Turi Fedeltà f’Kollox?

“Min juri fedeltà fl-​inqas ħaġa juri fedeltà wkoll fil-​ħafna.”​—LUQA 16:10.

1. Liema hu mod wieħed kif Ġeħova juri fedeltà?

HEKK kif tkun għaddejja l-​ġurnata, qatt innotajt x’jiġrilu d-​dell li siġra titfaʼ fuq l-​art? Id-​dell jibqaʼ jinbidel fid-​daqs u fid-​direzzjoni! L-​attivitajiet u l-​wegħdi tal-​bnedmin spiss huma bħal dell, jiġifieri instabbli. Mill-​banda l-​oħra, Alla Ġeħova ma jinbidilx biż-​żmien. Billi rrefera għalih bħala “l-​Missier tad-​dwal tas-​sema,” id-​dixxiplu Ġakbu qal: “Hu ma jinbidilx u m’huwiex bħal dell li jiċċaqlaq.” (Ġakbu 1:​17) Ġeħova u konsistenti u nistgħu nistrieħu fuqu, anki f’dettalji żgħar ħafna. Hu “Alla taʼ fedeltà.”​—Dewteronomju 32:​4, NW.

2. (a) Għala għandna neżaminaw lilna nfusna biex naraw jekk aħniex nuru fedeltà? (b) Liema mistoqsijiet rigward il-​fedeltà se nikkunsidraw?

² Alla kif iqis il-​fatt li l-​qaddejja tiegħu jiddependu minnu? Bl-​istess mod li kien iqishom David, li dwarhom qal: “Inżomm għajnejja fuq it-​twajbin taʼ l-​art, biex dawn joqogħdu miegħi. Min jimxi fit-​triq il-​perfetta, dan hu li jaqdini.” (Salm 101:6) Iva, Ġeħova jitgħaxxaq bil-​lealtà tal-​qaddejja tiegħu. Bir-​raġun, l-​appostlu Pawlu kiteb: “Dak li hu mistenni mill-​prokuraturi hu li jkunu leali.” (1 Korintin 4:2) X’jinvolvi li nuru fedeltà? F’liema oqsma tal-​ħajja għandna naġixxu bil-​fedeltà? Liema huma l-​barkiet taʼ li nimxu “fit-​triq il-​perfetta”?

X’Jiġifieri li Nuru Fedeltà

3. X’jiddetermina jekk nurux fedeltà?

³ “Mosè, bħala qaddej, wera fedeltà,” jgħid Ebrej 3:​5. X’qanqal lill-​profeta Mosè biex juri fedeltà? Fil-​bini u t-​tħejjija tat-​tabernaklu, “Mosè għamel kollox kif kien ordnalu l-​Mulej.” (Eżodu 40:16) Bħala qaddejja taʼ Ġeħova, aħna nuru fedeltà billi naqduh b’ubbidjenza. Dan jinkludi li nibqgħu leali lejn Ġeħova hekk kif niffaċċjaw problemi diffiċli jew provi kbar. Madankollu, is-​suċċess li jiġi meta negħlbu provi kbar mhux l-​uniku fattur li jiddetermina jekk nurux fedeltà. Ġesù qal: “Min juri fedeltà fl-​inqas ħaġa juri fedeltà wkoll fil-​ħafna, u min ma jagħmilx is-​sewwa fl-​inqas ħaġa ma jagħmilx is-​sewwa wkoll fil-​ħafna.” (Luqa 16:10) Ilkoll għandna nibqgħu nuru fedeltà anki fi kwistjonijiet li jidhru żgħar.

4, 5. Il-​fatt li nuru fedeltà “fl-​inqas ħaġa” x’jikxef dwarna?

⁴ Ubbidjenza kuljum “fl-​inqas ħaġa” hija importanti għal żewġ raġunijiet. L-​ewwelnett, tikxef kif inħossuna dwar is-​sovranità taʼ Ġeħova. Aħseb dwar il-​prova taʼ lealtà li ffaċċjaw l-​ewwel koppja umana, Adam u Eva. Ma kinitx xi ħaġa diffiċli li kellhom jagħmlu. Filwaqt li kellhom aċċess għal kull tip taʼ ikel fil-​ġnien taʼ l-​Għeden, kellhom sempliċement ma jiklux mill-​frott taʼ siġra waħda biss​—is-​“siġra taʼ tagħrif it-​tajjeb u l-​ħażin.” (Ġenesi 2:​16, 17) Kieku wrew fedeltà u obdew dak il-​kmand sempliċi, l-​ewwel koppja umana kienet se turi li kienet qed tappoġġa l-​ħakma taʼ Ġeħova. Jekk aħna nsegwu l-​istruzzjonijiet taʼ Ġeħova fil-​ħajja taʼ kuljum tagħna se nuru li aħna nżommu man-​naħa tas-​sovranità taʼ Ġeħova.

