Liema Ħarsa Għandu Jkollna Lejn in-​Nies Hekk Kif Joqrob il-​Jum taʼ Jehovah?

“Mhux għax jiddawwar il-​Mulej li jtemm il-​wegħdiet tiegħu, . . . imma qiegħed jistabar bikom għax ma jridx li xi ħadd jintilef, imma li kulħadd jersaq għall-​indiema.”—2 PIETRU 3:9.

1, 2. (a) Jehovah kif iħares lejn in-​nies illum? (b) Liema mistoqsijiet nistgħu nistaqsu lilna nfusna?

IL-​QADDEJJA taʼ Jehovah għandhom l-​inkarigu li jagħmlu “dixxipli mill-​ġnus kollha.” (Mattew 28:19) Waqt li nwettqu dan l-​inkarigu u nistennew “il-​Jum il-​kbir tal-​Mulej,” jeħtieġ li nħarsu lejn in-​nies bħalma jħares lejhom hu. (Sofonija 1:14) U Jehovah kif iħares lejhom? L-​appostlu Pietru jgħid: “Mhux għax jiddawwar il-​Mulej li jtemm il-​wegħdiet tiegħu, kif jaħsbu xi wħud, imma qiegħed jistabar bikom għax ma jridx li xi ħadd jintilef, imma li kulħadd jersaq għall-​indiema.” (2 Pietru 3:9) Alla jħares lejn il-​bnedmin bħala individwi li jistgħu jaslu għall-​indiema. Hu “jrid li l-​bnedmin kollha jsalvaw u jaslu biex jagħrfu l-​verità.” (1 Timotju 2:4) Kemm jifraħ Jehovah meta wieħed mill-​agħar ‘jerġaʼ lura minn triqtu biex jgħix’!—Eżekjel 33:11.

² Għandna aħna personalment l-​istess ħarsa taʼ Jehovah lejn in-​nies? Nagħmlu aħna bħalu u nikkunsidraw lil individwi taʼ kull razza u nazzjon bħala li jistgħu jkunu “nagħaġ tal-​mergħa tiegħu”? (Salm 100:3; Atti 10:​34, 35) Ejja nikkunsidraw żewġ eżempji li juru l-​importanza li jkollna l-​ħarsa taʼ Jehovah. Fiż-​żewġ rakkonti l-​qerda kienet qrib ħafna, u l-​qaddejja taʼ Jehovah ġew mgħarrfin minn qabel dwar dan. Dawn l-​eżempji huma speċjalment sinifikanti waqt li qegħdin nistennew il-​jum il-​kbir taʼ Jehovah.

Abraham Kellu l-​Istess Ħarsa taʼ Jehovah

3. Jehovah kif kien iħares lejn l-​abitanti taʼ Sodoma u Gomorra?

³ L-​ewwel eżempju jinvolvi l-​patrijarka leali Abraham u l-​bliet mill-​agħar taʼ Sodoma u Gomorra. Meta Jehovah semaʼ “l-​għajta qawwija taʼ Sodoma u Gomorra,” ma qeridhomx mill-​ewwel lil dawk il-​bliet u l-​abitanti tagħhom. L-​ewwel għamel investigazzjoni. (Ġenesi 18:​20, 21) Żewġ anġli ntbagħtu lejn Sodoma u marru joqogħdu fid-​dar tar-​raġel ġust Lot. Fil-​lejla li waslu l-​anġli, “in-​nies tal-​belt . . . miż-​żgħir sal-​kbir, il-​poplu kollu minn kull naħa, dawwru d-​dar,” għax riedu li jkollhom atti omosesswali maʼ l-​anġli. Biċ-​ċar, il-​kundizzjoni t’għajb taʼ l-​abitanti tal-​belt uriet li din kien ħaqqha tinqered. Madankollu, l-​anġli qalu lil Lot: “Lil min fadallek aktar? Ħatnek, uliedek, subjien u bniet, u kull ma għandek fil-​belt, oħroġhom minn dan il-​post.” Jehovah fetaħ it-​triq biex isalva lil xi wħud mir-​residenti taʼ dik il-​belt, imma fl-​aħħar mill-​aħħar, Lot u ż-​żewġt ibniet tiegħu biss inħelsu mill-​qerda.—Ġenesi 19:​4, 5, 12, 16, 23-26.

