“Sabiex Ma Tidħlux fit-​Tentazzjoni”

“Ibqgħu għassa u itolbu kontinwament, sabiex ma tidħlux fit-​tentazzjoni.”—MATTEW 26:41.

IL-​PRESSJONI kienet intensa​—qatt ma kien esperjenza xi ħaġa simili. Ġesù Kristu, l-​Iben t’Alla, kien qorob it-​tmiem tal-​ħajja tiegħu fuq l-​art. Ġesù kien jaf li ftit ieħor hu kien se jiġi arrestat, ikkundannat għall-​mewt, u msammar maʼ zokk tat-​tortura. Kien jaf li kull deċiżjoni u azzjoni li jieħu kienet se tirrifletti fuq l-​isem taʼ Missieru. Ġesù kien jaf ukoll li kien wasal il-​ħin biex jiġu determinati l-​prospetti għall-​ħajja futura taʼ l-​umanità. X’ħin sab ruħu wiċċ imbwiċċ maʼ din il-​pressjoni, x’għamel?

² Ġesù mar fil-​ġnien tal-​Ġetsemani mad-​dixxipli tiegħu. Dan kien il-​post favorit taʼ Ġesù. Hemmhekk hu resaq ftit ’il bogħod mid-​dixxipli tiegħu. Kif sab ruħu waħdu, dar lejn Missieru tas-​sema biex jagħtih is-​saħħa billi fetaħ qalbu miegħu b’talb ħerqan​—mhux darba biss imma tliet darbiet. Minkejja li kien perfett, Ġesù ma ħassx li setaʼ jiffaċċja l-​pressjoni waħdu.​—Mattew 26:​36-44.

³ Illum, aħna wkoll ninsabu taħt pressjoni. Iktar kmieni f’dan il-​browxer, ikkunsidrajna l-​evidenza li aħna qegħdin ngħixu fl-​aħħar jiem taʼ din is-​sistema mill-​agħar. It-​tentazzjonijiet u l-​istress tad-​dinja taʼ Satana qed jiħraxu. Id-​deċiżjonijiet u l-​azzjonijiet taʼ kull wieħed u waħda minna li nistqarru li naqdu lill-​Alla veru jirriflettu fuq ismu u għandhom effett kbir fuq il-​prospetti individwali tagħna għall-​ħajja fid-​dinja l-​ġdida tiegħu. Aħna nħobbuh lil Ġeħova. Irridu ‘nissaportu sat-​tmiem’​—it-​tmiem taʼ ħajjitna jew it-​tmiem taʼ din is-​sistema, liema minnhom jiġi l-​ewwel. (Mattew 24:13) Imma kif nistgħu nżommu s-​sens t’urġenza tagħna u nibqgħu għassa?

⁴ Billi kien jaf li d-​dixxipli tiegħu​—kemm taʼ dak iż-​żmien u kemm taʼ issa—ukoll kienu se jkunu taħt pressjoni, Ġesù ħeġġeġ: “Ibqgħu għassa u itolbu kontinwament, sabiex ma tidħlux fit-​tentazzjoni.” (Mattew 26:41) Xi jfisser dan il-​kliem għalina llum? X’tentazzjonijiet qed tiffaċċja int? U kif tistaʼ ‘tibqaʼ għassa’?

Tentazzjoni għal Xiex?

⁵ Ilkoll kemm aħna kuljum niffaċċjaw it-​tentazzjoni li naqgħu fin-​“nassa tax-​Xitan.” (2 Timotju 2:26) Il-​Bibbja twissina li l-​aduraturi taʼ Ġeħova huma l-​mira speċjali taʼ Satana. (1 Pietru 5:8; Rivelazzjoni 12:​12, 17) B’liema skop? Mhux neċessarjament biex jiħdilna ħajjitna. Ma tkunx rebħa għal Satana li kieku kellna mmutu leali lejn Ġeħova. Satana huwa konxju li Ġeħova, fiż-​żmien Tiegħu, se jneħħi l-​mewt permezz taʼ l-​irxoxt.​—Luqa 20:​37, 38.

⁶ Satana jixtieq jeqred xi ħaġa saħansitra iktar prezzjuża mill-​ħajja li għandna bħalissa​—l-​integrità tagħna lejn Alla. Satana huwa ddisprat biex jagħti prova li hu jistaʼ jbegħedna minn Ġeħova. Għalhekk, jekk aħna nistgħu niġu influwenzati biex ma nibqgħux leali​—biex ma nibqgħux inxandru l-​aħbar tajba jew biex nabbandunaw il-​livelli Kristjani—din tkun vittorja għal Satana! (Efesin 6:​11-​13) Għalhekk, “it-​Tentatur” ipoġġi t-​tentazzjonijiet quddiemna.​—Mattew 4:3.

