“Ix-​Xena taʼ Din id-​Dinja Qed Tinbidel”

“Dan ngħidilkom, ħuti: iż-​żmien [“li fadal,” “NW”] qsar.”—1 KORINTIN 7:29.

1, 2. Int liema bidliet rajt matul ħajtek?

LIEMA bidliet rajt int matul ħajtek? Tistaʼ tirrakkonta xi wħud minnhom? Per eżempju, hemm il-​progress li sar fix-​xjenza medika. Minħabba r-​riċerka li saret f’dan il-​qasam, il-​medja tat-​tul taʼ ħajja f’xi pajjiżi żdiedet minn inqas minn 50 sena fil-​bidu tas-​seklu 20 għal iktar minn 70 sena llum! Aħseb ukoll dwar il-​modi kif aħna bbenefikajna mill-​użu xieraq tar-​radju, it-​televixin, it-​telefon ċellulari, u l-​magna tal-​fax. Sinifikanti wkoll huwa l-​progress li sar fl-​edukazzjoni, fit-​trasport, u fil-​protezzjoni tad-​drittijiet umani, li lkoll kemm huma tejbu l-​ħajja taʼ miljuni taʼ nies.

² M’għandniex xi ngħidu, mhux il-​bidliet kollha kienu għall-​aħjar. Huwa impossibbli li tinjora l-​effetti koroh minħabba ż-​żjieda fil-​kriminalità, l-​abbuż tad-​droga, id-​divorzju, l-​inflazzjoni, it-​terroriżmu, kif ukoll in-​nuqqas taʼ valuri morali. Hu x’inhu l-​każ, int x’aktarx taqbel maʼ l-​appostlu Pawlu li żmien ilu kiteb: “Ix-​xena taʼ din id-​dinja qed tinbidel.”—1 Korintin 7:31, NW.

3. X’ried ifisser Pawlu meta kiteb li “x-​xena taʼ din id-​dinja qed tinbidel”?

³ Meta Pawlu għamel din l-​istqarrija, hu kien qed iqabbel id-​dinja maʼ palk. L-​atturi fuq dan il-​palk—nies famużi fil-​qasam politiku, reliġjuż, u kulturali—jidhru fuq ix-​xena, jirreċtaw il-​parti tagħhom, u mbagħad iħallu l-​palk għal oħrajn. Dan ilu jseħħ għal sekli sħaħ. Fil-​passat, dinastija forsi kienet iddum taħkem għal għaxriet taʼ snin—saħansitra sekli sħaħ—u bidliet ftit li xejn kienu jsiru. Illum mhux hekk, għax biżżejjed jiġi assassinat xi mexxej prominenti u l-​istorja tinbidel f’ħakka t’għajn! Iva, f’dawn iż-​żminijiet imqallba, ma nafux x’se jsir għada.

4. (a) Liema ħarsa bilanċjata għandu jkollhom il-​Kristjani rigward il-​ġrajjiet dinjin? (b) Liema żewġ linji t’evidenza konvinċenti se nikkunsidraw issa?

⁴ Jekk id-​dinja hija l-​palk u l-​mexxejja tagħha huma l-​atturi, mela l-​Kristjani huma l-​ispettaturi.a Madankollu, peress li “m’humiex tad-​dinja” huma ma jikkonċernawx ruħhom iżżejjed dwar il-​mod kif jirreċtaw jew saħansitra dwar l-​identità taʼ l-​atturi. (Ġwanni 17:16) Minflok, huma bil-​ħerqa qed ifittxu għal indikazzjonijiet li d-​dramm qed jilħaq il-​quċċata tiegħu—tmiem katastrofiku—għaliex huma jafu li din is-​sistema trid tispiċċa qabel ma Jehovah jagħti bidu għad-​dinja l-​ġdida taʼ ġustizzja li tant ilhom jistennew.b Ejja għalhekk neżaminaw żewġ linji t’evidenza li juru li aħna qed ngħixu fiż-​żmien taʼ l-​aħħar u li d-​dinja l-​ġdida hija qrib ħafna. Dawn huma (1) il-​kronoloġija tal-​Bibbja u (2) il-​kundizzjonijiet dinjin li qed jeħżienu.—Mattew 24:21; 2 Pietru 3:13.

