X’Tistaʼ Titgħallem mit-​Tfal?

“QISEK tifel żgħir!” Jekk jintqallek dan il-​kliem, wisq probabbli se tieħu għalik. Minkejja l-​ħlewwa tagħhom, it-​tfal żgħar bla dubju m’għandhomx il-​maturità, l-​esperjenza, u l-​għerf li ġeneralment jinkisbu bl-​età.​—Ġob 12:12.

Madankollu, darba minnhom Ġesù qal lid-​dixxipli tiegħu: “Tassew ngħidilkom, Jekk ma tinbidlux u ma ssirux bħal tfal żgħar, żgur li ma tidħlux fis-​saltna tas-​smewwiet.” (Mattew 18:3) X’ried ifisser Ġesù? Liema kwalitajiet li għandhom it-​tfal ikun tajjeb li jimitawhom il-​kbar?

Ikkultiva Umiltà bħal tat-​Tfal

Ikkunsidra s-​sitwazzjoni li wasslet għar-​rimarki li għamel Ġesù. Malli wasal lura Kafarnahum wara vjaġġ twil, Ġesù staqsa lid-​dixxipli tiegħu: “Fuqiex kontu qed targumentaw fit-​triq?” Id-​dixxipli bil-​mistħija ma qalu xejn, għaliex kienu tlewmu bejniethom dwar min minnhom kien l-​akbar. Fl-​aħħar, rabbew biżżejjed kuraġġ biex jistaqsu lil Ġesù: “Fil-​fatt, min hu l-​akbar fis-​saltna tas-​smewwiet?”​—Marku 9:​33, 34; Mattew 18:1.

Tistaʼ tidher bħala ħaġa taʼ l-​iskantament li wara li kienu ilhom tliet snin maʼ Ġesù, id-​dixxipli kienu jargumentaw dwar il-​pożizzjonijiet. Madankollu, huma kienu trabbew fir-​reliġjon Lhudija, li poġġiet importanza kbira fuq dawn il-​kwistjonijiet. Milli jidher, dan l-​isfond reliġjuż, flimkien maʼ l-​imperfezzjoni tal-​bniedem, influwenza l-​mod kif kienu jaħsbuha d-​dixxipli.

Ġesù qagħad bil-​qiegħda, sejjaħ lid-​dixxipli ħdejh, u qal: “Jekk xi ħadd irid ikun l-​ewwel, għandu jkun l-​aħħar wieħed u l-​qaddej taʼ kulħadd.” (Marku 9:​35) Dan il-​kliem wisq probabbli għaġġibhom. L-​irraġunar taʼ Ġesù kkontradixxa direttament il-​konċetti Lhud dwar min hu l-​akbar! Ġesù mbagħad sejjaħ tifel ċkejken biex imur ħdejh. Hekk kif ħaddnu miegħu b’tenerezza, hu wasslilhom il-​punt li xtaq joħroġ: “Tassew ngħidilkom, Jekk ma tinbidlux u ma ssirux bħal tfal żgħar, żgur li ma tidħlux fis-​saltna tas-​smewwiet. Għalhekk, kulmin jumilja ruħu bħal dan it-​tifel hu l-​akbar fis-​saltna tas-​smewwiet.”​—Mattew 18:​3, 4.

X’eżempju prattiku taʼ l-​umiltà! Immaġina x-​xena. Grupp taʼ rġiel kbar, adulti, u serji kienu mdawrin maʼ tifel żgħir, u lkoll kemm huma kienu qed iħarsu fiss lejh. L-​irġiel kollha bdew iħarsu lejn it-​tifel. Kemm kien timidu u kemm kien jafdahom! Kemm kien ħieles mir-​rivalità u l-​ħażen! Kemm kien sottomess u modest! Iva, it-​tifel ċkejken b’mod mill-​isbaħ kien xempju tal-​kwalità divina taʼ l-​umiltà.

Il-punt li ried joħroġ Ġesù huwa ċar. Ilkoll kemm aħna rridu nikkultivaw umiltà bħal tat-​tfal jekk irridu nirtu s-​Saltna t’Alla. Fl-​arranġament taʼ Ġeħova għall-​familja, m’hemmx lok għall-​kompetizzjoni bejn persuna u oħra jew għall-​kburija. (Galatin 5:​26) Fil-​fatt, dawn huma eżattament il-​karatteristiki li qanqlu lil Satana x-​Xitan biex jirribella kontra Alla fil-​bidunett. Mhux taʼ b’xejn li Ġeħova jobgħodhom!​—Proverbji 8:​13.