⁷ It-​“tattiċi qarrieqa” taʼ Satana huma varjati. (Efesin 6:​11, Jewish New Testament) Hu jistaʼ jittantana bil-​materjaliżmu, biżaʼ, dubji, jew ġiri wara l-​pjaċiri. Imma waħda mill-​aħjar tattiċi tiegħu tinvolvi l-​iskuraġġiment. Hu opportunist li jilħaqlu u jaf li l-​qtugħ taʼ qalb jistaʼ jdgħajjifna, u jagħmilna iktar vulnerabbli. (Proverbji 24:10) Għalhekk, speċjalment meta ‘nħossuna mfarrkin’ emozzjonalment, hu jittantana biex naqtgħu qalbna.​—Salm 38:9 (38:​8, NW ).

⁸ Hekk kif noqorbu iktar lejn it-​tmiem taʼ l-​aħħar jiem, dawk l-​affarijiet li jikkaġunaw l-​iskuraġġiment jidhru li qed jiżdiedu, u aħna m’aħniex ħelsin mill-​influwenza tagħhom. (Ara l-​kaxxa “Xi Fatturi li Jikkaġunaw l-​Iskuraġġiment.”) Hu x’inhu l-​kaġun, l-​iskuraġġiment jistaʼ jixorbilna saħħitna. Ikun taʼ sfida biex ‘nużaw il-​ħin bl-​aħjar mod’​—fosthom li nistudjaw il-​Bibbja, nattendu l-​laqgħat Kristjani, u nieħdu sehem fil-​ministeru​—jekk inkunu għajjenin fiżikament, mentalment, u emozzjonalment. (Efesin 5:​15, 16) Ftakar li t-​Tentatur iridek tieqaf. Imma issa mhux iż-​żmien li tnaqqas il-​pass jew li titlef is-​sens t’urġenza tiegħek dwar iż-​żminijiet li qed ngħixu fihom! (Luqa 21:​34-36) Kif tistaʼ tirreżisti t-​tentazzjoni u tibqaʼ għassa? Ikkunsidra erbaʼ suġġerimenti li jistgħu jkunu t’għajnuna.

‘Itlob Kontinwament’

⁹ Strieħ fuq Ġeħova permezz tat-​talb. Ftakar fl-​eżempju taʼ Ġesù fil-​ġnien tal-​Ġetsemani. Meta ffaċċja stress emozzjonali kbir, x’għamel? Hu dar lejn Ġeħova għall-​għajnuna, u tant talab bil-​ħerqa li “l-​għaraq tiegħu beda nieżel fl-​art bħal qtar tad-​demm.” (Luqa 22:44) Aħseb dwar dan. Ġesù kien jafu sew lil Satana. Mis-​sema, Ġesù kien osserva t-​tentazzjonijiet kollha taʼ Satana biex jipprova jonsob lill-​qaddejja t’Alla. Madankollu, Ġesù ma ħassx li hu setaʼ jkampa faċilment maʼ dak kollu li t-​Tentatur setaʼ jippreżentalu quddiemu. Jekk l-​Iben perfett t’Alla ħass il-​bżonn li jitlob għall-​għajnuna u għas-​saħħa mingħand Alla, kemm iktar imissna nagħmlu hekk aħna!​—1 Pietru 2:​21.

¹⁰ Ftakar ukoll li wara li ħeġġeġ lid-​dixxipli tiegħu biex ‘jitolbu kontinwament,’ Ġesù qal: “L-​ispirtu hu ħerqan imma l-​laħam dgħajjef.” (Mattew 26:41) Ġesù għal-​laħam taʼ min kien qed jirreferi? Żgur li mhux għal tiegħu; il-​laħam uman perfett tiegħu ma kellu xejn dgħajjef fih. (1 Pietru 2:​22) Imma kienet sitwazzjoni differenti għad-​dixxipli tiegħu. Minħabba l-​imperfezzjoni u t-​tendenzi midinba li wirtu, huma kien se jkollhom bżonn l-​għajnuna b’mod speċjali biex jirreżistu t-​tentazzjoni. (Rumani 7:​21-​24) Kien għalhekk li hu ħeġġeġ lilhom​—u lill-​Kristjani veri kollha warajhom​—biex jitolbu għall-​għajnuna meta jiffaċċjaw xi tentazzjoni. (Mattew 6:​13) Ġeħova jwieġbu talb bħal dan. (Salm 65:​3, 4a [65:​2, NW ]) Kif? Mill-​inqas b’żewġ modi.

