Kapitlu 2

Faħħar bil-​Kbir lil Jehovah Bħala Dak Alla Veru

1. (a) Min hu dak Alla veru? (b) Hekk kif nitgħallmu dwaru, ħajjietna stess kif għandhom jiġu effettwati?

LIL SĦABU Kristjani l-​appostlu Pawlu kitbilhom li, avolja hemm ħafna li huma msejħin allat, “hemm attwalment għalina Alla wieħed il-​Missier . . . u hemm Mulej wieħed, Ġesù Kristu.” (1 Kor. 8:​5, 6) Dak “Alla wieħed” li għalih Pawlu rrefera hu Jehovah, il-​Ħallieq taʼ l-​affarijiet kollha. (Dewt. 6:4; Riv. 4:11) Persuni li japprezzaw u li jitgħallmu dwar il-​kwalitajiet tiegħu u dwar l-​affarijiet li hu għamel għall-​umanità jsibu rwieħhom miġbudin lejh b’mod irreżistibbli. B’liema riżultat? Huwa biss naturali għalihom li jfaħħru bil-​kbir lill-​Wieħed li huma tant jammiraw profondament, billi jagħmlu dan kemm bil-​kliem u kemm bil-​għemejjel. Hekk kif l-​imħabba tagħhom lejn Alla tikber, iħossuhom imġegħlin jgħidu lil oħrajn dwaru, u sal-​punt possibbli għalihom bħala bnedmin iridu jimitawh. Il-​Bibbja tinkuraġġixxi lilna lkoll biex nagħmlu dak, billi tgħid: “Siru imitaturi t’Alla, bħala tfal maħbubin, u ibqgħu mexjin bl-​imħabba.” (Ef. 5:​1, 2) Biex napplikaw dak il-​parir, neħtieġu li nsiru nafu lil Jehovah bħalma verament hu.

IT-​TIP TAʼ PERSUNA LI HU JEHOVAH

2. X’inhuma ftit mill-​kwalitajiet li jispikkaw t’Alla li jqanqluna biex infaħħruh?

² Fil-​Bibbja kollha kemm hi jinstabu bosta stqarrijiet diretti li jidentifikaw il-​kwalitajiet li jispikkaw t’Alla. Meta taqra dawn, ħu l-​ħin biex taħseb dwar x’inhuma tassew il-​kwalitajiet u kemm huma importanti għalik. Per eżempju: “Alla hu mħabba.” (1 Ġwn. 4:8) “Il-​mogħdijiet tiegħu kollha huma ġustizzja.” (Dewt. 32:4) ‘Miegħu hemm l-​għerf.’ (Ġob 12:13) Hu “vigoruż fil-​qawwa.” (Isa. 40:26) Hekk kif tirrifletti fuq dawn l-​attributi, m’intix int imqanqal, minn ammirazzjoni lejn Alla, biex tfaħħru?

3. Liema aspetti oħrajn tal-​personalità taʼ Jehovah jappellaw ħafna?

³ Billi tkompli tgħarrafna dwar il-​personalità li tappella tiegħu, il-​Bibbja tgħidilna li Jehovah hu “Alla mimli ħniena u grazzjuż, bil-​mod biex jirrabja u abbundanti fil-​qalb tajba bl-​imħabba u fil-​verità.” (Eżo. 34:6) “Int, O Jehovah, tajjeb u lest li taħfer.” (Salm 86:5) “Inkwantu għal Jehovah, għajnejh qegħdin iżebbġu maʼ l-​art kollha biex juri saħħtu f’isem dawk li qalbhom hija sħiħa lejh.” (2 Kron. 16:9) “Alla mhux parzjali, imma f’kull ġens il-​bniedem li jibżaʼ minnu u jaħdem it-​tjieba hu aċċettabbli għalih.” (Atti 10:​34, 35) Jehovah “jagħti b’mod ġeneruż” u hu “dak Alla hieni.” (Ġak. 1:5; 1 Tim. 1:11) Kemm huwa rifreskanti li taqdi lil dan Alla li ma jistaʼ jiġi mqabbel maʼ ħadd u li ġġarrab l-​attenzjoni kollha mħabba tiegħu!

4. (a) Jehovah jirrikjedi liema tip taʼ devozzjoni, u dan kemm huwa importanti? (b) Salm 34:3 f’liema ħaġa jistedinna biex nieħdu sehem?