Misteru Solvut Sa fl-​Aħħar!

5. X’inhuma “ż-​żminijiet stabbiliti tal-​ġnus,” u għala huma taʼ interess għalina?

⁵ Il-​kronoloġija hija studju tar-​relazzjoni bejn iż-​żmien u l-​ġrajjiet. Ġesù tkellem dwar żmien li fih il-​mexxejja tad-​dinja kienu se jkunu l-​atturi prinċipali mingħajr indħil mis-​Saltna t’Alla. Ġesù sejjaħ dan il-​perijodu “ż-​żminijiet stabbiliti tal-​ġnus.” (Luqa 21:24, NW) Fit-​tmiem taʼ dawk “iż-​żminijiet stabbiliti,” is-​Saltna tas-​sema t’Alla kellha tibda taħkem, b’Ġesù bħala dak li bi dritt hu l-​Ħakkiem tagħha. Għall-​ewwel, Ġesù kellu jaħkem “f’nofs l-​għedewwa” tiegħu. (Salm 110:2) Imbagħad, skond Danjel 2:44, din is-​Saltna kellha “tfarrak u ttemm” il-​gvernijiet umani kollha, u hi tibqaʼ wieqfa għal dejjem.

6. “Iż-​żminijiet stabbiliti tal-​ġnus” meta bdew, kemm damu, u meta spiċċaw?

⁶ “Iż-​żminijiet stabbiliti tal-​ġnus” meta kienu se jispiċċaw u l-​ħakma tas-​Saltna t’Alla meta kellha tibda? It-​tweġiba, li kienet ‘issiġillata saż-​żmien taʼ l-​aħħar,’ tinvolvi l-​kronoloġija tal-​Bibbja. (Danjel 12:9) Hekk kif qorob dak “iż-​żmien,” Jehovah ħa passi biex jirrivela t-​tweġiba lil grupp taʼ studenti tal-​Bibbja umlin. Bl-​għajnuna taʼ l-​ispirtu t’Alla, huma għarfu li “ż-​żminijiet stabbiliti tal-​ġnus” bdew bil-​qerda taʼ Ġerusalemm fis-​sena 607 Q.E.K. u li dawk “iż-​żminijiet” kienu twal 2,520 sena. Minn dan, huma kkalkulaw li s-​sena 1914 immarkat it-​tmiem taż-​“żminijiet stabbiliti tal-​ġnus.” Irrealizzaw ukoll li s-​sena 1914 kienet il-​bidu tat-​tmiem għal din is-​sistema dinjija. Bħala student tal-​Bibbja, tistaʼ tispjega mill-​Iskrittura kif tiġi kalkulata d-​data taʼ l-​1914?c

7. Liema skritturi jgħinuna nsiru nafu l-​bidu, it-​tul, u t-​tmiem tas-​sebaʼ żminijiet imsemmijin fil-​ktieb taʼ Danjel?

⁷ Ħjiel wieħed jinsab moħbi fil-​ktieb taʼ Danjel. Ladarba Jehovah uża lis-​Sultan Nabukodonosor taʼ Babilonja biex jeqred lil Ġerusalemm fil-​bidu taż-​“żminijiet stabbiliti,” fis-​sena 607 Q.E.K., Hu wera permezz taʼ dan il-​ħakkiem li l-​ġnus kienu se jkomplu mingħajr indħil divin għal total taʼ sebaʼ żminijiet simboliċi. (Eżekjel 21:31, 32 [21:26, 27, NW]; Danjel 4:13, 20-22 [4:16, 23-25, NW]) Kemm huma twal dawn is-​sebaʼ żminijiet? Skond Apokalissi 11:2, 3, u 12:6, 14, tliet żminijiet u nofs huma 1,260 ġurnata. B’hekk, sebaʼ żminijiet huma d-​doppju, jew 2,520 ġurnata. Dan kollox? Le, għax Jehovah ta lill-​profeta Eżekjel, li kien jgħix fl-​istess żmien taʼ Danjel, din ir-​regola biex jinterpreta s-​simboliżmu: “Jum għal kull sena.” (Eżekjel 4:6) Għalhekk, is-​sebaʼ żminijiet fil-​fatt kienu 2,520 sena. Billi nużaw is-​sena 607 Q.E.K. bħala d-​data minn fejn nibdew u 2,520 sena bħala t-​tul, nistgħu nikkonkludu li ż-​żminijiet stabbiliti kellhom jispiċċaw fl-​1914.

