Kapitlu 16

Kif Tistaʼ Tersaq Qrib Lejn Alla

1. Liema similaritajiet huma evidenti f’ħafna reliġjonijiet?

TURISTA li kienet qiegħda żżur pajjiż Orjentali baqgħet skantata bir-​ritwali reliġjużi li osservat f’tempju Buddist. Għalkemm ix-​xbihat ma kinux dawk taʼ Marija jew taʼ Kristu, ħafna mir-​ritwali kienu jixbhu lil dawk tal-​knisja tagħha lura f’pajjiżha. Per eżempju, innotat l-​użu taʼ rużarji u kantaliena taʼ talb. Oħrajn ukoll għamlu paraguni bħal dawn. Fil-​Lvant jew fil-​Punent, il-​modi li bihom nies devoti jipprovaw jersqu qrib lejn Alla jew lejn l-​oġġetti tal-​qima tagħhom huma simili b’mod rimarkevoli.

2. It-​talb kif ġie deskritt, u ħafna nies għala jitolbu?

² Ħafna speċjalment jipprovaw jersqu qrib lejn Alla billi jitolbuh. It-​talb ġie deskritt bħala “att taʼ komunikazzjoni mill-​bniedem maʼ dak li huwa sagru jew qaddis—Alla, l-​allat, il-​qasam traxxendentali, jew potenzi soprannaturali.” (The New Encyclopædia Britannica) Meta jersqu lejn Alla fit-​talb, madankollu, xi wħud jaħsbu biss f’termini taʼ x’jistgħu jiksbu mingħandu. Per eżempju, raġel darba staqsa lil wieħed mix-​Xhieda taʼ Jehovah: “Jekk titlob għalija, se jissolvewli l-​problemi li għandi fil-​familja tiegħi, fuq ix-​xogħol, u taʼ saħħti?” Milli jidher dak ir-​raġel hekk ħaseb, imma ħafna jitolbu u jsibu li l-​problemi tagħhom jippersistu. Mela nistgħu nistaqsu, ‘Sewwa sew għala għandna nersqu qrib lejn Alla?’

GĦALA NERSQU QRIB LEJN ALLA

3. It-​talb tagħna lil min għandu jiġi indirizzat, u għala?

³ It-​talb m’huwiex ritwal bla sugu, lanqas m’huwa sempliċement mezz li bih niksbu xi ħaġa. Raġuni prinċipali biex nersqu lejn Alla hija biex ikollna relazzjoni mill-​qrib miegħu. It-​talb tagħna għalhekk għandu jiġi indirizzat lil Alla Jehovah. “Qrib il-​Mulej lejn kull min isejjaħlu,” qal is-​salmista David. (Salm 145:18) Jehovah jistedinna biex nidħlu f’relazzjoni paċifika miegħu. (Isaija 1:18) Dawk li jwieġbu għal din l-​istedina jaqblu mas-​salmista li qal: “Jiena l-​hena tiegħi li nkun qrib Alla.” Għala? Għaliex dawk li jersqu qrib lejn Alla Jehovah se jgawdu hena u paċi tal-​moħħ veri.—Salm 73:28.

4, 5. (a) Għala huwa importanti li nitolbu lil Alla? (b) Liema xorta taʼ relazzjoni nistgħu nibnu m’Alla permezz tat-​talb?

⁴ Għala nitolbu lil Alla għall-​għajnuna jekk ‘jaf x’neħtieġu qabel ma nitolbuh’? (Mattew 6:8; Salm 139:4) It-​talb juri li għandna fidi f’Alla u li nqisuh bħala s-​Sors taʼ “kull ħaġa tajba li tingħata u kull don perfett.” (Ġakbu 1:17; Lhud 11:6) Jehovah jieħu pjaċir bit-​talb tagħna. (Proverbji 15:8) Jieħu gost jismaʼ l-​espressjonijiet sinjifikanti tagħna t’apprezzament u tifħir, sewwa sew bħalma missier jithenna meta jismaʼ lil ibnu ż-​żgħir jgħid kliem sinċier taʼ gratitudni. (Salm 119:108) Fejn hemm relazzjoni tajba bejn il-​missier u l-​iben (bint), hemm komunikazzjoni kordjali. Iben li hu maħbub irid jitkellem maʼ missieru. L-​istess huwa veru meta niġu għar-​relazzjoni tagħna m’Alla. Jekk tassew napprezzaw dak li qegħdin nitgħallmu dwar Jehovah u l-​imħabba li wera għalina, se jkollna xewqa kbira li nesprimu lilna nfusna miegħu fit-​talb.—1 Ġwann 4:16-18.