4, 5. Abraham għala talab għall-​abitanti taʼ Sodoma, u kienet il-​ħarsa tiegħu lejn in-​nies fi qbil maʼ dik taʼ Jehovah?

⁴ Issa, ejja mmorru lura għaż-​żmien meta Jehovah għarraf l-​intenzjoni tiegħu li jispezzjona l-​bliet taʼ Sodoma u Gomorra. Kien dakinhar li Abraham talab: “U jekk hemm ħamsin bniedem ġust f’nofs il-​belt, jaqaw lil dawn se teqridhom u ma taħfirx lill-​pajjiż minħabba l-​ħamsin ġust li hemm f’nofsha? Ma jkun qatt li inti tagħmel ħaġa bħal din, li toqtol il-​bniedem ġust mal-​ħażin, u l-​ġust u l-​ħażin tmisshom l-​istess xorti. Ma jkun qatt minnek, l-​imħallef taʼ l-​art kollha, li ma tagħmilx ġustizzja.” Abraham uża l-​espressjoni “ma jkun qatt minnek” darbtejn. Mill-​esperjenza tiegħu, Abraham kien jaf li Jehovah ma kienx se jeqred il-​ġusti flimkien mal-​ħżiena. Meta Jehovah qal li ma kienx se jeqred lil Sodoma jekk kien hemm “ħamsin bniedem ġust f’nofs il-​belt,” Abraham beda jnaqqas ftit ftit in-​numru sakemm wasal għal għaxra biss.—Ġenesi 18:​22-33.

⁵ Kien Jehovah se jismaʼ t-​talbiet t’Abraham kieku dawn ma kinux fi qbil mal-​ħarsa tiegħu stess? Dażgur li le. Bħala l-​“ħabib taʼ Alla,” Abraham mid-​dehra kien jaf x’kienet il-​ħarsa t’Alla u kellu l-​istess ħarsa Tiegħu. (Ġakbu 2:23) Meta Jehovah dawwar l-​attenzjoni tiegħu lejn Sodoma u Gomorra, hu kien lest jismaʼ t-​talbiet li għamillu Abraham. Għala? Għaliex Missierna tas-​sema “ma jridx li xi ħadd jintilef, imma li kulħadd jersaq għall-​indiema.”

Il-​Ħarsa li Ġona Kellu Lejn in-​Nies ​—Kuntrast Qawwi

6. In-​Ninwin kif irreaġixxew għall-​proklamazzjoni taʼ Ġona?

⁶ Issa ikkunsidra t-​tieni eżempju​—dak taʼ Ġona. Din id-​darba l-​belt li kienet kundannata biex tinqered kienet Ninwè. Il-​profeta Ġona ntqallu biex jipproklama li l-​ħażen tal-​belt kien ‘telaʼ quddiem Jehovah.’ (Ġona 1:​2, NW) Bl-​irħula taʼ madwarha inklużi, Ninwè kienet belt kbira, ‘trid tliet ijiem biex timxiha.’ Meta Ġona finalment obda u daħal Ninwè, hu baqaʼ jiddikjara: “Erbgħin jum ieħor, u Ninwè ssir ħerba!” Malli semgħu dan, “in-​nies taʼ Ninwè emmnu f’Alla, nedew sawma u libsu x-​xkejjer.” Saħansitra, anki s-​sultan taʼ Ninwè nidem.—Ġona 3:​1-6.

7. Jehovah kif ħares lejn l-​attitudni taʼ ndiema li wrew in-​Ninwin?

⁷ X’kuntrast kien dan mal-​mod kif wieġbu n-​nies taʼ Sodoma! Jehovah kif ħares lejn in-​Ninwin li nindmu? Ġona 3:10 jgħid: “U Alla raġaʼ bdielu mid-​deni li qal li kien se jagħmlilhom, u ma għamlux.” Jehovah ‘reġaʼ bdielu’ fis-​sens li hu bidel dak li kien se jagħmel lin-​Ninwin minħabba li bidlu ħajjithom. Il-​livelli t’Alla ma nbidlux, imma Jehovah bidel id-​deċiżjoni tiegħu meta ra li n-​Ninwin kienu nidmu.—Malakija 3:6.

8. Ġona għala għamel in-​nervi?

