Erfaʼ ’l Fuq Idejn Leali Biex Titlob

“Nixtieq li l-​irġiel jitolbu kullimkien, jerfgħu ’l fuq idejn safja bla għadab u bla ġlied.”—1 TIMOTJU 2:8.

1, 2. (a) L-​Ewwel Timotju 2:8 kif japplika għal talb li jinvolvi lill-​poplu taʼ Jehovah? (b) X’se nikkunsidraw issa?

JEHOVAH jistenna li n-​nies tiegħu jkunu leali lejh u lejn xulxin. L-​appostlu Pawlu assoċja l-​lealtà mat-​talb meta kiteb: “Nixtieq li l-​irġiel jitolbu kullimkien, jerfgħu ’l fuq idejn safja [“leali,” NW] bla għadab u bla ġlied.” (1 Timotju 2:8) Milli jidher, Pawlu kien qed jirreferi għal talb pubbliku ‘kulfejn’ il-​Kristjani kienu jiltaqgħu flimkien. Min kellu jirrappreżenta lill-​poplu t’Alla bit-​talb fil-​laqgħat tal-​kongregazzjoni? Irġiel qaddisin, twajbin u taʼ rispett biss u li kienu josservaw bir-​reqqa d-​dmirijiet Skritturali kollha lejn Alla. (Koħèlet 12:13, 14) Dawn kellhom ikunu nodfa spiritwalment u moralment u bla ebda dubju devoti lejn Alla Jehovah.

² L-​anzjani tal-​kongregazzjoni għandhom speċjalment ‘jerfgħu ’l fuq idejn leali biex jitolbu.’ It-​talb tagħhom mill-​qalb permezz taʼ Ġesù Kristu juri lealtà lejn Alla u jgħinhom jevitaw dibattiti u tmasħin. Fil-​fatt, kull raġel li jkollu l-​privileġġ li jirrappreżenta lill-​kongregazzjoni Kristjana f’talb pubbliku għandu jkun ħieles mill-​korla, il-​malizzja, u l-​infedeltà lejn Jehovah u lejn l-​organizzazzjoni tiegħu. (Ġakbu 1:19, 20) Liema linji taʼ gwida Skritturali oħrajn hemm għal dawk li għandhom il-​privileġġ li jirrappreżentaw lill-​oħrajn f’talb pubbliku? U liema huma xi prinċipji Skritturali li għandna napplikaw fit-​talb privat tagħna u dak mal-​familja?

Aħseb bil-​Quddiem dwar x’Se Tgħid fit-​Talba

3, 4. (a) Għala huwa taʼ benefiċċju li naħsbu bil-​quddiem dwar x’se ngħidu f’talb pubbliku? (b) L-​Iskrittura x’tindika dwar it-​tul tat-​talb?

³ Jekk jistidnuna biex nitolbu pubblikament, x’aktarx li nkunu nistgħu naħsbu ftit bil-​quddiem dwar x’se ngħidu fit-​talba tagħna. Li nagħmlu dan jistaʼ jgħinna ninkludu affarijiet importanti u addattati, u b’hekk it-​talba tagħna ma tkunx twila żżejjed u bla sugu. M’għandniex xi ngħidu, it-​talb privat tagħna jistaʼ wkoll jitlissen. Dan jistaʼ jvarja fit-​tul. Ġesù qattaʼ lejl sħiħ jitlob qabel ma għażel lit-​12-il appostlu tiegħu. Madankollu, qabel ma waqqaf il-​Mafkar taʼ mewtu, it-​talb tiegħu rigward il-​ħobż u l-​inbid milli jidher kien pjuttost qasir. (Luqa 6:12-16; Mark 14:22-24) U aħna nafu li anki t-​talb qasir taʼ Ġesù kien għalkollox aċċettabbli għal Alla.