⁵ Meta navviċinaw lil dak Alla l-​Iktar Għoli, għandna nuru rispett kbir, għalkemm m’hemmx għalfejn ninkwetaw iżżejjed dwar il-​kliem eżatt li nużaw. (Lhud 4:16) Dejjem għandna aċċess għal Jehovah. U xi privileġġ huwa dan li nistgħu ‘niftħu qalbna’ m’Alla fit-​talb! (Salm 62:9 [62:8, NW]) Apprezzament lejn Jehovah iwassal għal relazzjoni kordjali miegħu, bħal dik li r-​raġel leali Abraham gawda bħala l-​ħabib t’Alla. (Ġakbu 2:23) Imma meta nitolbu lill-​Mulej Sovran taʼ l-​univers, irridu nikkonformaw maʼ dak li hu jirrikjedi biex navviċinawh.

ĦTIĠIJIET BIEX NERSQU QRIB LEJN ALLA

6, 7. Għalkemm Alla ma jesiġix ħlas biex jismaʼ t-​talb tagħna, x’jirrikjedi minna meta nitolbu?

⁶ Għandna bżonn il-​flus biex navviċinaw lil Alla? Ħafna nies iħallsu lill-​kleru biex jitolbu għalihom. Xi wħud saħansitra jemmnu li t-​talb tagħhom se jiġi mismugħ skond kemm tkun kbira d-​donazzjoni li jagħmlu. Madankollu, il-​Kelma t’Alla ma tgħidx li hemm bżonn xi offerta taʼ flus biex aħna navviċinaw lil Jehovah fit-​talb. Il-​provvedimenti spiritwali tiegħu u l-​barkiet taʼ relazzjoni miegħu fit-​talb huma disponibbli mingħajr prezz.—Isaija 55:1, 2.

⁷ X’inhu, allura, meħtieġ? Attitudni xierqa tal-​qalb hija ħtieġa waħda. (2 Kronaki 6:29, 30; Proverbji 15:11) F’qalbna rridu neżerċitaw fidi f’Alla Jehovah bħala ‘dak li jismaʼ talbna’ u dak “li . . . jagħti l-​ħlas xieraq lil dawk li jfittxuh.” (Salm 65:3 [65:2, NW]; Lhud 11:6) Irridu wkoll ikollna qalb umli. (2 Slaten 22:19; Salm 51:19 [51:17, NW]) F’waħda mit-​tixbihat tiegħu, Ġesù Kristu wera li meta kollettur umli tat-​taxxi b’attitudni taʼ qalb ġwejda avviċina lil Alla, dan ta prova li kien iktar twajjeb minn wieħed Fariżew arroganti. (Luqa 18:10-14) Hekk kif navviċinaw lil Alla fit-​talb, ejjew niftakru li “l-​Mulej jistmell lil kull min hu mkabbar.”—Proverbji 16:5.

