Tiftakar Int?

Ħadt pjaċir taqra l-​ħarġiet reċenti taʼ It-​Torri taʼ l-​Għassa? Jekk iva, se ssibu taʼ interess li tiftakar dan li ġej:

◻ Għala jistaʼ jkollna fiduċja fl-​għażla li ssir minn Jehovah taʼ individwi biex jiggwidaw lill-​poplu tiegħu?

Jehovah jagħżel għal ċerti responsabbiltajiet individwi li għandhom il-​kwalitajiet partikulari meħtiġin biex jiggwidaw lill-​poplu tiegħu fit-​triq li jridhom imorru f’dak iż-​żmien partikulari.—8/15, paġna 14.

◻ X’nistgħu nitgħallmu mill-​esperjenza taʼ Ġona?

Ġona kien jaħseb wisq dwaru nnifsu u ftit ferm f’oħrajn. Nistgħu nitgħallmu minn Ġona billi nżommu lilna nfusna u s-​sentimenti persunali tagħna fit-​tieni post.—8/15, paġna 19.

◻ B’liema mod jistaʼ jingħad li “Isem il-​Mulej [“Jehovah,” NW] hu torri qawwi”? (Proverbji 18:10)

Li nsibu l-​kenn fl-​isem t’Alla jfisser li jkollna fiduċja f’Jehovah nnifsu. (Salm 20:2 [Salm 20:1, NW]; Salm 122:4) Ifisser li wieħed jappoġġa s-​sovranità tiegħu, jobdi l-​liġijiet u l-​prinċipji tiegħu, ikollu fidi fil-​wegħdi tiegħu, u jagħtih devozzjoni esklużiva. (Isaija 50:10; Lhud 11:6)—9/1, paġna 10.

◻ Il-​metodu t’għoti taʼ xiehda li Pawlu uża quddiem id-​dinjitarji kif jipprovdilna eżempju tajjeb?

Pawlu uża d-​diskrezzjoni meta tkellem mas-​Sultan Agrippa billi enfasizza punti li kemm hu u kemm Agrippa kienu jaqblu fuqhom. Bl-​istess mod, għandna nisħqu fuq l-​aspetti pożittivi taʼ l-​aħbar tajba, billi nenfasizzaw tamiet li kemm aħna u kemm is-​semmiegħa naqblu fuqhom. (1 Korintin 9:22)—9/1, paġna 31.

◻ Min jibbenefika mill-​paċenzja taʼ Jehovah?

Minħabba l-​paċenzja taʼ Jehovah, miljuni oħrajn illum qed jingħataw l-​opportunità li jiġu salvati minn “jum il-​Mulej” li riesaq. (2 Pietru 3:9-15) Il-​paċenzja tiegħu qiegħda tħalli wkoll lil kull wieħed u waħda minna ‘nħabirku għas-​salvazzjoni tagħna bil-​biżaʼ u t-​tregħid.’ (Filippin 2:12)—9/15, paġna 20.

◻ Kemm kienet taʼ valur it-​traduzzjoni tas-​Settanta tal-​Bibbja?

Din it-​traduzzjoni kellha parti prominenti fit-​tixrid taʼ l-​għarfien dwar Alla Jehovah u Saltnatu b’Ġesù Kristu bħala Sultan. Permezz tas-​Settanta, sar xogħol importanti biex tiġi ppreparata t-​triq għall-​Ġentili u l-​Lhud li kienu jitkellmu bil-​Grieg fl-​ewwel seklu biex jaċċettaw l-​aħbar tajba tas-​Saltna.—9/15, paġna 30.

◻ Il-​parabbola taʼ l-​iben il-​ħali x’tgħallimna dwar Alla?

L-​ewwel, li Jehovah “jagħder u jħenn; tqil biex jagħdab u kbir fit-​tjieba [“qalb tajba bl-​imħabba,” NW] u l-​fedeltà.” (Eżodu 34:6) It-​tieni, hu ‘[“lest biex,” KŻ] jaħfer’ meta bidla fil-​qalb tipprovdilu bażi biex jestendi l-​ħniena. (Salm 86:5)—10/1, paġni 12, 13.

◻ Il-​kundizzjonijiet paċifiċi mwegħdin f’Isaija 65:21-25 meta se jitwettqu?