⁴ Nassumu li jkollna l-​privileġġ li nirrappreżentaw lil xi familja fit-​talb qabel l-​ikel. Talba bħal din tistaʼ tkun pjuttost qasira​—imma fiha trid tiġi inkluża espressjoni taʼ gratitudni għall-​ikel. Jekk qed nitolbu pubblikament qabel jew wara xi laqgħa Kristjana, m’għandniex għalfejn noffru talba twila li tinkludi ħafna punti. Ġesù kkritika lill-​iskribi li “għal wiċċ in-​nies [kienu] idumu ħafna jitolbu.” (Luqa 20:46, 47) Bniedem devot żgur li ma jkunx irid jagħmel ħaġa bħal din. Xi drabi, iżda, talba pubblika pjuttost twila tistaʼ tkun addattata. Per eżempju, anzjan li jintgħażel biex jgħid it-​talba finali f’xi assemblea għandu jaħseb bil-​quddiem dwar x’se jgħid u forsi jkun jixtieq isemmi diversi punti. Madankollu, saħansitra talba bħal din m’għandhiex tkun taʼ tul esaġerat.

Avviċina lil Alla bir-​Rispett

5. (a) X’għandna nżommu f’moħħna meta nitolbu pubblikament? (b) Għala għandna nitolbu b’mod dinjituż u taʼ rispett?

⁵ Meta nitolbu pubblikament għandna niftakru li m’aħniex nindirizzaw lil xi bniedem. Pjuttost, aħna ħlejjaq midinbin li qegħdin inressqu petizzjoni quddiem il-​Mulej Sovran Jehovah. (Salm 8:4-6, 10 [Salm 8:3-5, 9, NW]; Salm 73:28) Għalhekk, għandna nuru rispett u biżaʼ li ma mmorrux ma nogħġbuhx b’dak li ngħidu u bil-​mod kif nesprimuh. (Proverbji 1:7) Is-​salmista David kanta: “Imma jien għat-​tjieba kbira tiegħek nistaʼ nidħol ġewwa darek; ninxteħet quddiem is-​santwarju mqaddes tiegħek, . . . mimli bil-​biżaʼ tiegħek.” (Salm 5:8 [Salm 5:7, NW]) Jekk għandna din l-​attitudni, kif se nesprimu ruħna meta jistidnuna biex nitolbu pubblikament f’xi laqgħa tax-​Xhieda taʼ Jehovah? Ara, li kieku konna qed nitkellmu maʼ xi sultan uman, konna navviċinawh b’rispett u b’dinjità. M’għandux it-​talb tagħna jkun saħansitra iżjed dinjituż u taʼ rispett, ladarba nkunu qed nitolbu lil Jehovah, is-​“Sultan tal-​ġnus [“taʼ l-​eternità,” NW]”? (Apokalissi 15:3) Mela meta nitolbu rridu nevitaw stqarrijiet bħal, “Bonġu, Jehovah,” “Nibagħtu nsellu għalik,” jew, “Il-​ġurnata t-​tajba.” L-​Iskrittura turi li Ġesù Kristu, l-​Iben uniġenitu t’Alla, qatt ma indirizza lil Missieru tas-​sema b’dan il-​mod.

6. X’għandna nżommu f’moħħna meta nersqu “b’qalbna qawwija lejn it-​tron tal-​grazzja”?

⁶ Pawlu qal: “Ħa nersqu . . . b’qalbna qawwija [“liberi fi kliemna,” NW] lejn it-​tron tal-​grazzja.” (Lhud 4:16) Minħabba l-​fidi li għandna fis-​sagrifiċċju li ħallas Ġesù Kristu bħala prezz għall-​fidwa, aħna nistgħu navviċinaw lil Jehovah “liberi fi kliemna” minkejja l-​istat midneb tagħna. (Atti 10:42, 43; 20:20, 21) Madankollu, din il-​“libertà fi kliemna” ma tfissirx li nkunu qed inpaċpċu m’Alla; lanqas m’għandna ngħidulu affarijiet taʼ diżrispett. Biex it-​talb pubbliku tagħna jkun jogħġob lil Jehovah, dan irid jiġi offrut b’rispett u dinjità xierqa, u ma jkunx addattat li jintuża biex tixxandar xi ħaġa, biex jingħata parir lil xi individwu, jew biex l-​udjenza tiġi ammonita.