8. Jekk nixtiequ li Alla jwieġeb it-​talb tagħna, minn liema affarijiet irridu nnaddfu lilna nfusna?

⁸ Jekk nixtiequ li Alla jwieġeb it-​talb tagħna, irridu nnaddfu lilna nfusna minn kondotta midinba. Meta d-​dixxiplu Ġakbu inkuraġġixxa lil oħrajn biex jersqu qrib lejn Alla, hu żied: “Midinbin, naddfu idejkom; nies taʼ moħħ imħawwad saffu qlubkom.” (Ġakbu 4:8) Saħansitra dawk li jagħmlu l-​ħażen jistgħu jidħlu f’relazzjoni paċifika maʼ Jehovah jekk jindmu u jitilqu l-​mod taʼ ħajja taʼ qabel tagħhom. (Proverbji 28:13) Ma nistgħux ikollna udjenza maʼ Jehovah jekk aħna sempliċement nippretendu li naddafna l-​mogħdija tagħna. “Għajnejn il-​Mulej huma fuq il-​ġusti, u widnejh miftuħa għat-​talb tagħhom. Imma l-​Mulej ħarstu fuq dawk li jagħmlu l-​ħażen,” tgħid il-​Kelma t’Alla.—1 Pietru 3:12.

9. Permezz taʼ min għandna nersqu lejn Jehovah, u għala?

⁹ Il-​Bibbja tistqarr: “Ma ssibx bniedem ġust fid-​dinja li jagħmel is-​sewwa bla ma jaqaʼ f’xi ħtija.” (Koħelet 7:20) Int għalhekk tistaʼ tistaqsi: ‘Kif, allura, nistgħu navviċinaw lil Alla Jehovah?’ Il-​Bibbja twieġeb: “Jekk xi ħadd jidneb, aħna għandna Difensur quddiem il-​Missier, lil Ġesù Kristu, il-​ġust.” (1 Ġwann 2:1) Għalkemm aħna midinbin, nistgħu navviċinaw lil Alla bil-​libertà tal-​kelma permezz taʼ Ġesù Kristu, li miet bħala rahan għalina. (Mattew 20:28) Hu l-​uniku mezz taʼ komunikazzjoni li permezz tiegħu nistgħu navviċinaw lil Alla Jehovah. (Ġwann 14:6) Ma rridux nieħdu l-​mertu tas-​sagrifiċċju taʼ Ġesù bħala ħaġa żgura u deliberatament nipprattikaw id-​dnub. (Lhud 10:26) Madankollu, jekk qegħdin nagħmlu l-​aħjar tagħna biex inżommu lura minn dak li huwa ħażin u madankollu kultant niżbaljaw, nistgħu nindmu u nitolbu maħfra lil Alla. Meta navviċinawh b’qalb umli, hu se jismagħna.—Luqa 11:4.

OPPORTUNITAJIET BIEX NITKELLMU M’ALLA

10. Inkwantu għat-​talb, kif nistgħu nimitaw lil Ġesù, u x’inhuma xi okkażjonijiet għal talb privat?

¹⁰ Ġesù Kristu kien jistmaha ferm ir-​relazzjoni tiegħu maʼ Jehovah. Għalhekk, Ġesù għamel il-​ħin biex jitkellem m’Alla f’talb privat. (Mark 1:35; Luqa 22:40-46) Nagħmlu tajjeb li nimitaw l-​eżempju taʼ Ġesù u nitolbu lil Alla fuq bażi regulari. (Rumani 12:12) Huwa xieraq li nibdew il-​ġurnata bi kliem taʼ talb, u qabel ma nidħlu fis-​sodda, nistgħu bix-​xieraq niżżu ħajr lil Jehovah għall-​attività tal-​jum. Matul il-​ġurnata, kun determinat li tavviċina lil Alla “f’kull okkażjoni.” (Efesin 6:18, NW) Nistgħu saħansitra nitolbu bla ma ninstemgħu f’qalbna, billi nafu li Jehovah jistaʼ jismagħna. Li nitkellmu privatament m’Alla jgħinna nissodaw ir-​relazzjoni tagħna miegħu, u li nitolbu lil Jehovah kuljum jgħinna nersqu dejjem eqreb lejh.

11. (a) Il-​familji għala għandhom jitolbu flimkien? (b) X’ifisser meta tgħid “Amen” fl-​aħħar taʼ talba?

