“Fejqan għal Żokortok”

HUWA maħsub li ħafna mill-​mard tal-​bniedem jibda minn kundizzjonijiet taʼ stress emozzjonali bħalma huma l-​biżaʼ, in-​niket, l-​għira, is-​sentimenti taʼ rabja li wieħed iżomm ġo fih, il-​mibegħda, u s-​sens taʼ ħtija. Meta tqis dan, kemm hija taʼ faraġ il-​Bibbja meta tgħid li l-​‘biżaʼ minn Jehovah’ hu “fejqan għal żokortok u serħan għal għadmek”!—Proverbji 3:​7, 8, NW.

L-għadam huwa l-​qafas li fuqu jistrieħ il-​ġisem. Għalhekk, il-​Bibbja tuża l-​kelma ‘għadam’ b’mod simboliku, biex jirrappreżenta lill-​bniedem innifsu—speċjalment meta dan jiġi effettwat minn emozzjonijiet u sentimenti profondi. Imma kif inhu li l-​biżaʼ minn Jehovah hu “fejqan għal żokortok”?

L-istudjużi tal-​Bibbja għandhom opinjonijiet differenti dwar it-​tifsir taż-​‘żokra’ f’dan il-​vers. Wieħed minnhom jgħid li minħabba li din qegħda fil-​“parti ċentrali tal-​ġisem,” iż-​‘żokra’ tistaʼ tirrappreżenta lill-​organi vitali kollha. Studjuż ieħor jissuġġerixxi li l-​kelma ‘żokra’ tistaʼ tirreferi għall-​kurdun taż-​żokra, bħalma hi wżata f’Eżekjel 16:4. Jekk dan hu minnu, Proverbji 3:8 jistaʼ jkun li qed jenfasizza l-​ħtieġa li niddependu kompletament minn Alla, bħalma tarbija fil-​ġuf tiddependi għalkollox minn ommha għall-​ikel. Jerġaʼ idea oħra hi li ż-​‘żokra’ hawnhekk tistaʼ tirreferi għall-​muskoli u l-​għeruq tal-​ġisem. Meta wieħed jikkunsidra l-​bqija taʼ dan il-​vers, jistaʼ jkun li dawn il-​partijiet qed jissemmew f’kuntrast maʼ l-​“għadam,” li huwa iktar solidu.

Hi x’inhi t-​tifsira eżatta, dwar dan m’hemm ebda dubju: Huwa għaqli li nuru biżaʼ riverenzjali minn Jehovah. Jekk ngħixu fi qbil mal-​prinċipji t’Alla, dan jistaʼ jgħin biex inkunu b’saħħitna fiżikament issa. Iktar minn hekk, billi nagħmlu dan jistaʼ jkollna l-​favur taʼ Jehovah. Dan se jwassal biex inkunu nistgħu ngawdu ħajja bla tmiem kif ukoll saħħa fiżika u emozzjonali perfetta fid-​dinja l-​ġdida tiegħu li ġejja.—Isaija 33:24; Apokalissi 21:4; 22:2.

[Sors tal-​Istampa f’paġna 32]

Dr. G. Moscoso/SPL/Photo Researchers