⁸ Meta Ġona rrealizza li Ninwè ma kinitx se tinqered, ra hu l-​affarijiet mill-​ħarsa taʼ Jehovah? Le, għaliex hemm miktub: “Iżda dan xejn li xejn m’għoġbu lil Ġona, u inkorla.” X’għamel iktar Ġona? Ir-​rakkont jgħid: “U talab lill-​Mulej u qal: ‘Jaħasra, Mulej, m’hux dan kien kliemi meta kont għadni f’pajjiżi? Kien għalhekk li jien għall-​ewwel ħrabt lejn Tarsis, għax kont naf li int Alla ħanin u tagħder, tqil biex tinkorla, kollok tjieba u jisgħob bik għad-​deni.’” (Ġona 4:​1, 2) Ġona kien jaf dwar il-​kwalitajiet taʼ Jehovah. Madankollu, dak il-​ħin il-​profeta għamel in-​nervi u ma kellux l-​istess ħarsa t’Alla lejn l-​abitanti taʼ Ninwè li nidmu.

9, 10. (a) Jehovah x’lezzjoni pprovdielu lil Ġona? (b) Għala nistgħu nassumu li Ġona eventwalment kellu l-​ħarsa taʼ Jehovah dwar in-​Ninwin?

⁹ Ġona ħareġ min-​Ninwè, bena għarix, u qagħad bil-​qiegħda taħtu għad-​dell “biex jara x’kien se jiġri mill-​belt.” Jehovah ħalla siġra tar-​riġnu titlaʼ sabiex tipprovdilu d-​dell. Madankollu, l-​għada s-​siġra nixfet. Meta Ġona inkorla dwar dan, Jehovah qallu: “Inti ġietek ħasra mis-​siġra tar-​riġnu . . . Mela jiena ma kellix tiġini ħasra minn Ninwè, il-​belt il-​kbira fejn hemm aktar minn mija u għoxrin elf ruħ li ma jafux jagħżlu bejn il-​lemin u x-​xellug tagħhom, u fejn hemm ukoll ħafna bhejjem?” (Ġona 4:​5-11) X’lezzjoni kienet din għal Ġona rigward il-​ħarsa taʼ Jehovah lejn in-​nies!

¹⁰ It-​tweġiba taʼ Ġona għall-​istqarrija t’Alla dwar il-​mod kif tħassar lin-​nies taʼ Ninwè m’hix dokumentata. Madankollu, huwa evidenti li l-​profeta bidel il-​ħsieb tiegħu dwar in-​Ninwin li nidmu. Aħna naslu għal din il-​konklużjoni minħabba l-​fatt li Jehovah użah biex jikteb dan ir-​rakkont ispirat.

Liema Attitudni Għandek Int?

11. Abraham kif x’aktarx kien iħares lejn in-​nies li qed jgħixu llum?

¹¹ Illum, aħna qed niffaċċjaw qerda oħra​—dik tas-​sistema preżenti mill-​agħar matul il-​jum il-​kbir taʼ Jehovah. (Luqa 17:​26-30; Galatin 1:4; 2 Pietru 3:10) Kieku Abraham kien ħaj kif kien iħares lejhom in-​nies li qed jgħixu f’din id-​dinja li dalwaqt se tinqered? Probabbilment kien ikun konċernat dwar dawk li għadhom ma semgħux “l-​Evanġelju tas-​Saltna.” (Mattew 24:14) Abraham għal darba wara l-​oħra talab lil Alla rigward nies li forsi kienu ġusti f’Sodoma. Inħossuna aħna konċernati personalment dwar in-​nies li jkunu lesti li jiċħdu l-​modi taʼ din id-​dinja taħt il-​kontroll taʼ Satana jekk jingħataw l-​opportunità biex jindmu u jaqdu lil Alla?—1 Ġwann 5:19; Apokalissi 18:​2-4.

12. Għala huwa faċli li niżviluppaw attitudni bħal dik taʼ Ġona lejn in-​nies li niltaqgħu magħhom fil-​ministeru tagħna, u x’nistgħu nagħmlu dwar dan?

