Meta Ġesù Jiġi Fil-​Glorja tas-​Saltna

“Xi wħud minn dawk li qegħdin hawn . . . ma jġarrbux il-​mewt qabel ma jaraw Bin il-​bniedem ġej fis-​Saltna tiegħu.”—MATTEW 16:28.

1, 2. X’ġara ftit wara Pentekoste tas-​sena 32 E.K., u x’kien l-​iskop taʼ l-​avveniment?

FTIT wara Pentekoste tas-​sena 32 E.K., tlieta mill-​appostli taʼ Ġesù Kristu raw viżjoni memorabbli. Skond il-​kitba mnebbħa, “Ġesù ħa miegħu lil Pietru u ’l Ġakbu u ’l ħuh Ġwanni, tellagħhom fuq muntanja għolja weħidhom, u tbiddel quddiemhom.”—Mattew 17:1, 2.

² Il-​viżjoni tat-​trasfigurazzjoni ġiet fi żmien kritiku. Ġesù kien beda jgħid lis-​segwaċi tiegħu li kien se jbati u jmut f’Ġerusalemm, imma huma sabu kliemu diffiċli biex jifhmuh. (Mattew 16:21-23) Il-​viżjoni saħħet il-​fidi tat-​tliet appostli bi tħejjija għall-​mewt tiegħu li kienet riesqa u wkoll għas-​snin taʼ xogħol u provi ibsin li l-​kongregazzjoni Kristjana kellha quddiemha. Nistgħu aħna llum nitgħallmu xi ħaġa mill-​viżjoni? Iva, għaliex dak li ffigurat bil-​quddiem attwalment iseħħ fi żmienna.

3, 4. (a) X’qal Ġesù sitt ijiem qabel it-​trasfigurazzjoni? (b) Iddeskrivi x’ġara waqt it-​trasfigurazzjoni.

³ Sitt ijiem qabel it-​trasfigurazzjoni, Ġesù qal lis-​segwaċi tiegħu: “Bin il-​bniedem għandu jiġi fil-​glorja taʼ Missieru flimkien maʼ l-​anġli tiegħu, u mbagħad irodd lil kull wieħed skond ma wieħed ikun għamel.” Dan il-​kliem kellu jitwettaq fi “tmiem id-​dinja.” Ġesù stqarr ukoll: “Tassew, ngħidilkom, li hawn xi wħud minn dawk li qegħdin hawn, li ma jġarrbux il-​mewt qabel ma jaraw Bin il-​bniedem ġej fis-​Saltna tiegħu.” (Mattew 16:27, 28; 24:3; 25:31-34, 41; Danjel 12:4) It-​trasfigurazzjoni seħħet bi twettiq taʼ dan il-​kliem taʼ l-​aħħar.

⁴ X’raw eżattament it-​tliet appostli? Din li ġejja hi d-​deskrizzjoni taʼ l-​avveniment minn Luqa: “Ġara li huwa u jitlob, id-​dehra taʼ wiċċu tbiddlet u l-​ilbiesi tiegħu saru taʼ bjuda li tgħammex. U kien hemm żewġt irġiel jitħaddtu miegħu, Mosè u Elija, li dehru fil-​glorja, jitħaddtu fuq it-​tmiem taʼ ħajtu li kellu jseħħ f’Ġerusalemm.” Imbagħad, “ġiet sħaba u għattiethom [l-appostli] u huma beżgħu kif daħlu fis-​sħaba. U minn ġos-​sħaba nstamaʼ leħen jgħid: ‘Dan hu Ibni l-​maħtur, lilu isimgħu.’”—Luqa 9:29-31, 34, 35.

