iqattgħuh? Jekk dejjem iridu jużaw il-​ħin liberu tagħhom biex jagħmlu affarijiet li ma jinkludux lill-​familja tagħhom, l-​adolexxenti tagħhom malajr se jindunaw. Jekk l-​adolexxenti jaslu għall-​konklużjoni li l-​ħbieb taʼ l-​iskola jistmawhom iktar mill-​ġenituri tagħhom, bil-​fors li se jkollhom il-​problemi.

X’GĦANDEK TIKKOMUNIKA

8. L-​apprezzament lejn l-​onestà, ix-​xogħol iebes, u l-​kondotta xierqa kif jistaʼ jiġi stampat fit-​tfal?

⁸ Jekk il-​ġenituri għadhom ma naqqxux fit-​tfal tagħhom apprezzament għall-​onestà u għax-​xogħol iebes, għandhom ċertament jagħmlu dan matul is-​snin taʼ l-​adolexxenza. (1 Tessalonkin 4:11; 2 Tessalonkin 3:10) Huwa wkoll vitali għalihom li jaċċertaw ruħhom li t-​tfal tagħhom jemmnu b’qalbhom kollha fl-​importanza taʼ li jgħixu ħajja morali u nadifa. (Proverbji 20:11) Ġenitur jikkomunika ferm f’dawn l-​oqsma permezz taʼ l-​eżempju. Sewwa sew bħalma rġiel miżżewġin mhux kredenti jistgħu “jintrebħu, mhux bil-​kliem, imma bl-​imġiba tan-​nisa tagħhom,” hekk ukoll l-​adolexxenti jistgħu jitgħallmu prinċipji xierqa mill-​kondotta tal-​ġenituri tagħhom. (1 Pietru 3:1.) Xorta waħda, l-​eżempju waħdu qatt m’huwa biżżejjed, ladarba t-​tfal huma esposti wkoll għal ħafna eżempji ħżiena u għal viżibilju taʼ propaganda li tħajjar barra d-​dar. Ġenituri li jimpurtahom, għalhekk, jeħtieġ li jkunu jafu kif jaħsbuha l-​adolexxenti tagħhom fuq dak li jaraw u jisimgħu, u dan jirrikjedi konversazzjoni siewja.​—Proverbji 20:5.

9, 10. Il-​ġenituri għala għandhom ikunu ċerti li jistruwixxu lit-​tfal tagħhom dwar kwistjonijiet sesswali, u dan kif jistgħu jagħmluh?

⁹ Dan huwa partikolarment minnu meta niġu għal kwistjonijiet sesswali. Ġenituri, tħossukom imbarazzati biex tiddiskutu s-​sess mat-​tfal tagħkom? Saħansitra jekk tkunu, agħmlu l-​isforz biex tagħmluh dan, għax iż-​żgħażagħ tagħkom żgur li se jsiru jafu dwar dan is-​suġġett mingħand xi ħadd. Jekk ma jsirux jafuh mingħandkom, min jaf x’informazzjoni mħawda se jiksbu? Fil-​Bibbja, Jehovah ma jevitax kwistjonijiet taʼ natura sesswali, u lanqas m’għandhom jevitawhom il-​ġenituri.​—Proverbji 4:​1-4; 5:​1-21.

¹⁰ Niżżu ħajr ’l Alla, il-​Bibbja fiha gwida ċara fejn jikkonċerna l-​kondotta sesswali, u l-​Watchtower Society ippubblikat ħafna informazzjoni t’għajnuna li turi li din il-​gwida għadha tapplika fid-​dinja moderna. Għala ma tagħmilx użu minn din l-​għajnuna? Per eżempju, għala ma tirrevedix maʼ ibnek jew bintek kapitli adattati fl-​ewwel u t-​tieni Volum tal-​ktieb Questions Young People Ask—Answers That Work? Tistaʼ tissorprendi ruħek bir-​riżultati.