¹² Huwa xieraq li nixxennqu għat-​tmiem tal-​ħażen. (Ħabakkuk 1:​2, 3) Madankollu, huwa faċli li niżviluppaw attitudni bħal dik taʼ Ġona, u ma jinteressaniex mill-​qagħda taʼ dawk li għandhom mnejn jindmu. Dan jistaʼ jiġri speċjalment jekk nibqgħu niltaqgħu maʼ individwi li juru apatija, jopponu, jew saħansitra jkunu aggressivi meta mmorru għandhom bil-​messaġġ tas-​Saltna. Forsi ninsew lil dawk li Jehovah għad irid jiġbor minn din is-​sistema dinjija mill-​agħar. (Rumani 2:4) Jekk wara li neżaminaw lilna nfusna naraw li għandna mqar l-​inqas traċċa taʼ l-​attitudni li Ġona kien wera fil-​bidu lejn in-​Ninwin, nistgħu nitolbu għall-​għajnuna biex il-​ħarsa tagħna nibdluha ħalli tkun bħal dik taʼ Jehovah.

13. Għala nistgħu ngħidu li Jehovah hu konċernat dwar in-​nies illum?

¹³ Jehovah hu konċernat dwar dawk li għadhom mhux qed jaqduh, u hu jismaʼ t-​talb tan-​nies dedikati tiegħu. (Mattew 10:11) Per eżempju, meta jwieġeb it-​talb tagħhom hu se ‘jagħmlilhom ħaqq’. (Luqa 18:​7, 8) Iktar minn hekk, Jehovah se jwettaq il-​wegħdi u l-​iskopijiet kollha tiegħu meta jkun il-​waqt tiegħu. (Ħabakkuk 2:3) Dan se jinkludi li jneħħi l-​ħażen minn fuq l-​art, sewwasew bħalma qered lil Ninwè wara li l-​abitanti tagħha reġgħu waqgħu fil-​ħażen.—Naħum 3:​5-7.

14. X’suppost inkunu qegħdin nagħmlu waqt li qed nistennew il-​jum il-​kbir taʼ Jehovah?

¹⁴ Sakemm din is-​sistema dinjija mill-​agħar tinqered matul il-​jum il-​kbir taʼ Jehovah, se nibqgħu aħna nistennew bil-​paċenzja, u naħdmu iebes biex inwettqu r-​rieda tiegħu? Ma nafux id-​dettalji dwar kemm għad baqaʼ xogħol taʼ l-​ippridkar xi jsir qabel ma jasal il-​jum taʼ Jehovah, imma li nafu hu li l-​aħbar tajba tas-​Saltna se tixxandar fid-​dinja kollha sakemm Alla jkun sodisfatt qabel ma jiġi t-​tmiem. U żgur li għandna nkunu konċernati dwar il-​“ġid kollu” li għad irid jinġabar waqt li Jehovah ikompli jimla d-​dar tiegħu bil-​glorja.—Ħaggaj 2:7.

Il-​Ħarsa Tagħna Hija Evidenti mill-​Azzjonijiet Tagħna

15. X’jistaʼ jżid l-​apprezzament tagħna għax-​xogħol taʼ l-​ippridkar?

¹⁵ Forsi ngħixu f’komunità fejn ix-​xogħol taʼ l-​ippridkar ma tantx jiġi milqugħ tajjeb u m’aħniex f’pożizzjoni li mmorru ngħixu fejn hemm iktar bżonn taʼ proklamaturi tas-​Saltna. Ejja ngħidu li hemm għaxra fit-​territorju tagħna li jridu jinstabu sakemm jasal it-​tmiem. Inħossu aħna li dawk l-​għaxra jistħoqqilhom li nfittxuhom? Ġesù “tħassarhom” il-​folol “għax kienu mdejjqa u mitluqa bħal nagħaġ bla ragħaj.” (Mattew 9:36) Jekk nistudjaw il-​Bibbja u naqraw b’attenzjoni kbira l-​artikli fit-​Torri taʼ l-​Għassa u Stenbaħ! inkunu nistgħu niksbu dehen akbar dwar l-​istat imwiegħer li tinsab fih id-​dinja. Imbagħad, dan jistaʼ jżid l-​apprezzament tagħna għall-​bżonn li nippridkaw l-​aħbar tajba. Iktar minn hekk, il-​fatt li nużaw b’apprezzament il-​materjal ibbażat fuq il-​Bibbja provdut mill-​“ilsir leali u diskret” jistaʼ jgħinna nkunu iktar persważivi f’territorju li jinħadem spiss.—Mattew 24:​45-47, NW; 2 Timotju 3:​14-17.