⁵ It-​tieni, il-​kondotta tagħna “fl-​inqas ħaġa” għandha influwenza fuq kif se nwieġbu “fil-​ħafna,” jiġifieri, meta niffaċċjaw provi akbar fil-​ħajja. F’dan ir-​rigward, ikkunsidra x’ġara lil Danjel u lil tliet sħabu Ebrej li wrew fedeltà​—Ħananija, Misaèl, u Għażarija. Huma ttieħdu fl-​eżilju ġewwa Babilonja fis-​sena 617 Q.E.K. Filwaqt li kienu għadhom żgħar, x’aktarx adoloxxenti, dawn l-​erbgħa sabu lilhom infushom fil-​palazz tas-​Sultan Nabukodonosor. Hemmhekk ngħataw ‘sehem mill-​ikel tas-​sultan u mill-​inbid li kien jixrob hu, u baqgħu jitħarrġu għal tliet snin, meta mbagħad bdew jidhru quddiem is-​sultan.’​—Danjel 1:​3-5.

6. Liema prova kellhom jiffaċċjaw Danjel u t-​tliet Ebrej sħabu fil-​palazz Babiloniż?

⁶ Però, il-​provvedimenti tas-​sultan Babiloniż qajmu sfida għall-​erbaʼ Ebrej adoloxxenti. L-​ikel projbit fil-​Liġi Mosajka x’aktarx kien inkluż fl-​ikel tas-​sultan. (Dewteronomju 14:​3-​20) L-​annimali maqtulin forsi ma ġewx skarnati kif suppost, u li kieku ħadu minn dan il-​laħam kienu jkunu qed jiksru l-​Liġi t’Alla. (Dewteronomju 12:​23-​25) L-​ikel forsi ġie offrut lill-​idoli wkoll, għax din kienet id-​drawwa fost il-​qaddejja Babiloniżi qabel ma jieklu ikla flimkien.

7. Xi wriet l-​ubbidjenza taʼ Danjel u t-​tlett iħbieb tiegħu?

⁷ Ir-​restrizzjonijiet fuq l-​ikel żgur ma tqisux bħala problema kbira għad-​dar irjali tas-​sultan Babiloniż. Madankollu, Danjel u sħabu kienu determinati fi qlubhom li ma jħammġux lilhom infushom billi jieklu mill-​ikel projbit fil-​Liġi t’Alla lil Iżrael. Din kienet kwistjoni li involviet il-​lealtà tagħhom u t-​turija taʼ fedeltà lejn Alla. Għalhekk, talbu dieta taʼ ħaxix u ilma, u dan ngħatalhom. (Danjel 1:​9-​14) Għal xi nies illum, dak li għamlu dawn l-​erbat irġiel żgħażagħ forsi jidher insinifikanti. Però, l-​ubbidjenza tagħhom lejn Alla wriet il-​pożizzjoni tagħhom fil-​kwistjoni tas-​sovranità taʼ Ġeħova.

8. (a) Liema prova kruċjali tal-​lealtà kellhom jiffaċċjaw it-​tliet Ebrej? (b) X’kien ir-​riżultat tal-​prova, u dan x’juri?

⁸ Il-​fatt li wrew fedeltà f’dak li forsi kien jidher insinifikanti pprepara lit-​tlett iħbieb taʼ Danjel biex ikampaw maʼ prova ħafna akbar. Fittex kapitlu 3 tal-​ktieb Bibliku taʼ Danjel, u aqra dwar kif it-​tliet Ebrej iffaċċjaw il-​mewt minħabba li rrifjutaw li jqimu l-​istatwa tad-​deheb li waqqaf is-​Sultan Nabukodonosor. Meta ttieħdu quddiem is-​sultan, huma ddikjaraw id-​determinazzjoni tagħhom b’fiduċja: “Jekk inhu tassew hekk, Alla tagħna, li aħna nqimu, jistaʼ jeħlisna minn idejk, O Sultan! U mqar jekk le, kun af, sultan, li allatek m’aħniex se naqduhom, u l-​istatwa tad-​deheb li int waqqaft m’aħniex se nqimuha.” (Danjel 3:​17, 18) Salvahom Ġeħova? Il-​gwardjani li waddbu lill-​irġiel żgħażagħ fin-​nar mietu, imma t-​tliet Ebrej leali ħarġu ħajjin​—lanqas biss inħarqu mis-​sħana tan-​nar! It-​turijiet taʼ lealtà li huma stabbilew għenuhom jippreparaw biex juru fedeltà waqt dik il-​prova kruċjali. Ma jurix dan l-​importanza li nuru fedeltà f’affarijiet żgħar?