Il-Kristjani veri jfittxu li jaqdu, mhux li jeżerċitaw l-​awtorità. Minkejja kemm tistaʼ ma tkunx pjaċevoli l-​biċċa xogħol jew minkejja kemm ikun umli l-​individwu li nkunu se naqdu, l-​umiltà vera tqanqalna biex naqdu lil oħrajn. Servizz umli bħal dan iġib miegħu premjijiet kbar. Ġesù jgħid: “Kulmin jilqaʼ lil wieħed minn dawn it-​tfal żgħar f’ismi, jilqaʼ lili; u kulmin jilqaʼ lili, ma jilqax lili biss imma wkoll lil dak li bagħatni.” (Marku 9:​37) Meta nikkultivaw spirtu taʼ ġenerożità u umiltà bħal tat-​tfal, aħna se nkunu f’unjoni maʼ l-​ogħla Persunaġġ fl-​univers u maʼ Ibnu. (Ġwanni 17:​20, 21; 1 Pietru 5:5) Aħna se naħsdu l-​ferħ li jiġi meta nagħtu. (Atti 20:35) U għandna s-​sodisfazzjon li nikkontribwixxu għall-​paċi u l-​għaqda li jidhru ċari fost il-​poplu t’Alla.​—Efesin 4:​1-3.

Lesti li Jitgħallmu u li Jafdaw

Ġesù mbagħad jenfasizza tagħlima oħra li l-​adulti jistgħu jitgħallmu mit-​tfal: “Kulmin ma jilqax is-​saltna t’Alla bħal tifel żgħir żgur ma jidħolx fiha.” (Marku 10:15) It-​tfal mhux biss huma umli, imma wkoll lesti li jitgħallmu. “Huma jixorbu l-​informazzjoni bħal sponża,” tgħid waħda omm.

Għaldaqstant, sabiex nirtu s-​Saltna t’Alla, aħna rridu nilqgħu l-​messaġġ tas-​Saltna u nobduh. (1 Tessalonikin 2:​13) Bħal trabi tat-​twelid, aħna “[n]ifformaw xenqa għall-​ħalib safi tal-​kelma, sabiex permezz tiegħu [n]ikbru għas-​salvazzjoni.” (1 Pietru 2:2) Imma xi ngħidu jekk xi tagħlim Bibliku jkun diffiċli biex nifhmuh? “It-​tfal jibqgħu jistaqsu ‘Għala?’ sakemm isibu tweġibiet sodisfaċenti għall-​mistoqsijiet tagħhom,” tosserva waħda mara li xogħolha hu li tieħu ħsieb it-​tfal. Nagħmlu tajjeb jekk nimitaw l-​eżempju tagħhom. Mela kompli studja. Tkellem maʼ Kristjani oħrajn li għandhom l-​esperjenza. Itlob lil Ġeħova għall-​għerf. (Ġakbu 1:5) Mingħajr dubju, il-​persistenza tiegħek fit-​talb maż-​żmien se tiġi premjata.​—Mattew 7:​7-​11.

Madankollu, xi wħud jistgħu jaħsbu, ‘Ma jistgħux in-​nies li jkunu lesti li jitgħallmu jiġu żvijati faċilment?’ Dan ma jiġrix jekk ikollhom gwida taʼ min joqgħod fuqha. Per eżempju, it-​tfal b’mod istintiv iduru lejn il-​ġenituri tagħhom għall-​gwida. “Il-​ġenituri jagħtu prova li huma taʼ min jafdahom billi jipproteġu lil uliedhom u jipprovdulhom il-​bżonnijiet tagħhom ġurnata wara l-​oħra,” jgħid wieħed missier. Bla dubju, aħna għandna raġunijiet simili biex nafdaw lil Missierna tas-​sema, Ġeħova. (Ġakbu 1:​17; 1 Ġwanni 4:​9, 10) Ġeħova jagħtina gwida li ma tfalli qatt permezz tal-​Kelma miktuba tiegħu. L-​ispirtu qaddis u l-​organizzazzjoni tiegħu jfarrġuna u jappoġġawna. (Mattew 24:​45-​47; Ġwanni 14:26) Jekk nagħmlu użu minn dawn il-​provvedimenti se nibqgħu ħielsa mill-​ħsara spiritwali.​—Salm 91:​1-​16.

Meta nikkultivaw fiduċja f’Alla bħal tat-​tfal se jkollna wkoll il-​paċi tal-​moħħ. Wieħed studjuż tal-​Bibbja josserva: “Meta nkunu tfal, aħna nibdew vjaġġ li għalih ma jkollniex mezzi biex inħallsu l-​biljett, u ma jkollniex ħjiel kif naslu fid-​destinazzjoni, u madankollu qatt ma jgħaddilna minn rasna li niddubitaw jekk il-​ġenituri tagħna humiex se jwassluna qawwijin u sħaħ lejn tmiemu.” Għandna aħna din l-​istess fiduċja f’Ġeħova hekk kif nivvjaġġaw fit-​triq taʼ ħajjitna?​—Isaija 41:10.