16. Kif nistgħu nagħmlu l-​ministeru tagħna iktar effettiv?

¹⁶ It-​tħassib tagħna għal dawk li forsi għad iwieġbu għall-​messaġġ tal-​Bibbja li jagħti l-​ħajja jqanqalna nikkunsidraw ħinijiet u modi differenti biex inkunu nistgħu navviċinaw lin-​nies fit-​territorju tagħna. Insibu li ħafna m’humiex id-​dar meta nżuruhom? Jekk iva, forsi nistgħu nagħmlu l-​ministeru tagħna iktar effettiv billi invarjaw il-​ħinijiet u l-​postijiet taʼ l-​attività taʼ l-​ippridkar tagħna. Is-​sajjieda jmorru jistadu meta jistgħu jaqbdu l-​ħut. Nistgħu nagħmlu xi ħaġa simili fix-​xogħol tas-​sajd spiritwali tagħna? (Mark 1:​16-18) Għala ma tipprovax tippriedka fil-​għaxija u tieħu sehem f’għoti taʼ xiehda bit-​telefon, fejn dan hu legali? Xi wħud sabu li fil-​parking tal-​karozzi, ħdejn il-​pompi tal-​petrol, ħdejn il-​vapuri, u fil-​ħwienet huma ‘postijiet għas-​sajd’ produttivi. L-​attitudni tagħna bħal dik t’Abraham lejn in-​nies issir evidenti wkoll meta naħtfu kull opportunità biex nagħtu xiehda informali.

17. B’liema modi nistgħu ninkuraġġixxu lill-​missjunarji u oħrajn li jaqdu f’pajjiżi barranin?

¹⁷ Miljuni għadhom ma semgħux il-​messaġġ tas-​Saltna. Flimkien maʼ l-​ippridkar tagħna, nistgħu aħna nuru interess f’dawn in-​nies saħansitra mid-​dar tagħna stess? Nafu lil xi missjunarji jew ministri full-time li qed jaqdu f’pajjiżi oħra? Jekk iva, forsi nistgħu niktbulhom xi ittra li turi l-​apprezzament tagħna għax-​xogħol li qed jagħmlu. Dan kif juri l-​interess tagħna fin-​nies in ġenerali? L-​ittri tagħna taʼ inkuraġġiment u tifħir jistgħu jsaħħu lill-​missjunarji biex jibqgħu fl-​inkarigu tagħhom, u b’hekk jgħinu lil ħafna iktar nies jiksbu l-​għarfien tal-​verità. (Mħallfin 11:40) Nistgħu wkoll nitolbu għall-​missjunarji u għal dawk li qed jixxennqu għall-​verità f’pajjiżi oħra. (Efesin 6:​18-20) Mod ieħor kif nistgħu nuru interess hu billi nagħtu donazzjonijiet taʼ flus għax-​xogħol taʼ l-​ippridkar tax-​Xhieda taʼ Jehovah madwar id-​dinja.—2 Korintin 8:​13, 14; 9:​6, 7.

Tistaʼ Tmur Tgħix Xi Mkien Ieħor?

18. X’għamlu xi Kristjani biex jippromwovu l-​interessi tas-​Saltna fil-​pajjiż fejn jgħixu?

¹⁸ Dawk li marru jgħixu xi mkien fejn il-​bżonn għal proklamaturi tas-​Saltna huwa akbar ġew imberkin għall-​isforzi u s-​sagrifiċċji mill-​qalb tagħhom. Madankollu, Xhieda taʼ Jehovah oħra li jibqgħu f’pajjiżhom tgħallmu xi lingwa oħra sabiex ikunu t’għajnuna spiritwali għall-​immigranti. Dawn l-​isforzi ġew tabilħaqq premjati. Per eżempju, sebaʼ Xhieda li kienu qed jgħinu lin-​nies Ċiniżi f’belt ġewwa Texas, fl-​Istati Uniti, laqgħu 114-il individwu għall-​osservanza taʼ l-​Ikla taʼ fil-​Għaxija tal-​Mulej fis-​sena 2001. Dawk li jgħinu gruppi bħal dawn sabu l-​għelieqi tagħhom lesti għall-​ħsad.—Mattew 9:​37, 38.

19. X’inhu rrikkmandat li tagħmel jekk tkun qed tikkunsidra li tmur tgħix f’pajjiż barrani biex tgħin fix-​xogħol taʼ l-​ippridkar tas-​Saltna hemmhekk?