Uri Fedeltà Fejn Jidħol l-​“Għana Mhux Ġust”

9. X’inhu l-​kuntest tal-​kliem taʼ Ġesù mniżżel f’Luqa 16:10?

⁹ Qabel ma stqarr il-​prinċipju li wieħed li juri fedeltà fl-​inqas ħaġa juri fedeltà wkoll fi kwistjonijiet importanti, Ġesù wissa lis-​semmiegħa tiegħu: “Agħmlu għalikom ħbieb permezz taʼ l-​għana mhux ġust, sabiex meta jispiċċa, jilqgħukom fl-​għamajjar taʼ dejjem.” Hu kompla bl-​istqarrija dwar it-​turija taʼ fedeltà fl-​inqas ħaġa. Imbagħad Ġesù qal: “Għalhekk, jekk ma wrejtux fedeltà fl-​għana mhux ġust, min se jafdakom b’dak li hu veru? . . . Ebda qaddej fid-​dar ma jistaʼ jkun ilsir taʼ żewġ sidien; għax jew jobgħod lil wieħed u jħobb lill-​ieħor, jew jintrabat maʼ wieħed u jistmerr lill-​ieħor. Ma tistgħux tkunu lsiera t’Alla u tal-​flus.”​—Luqa 16:​9-​13.

10. Kif nistgħu nuru l-​fedeltà bil-​mod kif nużaw l-​“għana mhux ġust”?

¹⁰ Skond il-​kuntest, l-​applikazzjoni oriġinali tal-​kliem taʼ Ġesù li jinsab f’Luqa 16:10 għandha x’taqsam maʼ l-​użu taʼ l“għana mhux ġust,” ir-​riżorsi jew l-​affarijiet materjali li għandna. Huwa msejjaħ mhux ġust għaliex l-​għana materjali​—partikolarment il-​flus—​qiegħed fil-​kontroll taʼ bnedmin midinbin. Iżjed minn hekk, xewqa biex nakkwistaw l-​għana tistaʼ twassalna għal azzjonijiet mhux ġusti. Aħna nuru fedeltà billi neżerċitaw l-​għerf fil-​mod kif nużaw il-​ġid materjali tagħna. Minflok ma nużawhom għal skopijiet egoistiċi, għandna nużawhom biex navanzaw l-​interessi tas-​Saltna u biex ngħinu lil dawk fil-​bżonn. Billi nuru fedeltà b’dan il-​mod, nagħmlu ħbieb m’Alla Ġeħova u Ġesù Kristu, dawk li jippossiedu l-​“għamajjar taʼ dejjem.” Dawn se jilqgħuna f’dawn il-​postijiet, u se jagħtuna ħajja eterna jew fis-​sema jew f’Ġenna fuq l-​art.

11. Għala m’għandniex inżommu lura milli nispjegaw lill-​inkwilini li naċċettaw kontribuzzjonijiet għax-​xogħol li jsir madwar id-​dinja mix-​Xhieda taʼ Ġeħova?

¹¹ Ikkunsidra wkoll xi nkunu qed nagħmlu meta nħallu Bibbji jew letteratura bbażata fuq il-​Bibbja maʼ dawk li magħhom nipproklamaw il-​messaġġ tas-​Saltna u nispjegawlhom li naċċettaw kontribuzzjonijiet għax-​xogħol li jsir madwar id-​dinja mill-​poplu taʼ Ġeħova. Ma nkunux qed nestendulhom opportunità biex jagħmlu użu għaqli mir-​riżorsi materjali tagħhom? Għalkemm l-​applikazzjoni oriġinali taʼ Luqa 16:10 tikkonċerna l-​użu taʼ riżorsi materjali, il-​prinċipju li hemm japplika wkoll f’oqsma oħra tal-​ħajja.

L-​Onestà Hija Tassew Importanti

12, 13. F’liema oqsma nistgħu nuru l-​onestà?