Il-​Fidi Msaħħa

5. It-​trasfigurazzjoni x’effett kellha fuq l-​appostlu Pietru?

⁵ L-​appostlu Pietru kien diġà identifika lil Ġesù bħala “l-​Messija, Bin Alla l-​ħaj.” (Mattew 16:16) Il-​kliem taʼ Jehovah mis-​sema kkonferma dik l-​identifikazzjoni, u l-​viżjoni taʼ Ġesù trasfigurat kienet dewqien bil-​quddiem tal-​miġja taʼ Kristu bil-​qawwa u l-​glorja tas-​Saltna, biex eventwalment jiġġudika lill-​bnedmin. Iktar minn 30 sena wara t-​trasfigurazzjoni, Pietru kiteb: “Aħna ma konniex qegħdin nibnu fuq ħrejjef maħluqa minn moħħna meta għarrafniekom dwar il-​qawwa taʼ Sidna Ġesù Kristu u dwar il-​miġja tiegħu. Rajna b’għajnejna aħna stess il-​kobor tiegħu meta hu ħa mingħand Alla l-​Missier ġieħ u sebħ, u leħen mit-​Tron Glorjuż instemaʼ jgħid għalih: ‘Dan hu Ibni, l-​għażiż tiegħi, li bih jiena nitgħaxxaq.’ Aħna smajnieh dan il-​leħen ġej mis-​sema meta konna miegħu fuq il-​muntanja mqaddsa.”—2 Pietru 1:16-18; 1 Pietru 4:17.

6. Il-​ġrajjiet kif żviluppaw wara t-​trasfigurazzjoni?

⁶ Illum, il-​fidi tagħna wkoll tiġi msaħħa b’dak li raw it-​tliet appostli. M’għandniex xi ngħidu, l-​affarijiet imxew ’il quddiem mis-​sena 32 E.K. ’l hawn. Is-​sena taʼ wara, Ġesù miet u ġie rxoxtat, u telaʼ għal fuq il-​lemin taʼ Missieru. (Atti 2:29-36) F’Pentekoste taʼ dik is-​sena, l-​“Iżrael [ġdid] taʼ Alla” ġie fformat, u bdiet kampanja taʼ ppridkar li kellha l-​bidu f’Ġerusalemm u iktar tard infirxet sa truf l-​art. (Galatin 6:16; Atti 1:8) Kważi mill-​ewwel il-​fidi tas-​segwaċi taʼ Ġesù tpoġġiet taħt prova. L-​appostli ġew arrestati u msawtin bl-​aħrax għaliex irrifjutaw li jieqfu jippridkaw. Ftit wara Stiefnu ngħata l-​mewt. Imbagħad Ġakbu, wieħed minn dawk li raw b’għajnejhom stess it-​trasfigurazzjoni, ġie maqtul. (Atti 5:17-40; 6:8–7:60; 12:1, 2) Pietru u Ġwanni, madankollu, baqgħu ħajjin biex jaqdu lil Jehovah għal ħafna iżjed snin. Fil-​fatt, lejn tmiem l-​ewwel seklu E.K., Ġwanni niżżel bil-​miktub iżjed viżjonijiet fejn Ġesù jidher fil-​glorja tas-​sema.—Apokalissi 1:12-20; 14:14; 19:11-16.

7. (a) Il-​viżjoni tat-​trasfigurazzjoni meta bdiet titwettaq? (b) Ġesù meta radd lil xi wħud skond ma għamlu?

⁷ Minn mindu beda “jum il-​Mulej” fl-​1914, twettqu ħafna mill-​viżjonijiet li ra Ġwanni. (Apokalissi 1:10) Xi ngħidu dwar ‘il-​miġja taʼ Ġesù fil-​glorja taʼ Missieru,’ bħalma ġie ffigurat bil-​quddiem mit-​trasfigurazzjoni? Din il-​viżjoni bdiet titwettaq mat-​twelid tas-​Saltna tas-​sema t’Alla fl-​1914. Meta Ġesù, bħal kewkba taʼ fil-​għodu, daħal fix-​xena internazzjonali bħala s-​Sultan appena ġie mogħti t-​tron, dak kien, bħal li kieku, iż-​żerniq taʼ jum ġdid. (2 Pietru 1:19; Apokalissi 11:15; 22:16) Raddilhom Ġesù f’dak iż-​żmien lil xi wħud skond ma kienu għamlu? Iva. Hemm evidenza qawwija li ftit wara beda l-​irxoxt taʼ Kristjani midlukin għas-​sema.—2 Timotju 4:8; Apokalissi 14:13.