Itlob bi Spirtu Umli

7. Salamun kif wera l-​umiltà meta talab fid-​dedikazzjoni tat-​tempju taʼ Jehovah?

⁷ Kemm jekk nitolbu pubblikament u kemm fil-​privat, prinċipju Skritturali importanti li għandna nżommu f’moħħna hu li fit-​talb tagħna għandna nuru spirtu umli. (2 Kronaki 7:13, 14) Is-​Sultan Salamun wera l-​umiltà fit-​talba pubblika tiegħu meta saret id-​dedikazzjoni tat-​tempju taʼ Jehovah f’Ġerusalemm. Salamun kien għadu kif lesta wieħed mill-​iktar proġetti manjifiċi li qatt inbnew fuq l-​art. Madankollu, hu talab umilment: “Imma, tgħid, tassew li Alla se jgħix fuq l-​art? Ara! Lanqas biss is-​smewwiet – u s-​smewwiet tas-​smewwiet – ma jesgħuk, aħseb u ara dan id-​daqsxejn taʼ tempju li bnejt jien!”—1 Slaten 8:27.

8. Liema huma xi modi li bihom tintwera l-​umiltà fit-​talb pubbliku?

⁸ Bħal Salamun, għandna nkunu umlin meta nirrappreżentaw lil oħrajn f’talb pubbliku. Għalkemm ma rridux li nagħmlu xi turija taʼ qdusija, l-​umiltà tistaʼ tintwera mit-​ton taʼ leħinna. Talb umli m’huwiex bombastiku jew melodrammatiku. Dan jiġbed l-​attenzjoni lejn Dak li qed jiġi indirizzat u mhux lejn dak li qed jitlob. (Mattew 6:5) L-​umiltà tintwera wkoll b’dak li ngħidu fit-​talb. Jekk nitolbu b’umiltà, ma ninstemgħux qisna qed nordnaw li Alla jagħmel ċerti affarijiet kif irriduhom aħna. Minflok, aħna nagħmlu petizzjoni lil Jehovah biex jaġixxi b’manjiera li hija fi qbil mar-​rieda qaddisa tiegħu. Is-​salmista eżemplifika l-​attitudni xierqa meta talab bil-​ħniena: “O, issa, Jehovah, salva, jekk jogħġbok! O, issa, Jehovah, agħti suċċess, jekk jogħġbok!”—Salm 118:25, NW; Luqa 18:9-14.

Itlob mill-​Qalb

9. Liema parir mill-​aħjar mogħti minn Ġesù jinstab f’Mattew 6:7, u kif nistgħu napplikawh?

⁹ Biex it-​talb tagħna, fil-​pubbliku jew fil-​privat, jogħġob lil Jehovah, dan irid jiġi mill-​qalb. B’hekk, ma rridux sempliċement nirrepetu darba wara l-​oħra xi talba preskritta mingħajr ma naħsbu dwar dak li qed ngħidu. Fil-​Priedka tiegħu taʼ fuq il-​Muntanja, Ġesù wissa: “Intom u titolbu toqogħdux tlabalbu bħall-​pagani; dawn mingħalihom li, iktar ma jgħidu, iktar jinstemgħu.” Fi kliem ieħor, Ġesù qal: “Tgħidux kliem bla sens; toqogħdux tirrepetu fil-​vojt.”—Mattew 6:7; ara n-​nota taʼ taħt fin-​NW.

10. Għala jkun xieraq li titlob iktar minn darba dwar l-​istess ħaġa?

¹⁰ M’għandniex xi ngħidu, forsi jkollna bżonn nitolbu dwar l-​istess ħaġa ripetutament. Din m’hijiex ħaġa żbaljata għaliex Ġesù ħeġġeġ: “Ibqgħu itolbu, u se jingħatalkom; ibqgħu fittxu, u se ssibu; ibqgħu ħabbtu, u se jinfetħilkom.” (Mattew 7:7, NW) Forsi hemm bżonn taʼ Sala tas-​Saltna ġdida għaliex Jehovah qed jagħti l-​prosperità lix-​xogħol lokali taʼ l-​ippridkar. (Isaija 60:22) Ikun xieraq li jibqaʼ jissemma dan il-​bżonn kemm f’talb privat kif ukoll f’talb pubbliku offrut fil-​laqgħat tal-​poplu taʼ Jehovah. Jekk nagħmlu dan ma jfissirx li nkunu qegħdin ‘nirrepetu fil-​vojt.’