Iż-​“Żmien taʼ l-​Aħħar” Konfermat

8. Liema evidenza tistaʼ tipponta lejha biex turi li l-​kundizzjonijiet tad-​dinja ħżienu mill-​1914 ’l hawn?

⁸ Ġrajjiet dinjin mill-​1914 ’l hawn jikkonfermaw li l-​fehma bbażata fuq il-​kronoloġija tal-​Bibbja li nsibu fil-​paragrafu taʼ qabel hija korretta. Ġesù nnifsu qal li “tmiem id-​dinja” se jkun immarkat minn gwerer, ġuħ, u pestilenza. (Mattew 24:3-8; Apokalissi 6:1-8 [6:2-8, NW]) Dan żgur li ġara mill-​1914 ’l hawn. L-​appostlu Pawlu ta iktar informazzjoni, u qal li kellu jkun hemm differenza li tispikka fl-​attitudni tan-​nies lejn xulxin. Id-​deskrizzjoni tiegħu tal-​bidliet li aħna lkoll xiehda tagħhom kienet eżatta.—2 Timotju 3:1-5.

9. X’jgħidu xi osservaturi rigward il-​kundizzjonijiet tad-​dinja mill-​1914 ’l hawn?

⁹ Veru li “x-​xena taʼ din id-​dinja” nbidlet daqshekk mill-​1914 ’l hawn? Fil-​ktieb The Generation of 1914, il-​Professur Robert Wohl jagħmel din l-​osservazzjoni: “Dawk li għexu matul il-​gwerra qatt ma waqfu jemmnu li dinja waħda kienet spiċċat u oħra kienet bdiet f’Awissu taʼ l-​1914.” It-​tabib Jorge A. Costa e Silva, bħala d-​direttur tas-​saħħa mentali fl-​Organizzazzjoni Dinjija tas-​Saħħa, ikkonferma dan billi kiteb: “Aħna ngħixu fi żmien li fih qed isiru ħafna bidliet taʼ malajr, li qegħdin jikkaġunaw ansjetà u stress f’livelli li qatt ma rajna bħalhom fl-​istorja taʼ l-​umanità.” Kienet din l-​esperjenza persunali tiegħek?

10. Il-​Bibbja x’turina dwar il-​kaġun tal-​kundizzjonijiet dinjin li baqgħu jeħżienu mill-​1914 ’l hawn?

¹⁰ Min hu l-​perċimes wara l-​kundizzjonijiet dinjin li dejjem jeħżienu? Apokalissi 12:7-9 jikxef lil dan il-​perċimes: “Mbagħad qamet gwerra fis-​sema: Mikiel [Ġesù Kristu] u l-​anġli tiegħu jitqabdu mad-​Dragun [Satana x-​Xitan]. U d-​Dragun u l-​anġli tiegħu tqabdu, iżda ma kellhomx ħila jegħlbu, u ma kienx hemm iżjed post għalihom fis-​sema. U kien imwaddab id-​Dragun il-​kbir, . . . il-​qarrieq tad-​dinja kollha.” Għalhekk, Satana x-​Xitan hu x-​xewwiex ħati, u t-​tkeċċija tiegħu mis-​sema fl-​1914 kienet tfisser gwaj ‘għall-​art u l-​baħar, għax fihom niżel id-​Demonju, b’korla kbira fuqu, għax jaf li żmien ftit baqagħlu.’—Apokalissi 12:10, 12.