¹⁹ Forsi int u l-​familja tiegħek tħossu li tistgħu tmorru tgħixu xi mkien fejn il-​bżonn għall-​predikaturi tas-​Saltna huwa akbar. M’għandniex xi ngħidu, l-​ewwelnett huwa għaqli li ‘toqgħod bil-​qiegħda u tqis in-​nefqa.’ (Luqa 14:28) Dan huwa minnu speċjalment jekk xi ħadd qed jaħseb biex imur jgħix f’pajjiż barrani. Kulmin jikkunsidra din il-​possibbiltà jagħmel tajjeb jekk jistaqsi lilu nnifsu mistoqsijiet bħal dawn: ‘Inkun nistaʼ nieħu ħsieb il-​familja tiegħi? Nistaʼ nakkwista visa xierqa? Jien diġà naf bil-​lingwa tal-​pajjiż, jew lest jien li nitgħallimha? Ħsibt dwar il-​klima u l-​kultura? Nistaʼ jien verament inkun “taʼ faraġ kbir” u mhux taʼ piż għal sħabi fit-​twemmin f’dak il-​pajjiż?’ (Kolossin 4:​10, 11) Sabiex issir taf kemm hemm bżonn f’dak il-​pajjiż li int qed tippjana li tmur tgħix fih, huwa dejjem xieraq li tikteb lill-​uffiċċju tal-​fergħa tax-​Xhieda taʼ Jehovah li jieħu ħsieb l-​ippridkar f’dak il-​pajjiż.a

20. Wieħed żagħżugħ Kristjan kif ta sehmu għall-​benefiċċju taʼ sħabu fit-​twemmin u oħrajn f’pajjiż barrani?

²⁰ Kristjan wieħed li huwa involut fil-​bini taʼ Swali tas-​Saltna fil-​Ġappun sar jaf li kien hemm bżonn taʼ ħaddiema tas-​sengħa biex jibnu post għall-​qima fil-​Paragwaj. Peress li m’huwiex miżżewweġ u huwa żagħżugħ mimli enerġija, hu mar jgħix f’dak il-​pajjiż u ħadem għal tmien xhur bħala l-​uniku ħaddiem full-time fuq il-​proġett. Matul il-​perijodu li dam hemm, hu tgħallem l-​Ispanjol u kkonduċa studji tal-​Bibbja fid-​djar. Hu setaʼ jara l-​bżonn għal proklamaturi tas-​Saltna fil-​pajjiż. Għalkemm irritorna lejn il-​Ġappun, hu ma damx ma mar lura l-​Paragwaj u għen biex jiġbor lin-​nies f’dik l-​istess Sala tas-​Saltna.

21. X’għandu jkun l-​interess prinċipali u l-​ħarsa tagħna waqt li nistennew il-​jum il-​kbir taʼ Jehovah?

²¹ Alla se jagħmel żgur li x-​xogħol taʼ l-​ippridkar jitwettaq għalkollox, fi qbil mar-​rieda tiegħu. Illum, hu qed iħaffef l-​aħħar ħsad spiritwali. (Isaija 60:22) Mela, waqt li nistennew il-​jum taʼ Jehovah ejja nieħdu sehem b’mod żeluż fix-​xogħol tal-​ħsad u nħarsu lejn in-​nies bħalma jħares lejhom Alla tagħna kollu mħabba.

[Nota taʼ taħt]

Tiftakar Int?

• Waqt li qed nistennew il-​jum taʼ Jehovah, kif għandna nħarsu lejn in-​nies?

• X’kienet il-​ħarsa t’Abraham lejn dawk il-​ġusti li setgħu kienu qed jgħixu f’Sodoma?

• Ġona kif ħares lejn in-​nies li nidmu f’Ninwè?

• Kif nistgħu nuru li aħna għandna l-​istess ħarsa li Jehovah għandu lejn in-​nies li għadhom ma semgħux l-​aħbar tajba?

[Stampa f’paġna 16]

Abraham ħares lejn in-​nies bħalma jħares lejhom Jehovah

[Stampa f’paġna 17]

Ġona beda jkollu l-​istess ħarsa li Jehovah kellu lejn in-​Ninwin li nidmu

[Stampi f’paġna 18]

It-​tħassib għan-​nies iqanqalna nikkunsidraw ħinijiet u modi differenti biex nippridkaw l-​aħbar tajba