Mistoqsijiet mill-​Qarrejja

L-​appostlu Pawlu qal li ‘Iżrael kollu kellu jiġi salvat.’ (Rum. 11:26) Ried hu jfisser li xi darba l-​Lhud kollha kellhom jikkonvertu u jsiru Kristjani?

Le, Pawlu ma kienx qed jgħid hekk. Bħala ġens, id-​dixxendenti naturali t’Abraham ċaħdu lil Ġesù bħala l-​Messija. U fis-​snin taʼ wara l-​mewt taʼ Ġesù, beda jidher ċar li l-​Lhud bħala grupp ma kinux se jsiru Kristjani. Xorta waħda, dak li qal Pawlu li ‘Iżrael kollu kellu jiġi salvat’ kien minnu. B’liema mod?

Lill-mexxejja reliġjużi taʼ żmienu Ġesù qalilhom: “Is-​saltna t’Alla tittieħed mingħandkom u tingħata lil ġens li jagħti l-​frott minnha.” (Mt. 21:43) Minħabba li l-​ġens taʼ Iżrael in ġenerali kien ċaħad lil Ġesù, Ġeħova kien se jdawwar l-​attenzjoni tiegħu lejn ġens ġdid, wieħed spiritwali. Pawlu sejjaħ lil dan il-​ġens “l-​Iżrael t’Alla.”—Gal. 6:16.

Siltiet oħrajn fl-​Iskrittura Griega Kristjana jagħtu prova li “l-​Iżrael t’Alla” jikkonsisti f’144,000 Kristjan midluk. (Rum. 8:15-17; Riv. 7:4) Rivelazzjoni 5:9, 10 jikkonferma li dan il-​grupp kellu jinkludi wħud li ma kinux Lhud, u dan juri li l-​Kristjani midlukin kellhom joħorġu “minn kull tribù u lsien u poplu u ġens.” Il-​membri taʼ Iżrael spiritwali kienu magħżulin b’mod speċjali biex ikunu “saltna u qassisin . . . , u se jsaltnu għal fuq l-​art.” Għalkemm Ġeħova ċaħad lil Iżrael bħala ġens magħżul, xi individwi setgħu jitħabbu miegħu. Hekk għamlu l-​appostli u Kristjani oħrajn tal-​bidu. M’għandniex xi ngħidu, dawn il-​Lhud, bħall-​bnedmin l-​oħrajn kollha, kellhom jinxtraw bid-​demm taʼ Ġesù Kristu.—1 Tim. 2:5, 6; Ebr. 2:9; 1 Pt. 1:17-19.

Il-fatt li l-​maġġuranza tal-​Lhud naturali fl-​ewwel seklu tilfu l-​opportunità li jsiru ħakkiema bi sħab maʼ Ġesù ma fixkilx l-​iskop t’Alla. Dan qatt ma jistaʼ jiġri, għax Ġeħova stqarr permezz tal-​profeta tiegħu: “Hekk jiġri minn kelmti: hija toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”—Is. 55:11.

Dan huwa minnu rigward l-​iskop t’Alla li jinħatru 144,000 ħakkiem bi sħab maʼ Ibnu fis-​sema. Il-​Bibbja tagħmilha ċara li Alla kellu jaħtar numru sħiħ taʼ 144,000. L-​ebda wieħed ma se jkun nieqes!—Riv. 14:1-5.

B’hekk, meta Pawlu kiteb li ‘Iżrael kollu kellu jiġi salvat,’ hu ma kienx qed ibassar li kien se jkun hemm xi konverżjoni tal-​massa taʼ Lhud għall-​Kristjanità. Minflok, hu ried ifisser li l-​iskop t’Alla li jkollu 144,000 Iżraeli spiritwali jaħkmu fis-​sema maʼ Ibnu, Ġesù Kristu, kien se jitwettaq. Fiż-​żmien magħżul minn Alla, in-​numru sħiħ—“Iżrael kollu”—kien se jkun salvat, u maż-​żmien dawn kienu se jaħkmu bħala slaten u qassisin fis-​Saltna Messjanika.—Efes. 2:8.

[Stampi f’paġna 28]

Il-​midlukin joħorġu “minn kull tribù u lsien u poplu u ġens”