8. Liema ġrajjiet se jimmarkaw il-​qofol tat-​twettiq tal-​viżjoni tat-​trasfigurazzjoni?

⁸ Dalwaqt, iżda, Ġesù se jiġi “fil-​glorja tiegħu u bl-​anġli kollha miegħu” sabiex jiġġudika lill-​bnedmin kollha. (Mattew 25:31) F’dak iż-​żmien, se jirrivela lilu nnifsu fil-​glorja taʼ l-​għaġeb kollha tiegħu u jagħti lil “kull wieħed” ħlas xieraq għal dak li jkun għamel. Uħud bħal ngħaġ se jirtu ħajja taʼ dejjem fis-​Saltna mħejjija għalihom, u wħud bħal mogħoż se jmorru għall-​“kastig taʼ dejjem.” X’konklużjoni splendida se tkun dik għat-​twettiq tal-​viżjoni tat-​trasfigurazzjoni!—Mattew 25:34, 41, 46; Mark 8:38; 2 Tessalonikin 1:6-10.

L-​Imseħbin Igglorifikati Taʼ Ġesù

9. Għandna nistennew li Mosè u Elija jkunu maʼ Ġesù fit-​twettiq tal-​viżjoni tat-​trasfigurazzjoni? Spjega.

⁹ Ġesù ma kienx waħdu fit-​trasfigurazzjoni. Mosè u Elija dehru miegħu. (Mattew 17:2, 3) Kienu huma preżenti litteralment? Le, għax it-​tnejn li huma sa dak iż-​żmien kienu ilhom mejtin u kienu reqdin fit-​trab jistennew irxoxt. (Koħèlet 9:5, 10; Lhud 11:35) Se jidhru huma maʼ Ġesù meta jiġi fil-​glorja tas-​sema? Le, għaliex Mosè u Elija kienu jgħixu qabel ma ġiet ippreżentata t-​tama għas-​sema lill-​bnedmin. Huma se jkunu parti mill-​‘qawmien tat-​tajbin’ għal fuq l-​art. (Atti 24:15) Mela d-​dehra tagħhom fil-​viżjoni tat-​trasfigurazzjoni hi simbolika. Taʼ liema ħaġa?

10, 11. Mosè u Elija taʼ min jagħtu stampa f’kuntesti differenti?

¹⁰ F’kuntesti oħra, Mosè u Elija huma figuri profetiċi. Bħala medjatur tal-​patt tal-​Liġi, Mosè ffigura bil-​quddiem lil Ġesù, il-​Medjatur tal-​patt il-​ġdid. (Dewteronomju 18:18; Galatin 3:19; Lhud 8:6) Elija ffigura bil-​quddiem lil Ġwanni l-​Battista, prekursur tal-​Messija. (Mattew 17:11-13) Iktar minn hekk, fil-​kuntest t’Apokalissi kapitlu 11, Mosè u Elija jiffiguraw bil-​quddiem lill-​fdal midluk fiż-​żmien tat-​tmiem. Dan kif nafuh?

¹¹ Sewwa, iftaħ Apokalissi 11:1-6. Fil-​vers 3 naqraw: “Liż-​żewġ xhieda tiegħi nagħtihom li, bl-​ilbies tax-​xkejjer fuqhom, iħabbru għal elf, mitejn u sittin jum.” Din il-​profezija twettqet fuq il-​fdal taʼ Kristjani midlukin matul l-​Ewwel Gwerra Dinjija.a Għala żewġ xhieda? Għaliex il-​fdal midluk iwettaq xogħlijiet li, b’mod spiritwali, jixbhu lil dawk taʼ Mosè u Elija. Versi 5 u 6 jissoktaw jgħidu: “Jekk xi ħadd jaqbad biex jagħmlilhom ħsara [liż-żewġ xhieda], joħroġ nar minn fommhom li jiblaʼ l-​għedewwa tagħhom. Jekk xi ħadd ikun irid jagħmlilhom ħsara, hekk ikollu jinqered. Huma għandhom is-​setgħa jagħlqu s-​sema biex ma tagħmilx xita matul il-​jiem li fihom ikunu qegħdin iħabbru; għandhom is-​setgħa fuq l-​ilmijiet biex ibiddluhom f’demm, u li, kull meta jridu, jidorbu l-​art b’kull kastig.” B’hekk, niġu mfakkrin f’mirakli li saru minn Elija u Mosè.—Numri 16:31-34; 1 Slaten 17:1; 2 Slaten 1:9-12.