¹¹ L-​ewwel, Alla jgħinna nagħrfu t-​tentazzjonijiet. It-​tentazzjonijiet taʼ Satana huma bħal nasbiet mitfugħin ġo passaġġ mudlam. Jekk ma tarahomx, tistaʼ tinqabad ġo waħda minnhom. Permezz tal-​Bibbja u pubblikazzjonijiet ibbażati fuqha, Ġeħova jitfaʼ d-​dawl fuq in-​nasbiet taʼ Satana, u b’hekk jgħinna nevitaw li nċedu għat-​tentazzjoni. Matul iż-​żmien, il-​letteratura stampata u l-​programmi tal-​konvenzjonijiet u l-​assembleat wissewna ripetutament għal perikli bħalma huma l-​biżaʼ mill-​bniedem, l-​immoralità sesswali, il-​materjaliżmu, u tentazzjonijiet sataniċi oħrajn. (Proverbji 29:25; 1 Korintin 10:​8-11; 1 Timotju 6:​9, 10) Ma tħossokx grat lejn Ġeħova talli jwissina dwar il-​pjanijiet taʼ Satana? (2 Korintin 2:​11) Twissijiet bħal dawn huma tweġiba għat-​talb tiegħek għall-​għajnuna biex tirreżisti t-​tentazzjonijiet.

¹² It-​tieni, Ġeħova jwieġeb it-​talb tagħna billi jagħtina s-​saħħa biex nissaportu t-​tentazzjoni. Il-​Kelma tiegħu tgħid: “Alla . . . ma jħallikomx tiġu ttantati iktar milli tifilħu, imma mat-​tentazzjoni jiftħilkom ukoll it-​triq sabiex tkunu tistgħu tissaportuha.” (1 Korintin 10:13) Alla qatt ma se jippermetti li xi tentazzjoni tant tkun qawwija li ma jkollniex saħħa spiritwali biżżejjed biex nirreżistuha​—dment li nkomplu nistrieħu fuqu. Hu kif ‘jiftħilna t-​triq’? Hu “jagħti l-​ispirtu qaddis lil dawk li jitolbuh.” (Luqa 11:13) Dan l-​ispirtu jistaʼ jgħinna niftakru fi prinċipji Bibliċi li jistgħu jsaħħu r-​riżoluzzjoni tagħna biex nagħmlu dak li hu sewwa u jgħinna biex nieħdu deċiżjonijiet għaqlin. (Ġwanni 14:26; Ġakbu 1:​5, 6) Jistaʼ jgħinna nuru dawk il-​kwalitajiet li għandna bżonn biex negħlbu tendenzi ħżiena. (Galatin 5:​22, 23) L-​ispirtu t’Alla jistaʼ wkoll iqanqal lil sħabna fit-​twemmin biex ikunu ‘għajnuna li ssaħħaħna.’ (Kolossin 4:11) Ma tħossokx grat li Ġeħova jwieġeb b’tant imħabba t-​talb tiegħek għall-​għajnuna?

Kun Realistiku fl-​Istennijiet Tiegħek

¹³ Sabiex nibqgħu għassa, għandna bżonn inkunu realistiċi fl-​istennijiet tagħna. Minħabba l-​pressjonijiet tal-​ħajja, ilkoll kemm aħna ngħejjew kultant. Imma rridu niftakru li Alla qatt ma wiegħed li se jkollna ħajja mingħajr problemi f’din is-​sistema qadima. Anki fi żminijiet Bibliċi, il-​qaddejja taʼ Ġeħova ffaċċjaw ħafna kuntrarju, fosthom persekuzzjoni, faqar, dipressjoni, u mard.​—Atti 8:1; 2 Korintin 8:​1, 2; 1 Tessalonikin 5:​14; 1 Timotju 5:​23.