Ftakar fil-​Gratitudni u t-​Tifħir

11. Filippin 4:6, 7 kif japplika għal talb privat u pubbliku?

¹¹ Ħafna nies jitolbu biss meta jkollhom bżonn xi ħaġa, imma l-​imħabba tagħna għal Alla Jehovah għandha tqanqalna biex nirringrazzjawh u nfaħħruh f’talb kemm privat u kemm pubbliku. “Tħabbtu raskom b’xejn. Fit-​talb kollu tagħkom itolbu u uru lil Alla xi jkollkom bżonn, u iżżuh ħajr. U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.” (Filippin 4:6, 7) Iva, flimkien maʼ suppliki u petizzjonijiet, għandna nesprimu radd il-​ħajr lil Jehovah għall-​barkiet spiritwali u materjali. (Proverbji 10:22) Is-​salmista kanta: “Agħti ’l Alla sagrifiċċju taʼ radd il-​ħajr, u rodd lill-​Għoli l-​wegħdiet tiegħek.” (Salm 50:14) U melodija forma taʼ talba minn David kienet tinkludi dan il-​kliem kommoventi: “Nfaħħar l-​isem taʼ Alla bl-​għana, nkabbru b’għana taʼ radd il-​ħajr.” (Salm 69:31 [Salm 69:30, NW]) M’għandniex aħna nagħmlu l-​istess f’talb pubbliku u privat?

12. Salm 100:4, 5 kif qed jitwettaq illum, u għal liema ħaġa nistgħu għalhekk niżżu ħajr u nfaħħru lil Alla?

¹² Rigward Alla, is-​salmista kanta: “Idħlu b’għana taʼ ħajr mill-​bibien tiegħu, bit-​tifħir fil-​btieħi tat-​tempju tiegħu; roddulu ħajr u bierku ismu! Għax twajjeb il-​Mulej, għal dejjem it-​tjieba tiegħu; minn żmien għal żmien il-​fedeltà tiegħu.” (Salm 100:4, 5) Illum, nies mill-​ġnus kollha deħlin fil-​btieħi tas-​santwarju taʼ Jehovah, u għal dan nistgħu nagħtuh tifħir u ħajr. Tesprimi int gratitudni lejn Alla għas-​Sala tas-​Saltna lokali u turi l-​apprezzament tiegħek billi tiltaqaʼ hemmhekk regolarment maʼ dawk li jħobbuh? Waqt li tkun hemmhekk, tgħolli int il-​vuċi tiegħek mill-​qalb f’għanjiet taʼ tifħir u ringrazzjament għal Missierna tas-​sema kollu mħabba?

Qatt Tistħi Titlob

13. Liema eżempju Skritturali juri li għandna nitolbu bil-​ħniena lil Jehovah saħansitra meta ma nħossuniex denji minħabba l-​ħtija?

¹³ Anki jekk ma nħossuniex denji minħabba xi ħtija, għandna nduru lejn Alla b’talb ħerqan. Meta l-​Lhud dinbu billi żżewġu nisa barranin, Esdra niżel għarkubbtejh, fetaħ idejn leali lejn Alla, u talab b’umiltà: “Alla tiegħi, jien inħossni nistħi, u wiċċi ma jagħtinix li nerfaʼ ħarsti lejk, Alla tiegħi. Għax dnubietna tant kotru li ninsabu mgħaddsin sa rasna fihom, u ħtijietna għolew m’ogħla s-​smewwiet. Minn żmien missirijietna sa llum waqajna fi ħtijiet kbar . . . Wara dak kollu li għadda minn fuqna minħabba fl-​għemejjel ħżiena tagħna u fi dnubietna kbar – għalkemm int, Alla tagħna, ikkunsidrajt ħtijietna inqas milli tabilħaqq kienu u ħallejtilna dan il-​fdal – u se nerġgħu forsi niksru l-​kmandamenti tiegħek u nitħalltu biż-​żwieġ mal-​ġnus li jagħmlu ħwejjeġ moqżieża? Ma jkunx forsi l-​għadab tiegħek għalina hekk kbir li teqridna, u ma jeħlisha ħadd u ma jibqaʼ l-​ebda fdal? Mulej, Alla taʼ Iżrael, int ġust, għax fadal aħna li ħlisnieha llum. Ara, aħna nistqarru dnubietna quddiemek, għax minħabba fihom ħadd ma jibqaʼ wieqaf quddiemek.”—Esdra 9:1-15; Dewteronomju 7:3, 4.