12. Fil-​kuntest tat-​trasfigurazzjoni, min jiġi ffigurat minn Mosè u Elija?

¹² Mosè u Elija lil min, mela, jiffiguraw bil-​quddiem fil-​kuntest tat-​trasfigurazzjoni? Luqa jgħid li huma dehru flimkien maʼ Ġesù “fil-​glorja.” (Luqa 9:31) Jidher ċar li huma jiffiguraw bil-​quddiem lill-​Kristjani li ġew midlukin bi spirtu qaddis bħala “werrieta” bi sħab maʼ Ġesù u li minħabba f’dan ħadu t-​tama meraviljuża li jkunu “gglorifikati” flimkien miegħu. (Rumani 8:17) Uħud midlukin irxoxtati se jkunu maʼ Ġesù meta jiġi fil-​glorja taʼ Missieru biex “irodd lil kull wieħed skond ma wieħed ikun għamel.”—Mattew 16:27.

Xhieda Bħal Mosè u Elija

13. Liema fatturi jimmarkaw lil Mosè u Elija bħala stampi profetiċi xierqa tal-​werrieta midlukin sħab Ġesù gglorifikati miegħu?

¹³ Hemm fatturi notevoli li jimmarkaw lil Mosè u Elija bħala stampi profetiċi xierqa tal-​werrieta sħab midlukin taʼ Ġesù. Kemm Mosè u kemm Elija qdew bħala l-​kelliema taʼ Jehovah għal ħafna snin. It-​tnejn li huma ffaċċjaw il-​korla taʼ xi ħakkiem. Fi żmien taʼ bżonn, kull wieħed minnhom ġie mgħejjun minn familja stranġiera. It-​tnejn li huma pprofetizzaw bi qlubija lil slaten u żammew sod kontra l-​profeti foloz. Mosè u Elija t-​tnejn raw turijiet tal-​qawwa taʼ Jehovah fuq il-​Muntanja Sinaj (imsejħa wkoll Ħoreb). It-​tnejn li huma ħatru suċċessuri fuq in-​naħa tal-​Lvant tal-​Ġordan. U kemm fi żmien Mosè (maʼ Ġożwè) u kemm fi żmien Elija (maʼ Eliżew) saru l-​akbar għadd taʼ mirakli, apparti minn dawk li seħħew matul il-​ħajja taʼ Ġesù.b

14. Il-​midlukin kif qdew bħala kelliema taʼ Jehovah, bħal Mosè u Elija?

¹⁴ Ma jfakkarniex dan kollu fl-​Iżrael t’Alla? Iva, tabilħaqq. Ġesù qal lis-​segwaċi leali tiegħu: “Morru, mela, agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu, u għallmuhom iħarsu dak kollu li ordnajtilkom jien. U ara, jiena magħkom dejjem, sa l-​aħħar taż-​żmien.” (Mattew 28:19, 20) B’ubbidjenza għal dan il-​kliem, Kristjani midlukin qdew bħala l-​kelliema taʼ Jehovah minn Pentekoste tas-​sena 33 E.K. s’issa. Bħal Mosè u Elija, iffaċċjaw il-​korla taʼ ħakkiema u tawhom xiehda. Ġesù qal lit-​12-il appostlu tiegħu: “Itellgħukom quddiem gvernaturi u slaten minħabba fija, biex tagħtu xhieda quddiemhom u quddiem il-​pagani.” (Mattew 10:18) Kliemu twettaq ripetutament matul l-​istorja tal-​kongregazzjoni Kristjana.—Atti 25:6, 11, 12, 24-27; 26:3.

15, 16. Liema paralleli hemm bejn il-​midlukin fuq naħa u Mosè u Elija fuq in-​naħa l-​oħra fil-​kwistjoni tagħhom li (a) jieqfu bla biżaʼ għall-​verità? (b) jirċievu għajnuna minn nies mhux Iżraeliti?

¹⁵ Iktar minn hekk, Kristjani midlukin urew li kienu bla biżaʼ bħal Mosè u Elija f’li jappoġġjaw il-​verità kontra l-​qerq reliġjuż. Ftakar kif Pawlu akkuża lill-​profeta falz Lhudi Barjesu u bit-​tattika, imma b’mod sod, kixef il-​qerq taʼ l-​allat tan-​nies t’Ateni. (Atti 13:6-12; 17:16, 22-31) Ftakar, ukoll, li fi żmienna l-​fdal midluk kixfu bil-​qlubija lill-​Kristjaneżmu li ġie kkastigat minn dan l-​għoti taʼ xiehda.—Apokalissi 8:7-12.c