Fiduċja sħiħa f’Alla tgħinna nevitaw attitudnijiet u azzjonijiet li jistgħu jipperikolaw l-​ispiritwalità tagħna. Minflok, aħna għandna fiduċja sħiħa fil-​kliem taʼ Ġesù li Missierna tas-​sema jaf l-​għemejjel tagħna u li Hu se jieħu ħsiebna dment li nfittxu l-​ewwel is-​Saltna u s-​sewwa t’Alla. Dan se jgħinna nirreżistu t-​tentazzjoni li niffokaw fuq ħsibijiet materjali, u b’hekk nittraskuraw ir-​responsabbiltajiet spiritwali tagħna.​—Mattew 6:​19-​34.

“Trabi fil-​Ħażen”

Għalkemm jitwieldu imperfetti, it-​tfal żgħar għandhom is-​safa f’qalbhom u f’moħħhom b’mod li jserrħek. Għal din ir-​raġuni, il-​Bibbja tħeġġeġ lill-​Kristjani: “Kunu tfal ċkejknin għal dak li hu ħażen.”​—1 Korintin 14:20.

Ikkunsidra lil Monique li għandha ħames snin u li kollha eċċitament qalet lil ommha: “Il-​ħabiba l-​ġdida tiegħi, Sarah, għandha xagħarha nnokklat bħal tiegħi!” Il-​kulur tal-​ġilda u r-​razza differenti taʼ Sarah ma ssemmewx. Waħda omm tgħid: “It-​tfal żgħar m’humiex influwenzati minn razez differenti. M’għandhom l-​ebda idea taʼ razza jew preġudizzju.” F’dan l-​aspett, it-​tfal tassew jirriflettu b’mod mill-​isbaħ il-​ħarsa taʼ l-​Alla imparzjali tagħna, li jħobb lin-​nies tal-​ġnus kollha.​—Atti 10:​34, 35.

Ukoll, it-​tfal għandhom kapaċità taʼ l-​għaġeb li jaħfru. Wieħed missier jgħid: “Meta ċċkejknin Jack u Levi jiġġieldu, aħna ngħidulhom biex jitolbu apoloġija lil xulxin, u malajr tarahom jerġgħu jibdew jilagħbu flimkien ferħanin. Ma joqogħdux jhewdnu u jiftakru fil-​passat, jew jitolbu xi ħaġa qabel ikunu lesti li jaħfru. Huma sempliċement jibqgħu għaddejjin.” X’eżempju mill-​aħjar biex jimitawh l-​adulti!​—Kolossin 3:​13.

Barra minn hekk, it-​tfal żgħar jirrikonoxxu bla diffikultà l-​eżistenza t’Alla. (Ebrej 11:6) Is-​sinċerità naturali tagħhom spiss tqanqalhom biex jippridkaw bil-​kuraġġ lil oħrajn. (2 Slaten 5:​2, 3) It-​talb tagħhom, sempliċi u mill-​qalb, jistaʼ jmiss lil dawk li għandhom qalbhom tassew iebsa. U meta jiffaċċjaw xi tentazzjoni, huma kapaċi juru saħħa morali li tispikka. X’għotjiet prezzjużi huma t-​tfal ċkejknin!​—Salm 127:​3, 4.

Is-​Sbuħija Mġedda

Int għandek mnejn taħseb, ‘Huwa possibbli għall-​adulti li jerġgħu jiksbu l-​kwalitajiet mill-​isbaħ konnessi mat-​tfulija?’ It-​tweġiba sempliċi u li tqawwi l-​qalb hija iva! Bla dubju, il-​kmand taʼ Ġesù biex ‘insiru bħal tfal żgħar’ jagħti prova li dan huwa possibbli.​—Mattew 18:3.

Biex nagħtu eżempju: Grupp taʼ restawraturi taʼ l-​arti jistgħu jaħdmu biex jirrestawraw kapulavur imprezzabbli. F’dan il-​proċess, huma jneħħu saffi taʼ ħmieġ li jakkumula biż-​żmien u jneħħu xogħlijiet oħrajn taʼ restawrazzjoni bla sengħa li jkunu saru fuqha. Wara ħafna sforzi li r-​restawraturi għamlu bil-​paċenzja, il-​kuluri vivaċi u s-​sbuħija naturali tat-​tpinġija oriġinali jiġu mikxufin biex jarahom kulħadd. Bl-​istess mod, bi sforz persistenti, bl-​għajnuna taʼ l-​ispirtu qaddis taʼ Ġeħova, u bl-​appoġġ bi mħabba tal-​kongregazzjoni Kristjana, aħna nistgħu nerġgħu niksbu l-​kwalitajiet sbieħ li kienu jiffjorixxu b’mod naturali meta konna għadna tfal.​—Efesin 5:​1.

[Stampa f’paġna 9]

It-​tfal huma umli b’mod naturali

[Stampa f’paġna 10]

It-​tfal żgħar m’humiex preġudikati, u jaħfru u jinsew malajr