Jistaʼ Xi Ħadd Ibiddel Verament id-​Dinja?

“Il-​foqra jgħidulna li, iktar minn kwalunkwe ħaġa oħra, dak li jixtiequ hu l-​paċi u s-​sigurtà—u mbagħad li jkollhom opportunitajiet biex itejbu ħajjithom. Huma jridu sistemi nazzjonali u internazzjonali sabiex l-​isforzi tagħhom ma jitħassrux minn qawwiet b’saħħithom f’pajjiżi sinjuri u minn kumpaniji għonja.”

DAN hu kif direttriċi t’aġenzija internazzjonali li tagħti l-​għajnuna ddeskriviet it-​tamiet u x-​xewqat taʼ dawk li huma foqra. Fil-​fatt, kliemha jiddeskrivi sew ix-​xewqa taʼ kull vittma fid-​dinja li sofriet traġedja jew inġustizzja. Ilkoll kemm huma jixxennqu għal dinja li tkun mimlija paċi u sigurtà vera. Dinja bħal din qatt se ssir realtà? Hemm xi ħadd li vera għandu l-​qawwa u l-​abbiltà li jġib bidla f’din id-​dinja li hi verament inġusta?

Sforzi li Jġibu Barkiet

Ħafna nies ipprovaw. Per eżempju, Florence Nightingale, mara Ingliża li kienet tgħix fid-​19-il seklu, iddedikat ħajjitha biex dawk li kienu morda jingħataw kura medika li tilħaq livell tajjeb taʼ iġjene, u għamlet ċert li din tingħata b’mogħdrija. Fi żmienha—qabel ma kien hemm l-​antisettiċi u l-​antibijotiċi—il-​kura tal-​morda ma kinitx kif nistennew li tkun illum. Ktieb wieħed jgħid li l-​infermiera kienu bla edukazzjoni, ma kinux nodfa, u kienu magħrufin għas-​sokor u għall-​ħajja immorali li kienu jgħixu. Kellha Florence Nightingale xi suċċess fl-​isforzi tagħha biex tbiddel il-​qasam tal-​kura tal-​morda? Iva. B’mod simili, ħafna nies li jimpurtahom u li huma altruisti kellhom suċċess mill-​aqwa f’ħafna oqsma tal-​ħajja, bħal per eżempju billi tejbu l-​qari u l-​kitba, l-​edukazzjoni, il-​mediċina, l-​akkomodazzjoni, u l-​programmi tat-​tqassim taʼ l-​ikel, biex insemmu biss ftit. B’riżultat taʼ dan, sar titjib sinifikanti fil-​kwalità tal-​ħajja taʼ miljuni taʼ nies li huma żvantaġġati.

Madankollu, ma nistgħux ninjoraw din ir-​realtà kiefra: Mijiet taʼ miljuni taʼ nies għadhom isofru mill-​gwerer, il-​kriminalità, il-​mard, il-​ġuħ, u problemi oħra. Aġenzija Irlandiża li tagħti l-​għajnuna bl-​isem taʼ Concern tgħid li “l-​faqar joqtol 30,000 persuna kuljum.” Anki l-​iskjavitù, li kien il-​mira taʼ ħafna riformisti tul is-​sekli, għadu madwarna. Id-​Disposable People​—New Slavery in the Global Economy jgħid, “Hemm iktar skjavi ħajjin illum milli kien hemm meta nsterqu n-​nies mill-​Afrika fiż-​żmien meta kien hawn l-​ittraffikar taʼ l-​iskjavi lejn l-​Amerika.”

X’kien dak li tellef l-​isforzi tan-​nies biex iġibu bidla dejjiema? Huwa dan biss minħabba l-​qawwa taʼ l-​għonja u taʼ dawk fil-​poter, jew hemm iktar involut?

Affarijiet li Ma Jħallux il-​Bidliet Iseħħu

Skond il-​Kelma t’Alla, l-​akbar problema li ma tħallix l-​isforzi tal-​bniedem iġibu dinja verament ġusta hi Satana x-​Xitan. L-​appostlu Ġwanni jgħid li “d-​dinja kollha qiegħda taħt il-​qawwa tal-​Ħażin.” (1 Ġwanni 5:19) Fil-​fatt, bħalissa Satana qed “iqarraq bl-​art abitata kollha.” (Rivelazzjoni 12:9) Sakemm ma titneħħiex l-​influwenza mill-​agħar tiegħu, se jibqaʼ jkun hawn vittmi tal-​ħażen u l-​inġustizzja. X’kien dak li ġab din is-​soluzzjoni tal-​biki?