⁴ Konsistenti maʼ l-​attributi tiegħu huwa l-​fatt li hu ‘Alla li jesiġi devozzjoni esklussiva.’ (Eżo. 20:5) Biex naqduh b’mod aċċettabbli rridu nagħtuh id-​devozzjoni sħiħa tagħna. Ma nistgħux inħobbu wkoll lid-​dinja li alla tagħha huwa Satana. (1 Ġwn. 2:​15-17; 2 Kor. 4:​3, 4) Jehovah jinduna b’min hu biss taparsi tajjeb. Jaf għalkollox mhux biss dak li nagħmlu imma wkoll kif inħossuna dwar dak li nagħmlu u x’tip taʼ persuni qegħdin nipprovaw inkunu. Jekk verament inħobbu t-​tjieba, hu jgħinna. (Ġer. 17:10; Prov. 15:9) Minħabba t-​tip taʼ persuna li hu Jehovah, miljuni taʼ nies madwar l-​art jaċċettaw bil-​ferħ l-​istedina tas-​salmista tal-​Bibbja li kiteb: “Faħħru bil-​kbir lil Jehovah miegħi, u ejjew neżaltaw lil ismu flimkien.” (Salm 34:3) Int wieħed minnhom?

5. X’se jgħinna biex nibbenefikaw bis-​sħiħ mill-​istudju tagħna dwar il-​personalità taʼ Jehovah?

⁵ Ix-​xewqa tiegħek li titkellem dwar Alla ssir iktar profonda, u tkun mgħejjun ħafna fl-​isforzi tiegħek biex timitah jekk teżamina mill-​qrib il-​kwalitajiet sublimi tiegħu. Skopri (1) eżattament x’inhi kull kwalità, forsi dak li jagħmilha differenti minn kwalitajiet oħrajn, (2) kif Jehovah urieha biċ-​ċar u lil min, u (3) kif int tistaʼ turiha jew kif għandha teffettwa l-​opinjoni tiegħek.

6. Billi tuża l-​imħabba bħala eżempju, uri kif tistaʼ teżamina l-​kwalitajiet taʼ Jehovah. Agħmel dan billi twieġeb il-​mistoqsijiet fl-​aħħar taʼ dan il-​paragrafu, u billi tinkludi xi skritturi fit-​tweġibiet tiegħek.

⁶ Ikkunsidra hawnhekk sempliċement eżempju wieħed. Meta l-​Bibbja tgħid, “Alla hu mħabba,” xi trid tfisser? (1 Ġwn. 4:8) Hemm, m’għandniex xi ngħidu, diversi tipi taʼ mħabba. Il-​kelma Griega wżata f’dan it-​test hija a·gaʹpe, li tirreferi għall-​ogħla forma taʼ mħabba, murija bħala eżempju fil-​persuna taʼ Jehovah innifsu. Imħabba bħal din hija espressjoni taʼ nuqqas assolut t’egoiżmu. Billi żżomm dan f’moħħok, fassal it-​tweġibiet tiegħek stess għall-​mistoqsijiet t’hawn taħt, billi tuża l-​iskritturi ċċitati.

Din il-​kwalità kif inhi murija fix-​xogħlijiet taʼ ħolqien taʼ Jehovah? (Atti 14:​16, 17)

Liema huwa l-​iktar eżempju li jispikka taʼ l-​imħabba li Jehovah għandu lejn il-​bnedmin? (Ġwn. 3:16) Kien minħabba t-​tjubija tal-​bniedem li Jehovah għamel dan? (Rum. 5:8)

Dak li Jehovah għamel permezz taʼ Ibnu kif għandu jinfluwenza l-​mod taʼ kif nużaw ħajjietna? (2 Kor. 5:​14, 15, 18, 19)

Bħala Kristjani b’liema modi nistgħu aħna nuru li għandna l-​istess tip taʼ mħabba lejn Kristjani sħabna? (1 Kor. 13:​4-7; 1 Ġwn. 4:​10, 11; 3:​16-18)

Lejn min iktar għandna nuru mħabba, u kif? (Matt. 5:​43-48; 28:​19, 20; Gal. 6:10)

