Id-Dinja l-Ġdida t’Alla Mimlija Paċi—Int Tistaʼ Tgħix Fiha

ALLA poġġa lil Adam u Eva fil-​ġnien taʼ l-​Għeden. Għalkemm dawn m’obdewx u mietu, Alla għamilha possibbli li wliedhom, fosthom aħna llum, ngħixu għal dejjem fil-​Ġenna taʼ l-​art. Il-​Bibbja twiegħed: “Il-​ġusti jirtu l-​art, u [jgħixu] fiha għal dejjem.”​—Salm 37:29.

Il-​Bibbja titkellem dwar “smewwiet ġodda” u “art ġdida.” (Isaija 65:17; 2 Pietru 3:​13) Is-​“smewwiet” taʼ bħalissa huma fformati mill-​gvernijiet tal-​bnedmin li hawn illum, imma Ġesù Kristu u dawk li jaħkmu miegħu fis-​sema se jifformaw is-​“smewwiet ġodda.” Kemm se jkun sabiħ meta dawn is-​smewwiet ġodda, jiġifieri l-​gvern ġust t’Alla li se jġib il-​paċi, jaħkmu għal fuq l-​art kollha!

X’inhi, allura, l-​“art ġdida”?— L-​art ġdida se tkun in-​nies tajbin li jħobbu lil Ġeħova. Trid tifhem li meta l-​Bibbja titkellem dwar “l-​art,” xi drabi tkun qed tgħid għan-​nies li jgħixu fuq l-​art, mhux l-​art infisha. (Ġenesi 11:1; Salm 66:4; 96:1) Mela n-​nies li jifformaw l-​art ġdida se jgħixu hawn stess fuq din l-​art.

Imbagħad, id-​dinja preżenti taʼ nies ħżiena se tkun spiċċat. Ftakar, id-​Dilluvju taʼ żmien Noè qered dinja taʼ nies ħżiena. U, bħalma tgħallimna, id-​dinja ħażina li hawn bħalissa se tinqered f’Armageddon. Issa ejja naraw x’tip taʼ ħajja se ngħixu fid-​dinja l-​ġdida t’Alla wara Armageddon.

Tixtieq tgħix għal dejjem f’Ġenna taʼ l-​art fid-​dinja l-​ġdida t’Alla mimlija paċi?— L-​ebda tabib ma jistaʼ jagħmilna ngħixu għal dejjem. Ma teżisti l-​ebda pillola biex ma mmutux. L-​uniku mod kif nistgħu ngħixu għal dejjem hu billi nersqu qrib lejn Alla. U l-​Għalliem il-​Kbir jgħidilna kif nistgħu nagħmlu dan.

Ejja nġibu l-​Bibbji tagħna u niftħuhom fi Ġwanni kapitlu 17, il-​vers 3. Hawnhekk insibu l-​kliem taʼ l-​Għalliem il-​Kbir: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.”

Allura, Ġesù x’qal li għandna bżonn nagħmlu biex ngħixu għal dejjem?— L-​ewwel, irridu nieħdu għarfien dwar Missierna tas-​sema, Ġeħova, u wkoll dwar Ibnu, li ta ħajtu għalina. Dan ifisser li rridu nistudjaw il-​Bibbja. Dan il-​ktieb, Tgħallem mill-​Għalliem il-​Kbir, qiegħed jgħinna nagħmlu hekk.

Imma li nitgħallmu dwar Ġeħova kif se jgħinna ngħixu għal dejjem?—Sewwa, l-​istess bħalma għandna bżonn l-​ikel kuljum, għandna bżonn nitgħallmu dwar Ġeħova kuljum. Il-​Bibbja tgħid: “Il-​bniedem mhux bil-​ħobż biss jgħix, imma b’kull kelma li toħroġ minn fomm Ġeħova.”​—Mattew 4:4.

Irridu wkoll nieħdu għarfien dwar Ġesù Kristu għax Alla bagħat lil Ibnu biex ineħħi dnubietna. Il-​Bibbja tgħid: “F’ħadd iżjed m’hemm salvazzjoni.” U l-​Bibbja tgħid ukoll: “Min jeżerċita l-​fidi fl-​Iben għandu l-​ħajja taʼ dejjem.” (Atti 4:​12; Ġwanni 3:​36) Issa, xi jfisser li ‘teżerċita l-​fidi’ f’Ġesù?— Ifisser li nkunu verament nemmnu f’Ġesù u nafu li ma nistgħux ngħixu għal dejjem mingħajru. Nemmnuh dan?— Jekk iva, se nkomplu nitgħallmu kuljum mill-​Għalliem il-​Kbir, u se nagħmlu dak li jgħid hu.

Mod tajjeb ħafna kif nitgħallmu mill-​Għalliem il-​Kbir huwa li naqraw dan il-​ktieb għal darba wara l-​oħra u nħarsu lejn l-​istampi kollha u noqogħdu naħsbu fuqhom. Ara jekk tistax twieġeb il-​mistoqsijiet li hemm ħdejn l-​istampi. Ukoll, aqra l-​ktieb m’ommok jew maʼ missierek. Jekk il-​ġenituri tiegħek m’humiex miegħek, aqrah maʼ xi ħadd kbir ieħor u maʼ tfal oħra. Ma jkunx sabiħ li kieku tgħin lil nies oħra jitgħallmu mill-​Għalliem il-​Kbir xi jridu jagħmlu biex jgħixu għal dejjem fid-​dinja l-​ġdida t’Alla?—

Il-Bibbja tgħidilna: “Id-​dinja tgħaddi.” Imma mbagħad il-​Bibbja tispjega kif nistgħu ngħixu għal dejjem fid-​dinja l-​ġdida t’Alla. Din tgħid: “Min jagħmel ir-​rieda t’Alla jibqaʼ għal dejjem.” (1 Ġwanni 2:​17) Mela kif nistgħu ngħixu għal dejjem fid-​dinja l-​ġdida t’Alla?— Iva, billi nieħdu għarfien dwar Ġeħova u dwar Ibnu l-​għażiż, Ġesù. Imma rridu wkoll nagħmlu, jew nipprattikaw, dak li nitgħallmu. Jalla l-​istudju tiegħek taʼ dan il-​ktieb jgħinek tagħmel dawn l-​affarijiet.