11. Liema huwa l-​iktar mod effettiv li bih il-​ġenituri jgħallmu lit-​tfal tagħhom kif jaqdu lil Jehovah?

¹¹ Liema hu l-​iktar suġġett importanti li l-​ġenituri u t-​tfal għandhom jiddiskutu? L-​appostlu Pawlu rrefera għal dan meta kiteb: “Rabbuhom [lil uliedkom] fid-​dixxiplina u t-​twiddib tal-​Mulej.” (Efesin 6:4) It-​tfal għandhom bżonn ikomplu jitgħallmu dwar Jehovah. B’mod partikulari, għandhom bżonn jitgħallmu jħobbuh, u għandhom ikunu jridu jaqduh. Hawnhekk, ukoll, ħafna jistaʼ jiġi mgħallem bl-​eżempju. Jekk l-​adolexxenti jaraw li l-​ġenituri tagħhom iħobbu ’l Alla ‘b’qalbhom kollha, b’ruħhom kollha, u b’moħħhom kollu’ u li dan jipproduċi frott tajjeb fil-​ħajjiet tal-​ġenituri tagħhom, huma jistgħu b’mod xieraq jiġu influwenzati biex jagħmlu bħalhom. (Mattew 22:37) Bl-​istess mod, jekk żgħażagħ jaraw li l-​ġenituri tagħhom għandhom ħarsa raġonevoli lejn l-​affarijiet materjali, billi jpoġġu s-​Saltna t’Alla l-​ewwel, huma se jiġu mgħejjunin biex jiżviluppaw l-​istess attitudni mentali.​—Koħelet 7:12; Mattew 6:​31-33.

12, 13. Liema punti għandu wieħed iżomm f’moħħu jekk l-​istudju tal-​familja għandu jkun suċċess?

¹² Studju tal-​Bibbja mal-​familja kull ġimgħa huwa għajnuna li tispikka fl-​ikkomunikar taʼ valuri spiritwali liż-​żgħażagħ. (Salm 119:​33, 34; Proverbji 4:​20-23) Li jsir studju bħal dan regolarment huwa vitali. (Salm 1:​1-3) Il-​ġenituri u t-​tfal tagħhom għandhom jirrealizzaw li l-​affarijiet l-​oħrajn iridu jiġu ppjanati madwar l-​istudju tal-​familja, mhux viċeversa. Iktar minn hekk, l-​attitudni xierqa hija essenzjali jekk l-​istudju tal-​familja għandu jkun effettiv. Wieħed missier qal: “Is-​sigriet huwa li min jikkonduċi jinkuraġġixxi atmosfera rilassata u madankollu taʼ rispett matul l-​istudju tal-​familja​—informali imma mhix redikola. Il-​bilanċ korrett jistaʼ ma jkunx dejjem faċli li jinkiseb, u ż-​żgħażagħ taʼ spiss se jkollhom bżonn jaġġustaw l-​attitudni tagħhom. Jekk l-​affarijiet ma jmorrux sew għal darba jew tnejn, ippersevera u ħares ’il quddiem għad-​darba li jmiss.” Dan l-​istess missier qal li fit-​talba tiegħu qabel kull studju, talab speċifikament l-​għajnuna mingħand Jehovah għall-​fehma korretta min-​naħa taʼ dawk kollha involuti.​—Salm 119:66.

¹³ Hija r-​responsabbiltà taʼ ġenituri kredenti li jikkonduċu l-​istudju tal-​familja. Veru, xi ġenituri jistgħu ma jkunux maqtugħin bħala għalliema, u jistaʼ jkun diffiċli għalihom li jsibu modi kif l-​istudju tal-​familja jagħmluh interessanti. Minkejja dan, jekk int tħobb lill-​adolexxenti tiegħek “bil-​għemil u bil-​verità,” int se tkun tixtieq li tgħinhom b’mod umli u onest biex javanzaw spiritwalment. (1 Ġwann 3:18) Għandhom mnejn igergru kultant, imma x’aktarx li se jindunaw bl-​interess profond tiegħek fil-​benesseri tagħhom.

14. Dewteronomju 11:​18, 19 kif jistaʼ jiġi applikat meta jiġu kkomunikati affarijiet spiritwali lill-​adolexxenti?

¹⁴ L-​istudju tal-​familja m’huwiex l-​unika okkażjoni biex jiġu kkomunikati kwistjonijiet li huma spiritwalment importanti. Tiftakru int il-​kmand li Jehovah ta lill-​ġenituri? Hu qal: “Qiegħdu dawn il-​kelmiet tiegħi f’qalbkom u f’moħħkom; orbtuhom b’sinjali maʼ idejkom u dendluhom bejn għajnejkom. Għallmuhom lill-​uliedkom u tkellmu fuqhom meta tkun mistrieħ f’darek u miexi fit-​triq; meta timtedd u meta tqum.” (Dewteronomju 11:​18, 19; ara wkoll Dewteronomju 6:​6, 7.) Dan ma jfissirx li l-​ġenituri jridu l-​ħin kollu jippridkaw lit-​tfal tagħhom. Imma kap tal-​familja li jħobb għandu dejjem ikun attent għal opportunitajiet biex jibni l-​prospett spiritwali tal-​familja tiegħu.