¹¹ Jehovah jagħti widen ukoll għal talb offrut għan-​nom taʼ gruppi taʼ nies. (1 Slaten 8:22-53) Nistgħu nersqu qrib lejn Jehovah bħala familja, billi l-​kap tal-​familja jieħu t-​tmexxija. Dan isaħħaħ l-​għaqda tal-​familja, u Jehovah isir reali għal uħud żgħar hekk kif huma jisimgħu lill-​ġenituri tagħhom jitolbu b’umiltà lil Alla. Xi ngħidu jekk xi ħadd qiegħed jirrappreżenta lil xi grupp fit-​talb, forsi f’laqgħa tax-​Xhieda taʼ Jehovah? Jekk aħna qegħdin fl-​udjenza, ejjew nagħtu widen b’attenzjoni sabiex fi tmiem it-​talba, nistgħu b’qalbna kollha ngħidu “Amen,” li tfisser “Hekk ikun.”—1 Korintin 14:16.

TALB LI JEHOVAH JISMAʼ

12. (a) Alla għala ma jweġibx xi ftit mit-​talb? (b) Għala m’għandniex nikkonċentraw unikament fuq ħtiġijiet persunali meta nitolbu?

¹² Xi wħud jistgħu jħossu li Alla ma jweġibx it-​talb tagħhom avolja jitolbuh permezz taʼ Kristu. Madankollu, l-​appostlu Ġwanni qal: “Jekk nitolbu xi ħaġa skond ir-​rieda [t’Alla], hu jismagħna.” (1 Ġwann 5:14) Mela, allura, jeħtieġ li nitolbu skond ir-​rieda t’Alla. Ladarba hu interessat fil-​ġid spiritwali tagħna, kwalunkwe ħaġa li teffettwa l-​ispiritwalità tagħna hija suġġett xieraq għat-​talb. Irridu nirreżistu t-​tentazzjoni li nikkonċentraw kompletament fuq ħtiġijiet fiżiċi. Per eżempju, waqt li huwa xieraq li nitolbu għal dehen u saħħa biex inkampaw maʼ xi mard, tħassib dwar is-​saħħa m’għandux idallam l-​interessi spiritwali. (Salm 41:2-4 [41:1-3, NW]) Billi indunat li kienet saret ikkonċernata żżejjed dwar saħħitha, waħda mara Kristjana talbet lil Jehovah għall-​għajnuna biex ikollha l-​ħarsa xierqa dwar il-​marda tagħha. Bħala riżultat, il-​problemi taʼ saħħitha saru kwistjoni ferm iżgħar, u ħasset li ġiet mogħtija “qawwa iktar min-​normal.” (2 Korintin 4:7, NW) Ix-​xewqa tagħha li tkun t’għajnuna spiritwali għal oħrajn intensifikat, u hi saret proklamatriċi full-time tas-​Saltna.

13. Bħalma huwa indikat f’​Mattew 6:9-13, x’inhuma xi suġġetti addattati li nistgħu ninkludu fit-​talb tagħna?

¹³ X’nistgħu ninkludu fit-​talb tagħna sabiex Jehovah jieħu pjaċir jisimgħu? Ġesù Kristu għallem lid-​dixxipli tiegħu kif jitolbu. Fit-​talba mudell iddokumentata f’​Mattew 6:9-13, hu stabbilixxa mudell taʼ suġġetti li dwarhom nistgħu nitolbu b’mod xieraq. X’għandu jkun taʼ tħassib prinċipali fit-​talb tagħna? L-​isem u s-​Saltna t’Alla Jehovah iridu jkunu taʼ l-​ogħla prijorità. Li nitolbu għall-​ħtiġijiet materjali tagħna huwa xieraq. Huwa importanti wkoll li nitolbu għall-​maħfra taʼ dnubietna u għall-​ħelsien mit-​tentazzjonijiet u mill-​wieħed mill-​agħar, Satana x-​Xitan. Ġesù ma ridniex ngħidu din it-​talba bil-​kantaliena jew nirrepetuha darba wara l-​oħra, billi ngħiduha bla ma naħsbu dwar it-​tifsira tagħha. (Mattew 6:7) Liema xorta taʼ relazzjoni kienet tkun li kieku tifel juża l-​istess kliem kull darba li jkellem lil missieru?