¹² L-​appostlu Pawlu kiteb: “Aħna fiduċjużi li għandna kuxjenza onesta, peress li nixtiequ nġibu ruħna bl-​onestà f’kollox.” (Ebrej 13:18) “F’kollox” żgur jinkludi kull kwistjoni li tinvolvi l-​immaniġġar tal-​finanzi. Aħna nħallsu d-​djun u t-​taxxi tagħna mingħajr dewmien u bl-​onestà. Għala? Nagħmlu dan minħabba l-​kuxjenza tagħna u primarjament minħabba l-​imħabba li għandna għal Alla u biex inkunu ubbidjenti għall-​istruzzjonijiet tiegħu. (Rumani 13:​5, 6) Kif nirreaġixxu meta nsibu xi ħaġa li mhix tagħna? Aħna nagħmlu dak kollu li nistgħu biex nirritornawha għand sidha. Kemm jirriżulta f’xiehda mill-​aħjar dan meta nispjegaw x’qanqalna biex nirritornaw l-​oġġett taʼ l-​individwu!

¹³ Biex nuru fedeltà u onestà f’kollox jirrikjedi li nkunu onesti fuq il-​post tax-​xogħol tagħna. Onestà fid-​drawwiet tax-​xogħol tagħna tiġbed l-​attenzjoni lejn it-​tip t’Alla li aħna nirrappreżentaw. Aħna ma “nisirqux” ħin billi nkunu għażżenin. Minflok, aħna naħdmu iebes, bħallikieku għal Ġeħova. (Efesin 4:​28; Kolossin 3:​23) Huwa stmat li f’pajjiż Ewropew wieħed, terz mill-​impjegati li jistaqsu għal ittra mingħand tabib biex jawtorizza s-​sick leave jagħmlu dan b’qerq. Qaddejja veri taʼ Ġeħova ma jivvintawx skużi biex jevitaw li jmorru għax-​xogħol. Kultant, ix-​Xhieda taʼ Ġeħova jingħataw promozzjoni għaliex dawk li jħaddmuhom josservaw l-​onestà u x-​xogħol iebes tagħhom.​—Proverbji 10:4.

Fedeltà fil-​Ministeru Kristjan Tagħna

14, 15. Liema huma xi modi li bihom nistgħu nagħtu prova li nuru fedeltà fil-​ministeru Kristjan?

¹⁴ Kif nuru fedeltà fil-​ministeru li hu fdat lilna? Il-​Bibbja tgħid: “Ħa noffru dejjem sagrifiċċju taʼ tifħir lil Alla, jiġifieri, il-​frott tax-​xofftejn li jistqarru ismu pubblikament.” (Ebrej 13:15) L-​iktar mod li nuru fedeltà fil-​ministeru taʼ l-​għalqa hu billi nipparteċipaw fih regolarment. M’għandniex inħallu li jgħaddi xahar mingħajr ma nagħtu xiehda dwar Ġeħova u l-​iskop tiegħu! Sehem regulari fix-​xogħol taʼ l-​ippridkar jgħinna wkoll biex intejbu l-​abbiltajiet u l-​effettività tagħna.

¹⁵ Mod ieħor mill-​aħjar biex nuru fedeltà fis-​servizz taʼ l-​għalqa hu li napplikaw is-​suġġerimenti li hemm fit-​Torri taʼ l-​Għassa u l-​Ministeru tas-​Saltna. Meta nippreparaw u nużaw il-​preżentazzjonijiet suġġeriti jew oħrajn li huma realistiċi, ma ninnotawx li l-​ministeru tagħna hu iktar produttiv? Meta niltaqgħu maʼ xi ħadd li juri interess fil-​messaġġ tas-​Saltna, nikkultivaw malajr l-​interess? U xi ngħidu dwar studji tal-​Bibbja fid-​djar li nistgħu nibdew maʼ wħud interessati? Nuru li aħna taʼ min jafdana u nuru fedeltà f’li nieħdu ħsiebhom? Il-​fatt li nagħtu prova li aħna leali fil-​ministeru jistaʼ jwassal lilna u lil dawk li jisimgħuna għall-​ħajja.​—1 Timotju 4:​15, 16.

Nibqgħu Separati mid-​Dinja

16, 17. B’liema modi nistgħu nuru li aħna separati mid-​dinja?