DIXXIPLINA U RISPETT

15, 16. (a) X’inhi d-​dixxiplina? (b) Min hu responsabbli għall-​amministrar tad-​dixxiplina, u min għandu r-​responsabbiltà li jassigura li dak li jkun se jagħti kasha?

¹⁵ Id-​dixxiplina hija taħriġ li jikkorreġi, u tinkludi komunikazzjoni. Id-​dixxiplina ġġorr il-​ħsieb taʼ korrezzjoni iktar milli taʼ kastig​—għalkemm kastig jistaʼ jkun neċessarju. Uliedek kienu jeħtieġu d-​dixxiplina meta kienu iżgħar, u issa li huma adolexxenti, għadhom jeħtieġu xi forma tagħha, forsi saħansitra iktar. Adolexxenti għaqlin jafu li dan huwa veru.

¹⁶ Il-​Bibbja tgħid: “L-​iblah jistmell it-​tagħlim taʼ missieru; bil-​għaqal hu min jaf jilqaʼ t-​twiddib.” (Proverbji 15:5) Aħna nitgħallmu ħafna minn din l-​iskrittura. Din timplika li d-​dixxiplina se tingħata. Adolexxent ma jistax “jilqaʼ t-​twiddib” jekk dan ma jingħatax. Jehovah iqiegħed ir-​responsabbiltà għall-​amministrar tad-​dixxiplina fuq il-​ġenituri, partikolarment il-​missier. Madankollu, ir-​responsabbiltà li jagħti widen għal dik id-​dixxiplina tappartjeni lill-​adolexxent. Hu se jitgħallem iktar u jagħmel inqas żbalji jekk jagħti kas id-​dixxiplina għaqlija taʼ missieru u ommu. (Proverbji 1:8) Il-​Bibbja tgħid: “Faqar u għajb fuq min iwarrab it-​tagħlim, imma ġieħ ikollu min jilqaʼ t-​twiddib.”​—Proverbji 13:18.

17. Il-​ġenituri liema bilanċ għandhom bżonn jimmiraw għalih meta jkunu qegħdin jamministraw id-​dixxiplina?

¹⁷ Meta jiddixxiplinaw lill-​adolexxenti, il-​ġenituri jeħtieġu li jkunu bbilanċjati. Għandhom jevitaw li jkunu tant stretti li jirritaw lil uliedhom, forsi billi saħansitra jagħmlu ħsara lill-​fiduċja tat-​tfal tagħhom fihom infushom. (Kolossin 3:21) U madankollu l-​ġenituri ma jridux ikunu tant permissivi li t-​tfal tagħhom jiġu mċaħħdin minn taħriġ vitali. Permissività bħal din tistaʼ tkun diżastruża. Proverbji 29:17 jgħid: “Widdeb lil ibnek, u hu jkun il-​hena tiegħek; ikun il-​faraġ taʼ qalbek.” Madankollu, vers 21 jgħid: “Min ifissed il-​qaddej minn ċkunitu, fl-​aħħar jispiċċa biex jidħol floku.” Għalkemm dan il-​vers qiegħed jitkellem fuq qaddej, japplika bl-​istess mod għal kwalunkwe tifel jew tifla fid-​dar.

18. Id-​dixxiplina hija evidenza taʼ liema ħaġa, u x’jiġi evitat meta l-​ġenituri jamministraw dixxiplina konsistenti?

¹⁸ Fil-​verità, dixxiplina xierqa hija prova taʼ l-​imħabba li ġenitur għandu għal ibnu. (Lhud 12:​6, 11) Jekk int ġenitur, taf li huwa diffiċli biex iżżomm dixxiplina konsistenti u raġonevoli. Biex iżżomm il-​paċi, għandu mnejn jidher iktar faċli li tħalli adolexxent stinat jagħmel li jrid. Eventwalment, madankollu, ġenitur li jsegwi din il-​korsa se jħallas b’dar li ma tistax tiġi kkontrollata.​—Proverbji 29:15; Galatin 6:9.