14. Minbarra petizzjonijiet, liema talb għandna noffru?

¹⁴ Minbarra petizzjonijiet u suppliki mill-​qalb, għandna noffru talb taʼ tifħir u radd il-​ħajr. (Salm 34:2 [34:1, NW]; Salm 92:2 [92:1, NW]; 1 Tessalonkin 5:18) Nistgħu wkoll nitolbu għal oħrajn. It-​talb rigward ħutna spiritwali li jinsabu mnikktin jew ippersegwitati juri l-​interess tagħna fihom, u Jehovah jieħu pjaċir jismagħna nesprimu tħassib bħal dan. (Luqa 22:32; Ġwann 17:20; 1 Tessalonkin 5:25) Fil-​fatt, l-​appostlu Pawlu kiteb: “Tħabbtu raskom b’xejn. Fit-​talb tagħkom itolbu u uru lil Alla xi jkollkom bżonn, iżżuh ħajr. U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu [Ġesù].”—Filippin 4:6, 7.

IPPERSEVERA FIT-​TALB

15. X’għandna niftakru jekk it-​talb tagħna jidher li m’huwiex jiġi mwieġeb?

¹⁵ Għalkemm qiegħed tikseb l-​għarfien dwar Alla, tistaʼ tħoss li t-​talb tiegħek xi drabi m’huwiex jiġi mwieġeb. Dan jistaʼ jkun il-​każ għaliex għandu mnejn li għadu m’huwiex il-​waqt t’Alla biex iwieġeb talba speċifika. (Koħelet 3:1-9) Jehovah jistaʼ jħalli sitwazzjoni tkompli sejra għal xi żmien, imma hu tassew iwieġbu t-​talb u jaf l-​aħjar żmien biex jagħmel dan.—2 Korintin 12:7-9.

16. Għala għandna nippersistu fit-​talb, u li nagħmlu dan kif jeffettwa r-​relazzjoni tagħna m’Alla?

¹⁶ Il-​persistenza tagħna fit-​talb tirrivela l-​interess mill-​qalb tagħna f’dak li qegħdin ngħidu lil Alla. (Luqa 18:1-8) Per eżempju, nistgħu nitolbu lil Jehovah biex jgħinna negħlbu ċerta dgħjufija. Billi nipperseveraw fit-​talb u naġixxu f’armonija mal-​petizzjonijiet tagħna, aħna nuru s-​sinċerità tagħna. Għandna nkunu speċifiċi u onesti fil-​petizzjonijiet tagħna. Huwa speċjalment importanti li nitolbu intensament meta nkunu qegħdin inġarrbu xi tentazzjoni. (Mattew 6:13) Hekk kif inkomplu nitolbu waqt li nipprovaw nikkontrollaw it-​tqanqil midneb tagħna, se naraw kif Jehovah jgħinna. Dan se jibni l-​fidi tagħna u jsaħħaħ ir-​relazzjoni tagħna miegħu.—1 Korintin 10:13; Filippin 4:13.

17. Kif se nibbenefikaw minn attitudni taʼ talb f’li naqdu lil Alla?

¹⁷ Billi nikkultivaw attitudni taʼ talb f’li nagħtu servizz sagru lil Alla Jehovah, se nibdew nirrealizzaw li aħna ma naqduhx bis-​saħħa tagħna stess. Huwa bis-​saħħa taʼ Jehovah li jsir kollox. (1 Korintin 4:7) Li nirrikonoxxu dan se jgħinna biex inkunu umlin u se jtejjeb ir-​relazzjoni tagħna miegħu. (1 Pietru 5:5, 6) Iva, għandna raġunijiet sodi biex nipperseveraw fit-​talb. It-​talb serju tagħna u l-​għarfien prezzjuż li għandna dwar kif nersqu qrib lejn Missierna kollu mħabba tas-​sema se jagħmlu lil ħajjitna verament hienja.