14. Bħalma ntwera fi żmien Esdra, x’inhu meħtieġ sabiex niksbu l-​maħfra t’Alla?

¹⁴ Biex naqilgħu l-​maħfra t’Alla, il-​qrara tagħna miegħu trid tkun akkumpanjata minn sogħba u “frott li jixraq lill-​indiema.” (Luqa 3:8; Ġob 42:1-6; Isaija 66:2) Fi żmien Esdra, attitudni niedma kienet akkumpanjata minn sforz biex jissewwa l-​ħażin billi jitkeċċew in-​nisa barranin. (Esdra 10:44; qabbel it-2 Korintin 7:8-13.) Jekk qed infittxu l-​maħfra mingħand Alla minħabba xi għemil ħażin serju, ejjew nistqarru ħtijietna b’talba umli u nipproduċu frott li jixraq lill-​indiema. Spirtu niedem u xewqa li nsewwu l-​ħażin se jqanqluna wkoll biex infittxu l-​għajnuna spiritwali t’anzjani Kristjani.—Ġakbu 5:13-15.

Ikseb Faraġ mit-​Talb

15. L-​esperjenza taʼ Anna kif turi li nistgħu niksbu faraġ mit-​talb?

¹⁵ Meta qalbna tkun muġugħa minħabba xi raġuni jew oħra, nistgħu niksbu faraġ mit-​talb. (Salm 51:19 [Salm 51:17, NW]; Proverbji 15:13) Hekk għamlet Anna li kienet leali. Kienet tgħix meta f’Iżrael kienu komuni familji kbar, imma hi ma kellhiex tfal. Żewġha, Elkana, kellu tfal subjien u bniet minn martu l-​oħra, Peninna, li kienet tinki lil Anna għax kienet ħawlija. Anna talbet bil-​ħerqa u wiegħdet li jekk titbierek b’iben, kienet se “tagħtih lill-​Mulej il-​jiem kollha taʼ ħajtu.” Imfarrġa bit-​talba tagħha u bil-​kliem taʼ Għeli, il-​qassis il-​kbir, Anna ‘ma baqgħetx inkwetata.’ Hi welldet tifel u semmietu Samwel. Iktar tard, bagħtitu jaqdi fis-​santwarju taʼ Jehovah. (1 Samwel 1:9-28) Grata għall-​qalb tajba t’Alla lejha, hi offriet talba taʼ radd il-​ħajr​—talba li faħħret lil Jehovah bħala dak li m’hawnx ieħor daqsu. (1 Samwel 2:1-10) Bħal Anna, aħna nistgħu niksbu l-​faraġ mit-​talb, fiduċjużi li Alla jwieġeb it-​talb kollu li jkun fi qbil mar-​rieda tiegħu. Meta niftħu qalbna miegħu, ħalli ‘wiċċna ma jibqax bħal qabel,’ għax hu se jneħħi x-​xkiel tagħna jew jgħinna nissaportuh.—Salm 55:23 [Salm 55:22, NW].

16. Bħalma ntwera fil-​każ taʼ Ġakobb, għala għandna nitolbu meta nkunu beżgħanin jew ansjużi?

¹⁶ Jekk xi sitwazzjoni tikkaġuna biżaʼ, uġigħ taʼ qalb, jew ansjetà, ejjew ma nonqsux li nduru lejn Alla għall-​faraġ bit-​talb. (Salm 55:2-5 [Salm 55:1-4, NW]) Ġakobb kien beżgħan meta kien sejjer jiltaqaʼ maʼ ħuh Għesaw, li kien kisirha miegħu. Madankollu, Ġakobb talab: “Alla taʼ missieri Abraham, Alla taʼ missieri Iżakk, int il-​Mulej li għedtli: ‘Erġaʼ lura lejn artek u lejn niesek, u jien nagħtik ir-​riżq.’ Ma kinux jistħoqquli t-​tjieba u l-​fedeltà kollha tiegħek, li wrejt mal-​qaddej tiegħek; jien qsamt dan il-​Ġordan bil-​ħatar tiegħi biss, imma issa sirt żewġ kampijiet. Eħlisni issa minn idejn Għesaw, għax qiegħed nibżaʼ minnu, li ma jiġix u joqtol lili, ’l omm u ’l uliedha. Issa int għedtli: ‘Jien nagħtik riżq kbir u nagħmel lil nislek bħar-​ramel tal-​baħar, li ma jingħaddx bil-​kotra.’” (Ġenesi 32:9-12) Għesaw ma ħebbx għal Ġakobb u għal dawk li kienu miegħu. B’hekk Jehovah veru li ‘ta r-​riżq’ lil Ġakobb f’dik l-​okkażjoni.