Kif Se Jiżvolġi l-​Aħħar Att

11. (a) Liema metodi juża Satana biex jiżvija lid-​“dinja kollha”? (b) L-​appostlu Pawlu ġibed l-​attenzjoni lejn liema sforz speċjali taʼ Satana?

¹¹ Konxju li t-​tmiem tiegħu qed joqrob, Satana ilu mill-​1914 ’l hawn iżid l-​isforzi tiegħu sabiex jiżvija lid-​“dinja kollha.” Bħala l-​aqwa qarrieq, Satana qed jaħdem wara l-​kwinti, u qed itellaʼ fuq il-​palk lill-​mexxejja tad-​dinja u lil dawk li jfasslu l-​moda bħala l-​atturi prinċipali. (2 Timotju 3:13; 1 Ġwanni 5:19) Waħda mill-​miri tiegħu hi li jqarraq bil-​bnedmin biex huma jaħsbu li l-​mod kif hu jmexxi jistaʼ jġibilhom paċi vera. Ġeneralment, il-​propaganda tiegħu rnexxiet, għaliex in-​nies jibqgħu ottimisti minkejja l-​ammont li dejjem jiżdied t’evidenza li l-​kundizzjonijiet sejrin mill-​ħażin għall-​agħar. L-​appostlu Pawlu bassar li ftit qabel ma tinqered din is-​sistema dinjija, se jkun hemm ammont konsiderevoli taʼ propaganda satanika. Hu kiteb: “Meta kulħadd jibda jgħid: ‘[“Paċi u sigurtà” NW],’ dak il-​ħin stess, bħall-​uġigħ fuq mara li tkun waslet għall-​ħlas, tiġi fuqhom għal għarrieda l-​qerda.”—1 Tessalonikin 5:3; Apokalissi 16:13.

12. Liema sforzi kontinwi kien hemm biex iġibu l-​paċi fi żmienna?

¹² Fi snin reċenti, il-​politikanti spiss użaw il-​frażi “paċi u sigurtà” biex jiddeskrivu diversi pjanijiet tal-​bnedmin. Saħansitra sejħu s-​sena 1986 is-​Sena Internazzjonali tal-​Paċi, għalkemm din ma ġabet ebda paċi. Qegħdin dawn l-​isforzi minn mexxejja dinjin iwettqu kompletament l-​1 Tessalonikin 5:3, jew kien Pawlu qed jirreferi għal xi ġrajja speċifika li tant kemm tkun drammatika se tiġbed l-​attenzjoni tad-​dinja kollha?

13. Meta Pawlu bassar l-​għajta taʼ “Paċi u sigurtà!” maʼ xiex qabbel il-​qerda li kellha tiġi warajha, u x’nistgħu nitgħallmu minn dan?

¹³ Ladarba l-​profeziji Bibliċi spiss jiġu mifhumin kompletament biss wara li jitwettqu jew meta jkunu qed jitwettqu, irridu nistennew biex naraw. Però, hu taʼ interess li Pawlu qabbel il-​qerda f’daqqa li tiġi eżatt wara l-​għajta taʼ “Paċi u sigurtà!” maʼ l-​uġigħ tal-​ħlas taʼ mara tqila. Matul perijodu taʼ madwar disaʼ xhur, mara tqila ssir iktar konxja tat-​tarbija li qed tikber ġo fiha. Hi forsi tistaʼ tismaʼ l-​qalb tat-​tarbija tagħha tħabbat jew tħossha tiċċaqlaq fil-​ġuf. Saħansitra forsi tħossha tagħti b’saqajha. Is-​sinjali ġeneralment isiru iktar evidenti minn jum għal jum sakemm, ġurnata minnhom, tħoss uġigħ qawwi li jindika li l-​ġrajja li kienet qed tistenna—it-​twelid tat-​tarbija—tkun waslet. Għalhekk, titwettaq kif titwettaq il-​profezija taʼ l-​għajta taʼ “Paċi u sigurtà!,” din se twassal għal ġrajja li tiġi f’daqqa, li se tkun taʼ wġigħ, imma li fl-​aħħar se ġġib barka—il-​qerda tal-​ħażen u l-​bidu taʼ sistema dinjija ġdida.