Il-​ġenituri oriġinali tagħna, Adam u Eva, ngħataw art li kienet disinjata b’tali mod li kienet ġenna taʼ l-​art perfetta għall-​familja umana kollha—dinja li kienet ‘tajba ħafna.’ (Ġenesi 1:31) X’kien dak li ġab din il-​bidla? Kien Satana. Hu sfida d-​dritt li għandu Alla biex jagħmel ir-​regoli li l-​irġiel u n-​nisa għandhom jimxu magħhom. Hu insinwa li l-​mod kif Alla jaħkem m’huwiex ġust. Hu ġagħal lil Adam u lil Eva jagħżlu ħajja indipendenti sabiex ikunu jistgħu jiddeċiedu għalihom infushom dak li hu tajjeb u dak li hu ħażin. (Ġenesi 3:​1-6) Dan wassal għat-​tieni problema li ma tħallix l-​isforzi li jagħmel il-​bniedem iġibu dinja ġusta—id-​dnub u l-​imperfezzjoni.—Rumani 5:12.

Għala Tħalla?

Xi wħud jistaqsu, ‘Imma Alla għala ħalla d-​dnub u l-​imperfezzjoni jiżviluppaw? Għala m’użax il-​qawwa bla limitu tiegħu sabiex jeqred ir-​ribelli u jerġaʼ jibda mill-​bidu?’ Kemm tinstemaʼ li kienet tkun soluzzjoni faċli! Madankollu, l-​użu tal-​qawwa tiegħu tqajjem mistoqsijiet serji. M’huwiex minnu li l-​abbuż tal-​poter huwa r-​raġuni prinċipali għall-​problemi taʼ dawk li huma foqra u li huma magħkusin fid-​dinja? Ma jqajjimx dan mistoqsijiet fi mħuħ dawk li huma sinċieri meta xi dittaturi jużaw il-​qawwa tagħhom biex jeqirdu lil dawk li ma jaqblux mar-​regoli tagħhom?

Sabiex jaċċerta lil dawk li huma onesti li m’huwiex xi tirann li se jabbuża mill-​qawwa tiegħu, Alla għażel li jħalli lil Satana u r-​ribelli umani jkunu indipendenti mil-​liġijiet u l-​prinċipji divini—għal żmien qasir biss. Iż-​żmien kellu jagħti prova li l-​mod kif jaħkem Alla huwa l-​uniku mod tajjeb. Kellu juri li kwalunkwe restrizzjoni li jpoġġi fuqna jagħmilha għall-​ġid tagħna. Fil-​fatt, ir-​riżultati traġiċi li ġabet ir-​ribelljoni kontra l-​ħakma t’Alla wrew kemm dan huwa minnu. U taw prova li Alla għandu raġuni valida biex juża l-​qawwa kbira tiegħu biex jelimina kull ħażen meta jiddeċiedi li jagħmel dan. Dan mhux se jdum ma jseħħ.—Ġenesi 18:​23-32; Dewteronomju 32:4; Salm 37:​9, 10, 38.

Biss, sakemm jaġixxi Alla, aħna ninsabu maqbudin f’sistema inġusta, ‘nokorbu u nħossu l-​uġigħ flimkien.’ (Rumani 8:22) Nagħmlu x’nagħmlu biex inbiddlu l-​affarijiet, ma nistgħux neħilsu minn Satana, u lanqas ma nistgħu nneħħu kompletament l-​imperfezzjoni li hi l-​problema bażika tas-​sofferenza kollha li nesperjenzaw. Aħna żgur li ma nistgħux nipprovdu rimedju għall-​effetti tad-​dnub li wrietna minn Adam.—Salm 49:​8-10 (49:​7-9, NW).

Ġesù Kristu Se Jġib Bidla Dejjiema

Ifisser dan li s-​sitwazzjoni hija kompletament bla tama? Żgur li le. Xi ħadd li hu bil-​wisq iktar minn sempliċi bniedem mortali ġie inkarigat bir-​responsabbiltà taʼ li jġib bidla permanenti. Dan min hu? Huwa Ġesù Kristu. Fil-​Bibbja huwa deskritt bħala l-​Aġent Ewlieni għas-​salvazzjoni tal-​familja umana.—Atti 5:31.

Bħalissa hu qed jistenna għaż-​“żmien stabbilit” t’Alla sabiex ikun jistaʼ jaġixxi. (Rivelazzjoni 11:18) X’se jagħmel eżattament? Hu se ‘jġedded l-​affarijiet kollha li Alla tkellem dwarhom b’fomm il-​profeti mqaddsa tiegħu tal-​qedem.’ (Atti 3:21) Per eżempju, Ġesù se “jeħles lill-​fqir li jsejjaħlu, u lill-​imsejken li m’għandux min jgħinu. . . . Jeħlishom mill-​qerq u mill-​moħqrija.” (Salm 72:​12-16) Permezz taʼ Ġesù Kristu, Alla wiegħed li se “jwaqqaf il-​gwerer sa truf l-​art.” (Salm 46:10 [46:​9, NW]) Hu jwiegħed: “Ħadd minn min jgħammar hemm ma jgħid: ‘Jien marid.’” L-​għomja, it-​torox, iz-​zopop—dawk kollha li huma milqutin minn xi mard—se tingħatalhom saħħa perfetta. (Isaija 33:24; 35:​5, 6; Rivelazzjoni 21:​3, 4) Anki dawk li mietu sekli ilu se jibbenefikaw. Hu wiegħed li se jġib lura għall-​ħajja lil dawk kollha li kienu vittmi taʼ l-​inġustizzja u l-​oppressjoni.—Ġwanni 5:​28, 29.