¹⁶ Meta Mosè ħarab mill-​korla taʼ Farawni, sab refuġju fid-​dar taʼ wieħed mhux Iżraelit, Ruwel, imsejjaħ ukoll Ġetro. F’xi żmien wara dan, Mosè rċieva pariri organizzazzjonali imprezzabbli mingħand Ruwel, li ibnu, Ħobab, iggwida lil Iżrael minn ġox-​xagħri.d (Eżodu 2:15-22; 18:5-27; Numri 10:29) Ġew mgħejjunin b’mod simili membri taʼ l-​Iżrael t’Alla minn individwi li m’humiex membri midlukin taʼ l-​Iżrael t’Alla? Iva, ġew appoġġjati minn “kotra kbira” taʼ “nagħaġ oħra,” li tfaċċaw fuq ix-​xena matul dawn l-​aħħar jiem. (Apokalissi 7:9; Ġwann 10:16; Isaija 61:5) Billi bassar l-​appoġġ kordjali u taʼ mħabba li dawn in-​“nagħaġ” kellhom joffru lil ħutu l-​midlukin, Ġesù qalilhom profetikament: “Jien kont bil-​ġuħ u tmajtuni, kont bil-​għatx u sqejtuni, kont barrani u lqajtuni, kont għeri u libbistuni, kont marid u ġejtu tarawni, kont fil-​ħabs u ġejtu żżuruni. . . . Tassew, ngħidilkom, kull ma għamiltu maʼ wieħed mill-​iżgħar fost dawn ħuti, għamiltuh miegħi.”—Mattew 25:35-40.

17. Il-​midlukin kif kellhom esperjenza simili għal dik t’Elija fuq il-​Muntanja Ħoreb?

¹⁷ Jerġaʼ, l-​Iżrael t’Alla kellhom esperjenza simili għal dik t’Elija fuq il-​Muntanja Ħoreb.e Bħal Elija meta kien qed jaħrab mir-​Reġina Ġeżebel, il-​fdal midluk beżgħanin ħasbu li xogħlhom kien mitmum meta spiċċat l-​Ewwel Gwerra Dinjija. Imbagħad, ukoll bħal Elija, kellhom laqgħa maʼ Jehovah, li kien ġie biex jiġġudika lil dawk l-​organizzazzjonijiet li kienu jgħidu li huma “mid-​dar taʼ Alla.” (1 Pietru 4:17; Malakija 3:1-3) Fil-​waqt li l-​Kristjaneżmu nstab nieqes, il-​fdal midluk ġie rrikonoxxut bħala “l-​irsir leali u diskret” u ġie maħtur fuq il-​ġid kollu taʼ Ġesù fuq l-​art. (Mattew 24:45-47, New World Translation) F’Ħoreb, Elija ħass “żiffa ħelwa” li kienet leħen Jehovah, jagħtih iktar xogħol x’jagħmel. Fil-​perijodu kwiet tas-​snin taʼ wara l-​gwerra, qaddejja midlukin leali taʼ Jehovah semgħu leħnu mill-​paġni tal-​Bibbja. Huma wkoll indunaw li kellhom inkarigu x’iwettqu.—1 Slaten 19:4, 9-18; Apokalissi 11:7-13.

18. Turijiet taʼ l-​għaġeb tal-​qawwa taʼ Jehovah kif saru permezz taʼ l-​Iżrael t’Alla?

¹⁸ Finalment, saru xi turijiet taʼ l-​għaġeb tal-​qawwa taʼ Jehovah permezz taʼ l-​Iżrael t’Alla? Wara l-​mewt taʼ Ġesù, l-​appostli wettqu ħafna mirakli, imma dawn maż-​żmien waqfu. (1 Korintin 13:8-13) Illum il-​ġurnata, ma narawx mirakli f’sens fiżiku. Mill-​banda l-​oħra, Ġesù qal lis-​segwaċi tiegħu: “Tassew tassew ngħidilkom, min jemmen fija hu wkoll għad jagħmel l-​opri li qiegħed nagħmel jien, u akbar minnhom għad jagħmel.” (Ġwann 14:12) Dan kellu twettiq inizjali hekk kif id-​dixxipli taʼ Ġesù ppridkaw l-​aħbar tajba maʼ l-​Imperu Ruman kollu fl-​ewwel seklu. (Rumani 10:18) Illum saru saħansitra xogħlijiet akbar hekk kif il-​fdal midluk ġabu ’l quddiem l-​ippridkar taʼ l-​aħbar tajba “fid-​dinja kollha, biex il-​ġnus kollha jkollhom xhieda.” (Mattew 24:14) Ir-​riżultat? Is-​seklu 20 xehed il-​ġbir taʼ l-​akbar numru taʼ qaddejja leali u ddedikati taʼ Jehovah fl-​istorja. (Apokalissi 5:9, 10; 7:9, 10) X’evidenza taʼ l-​għaġeb tal-​qawwa taʼ Jehovah!—Isaija 60:22.