¹⁶ F’talba lil Alla, Ġesù qal dwar is-​segwaċi tiegħu: “Tajthom kelmtek, imma d-​dinja bagħdithom, għax m’humiex parti mid-​dinja, bħalma jien m’iniex parti mid-​dinja. Ma nitolbokx biex toħroġhom mid-​dinja, imma biex tħarishom minħabba l-​Ħażin. M’humiex parti mid-​dinja, bħalma jien m’iniex parti mid-​dinja.” (Ġwanni 17:​14-​16) Aħna nistgħu nkunu sodi u determinati biex nibqgħu separati mid-​dinja fi kwistjonijiet kbar, bħan-​newtralità, il-​festi reliġjużi, id-​drawwiet, u l-​immoralità. Però, xi ngħidu dwar affarijiet iżgħar? Jistaʼ jkun li anki mingħajr ma nindunaw, qed niġu influwenzati mill-​modi tad-​dinja? Per eżempju, jekk ma noqogħdux attenti, kemm hu faċli li l-​mod kif nilbsu jsir bla dinjità u mhux xieraq! Li nuru fedeltà jinkludi li nkunu ‘modesti u moħħna f’loku’ fil-​kwistjoni taʼ l-​ilbies u d-​dehra. (1 Timotju 2:​9, 10) Iva, “bl-​ebda mod m’aħna noħolqu xi raġuni għal tfixkil, biex ħadd ma jsib xi jgħid fil-​ministeru tagħna; imma b’kull mod nirrikkmandaw lilna nfusna bħala ministri t’Alla.”​—2 Korintin 6:​3, 4.

¹⁷ Minħabba x-​xewqa li għandna biex nonoraw lil Ġeħova, aħna nilbsu b’mod dinjituż għal-​laqgħat Kristjani tagħna. L-​istess huwa minnu meta niltaqgħu fi gruppi kbar fl-​assembleat u l-​konvenzjonijiet tagħna. L-​ilbies tagħna għandu jkun prattiku u preżentabbli. Dan iservi bħala xiehda għal dawk li josservawna. Anki l-​anġli jinnotaw l-​attività tagħna, bħalma nnotaw l-​attività taʼ Pawlu u taʼ sħabu l-​Kristjani. (1 Korintin 4:9) Fil-​fatt, dejjem għandna nilbsu pulit. Għal xi wħud, il-​fatt li nuru fedeltà fl-​għażla tagħna taʼ ħwejjeġ jistaʼ jidher li hi kwistjoni żgħira, imma f’għajnejn Alla hija importanti.

Barkiet li Jiġu Meta Nuru Fedeltà

18, 19. Liema barkiet jiġu meta nuru lealtà?

¹⁸ Il-​Kristjani veri huma deskritti bħala “prokuraturi mill-​aħjar tal-​qalb tajba mhix mistħoqqa t’Alla espressa b’diversi modi.” Għalhekk, huma ‘jiddependu mis-​saħħa li jagħti Alla.’ (1 Pietru 4:​10, 11) Iżjed minn hekk, bħala prokuraturi, aħna fdati b’dak li mhux tagħna personalment​—espressjonijiet tal-​qalb tajba mhux mistħoqqa t’Alla, inkluż il-​ministeru. Biex nuru li aħna prokuraturi mill-​aħjar, aħna nistrieħu fuq is-​saħħa li jagħtina Alla, “il-​qawwa iktar min-​normal.” (2 Korintin 4:7) X’taħriġ mill-​aħjar biex jgħinna niffaċċjaw kwalunkwe prova li nistgħu niltaqgħu magħha fil-​futur!

¹⁹ Is-​salmista kanta: “Ħobbu l-​Mulej, ħbieb tiegħu kollha. Lit-​twajbin [“lil leali,” NW] iħarishom il-​Mulej.” (Salm 31:24 [31:​23, NW]) Jalla nkunu determinati li nagħtu prova li aħna leali, fiduċjużi li Ġeħova hu “s-​Salvatur taʼ kull xorta taʼ bnedmin, speċjalment taʼ wħud leali.”​—1 Timotju 4:​10.

Tiftakar Int?

• Għala għandna nuru “fedeltà fl-​inqas ħaġa”?

• Kif nistgħu nuru l-​fedeltà

b’konnessjoni maʼ l-​onestà?

fil-​ministeru?

f’li nibqgħu separati mid-​dinja?

[Stampi f’paġna 26]

Min juri fedeltà fl-​inqas ħaġa, juri fedeltà wkoll fil-​ħafna

[Stampa f’paġna 29]

‘F’kollox ġib ruħek bl-​onestà’

[Stampa f’paġna 29]

Mod mill-​aħajr biex nuru fedeltà hu li nippreparaw tajjeb għall-​ministeru taʼ l-​għalqa

[Stampa f’paġna 30]

Kun modest fl-​ilbies u d-​dehra