7. Fl-​istudju persunali tiegħek, kif tistaʼ ssib materjal simili dwar kwalitajiet oħrajn taʼ Jehovah?

⁷ Tixtieq int ukoll tesplora xi kwalitajiet oħrajn taʼ Jehovah? Bħala bidu, fl-​istudju persunali għax ma tipprovax il-​“ġustizzja” u l-​“għerf,” imbagħad forsi l-​“qalb tajba bl-​imħabba” u l-​“ħniena.” Bl-​użu taʼ l-​indiċi tal-​pubblikazzjonijiet tal-​Watch Tower u konkordanza tal-​Bibbja, se ssib għana taʼ materjal li jdawwal.

8. (a) In-​nies tad-​dinja jaduraw liema allat? (b) Min hemm wara din il-​konfużjoni kollha, u għala tgħid hekk?

⁸ B’oppożizzjoni lejn il-​qima taʼ Dak Alla veru, litteralment miljuni t’allat oħrajn huma meqjumin mill-​bnedmin. Fir-​rabaʼ seklu, il-​Kristjaneżmu adotta t-​twemmin tat-​“Trinità,” li kien mgħallem mill-​Babilonjani, mill-​Eġizzjani, mill-​Ħindu u mill-​Buddisti qabel dak iż-​żmien. Minbarra din l-​idea dwar Alla, hemm ħakkiema potenti, atleti li jispikkaw u kantanti li ġew mogħtijin qima bħal allat. Il-​flus, il-​persuna nfisha u s-​sess ukoll saru allat li jiġu mogħtijin devozzjoni ferventi. Min hemm wara dan kollu? “L-​alla taʼ din is-​sistema t’affarijiet,” Satana x-​Xitan. (2 Kor. 4:4; 1 Kor. 10:20) B’kull mezz qarrieq li jistaʼ jiġi vvintat, huwa jipprova jdawwar lin-​nies ’il bogħod minn Jehovah, jew għall-​inqas jaqsam id-​devozzjoni tagħhom.

9. Liema huwa l-​aħjar mod biex tgħin lil kwalunkwe persuna ħalli titgħallem il-​verità dwar Alla?

⁹ Kif nistgħu aħna ngħinu lil persuni bħal dawn, kemm lil dawk li jgħidu li huma Kristjani u kemm lil oħrajn, biex ikunu jafu l-​verità dwar Alla? Wieħed mill-​iktar modi mill-​aħjar huwa li turihom b’manjiera li tkun t’għajnuna dak li l-​Bibbja nfisha tgħid dwar l-​identità taʼ dak Alla veru u t-​tip taʼ persuna li hu. Imbagħad jeħtieġ li nappoġġjaw dan b’kondotta li tirrifletti kwalitajiet divini fil-​ħajjiet tagħna stess.​—1 Piet. 2:12.

10. Meta nitkellmu maʼ wieħed li jemmen fit-​“Trinità,” għala m’huwiex għaqli li nassumu li nafu eżattament x’jemmen?

¹⁰ Imma xi ngħidu jekk xi ftit li huma membri tal-​knejjes tal-​Kristjaneżmu jħaqquha miegħek, billi jsostnu li t-​twemmin tagħhom fit-​“Trinità” huwa Skritturali? L-​ewwelnett, irrealizza li, għalkemm hemm stqarrijiet uffiċċjali dwar id-​duttrina tat-​“Trinità,” ħafna persuni għandhom l-​ideat tagħhom stess. Stedinhom biex jesprimu rwieħhom, u mbagħad għinhom iqabblu t-​twemmin tagħhom maʼ dak li hemm fil-​Bibbja tagħhom stess. Maż-​żmien, inkuraġġihom ukoll biex iqabblu t-​tagħlim uffiċċjali tal-​knisja mal-​Kelma t’Alla.

11. Billi tieħu biss wieħed mill-​ħames punti prinċipali kull darba, uża l-​mistoqsijiet u l-​iskritturi mniżżlin f’dan il-​paragrafu biex tirraġuna dwar kemm m’hijiex skritturali d-​duttrina tat-​“Trinità.”