XOGĦOL U LOGĦOB

19, 20. Il-​ġenituri kif jistgħu jittrattaw bil-​għaqal mal-​kwistjoni taʼ rikreazzjoni għall-​adolexxenti tagħhom?

¹⁹ Fi żminijiet iktar bikrin it-​tfal kienu ġeneralment mistennijin li jgħinu fid-​dar jew fir-​rabaʼ. Illum ħafna adolexxenti għandhom partita ħin liberu mingħajr superviżjoni. Biex timla dak il-​ħin, id-​dinja kummerċjali tipprovdi abbundanza kbira taʼ materjal għad-​divertiment. Żid maʼ dan il-​fatt li d-​dinja tpoġġi ftit ferm valur fuq il-​livelli tal-​Bibbja dwar il-​moralità, u għandek l-​ingredjenti għal diżastru potenzjali.

²⁰ Għalhekk, il-​ġenitur prudenti jżomm id-​dritt li jagħmel id-​deċiżjonijiet finali dwar ir-​rikreazzjoni. Tinsiex, iżda, li l-​adolexxent qiegħed jikber. Kull sena, hu jew hi x’aktarx li se jittamaw li jiġu ttrattati iktar bħala adulti. B’hekk, huwa għaqli għal ġenitur li jagħti iktar libertà fl-​għażla taʼ rikreazzjoni hekk kif l-​adolexxent ikun qiegħed jikber​—sakemm dawk l-​għażliet jirriflettu progress lejn maturità spiritwali. Kultant, l-​adolexxent jistaʼ jagħmel għażliet mhux għaqlin f’dik li hija mużika, ħbieb, u affarijiet bħal dawn. Meta jiġri hekk, dan għandu jiġi diskuss maʼ l-​adolexxent sabiex isiru għażliet aħjar fil-​futur.

21. Ir-​raġonevolezza fl-​ammont taʼ ħin imqattaʼ fir-​rikreazzjoni kif se tipproteġi lil adolexxent?

²¹ Kemm għandu jiġi mwarrab ħin għar-​rikreazzjoni? F’xi pajjiżi l-​adolexxenti jingħataw l-​impressjoni li huma intitolati għal divertiment kontinwu. Għalhekk, adolexxent għandu mnejn jippjana l-​iskeda tiegħu sabiex imur minn divertiment għal ieħor. Huwa kompitu tal-​ġenituri li jwasslu t-​tagħlima li xi ħin għandu jiġi mqattaʼ wkoll fuq affarijiet oħrajn, bħalma huma l-​familja, l-​istudju persunali, is-​sħubija maʼ persuni maturi spiritwalment, il-​laqgħat Kristjani, u l-​faċendi fid-​dar. Dan se jevita li “l-​pjaċiri tal-​ħajja” joħonqu l-​Kelma t’Alla.​—Luqa 8:​11-15.

22. Ir-​rikreazzjoni maʼ xiex għandha tiġi bbilanċjata fil-​ħajja t’adolexxent?

²² Is-​Sultan Salamun qal: “Hekk fhimt li għall-​bnedmin m’hemmx aħjar milli jkunu ferħana u jgawdu ġidhom f’ħajjithom. Għax li wieħed jiekol u jixrob u jduq mill-​frott taʼ xogħlu, dan ukoll hu don t’Alla.” (Koħelet 3:​12, 13) Iva, li wieħed jithenna huwa parti minn ħajja bbilanċjata. Imma hekk ukoll huwa x-​xogħol iebes. Ħafna adolexxenti llum ma jsirux jafu s-​sodisfazzjon li jiġi minn xogħol iebes jew is-​sentiment taʼ rispett lejhom infushom li jiġi milli jiffaċċjaw xi problema u jsolvuha. Xi wħud ma jingħatawx l-​opportunità biex jiżviluppaw xi sengħa jew mistier li bih imantnu lilhom infushom iktar ’il quddiem fil-​ħajja. Hawnhekk għandna sfida reali għall-​ġenitur. Se taċċerta ruħek int li l-​adolexxent tiegħek ikollu opportunitajiet bħal dawn? Jekk jirnexxilek tgħallem lill-​adolexxent tiegħek biex japprezza u saħansitra jieħu gost b’xogħol iebes, hu jew hi se jiżviluppaw attitudni tajba li se ġġib għomor mimli benefiċċji.