14. F’liema sekwenza ġenerali se jseħħu l-​ġrajjiet futuri, u għalxiex se jwasslu?

¹⁴ Il-​qerda li ġejja se tqanqal il-​biżaʼ għal dawk il-​Kristjani leali li jkunu qed jarawha bħala spettaturi. L-​ewwelnett, is-​slaten taʼ l-​art (il-qasam politiku taʼ l-​organizzazzjoni taʼ Satana) se jattakkaw lil dawk li jappoġġaw lil Babilonja l-​Kbira (il-qasam reliġjuż) u se jeqirduhom. (Apokalissi 17:1, 15-18) B’hekk, f’daqqa waħda x-​xena tinbidel, u s-​saltna taʼ Satana se ssir maqsuma kontra tagħha stess, b’parti waħda tattakka lill-​oħra, u Satana mhux se jkollu l-​qawwa jwaqqafhom. (Mattew 12:25, 26) Jehovah se jdaħħal fi qlub is-​slaten tad-​dinja biex “jagħmlu l-​fehma tiegħu,” jiġifieri, biex jeħles l-​art mill-​avversarji reliġjużi tiegħu. (Korsiv tagħna.) Wara li tinqered ir-​reliġjon falza, Ġesù Kristu se jmexxi l-​eżerċti tiegħu fis-​smewwiet biex jeqirdu totalment dak li jkun fadal mill-​organizzazzjoni taʼ Satana—l-​elementi kummerċjali u politiċi. Fl-​aħħarnett, Satana nnifsu se jiġi mrażżan. Wara dan, jinżel is-​siparju, u d-​dramm li ilu għaddej se jinġieb fi tmiemu.—Apokalissi 16:14-16; 19:11-21; 20:1-3.

15, 16. X’effett għandu jkollha fuq ħajjitna t-​tfakkira li “ż-​żmien [“li fadal,” NW] qsar”?

¹⁵ Dawn l-​affarijiet kollha meta se jseħħu? Aħna ma nafux il-​ġurnata jew is-​siegħa. (Mattew 24:36) Madankollu, aħna nafu li “ż-​żmien [“li fadal,” NW] qsar.” (1 Korintin 7:29) Għalhekk, huwa vitali li nużaw il-​ħin li fadal bil-​għaqal. Kif? Bħalma jispjega l-​appostlu Pawlu, aħna għandna ‘nirbħu ż-​żmien’ (Saydon) għall-​affarijiet iktar importanti minn dawk li m’humiex daqshekk importanti u nagħmlu użu tajjeb minn kull ġurnata. Il-​għala? “Għaliex ħżiena huma l-​jiem.” U billi nagħrfu “x’inhi r-​rieda tal-​Mulej” għalina, m’aħniex se naħlu l-​ftit ħin prezzjuż li fadal.—Efesin 5:15-17; 1 Pietru 4:1-4.

¹⁶ Minħabba li nafu li ġejja l-​qerda fuq din is-​sistema dinjija kollha kemm hi, kif għandna niġu effettwati personalment? Għall-​benefiċċju tagħna l-​appostlu Pietru kiteb: “Ladarba dawn kollha għad idubu b’dan il-​mod, x’tip taʼ persuni għandkom tkunu f’dawk li huma atti taʼ kondotta qaddisa u għemejjel taʼ devozzjoni lejn Alla.” (2 Pietru 3:11, NW) Dan hu verament it-​tip taʼ persuni li għandna nkunu! Fi qbil mal-​parir għaqli taʼ Pietru, għandna bżonn (1) noqogħdu attenti ferm għall-​kondotta tagħna sabiex inkunu ċerti li hi qaddisa u (2) nagħmlu żgur li l-​għemejjel żelużi tagħna fis-​servizz taʼ Jehovah dejjem jirriflettu l-​imħabba profonda tagħna għalih.