¹¹ Billi għandek f’moħħok ix-​xewqa li tgħin lil persuni sinċieri, ikkunsidra kif tistaʼ tuża t-​testi mniżżlin hawn taħt biex tirraġuna fuq il-​punti li magħhom dawn l-​iskritturi huma murijin:

(1) Xi wħud li jemmnu fit-​“Trinità” jenfasizzaw l-​idea li hemm tliet Persuni divini (il-Missier, l-​Iben u l-​Ispirtu s-​Santu) imma biss Alla wieħed.

Imma jindika Atti 2:​4, 17 li l-​“Ispirtu s-​Santu,” jew “spirtu qaddis,” hu persuna?

Għala huwa t’għajnuna li tinnota kemm-il persuna ssir referenza għaliha f’kull waħda mill-​iskritturi li ġejjin? (Ġwn. 17:​20-22; Atti 7:56; Riv. 7:10)

(2) Xi wħud jemmnu li l-​membri kollha tat-​“Trinità” huma taʼ glorja ugwali, li ebda wieħed minnhom m’hu akbar jew inqas minn ieħor, li huma kougwali kif ukoll koeterni.

Taqbel l-​Iskrittura maʼ dan? (Għat-tweġiba, ara Ġwann 14:​28; Mattew 24:36; Rivelazzjoni 3:14.)

(3) Xi nies jippontaw lejn Ġwann 1:1 bħala prova tat-​“Trinità.” Jargumentaw li hawnhekk it-​test Grieg m’għandux artiklu indefinit (“wieħed”) u li l-​iskrittura trid għalhekk tinqara: “il-​Kelma kienet Alla,” minflok “wieħed alla.”

Imma kemm-il persuna tissemma fi Ġwann 1:1? Tlieta? Jew tnejn? Ġwann 1:18 kif inhu f’konflitt ukoll mad-​duttrina tat-​“Trinità”?

Huwa minnu li l-​Grieg m’għandux artiklu indefinit, imma ħafna ilsna għandhom, u dan jiġi wżat f’dawk l-​ilsna sabiex jesprimi l-​ħsibijiet b’mod korrett. Jekk xi ħadd iħoss li huwa żbaljat li tuża l-​artiklu indefinit meta tittraduċi Ġwann 1:​1, ikun hu jrid ukoll iħallih barra f’​Atti 28:6 skond il-​King James Version u oħrajn? (Mod ieħor li tittraduċi Ġwann 1:​1, bħalma huwa muri f’An American Translation, huwa “l-​Kelma kienet divina,” jiġifieri, hu kellu l-​istess kwalitajiet divini li għandu Alla.)

(4) Dawk li jemmnu fit-​“Trinità” jargumentaw ukoll li f’​Ġenesi 1:​1, 26 il-​kelma Ebrajka tradotta “Alla” hija El·o·himʹ u li din hija l-​plural fl-​Ebrajk u attwalment tfisser “Allat.”

Dak għala ma jappoġġjax it-​tagħlim taʼ tliet Persuni divini f’“Alla wieħed”?

Jekk din tindika “Trinità” f’​Ġenesi 1:1, x’tindika din f’​Imħallfin 16:​23, li juża el·o·himʹ għal “alla,” bil-​verb Ebrajk fis-​singular, u mhux fil-​plural?

Għala hija l-​forma fil-​plural t’Alla wżata f’dawn it-​testi fl-​Ebrajk? Dan huwa mod wieħed li l-​Ebrajk jagħti l-​idea t’eċċellenza jew maestà. Kieku iktar minn persuna waħda kienet involuta, kieku l-​verbi li jakkumpanjaw kienu wkoll ikunu fil-​plural, imma fil-​postijiet imsemmijin hawn fuq m’humiex.

(5) Minħabba l-​enfasi li l-​knejjes poġġew fuq Ġesù (flimkien mal-​fatt li l-​isem Jehovah ġie mneħħi minn ħafna traduzzjonijiet tal-​Bibbja), xi persuni jaħsbu biss dwar Ġesù meta jissemma Alla.

Imma f’dik li hi qima Ġesù liema eżempju pprovda għalina biex nimitawh? (Luqa 4:8)

12. Ġesù għala b’mod xieraq indirizza lil Missieru bħala “l-​uniku Alla veru”?