MINN ADOLEXXENT GĦAL ADULT

23. Il-​ġenituri kif jistgħu jinkuraġġixxu lill-​adolexxenti tagħhom?

²³ Saħansitra meta jkollok problemi maʼ l-​adolexxent tiegħek, xorta tgħodd l-​iskrittura: “L-​imħabba ma tintemm qatt.” (1 Korintin 13:8) Qatt tieqaf milli turi l-​imħabba li int bla dubju tħoss. Staqsi lilek innifsek, ‘Nikkumplimenta jien lil kull tifel u tifla għas-​suċċessi tagħhom f’li jittrattaw mal-​problemi u f’li jsolvu l-​ostakli? Naħtaf jien opportunitajiet biex nesprimi l-​imħabba u l-​apprezzament tiegħi lejn it-​tfal tiegħi, qabel ma jintilfu dawk l-​opportunitajiet?’ Għalkemm kultant jistaʼ jkun hemm nuqqas taʼ ftehim, jekk l-​adolexxenti jħossuhom assigurati minn imħabbtek għalihom, x’aktarx li jkunu iktar lesti li jirreċiprokaw dik l-​imħabba.

24. Liema prinċipju Skritturali japplika bħala regola ġenerali fit-​trobbija tat-​tfal, imma wieħed x’għandu jżomm f’moħħu?

²⁴ M’għandniex xi ngħidu, hekk kif it-​tfal jikbru u jsiru adulti, huma eventwalment se jieħdu deċiżjonijiet ibsin ferm għalihom infushom. F’xi każi lill-​ġenituri jistgħu ma jogħġbuhomx dawk id-​deċiżjonijiet. Xi ngħidu jekk xi ħadd mit-​tfal jiddeċiedi li ma jkomplix jaqdi lil Alla Jehovah? Dan jistaʼ jiġri. Saħansitra xi wħud mill-​ulied spirti taʼ Jehovah stess irrifjutaw il-​parir tiegħu u saru ribellużi. (Ġenesi 6:2; Ġuda 6) It-​tfal m’humiex kompjuters, li jistgħu jiġu pprogrammati biex jaġixxu kif irridu aħna. Huma ħlejjaq bir-​rieda ħielsa, responsabbli quddiem Jehovah għad-​deċiżjonijiet li jieħdu. Xorta waħda, Proverbji 22:6 japplika bħala regola ġenerali: “Ħarreġ tifel jimxi fit-​triq it-​tajba; ma joħroġx minnha lanqas meta jixjieħ.”

25. Liema huwa l-​aħjar mod għall-​ġenituri biex juru gratitudni lejn Jehovah għall-​privileġġ taʼ l-​irwol taʼ ġenitur?

²⁵ Mela allura, uri lit-​tfal tiegħek ħafna mħabba. Agħmel l-​aħjar tiegħek biex issegwi l-​prinċipji tal-​Bibbja f’li trabbihom. Agħti eżempju mill-​aħjar taʼ kondotta devota. B’hekk se tagħti lit-​tfal tiegħek l-​aqwa opportunità biex jikbru u jsiru adulti responsabbli li jibżgħu minn Alla. Dan huwa l-​aħjar mod li bih il-​ġenituri juru l-​gratitudni lejn Jehovah għall-​privileġġ taʼ l-​irwol taʼ ġenitur.

DAWN IL-​PRINĊIPJI TAL-​BIBBJA KIF JISTGĦU JGĦINU . . . LILL-​ĠENITURI BIEX IRABBU LILL-​ADOLEXXENTI TAGĦHOM?

Il-​komunikazzjoni hija meħtieġa.​—Proverbji 15:22.

Għandna nikkunsidraw regolarment il-​Kelma t’Alla.​—Salm 1:​1, 2.

Bniedem għaqli jagħti widen għad-​dixxiplina. ​—Proverbji 15:5.

Kemm ix-​xogħol u kemm il-​logħob għandhom il-​post tagħhom.​—Koħelet 3:​12, 13.

[Stampa f’paġna 67]

Kun disponibbli meta l-​adolexxent tiegħek ikollu bżonn jitkellem

[Stampa f’paġna 69]

Studju tal-​Bibbja regulari huwa essenzjali għall-​familja

[Stampa f’paġna 70]

Esprimi mħabba u apprezzament għat-​tfal tiegħek