Ġesù Kristu mhux se jġib bidla parzjali jew temporanja. Hu se jneħħi għalkollox kull problema li ma tħallix lil din id-​dinja tkun verament ġusta. Hu se jneħħi d-​dnub u l-​imperfezzjoni u se jeqred lil Satana x-​Xitan u lil dawk kollha li jsegwu r-​ribelljoni tiegħu. (Rivelazzjoni 19:​19, 20; 20:​1-3, 10) In-​niket u s-​sofferenza li Alla ħalla għal ftit żmien mhux se jitħallew ‘iqumu darbtejn.’ (Naħum 1:9) Dan kellu f’moħħu Ġesù meta għallimna nitolbu biex tiġi s-​Saltna t’Alla u biex isseħħ ir-​rieda tiegħu “kif fis-​sema, ukoll fuq l-​art.”—Mattew 6:10.

Forsi għandek mnejn toġġezzjona, ‘Imma mhux Ġesù nnifsu qal li “l-​foqra dejjem magħna”? Ma jurix dan li l-​inġustizzja u l-​faqar se jibqgħu għal dejjem?’ (Mattew 26:11) Iva, Ġesù vera qal li dejjem se jkun hemm il-​foqra. Madankollu, il-​kuntest tal-​kliem tiegħu kif ukoll il-​wegħda tal-​Kelma t’Alla juru li dak li ried ifisser kien li l-​foqra dejjem se jkunu hemm sakemm tibqaʼ din is-​sistema. Hu kien jaf li l-​ebda bniedem m’hu qatt se jkun jistaʼ jneħħi l-​faqar u l-​inġustizzja mid-​dinja. Hu kien jaf ukoll li kien se jbiddel dan kollu. Hu dalwaqt se jġib sistema kompletament ġdida—“smewwiet ġodda u art ġdida” fejn mhux se jkun hemm iktar uġigħ, mard, faqar, u mewt.—2 Pietru 3:13; Rivelazzjoni 21:1.

“Tinsewx Tagħmlu l-​Ġid”

Ma jurix dan kollu li ma jagħmilx sens li tipprova tagħmel ħiltek kollha biex tgħin lin-​nies? Żgur li le. Il-​Bibbja tinkuraġġina biex ngħinu lil oħrajn meta jiffaċċjaw xi provi jew xi ċirkustanzi taʼ niket. Is-​Sultan Salamun tal-​qedem kiteb: “Min ħaqqu l-​ġid tiċħadhulux, meta dan tistaʼ tagħmlu.” (Proverbji 3:27) L-​appostlu Pawlu ħeġġeġ: “Tinsewx tagħmlu l-​ġid u taqsmu m’oħrajn.”—Ebrej 13:16.

Ġesù Kristu nnifsu inkuraġġiena nagħmlu ħilitna biex ngħinu lil oħrajn. Hu ġab tixbiha taʼ Samaritan li ltaqaʼ maʼ raġel li kienu sawtuh u serquh. Ġesù qal li r-​raġel Samaritan “tħassru” u uża r-​riżorsi tiegħu stess biex jinfaxxa l-​feriti tar-​raġel li kien ġie msawwat u għenu jirkupra mill-​assalt. (Luqa 10:​29-37) Il-​mogħdrija tas-​Samaritan ma biddlitx id-​dinja, imma għamlet differenza kbira fil-​ħajja taʼ dan ir-​raġel. Aħna nistgħu nagħmlu l-​istess.

Madankollu, Ġesù Kristu jistaʼ jagħmel iktar milli jgħin biss lil uħud individwalment. Hu jistaʼ verament iġib bidla, u se jagħmel hekk dalwaqt. Meta jagħmel hekk, dawk li sfaw vittmi minħabba l-​kundizzjonijiet taʼ din id-​dinja inġusta se jkunu jistgħu jtejbu l-​ħajjiet tagħhom u jgawdu paċi u sigurtà vera.—Salm 4:8; 37:​10, 11.

Sakemm nistennew li dan iseħħ, jalla qatt ma noqogħdu lura milli nagħmlu ħilitna, kemm spiritwalment u kemm materjalment, biex “nagħmlu t-​tajjeb” maʼ dawk kollha li huma vittmi taʼ din id-​dinja inġusta.—Galatin 6:10.

[Stampi f’paġna 5]

Florence Nightingale għamlet bidliet kbar fil-​qasam tal-​kura

[Sors]

Courtesy National Library of Medicine

[Stampi f’paġna 7]

Is-​segwaċi taʼ Kristu jagħmlu l-​ġid maʼ l-​oħrajn

[Sors tal-​Istampa f’paġna 4]

The Star, Johannesburg, S.A.