IL-​KOMUNIKAZZJONI MAʼ JEHOVAH MHIX UNILATERALI

18. Kif nistgħu nagħtu widen lil Alla?

¹⁸ Jekk irridu li Alla jismaʼ t-​talb tagħna, irridu nagħtu widen għal dak li jgħid hu. (Żakkarija 7:13) Hu m’għadux jibgħat il-​messaġġi tiegħu permezz taʼ profeti ispirati b’mod divin u żgur li mhux qiegħed juża mezzi spiritistiċi. (Dewteronomju 18:10-12) Imma aħna nistgħu nagħtu widen lil Alla billi nistudjaw il-​Kelma tiegħu, il-​Bibbja. (Rumani 15:4; 2 Timotju 3:16, 17) Sewwa sew bħalma nistgħu jkollna bżonn niksbu gosti għal ikel fiżiku li huwa tajjeb għalina, aħna mħeġġin biex ‘nixxennqu għall-​ħalib safi, il-​ħalib tar-​ruħ [“tal-​kelma,” NW].’ Ikkultiva inklinazzjoni għal ikel spiritwali billi taqra l-​Kelma t’Alla kuljum.—1 Pietru 2:2, 3; Atti 17:11.

19. X’benefiċċju hemm f’li timmedita fuq dak li taqra fil-​Bibbja?

¹⁹ Immedita fuq dak li taqra fil-​Bibbja. (Salm 1:1-3; 77:12, 13 [77:11, 12, NW]) Dak ifisser li tiżen il-​materjal f’moħħok. Tistaʼ xxebbah dan maʼ li tixtarr l-​ikel. Tistaʼ tixtarr ikel spiritwali billi tara kif dak li qiegħed taqra huwa relatat m’affarijiet li diġà taf. Ikkunsidra kif il-​materjal jeffettwa lil ħajtek, jew irrifletti fuq dak li dan jirrivela dwar il-​kwalitajiet u l-​aġir taʼ Jehovah. B’hekk permezz taʼ studju persunali, tistaʼ ddaħħal ġewwa fik l-​ikel spiritwali li jipprovdi Jehovah. Dan se jressqek eqreb lejn Alla u se jgħinek tittratta mal-​problemi minn jum għal jum.

20. Li nattendu l-​laqgħat Kristjani kif jgħinna nersqu qrib lejn Alla?

²⁰ Tistaʼ wkoll tersaq qrib lejn Alla billi tagħti widen għall-​Kelma tiegħu diskussa f’laqgħat Kristjani, sewwa sew bħalma l-​Iżraeliti taw widen b’attenzjoni meta nġabru biex jisimgħu l-​qari pubbliku tal-​Liġi t’Alla. L-​għalliema taʼ dak iż-​żmien taw sinjifikat lill-​qari tagħhom tal-​Liġi, billi b’hekk għenu lis-​semmiegħa tagħhom jifhmu u jiġu mqanqlin biex japplikaw dak li semgħu. Dan wassal għal ferħ kbir. (Neħemija 8:8, 12) Mela agħmilha d-​drawwa tiegħek li tattendi l-​laqgħat tax-​Xhieda taʼ Jehovah. (Lhud 10:24, 25) Dan se jgħinek tifhem u mbagħad tapplika l-​għarfien dwar Alla f’ħajtek u se jġiblek l-​hena. Li tkun parti mill-​fratellanza Kristjana mad-​dinja kollha se jgħinek tibqaʼ qrib taʼ Jehovah. U bħalma se naraw, int tistaʼ ssib sigurtà vera fost il-​poplu t’Alla.

ITTESTJA L-​GĦARFIEN TIEGĦEK

Għala għandek tersaq qrib lejn Jehovah?

X’inhuma xi ħtiġijiet biex tersaq qrib lejn Alla?

X’tistaʼ tinkludi fit-​talb tiegħek?

Għala għandek tippersevera fit-​talb?

Kif tistaʼ tagħti widen lil Jehovah illum?

[Stampa taʼ paġna sħiħa f’paġna 157]