¹⁴ Illum, aħna wkoll qed niffaċċjaw il-​problemi. Għandna mnejn niffaċċjaw il-​persekuzzjoni, ikollna ansjetajiet finanzjarji, nitqabdu mad-​dipressjoni, nimirdu, jew inbatu b’modi oħrajn. Kieku Ġeħova jipproteġina mirakolożament minn kull ħsara, ma kienx dan ikun bażi soda biex Satana jgħajjar lil Ġeħova? (Proverbji 27:11) Ġeħova jippermetti li l-​qaddejja tiegħu jiġu ttantati u jgħaddu mill-​provi, xi drabi anki b’mewt qabel il-​waqt f’idejn min ikun kontrihom.​—Ġwanni 16:2.

¹⁵ Mela Ġeħova x’wiegħed? Bħalma ntqal qabel, hu wegħedna li se jgħinna nifilħu għal kull tentazzjoni li nistgħu niltaqgħu magħha, dejjem jekk aħna nafdaw fih kompletament. (Proverbji 3:​5, 6) Permezz tal-​Kelma tiegħu, l-​ispirtu tiegħu, u l-​organizzazzjoni tiegħu, hu jipproteġina spiritwalment billi jgħinna nipproteġu r-​relazzjoni tagħna miegħu. Jekk dik ir-​relazzjoni tibqaʼ hemm, saħansitra jekk immutu, se nkunu rebbieħa. Xejn​—lanqas il-​mewt​—ma se jżomm lil Alla milli jippremja lill-​qaddejja leali tiegħu. (Ebrej 11:6) U fid-​dinja l-​ġdida li issa tinsab tefgħa taʼ ġebla ’l bogħod, Ġeħova mhux se jonqos milli jwettaq il-​kumplament tal-​wegħdi meraviljużi taʼ barkiet għal dawk li jħobbuh.​—Salm 145:16.

Ftakar fil-​Kwistjonijiet

¹⁶ Sabiex nissaportu sa l-​aħħar, irridu niftakru l-​kwistjonijiet vitali involuti fil-​fatt li Alla jippermetti l-​ħażen. Jekk xi drabi l-​problemi li jkollna jidhru tant kbar li nibdew naħsbu biex nieqfu, nagħmlu tajjeb li nfakkru lilna nfusna li Satana sfida d-​dritt tas-​sovranità taʼ Ġeħova. Il-​Qarrieq tefaʼ dubju wkoll fuq id-​devozzjoni u l-​integrità taʼ dawk li jqimu lil Alla. (Ġob 1:​8-​11; 2:​3, 4) Dawn il-​kwistjonijiet u l-​mod kif Ġeħova għażel li jsolvihom huma iktar importanti minn ħajjitna stess. Dan kif?

¹⁷ Il-​fatt li Alla jippermetti t-​tbatija b’mod temporanju ta ċans biex ikun hemm oħrajn li jħaddnu l-​verità. Aħseb dwar dan: Ġesù bata biex aħna nkunu nistgħu niksbu l-​ħajja. (Ġwanni 3:16) M’aħniex grati għal dan? Imma lesti aħna li għal ftit ieħor nissaportu l-​problemi li jinqalgħu sabiex ikun hemm iktar nies li jkunu jistgħu jiksbu l-​ħajja? Jekk irridu nissaportu sa l-​aħħar, irridu nirrikonoxxu li lgħerf taʼ Ġeħova huwa bil-​wisq akbar minn tagħna. (Isaija 55:9) Hu se jtemm il-​ħażen fl-​aħjar żmien biex jiġu setiljati dawn il-​kwistjonijiet darba għal dejjem u għall-​ġid etern tagħna. Jistaʼ jkun hemm mod aħjar minn dan? M’hemm l-​ebda inġustizzja f’Alla!​—Rumani 9:​14-​24.

“Ersaq Qrib Lejn Alla”

¹⁸ Sabiex inżommu s-​sens t’urġenza tagħna, irridu nibqgħu qrib Ġeħova. Qatt tinsa li Satana qed jagħmel dak kollu li jistaʼ biex jeqred ir-​relazzjoni tajba tagħna maʼ Ġeħova. Satana jridna nemmnu li t-​tmiem qatt m’hu ġej u li m’hemmx skop f’li nippridkaw l-​aħbar tajba jew f’li ngħixu skond il-​livelli tal-​Bibbja. Però, “hu giddieb u missier il-​gidba.” (Ġwanni 8:44) Irridu nkunu determinati li ‘nopponu lix-​Xitan.’ Qatt ma rridu nħarsu lejn ir-​relazzjoni tagħna maʼ Ġeħova bħala xi ħaġa taʼ valur żgħir. Il-​Bibbja tħeġġiġna bl-​imħabba: “Ersqu qrib lejn Alla, u hu jersaq qrib lejkom.” (Ġakbu 4:​7, 8) Kif tistaʼ tersaq eqreb lejn Ġeħova?