17. Fi qbil maʼ Salm 119:52, kif jistaʼ t-​talb iġibilna faraġ meta nkunu għaddejjin minn provi ħorox?

¹⁷ Waqt is-​suppliki tagħna, nistgħu nitfarrġu billi niftakru affarijiet li ntqalu fil-​Kelma t’Alla. Fl-​itwal salm​—talba sabiħa akkumpanjata bil-​mużika—​għandu mnejn kien il-​Prinċep Ħeżekija li kanta: “Niftakar fid-​digrieti tiegħek taʼ dari; fihom, Mulej, jiena nsib il-​faraġ tiegħi.” (Salm 119:52) F’talb umli meta nkunu għaddejjin minn xi provi ħorox, aħna nistgħu niftakru xi prinċipju jew liġi tal-​Bibbja li jistgħu jgħinuna nsegwu korsa li tirriżulta fl-​assiguranza taʼ faraġ li aħna qegħdin nogħġbu lil Missierna tas-​sema.

Uħud Leali Jipperseveraw fit-​Talb

18. Għala jistaʼ jingħad li ‘kull min hu leali se jitlob lil Alla’?

¹⁸ Dawk kollha li huma leali lejn Alla Jehovah “jitolbu bla waqfien.” (Rumani 12:12) F’Salm 32, li x’aktarx ikkomponieh David wara li dineb maʼ Batseba, hu ddeskriva l-​agunija tiegħu talli naqas li jfittex il-​maħfra u s-​serħan li ġabulu l-​indiema u l-​qrara tiegħu m’Alla. Imbagħad David kanta: “Għalhekk [minħabba li l-​maħfra taʼ Jehovah hija disponibbli għal kulmin jindem tassew] kull min hu twajjeb lilek jitlob fi żmien in-​niket.”—Salm 32:6.

19. Għala għandna nerfgħu ’l fuq idejn leali biex nitolbu?

¹⁹ Jekk ngħożżu r-​relazzjoni tagħna m’Alla Jehovah, aħna se nitolbu għall-​ħniena tiegħu fuq il-​bażi tas-​sagrifiċċju li Ġesù ħallas bħala prezz għall-​fidwa. B’fidi, nistgħu navviċinaw it-​tron tal-​grazzja b’libertà fi kliemna biex niksbu ħniena u għajnuna f’waqtha. (Lhud 4:16) Imma hemm ħafna u ħafna raġunijiet għat-​talb! Ejjew għalhekk ‘nitolbu bla heda’​—spiss bi kliem taʼ tifħir u gratitudni mill-​qalb lejn Alla. (1 Tessalonikin 5:17) Lejl u nhar, ejjew nerfgħu ’l fuq idejn leali biex nitolbu.

Int kif Twieġeb?

◻ Li taħseb bil-​quddiem dwar x’se tgħid fit-​talb huwa taʼ liema benefiċċju?

◻ Għala għandna nitolbu b’manjiera dinjituża u taʼ rispett?

◻ Liema spirtu għandna nuru meta nitolbu?

◻ Meta nitolbu, għala għandna niftakru fir-​radd il-​ħajr u t-​tifħir?

◻ Il-​Bibbja kif turi li nistgħu niksbu faraġ mit-​talb?

[Stampa f’paġna 17]

Is-​Sultan Salamun wera l-​umiltà fit-​talba pubblika tiegħu fid-​dedikazzjoni tat-​tempju taʼ Jehovah

[Stampi f’paġna 18]

Bħal Anna, int tistaʼ tikseb faraġ mit-​talb