Bħala adoraturi magħqudin taʼ Jehovah fil-​ġenna spiritwali llum, il-​midlukin u dawk min-​“nagħaġ oħra” qegħdin issa jesperjenzaw paċi mogħtija minn Alla. (Ġwann 10:16) U paċi bħal din se testendi għal ġol-​Ġenna fiżika, meta ‘r-​rieda t’Alla se sseħħ maʼ l-​art kollha, saħansitra bħalma sseħħ fis-​sema.’ F’dak iż-​żmien il-​kliem tal-​profeta Isaija se jitwettaq bis-​sħiħ. (Mattew 6:10)—10/15, paġna 24.

◻ Il-​Kristjani għala jiċċelebraw l-​anniversarju tat-​tieġ imma mhux għeluq sninhom?

Il-​Bibbja ma tpinġihx ikrah iż-​żwieġ. Hija kompletament kwistjoni persunali jekk uħud Kristjani jagħżlu li jagħtu kas taʼ l-​anniversarju tat-​tieġ billi jirriflettu fuq il-​ferħ taʼ dik l-​okkażjoni u fuq id-​determinazzjoni tagħhom biex jaħdmu ħalli jirnexxu bħala koppja. Madankollu, l-​uniċi ċelebrazzjonijiet taʼ għeluq is-​snin iddokumentati fil-​Bibbja huma dawk taʼ nies pagani, u huma marbutin maʼ atti krudili.—10/15, paġni 30, 31.

◻ Fit-​tixbieha taʼ Pawlu ddokumentata fl-​1 Korintin 3:12, 13, in-​“nar” x’jirrappreżenta, u l-​Kristjani kollha taʼ xiex iridu jkunu konxji?

Hemm nar li lkoll kemm aħna niffaċċjaw fil-​ħajja​—provi fuq il-​fidi tagħna. (Ġwann 15:20; Ġakbu 1:2, 3) Dawk kollha li qed ngħallmuhom il-​verità se jiġu pprovati. Jekk ma ngħallmuhomx tajjeb, jistaʼ jkun hemm konsegwenzi taʼ swied il-​qalb, bħalma wissa Pawlu. (1 Korintin 3:15)—11/1, paġna 11.

◻ Noè kif ‘kien jimxi m’Alla’? (Ġenesi 6:9)

Noè mexa m’Alla fis-​sens li hu għamel dak li qallu Alla. Minħabba li ddedika ħajtu biex jagħmel ir-​rieda t’Alla, Noè gawda relazzjoni intima u kordjali m’Alla.—11/15, paġna 10.

◻ Il-​fatt li ma nafux il-​waqt eżatt meta se tiġi esegwita l-​vendetta t’Alla fuq il-​ħżiena jiftħilna liema opportunitajiet?

Dan jagħtina l-​opportunità li nuru li aħna verament inħobbu lil Jehovah u li rridu nimxu fil-​mogħdijiet tiegħu għal dejjem. Dan juri wkoll li aħna leali lejn Alla u nafdaw fil-​mod kif hu jmexxi l-​affarijiet. Iktar minn hekk, dan jgħinna nibqgħu għassa u mqajmin spiritwalment. (Mattew 24:42-44)—11/15, paġna 18.

◻ X’ifisser li npoġġu fidi “fl-​isem taʼ l-​Iben taʼ Alla”? (1 Ġwann 5:13)

Ifisser li nobdu l-​kmandamenti kollha taʼ Kristu, inkluż il-​kmandament tiegħu li ‘nħobbu lil xulxin.’ (Ġwann 15:14, 17) L-​imħabba tfittex li tagħmel il-​ġid lil oħrajn. Din twarrab għalkollox kull preġudizzju razzjali, reliġjuż, u soċjali.—12/1, paġna 7.

◻ Ix-​Xhieda taʼ Jehovah għala huma ‘mibgħudin’? (Mattew 10:22)

Ix-​Xhieda taʼ Jehovah jinbagħdu inġustament għall-​istess raġunijiet li għalihom ġew ippersegwitati l-​Kristjani bikrin. L-​ewwel, ix-​Xhieda taʼ Jehovah jaġixxu skond it-​twemmin reliġjuż tagħhom b’modi li ma tantx jagħmluhom popolari m’oħrajn. It-​tieni, huma kienu l-​mira t’akkużi foloz​—gideb sfaċċat u interpretazzjonijiet mgħawġin taʼ dak li jemmnu.—12/1, paġna 14.