¹⁹ Hemm bżonn taʼ meditazzjoni bit-​talb. Meta l-​pressjonijiet tal-​ħajja jidhru li huma iktar milli tistaʼ tiflaħ, iftaħ qalbek kompletament maʼ Ġeħova. Iktar kemm tkun speċifiku, iktar se jkun faċli biex tara t-​tweġiba għal dak li tlabt. Għandu mnejn li t-​tweġiba ma tkunx eżatt dak li kellek f’moħħok, imma jekk ix-​xewqa tiegħek hija li tonorah u li żżomm l-​integrità, hu se jipprovdilek lgħajnuna li għandek bżonn biex jirnexxilek tistabar. (1 Ġwanni 5:​14) Hekk kif tara d-​direzzjoni tiegħu f’ħajtek, se tersaq eqreb lejh. Il-​qari u l-​ħsieb fil-​fond dwar il-​kwalitajiet taʼ Ġeħova u l-​modi tiegħu, kif murijin fil-​Bibbja, ukoll huma bżonnjużi. Meditazzjoni bħal din tgħinek issir tafu aħjar; tqanqallek qalbek u tkabbarlek l-​imħabba tiegħek għalih. (Salm 19:15 [19:​14, NW ]) Din l-​imħabba, iktar minn kwalunkwe ħaġa oħra, se tgħinek tirreżisti t-​tentazzjoni u tibqaʼ għassa.​—1 Ġwanni 5:3.

²⁰ Biex nibqgħu qrib Ġeħova, huwa importanti wkoll li nibqgħu qrib sħabna fit-​twemmin. Dan se jiġi diskuss fl-​aħħar sezzjoni taʼ dan il-​browxer.

MISTOQSIJIET TAʼ STUDJU

• Meta qorob it-​tmiem taʼ ħajtu, Ġesù x’għamel taħt pressjoni estrema, u x’ħeġġeġ lid-​dixxipli tiegħu biex jagħmlu? (Pari. 1-4)

• Satana għalfejn jimmira lejn l-​aduraturi taʼ Ġeħova, u b’liema modi jittantana? (Pari. 5-8)

• Sabiex nirreżistu t-​tentazzjoni, għala għandna nitolbu kontinwament (Pari. 9-12), inkunu realistiċi fl-​istennijiet tagħna (Pari. 13-15), niftakru fil-​kwistjonijiet (Pari. 16-​17), u ‘nersqu qrib lejn Alla’ (Pari. 18-​20)?

[Kaxxa f’paġna 25]

Xi Fatturi li Jikkaġunaw l-​Iskuraġġiment

Is-​Saħħa/l-età. Jekk inbatu minn xi marda kronika jew jekk l-​età avanzata qed tillimitana, nistgħu nkunu mdejqin minħabba li ma nkunux nistgħu nagħmlu iktar biex naqdu lil Alla.​—Ebrej 6:10.

Diżappunt. Nistgħu nibdew naqtgħu qalbna jekk ftit li xejn naraw min iwieġeb għall-​isforzi tagħna biex nippridkaw il-​Kelma t’Alla.​—Proverbji 13:12.

Tħossok li ma tiswaʼ għal xejn. Individwu li għal snin sħaħ jiġi trattat ħażin jistaʼ jsir konvint li hu m’huwiex maħbub, lanqas minn Ġeħova.​—1 Ġwanni 3:​19, 20.

Sentimenti mweġġgħin. Jekk xi ħadd jiġi offiż ħafna minn individwu taʼ l-​istess twemmin, dan jistaʼ tant jinfixel li jiġih il-​ħsieb biex ma jibqax jattendi l-​laqgħat Kristjani jew jieħu sehem fil-​ministeru.​—Luqa 17:1.

Persekuzzjoni. Nies li m’għandhomx listess twemmin tiegħek jistgħu jopponuk, jippersegwitawk, jew iwaqqgħuk għaċ-​ċajt.​—2 Timotju 3:12; 2 Pietru 3:​3, 4.

[Stampa f’paġna 26]

Ġesù ħeġġiġna biex ‘nitolbu kontinwament’ għall-​għajnuna ħalli niġġieldu t-​tentazzjoni