Ħut Ġesù Jiġu Fil-​Glorja

19. L-​aħwa midlukin taʼ Ġesù meta jidhru miegħu fil-​glorja?

¹⁹ Hekk kif il-​fdal t’aħwa midlukin taʼ Ġesù jtemmu l-​korsa tagħhom fuq l-​art, huma jiġu gglorifikati miegħu. (Rumani 2:6, 7; 1 Korintin 15:53; 1 Tessalonikin 4:14, 17) B’hekk isiru slaten u qassisin immortali fis-​Saltna tas-​sema. Maʼ Ġesù, huma mbagħad se ‘jmexxu lin-​nies b’xettru tal-​ħadid bħal min ifarrak il-​bwieqi tal-​fuħħar.’ (Apokalissi 2:27; 20:4-6; Salm 110:2, 5, 6) Maʼ Ġesù, se jpoġġu fuq tronijiet biex jiġġudikaw lit-​“tnax-il tribù taʼ Iżrael.” (Mattew 19:28) Il-​ħolqien jitniehed stenna b’ħerqa dawn il-​ġrajjiet, li huma parti mir-​“rivelazzjoni taʼ wlied Alla.”—Rumani 8:19-21; 2 Tessalonikin 1:6-8.

20. (a) It-​trasfigurazzjoni rigward liema prospett saħħet il-​fidi taʼ Pietru? (b) It-​trasfigurazzjoni kif issaħħaħ lill-​Kristjani llum?

²⁰ Pawlu tkellem dwar ir-​rivelazzjoni taʼ Ġesù matul it-​“tribulazzjoni kbira” meta kiteb: “Dakinhar . . . jiġi biex jieħu l-​glorja mingħand il-​qaddisin tiegħu u l-​ġieħ minn dawk kollha li jkunu emmnu.” (Mattew 24:21, NW; 2 Tessalonikin 1:10) Xi prospett taʼ l-​għaġeb dak għal Pietru, Ġakbu, Ġwanni, u għall-​Kristjani midlukin kollha! It-​trasfigurazzjoni saħħet il-​fidi taʼ Pietru. Ċertament, meta naqraw dwarha tissaħħaħ il-​fidi tagħna wkoll u titqawwa l-​fiduċja tagħna li Ġesù dalwaqt “irodd lil kull wieħed skond ma wieħed ikun għamel.” Kristjani midlukin leali li għadhom ħajjin sal-​lum jaraw ikkonfermata l-​fiduċja tagħhom li se jkunu gglorifikati maʼ Ġesù. Ngħaġ oħrajn għandhom il-​fidi tagħhom imsaħħa billi jafu li hu se jsalvahom matul it-​tmiem taʼ din is-​sistema t’affarijiet mill-​agħar għal ġod-​dinja l-​ġdida glorjuża. (Apokalissi 7:14) X’inkuraġġiment biex nibqgħu sodi sat-​tmiem! U din il-​viżjoni tistaʼ tgħallimna wisq iżjed, bħalma se naraw fl-​artiklu li jmiss. (w97 5/15)

[Noti taʼ taħt]

Tiftakar Int?

◻ Min deher maʼ Ġesù fit-​trasfigurazzjoni?

◻ Il-​fidi taʼ l-​appostli kif ġiet imsaħħa permezz tat-​trasfigurazzjoni?

◻ Meta Mosè u Elija dehru “fil-​glorja” flimkien maʼ Ġesù fit-​trasfigurazzjoni, lil min kienu jirrappreżentaw?

◻ Liema paralleli hemm bejn Mosè u Elija fuq naħa u l-​Iżrael t’Alla fuq in-​naħa l-​oħra?

[Stampa f’paġna 8]

It-​trasfigurazzjoni saħħet il-​fidi tal-​Kristjani taʼ l-​imgħoddi u tal-​preżent