17. Għal liema nases taʼ Satana għandhom joqogħdu għassa l-​Kristjani leali?

¹⁷ L-​imħabba għal Alla se żżommna milli norbtu qalbna maʼ din id-​dinja minħabba l-​ġibdiet tagħha. Meta nqisu dak li se jiġri lil din is-​sistema dinjija, hu perikoluż li nħallu l-​ġibdiet attraenti u t-​tlellix taʼ ħajja materjalistika u laxka jħajruna. Għalkemm ngħixu u naħdmu fid-​dinja, għandna nagħtu kas il-​parir għaqli biex ma nużawx id-​dinja bis-​sħiħ. (1 Korintin 7:31, NW) Fil-​fatt, għandna nagħmlu l-​aħjar tagħna biex noqogħdu b’sebaʼ għajnejn li ma niġux imqarrqin mill-​propaganda tad-​dinja. Din id-​dinja mhix se jirnexxilha ssib soluzzjonijiet għall-​problemi tagħha. M’hijiex se tibqaʼ għaddejja għal dejjem. Għala nistgħu nkunu daqshekk ċerti? Għaliex il-​Kelma ispirata t’Alla hekk tgħid: “Id-​dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem.”—1 Ġwanni 2:17.

L-​Aħjar Għadu Ġej!

18, 19. Liema bidliet qed tistenna fid-​dinja l-​ġdida, u għala se jkun jiswielek li tistenna?

¹⁸ Jehovah dalwaqt se jniżżel is-​siparju fuq Satana u dawk li jappoġġawh. Wara dan, bil-​barka t’Alla, dawk l-​uħud leali li jsalvaw mit-​tmiem taʼ din is-​sistema se jibdew jaħdmu biex jagħmlu l-​bidliet meħtieġa fix-​“xena” li se jibqgħu għal dejjem. Il-​gwerra mhix se tibqaʼ tħassar ix-​xena; Alla se “jwaqqaf il-​gwerer sa truf l-​art.” (Salm 46:10 [46:9, NW]) Minflok nuqqas taʼ ikel, ‘il-​qamħ se jkun kotran fuq l-​art; jogħla sal-​qċaċet.’ (Salm 72:16) Il-​ħabsijiet, l-​għases tal-​pulizija, il-​mard trasmess sesswalment, il-​barunijiet tad-​droga, il-​qrati li jittrattaw id-​divorzju, il-​proċeduri legali minħabba falliment, u t-​terroriżmu, se jisparixxu.—Salm 37:29; Isaija 33:24; Apokalissi 21:3-5.

¹⁹ L-​oqbra se jitbattlu, u biljuni taʼ wħud irxoxtati—atturi oħra—se jidhru fuq ix-​xena. X’ferħ se jkun hemm meta ġenerazzjoni waħda tingħaqad m’oħra u meta maħbubin li ilhom separati jilqgħu lil xulxin b’tgħanniqa kollha mħabba! Eventwalment, kull min jgħix se jaqdi lil Jehovah. (Apokalissi 5:13) Meta l-​bidliet ikunu kompleti, se jitlaʼ s-​siparju u tfeġġ Ġenna taʼ l-​art mad-​dinja kollha. Kif se tħossok meta tħares lejn din ix-​xena? Bla dubju se titqanqal biex tgħid, ‘Kemm ilni nistennieha, imma kemm swieli li stennejt!’

[Noti taʼ taħt]

Int Kif Twieġeb?

• Il-​kliem taʼ l-​appostlu Pawlu “x-​xena taʼ din id-​dinja qed tinbidel” kif wera li huwa minnu fi żmienna?

• Il-​kronoloġija Biblika kif tipponta lejn it-​tmiem taż-​“żminijiet stabbiliti tal-​ġnus”?

• Il-​kundizzjonijiet tad-​dinja li dejjem jinbdlu kif jikkonfermaw li s-​sena 1914 immarkat il-​bidu taż-​“żmien taʼ l-​aħħar”?

• Il-​fatt li “ż-​żmien [“li fadal,” NW] qsar” kif għandu jeffettwana?

[Stampa f’paġna 20]

Sa fl-​aħħar—il-​misteru jissolva!