¹² Għalkemm l-​Iskrittura titkellem dwar Ġesù bħala “wieħed alla,” saħansitra “Alla Setgħan,” madankollu hu faħħar bil-​kbir lil Missieru, billi rrefera għalih bħala “Alla tiegħi u Alla tagħkom.” (Ġwn. 1:1; 20:17; Isa. 9:6) Hu qabel maʼ Mosè, li iktar kmieni kien stqarr: “Jehovah hu dak Alla veru; m’hemmx ieħor għajru.” (Dewt. 4:35) Jehovah qiegħed f’kuntrast assolut m’oġġetti taʼ qima bħal idoli, bnedmin dejifikati u Satana x-​Xitan. F’kuntrast maʼ l-​affarijiet kollha, Jehovah hu, bħalma sejjaħlu Ġesù, “l-​uniku Alla veru.”​—Ġwn. 17:3.

‘IMXI FL-​ISEM TAʼ JEHOVAH’

13, 14. X’inhu involut f’li tkun ‘taf’ u li ‘timxi’ f’isem Jehovah?

¹³ Wara snin sħaħ taʼ konfużjoni rigward l-​identità t’Alla, ħafna persuni jsibuha eċċitanti meta għall-​ewwel darba jaraw l-​isem persunali t’Alla, Jehovah, fil-​Bibbja tagħhom. (Eżo. 6:3) Imma dawn se jkollhom il-​benefiċċju dejjiemi b’dan l-​għarfien jekk biss ‘jimxu f’isem Jehovah għal dejjem.’ (Mik. 4:5) Dan jinvolvi ħafna iktar milli sempliċement ikunu jafu l-​isem taʼ Jehovah jew li jistqarru li huma Xhieda taʼ Jehovah.

¹⁴ Rigward is-​sinjifikat taʼ l-​isem t’Alla, Salm 9:10 jistqarr: “Dawk li jafu lil ismek se jafdaw fik, . . . O Jehovah.” Dak x’jinvolvi? Jinvolvi iktar milli tkun taf biss l-​isem Jehovah, li ma jfissirx awtomatikament li tafda f’Jehovah. Li tkun ‘taf’ l-​isem t’Alla hawnhekk ifisser li tapprezza t-​tip t’Alla li Jehovah hu, tirrispetta l-​awtorità tiegħu, tobdi l-​kmandi tiegħu. B’mod simili, li ‘timxi f’isem Jehovah’ jimplika li tkun iddedikat lejh u li tirrappreżentah bħala wieħed mill-​adoraturi tiegħu, li tassew tkun qiegħed tuża ħajtek f’armonija mar-​rieda t’Alla. (Luqa 10:27) Qiegħed int tagħmel dak?

15. Liema ħaġa, minbarra sens taʼ dover, hija meħtieġa jekk se naqdu lil Jehovah għal dejjem?

¹⁵ Jekk se naqdu lil Jehovah għall-​eternità, iktar minn sens taʼ dover irid iqanqalna. L-​appostlu Pawlu ħeġġeġ lil Timotju, li kien diġà ilu jaqdi lil Jehovah għal bosta snin: “Kun qiegħed tħarreġ lilek innifsek bid-​devozzjoni lejn Alla bħala l-​mira tiegħek.” (1 Tim. 4:7) Id-​devozzjoni tiġi mill-​qalb; titqanqal mill-​apprezzament lejn il-​persuna li lejha d-​devozzjoni hija diretta. Id-​“devozzjoni lejn Alla” hija rispett profond lejn Jehovah personalment. Turi rabta taʼ mħabba miegħu minħabba apprezzament lejh u lejn il-​mogħdijiet tiegħu. Iġġegħilna nkunu rridu li kulħadd iżomm lil ismu bi stima għolja. Irridu nikkultivaw “devozzjoni lejn Alla” bħala l-​għan jew il-​mira f’ħajjietna jekk se nimxu f’isem Jehovah, dak Alla veru, għal dejjem.​—Salm 37:4; 2 Piet. 3:11.

Diskussjoni Bħala Reviżjoni

● X’tip taʼ persuna hu Jehovah? Kif nibbenefikaw billi niksbu fehma ċara dwar kull waħda mill-​kwalitajiet tiegħu?

● Kif nistgħu ngħinu lil nies oħrajn biex jitgħallmu l-​verità dwar Alla?

● X’hemm involut f’li tkun ‘taf’ lil Jehovah u li ‘timxi f’ismu’?