“Ma Tawx Kas”
JEKK it-twissijiet ma niħduhomx bis-serjetà, nistgħu nġarrbu diżastru.
Fl-1974, il-belt taʼ Darwin, fl-Awstralja, kienet għaddejja bil-preparamenti għaċ-ċelebrar tal-vaganzi meta f’daqqa waħda s-sireni bdew idoqqu biex jallarmaw lin-nies li kien ġej ċiklun. Imma l-belt taʼ Darwin kienet ilha madwar 30 sena ma tintlaqat minn ċiklun. Għaliex kellu jinqalaʼ issa? Ħafna minn dawk li kienu joqogħdu hemm ma qisux is-serjetà tal-periklu sakemm irwiefen qalila bdew itajru s-soqfa u jaqilgħu l-ħitan tad-djar fejn in-nies kienu jinsabu mgeddsin maʼ xulxin. Sa l-għada fil-għodu, il-belt kienet saret ħerba.
F’Novembru taʼ l-1985, żbroffa vulkan fil-Kolombja. Is-silġ u l-borra li bdew jinħallu kkawżaw massa kbira taʼ tajn li niżlet fuq iktar minn 20,000 abitant fil-belt t’Armero. Kien hemm xi twissija minn qabel? Il-muntanja kienet ilha xhur sħaħ titriegħed. Madankollu, peress li kienu draw joqogħdu qrib il-vulkan, il-maġġuranza mill-abitanti t’Armero ma ħabblux rashom. L-awtoritajiet irċivew twissijiet li dalwaqt kien ġej diżastru, imma bilkemm ħadu azzjoni biex javżaw lill-pubbliku. Minn fuq ir-radju saru avviżi biex jaċċertaw lin-nies. Permezz taʼ l-ispeakers, fil-knisja bdew iħeġġu lin-nies biex jibqgħu kalmi. Fil-għaxija kien hemm żewġ splużjonijiet spettakolari. Kieku int kont tabbanduna kollox u taħrab? Ftit kienu n-nies li għamlu sforz biex jaħarbu qabel ma kien tard wisq.
Ħafna drabi, il-ġeoloġi jbassru minn qabel b’eżattezza konsiderevoli fejn ikunu se jsiru t-terremoti. Imma rari jkunu jistgħu jgħidu bl-eżatt meta dawn ikunu se jseħħu. Fl-1999, it-terremoti madwar id-dinja qatlu madwar 20,000 ruħ. Ħafna minn dawk li mietu kienu ħasbu li ħaġa bħal din qatt ma kienet se tiġri lilhom.
Kif Tiħodhom it-Twissijiet li Jiġu minn Alla Nnifsu?
Minn ħafna qabel, il-Bibbja ddeskriviet b’mod ħaj il-ġrajjiet li jimmarkaw l-aħħar jiem. Fi qbil maʼ dan, din tħeġġiġna biex nikkunsidraw “jiem Noè.” “F’dawk il-jiem qabel id-dilluvju,” in-nies kienu għaddejjin bl-attivitajiet normali tal-ħajja, għalkemm bla dubju huma kienu konċernati dwar kemm kienet qed toktor il-vjolenza. Rigward it-twissija li Alla ta permezz tal-qaddej tiegħu Noè, in-nies “ma tawx kas sakemm ġie d-dilluvju u kinishom ilkoll.” (Mattew 24:37-39) Kieku int kont tagħti kasha t-twissija? Qiegħed tagħmel hekk issa?
Xi ngħidu li kieku kont tgħix f’Sodoma, ħdejn il-Baħar il-Mejjet, fi żmien ir-raġel Lot li kien in-neputi t’Abraham? Il-kampanja kienet qisha ġenna taʼ l-art. Il-belt kellha ħafna ġid. In-nies kienu jgħixu b’moħħhom mistrieħ. Fi żmien Lot, “kienu qed jieklu, kienu qed jixorbu, kienu qed jixtru, kienu qed ibigħu, kienu qed iħawlu, u kienu qed jibnu.” Is-soċjetà li kienu qed jgħixu fiha kienet ukoll estremament immorali. Kieku int kont tagħti kas it-twissija meta Lot tkellem kontra l-prattiċi mill-agħar? Kont se tismaʼ meta qallek li Alla kien determinat li jġib fit-tmiem lill-belt taʼ Sodoma? Jew kont tieħu kollox biċ-ċajt, kif għamlu l-irġiel li kienu se jiżżewġu lill-bniet taʼ Lot? Kont forsi tibda taħrab, imma mbagħad iddur lura bħalma għamlet mart Lot? Għalkemm kien hemm min ma ħax it-twissija bis-serjetà, dakinhar li Lot ħareġ minn Sodoma “niżlet xita taʼ nar u kubrit mis-sema u qerdithom ilkoll.”—Luqa 17:28, 29.
Il-maġġuranza tan-nies fi żmienna ma jagħtux kas. Imma dawn l-eżempji baqgħu preservati fil-Kelma t’Alla bħala twissija għalina, biex jinkuraġġuna NIBQGĦU GĦASSA!
[Stampa/Kaxxa f’paġna 22]
Huwa Minnu li Kien Hemm Dilluvju Globali?
Ħafna kritiċi jgħidu Le. Imma l-Bibbja tgħid Iva.
Ġesù Kristu nnifsu tkellem dwaru. Hu stess kien ħaj meta dan ġara, u ra kollox mis-sema.
[Kaxxa/Stampa f’paġna 23]
Veru li Sodoma u Gomorra Ġew Meqrudin?
L-arkeoloġija tagħti prova taʼ din il-ġrajja.
Din il-ġrajja tissemma fl-istorja sekulari.
Ġesù Kristu vverifika din il-ġrajja, u dak li seħħ jissemma f’14-il ktieb differenti tal-Bibbja.