Afda f’Jehovah u fil-​Kelma Tiegħu

“Fik jittama [“jafda,” NW] min jagħraf lil ismek.”—SALM 9:11 [SALM 9:10, NW].

1. Għala xorta waħda jistaʼ jkollna fiduċja f’Jehovah u fil-​Kelma tiegħu fi żmienna?

F’DID-DINJA moderna, l-​istedina biex tafda f’Alla u fil-​Kelma tiegħu, il-​Bibbja, tistaʼ tidher mhix prattika u mhix realistika. Madankollu, l-​għerf t’Alla għadda mit-​test taż-​żmien. Il-​Ħallieq tar-​raġel u l-​mara hu l-​Oriġinatur taż-​żwieġ u l-​familja, u jaf il-​bżonnijiet tagħna iktar milli jafhom ħaddieħor. Sewwa sew bħalma ma nbiddlux il-​bżonnijiet bażiċi umani, hekk ukoll il-​modi fundamentali taʼ li jitwettqu dawk il-​bżonnijiet baqgħu l-​istess. Il-​pariri għaqlin tal-​Bibbja, għalkemm miktubin sekli ilu, għadhom jipprovdu l-​aqwa gwida għal suċċess fl-​għixien u f’li jiġu solvuti l-​problemi. Li nagħtu kashom jirriżulta f’ammont kbir t’hena​—saħansitra fid-​dinja sofistikata u xjentifika li ngħixu fiha!

2. (a) Li jobdu l-​kmandamenti t’Alla liema frott tajjeb ipproduċa fil-​ħajjiet tan-​nies taʼ Jehovah? (b) Jehovah x’iwiegħed iżjed għal dawk li jobdu lilu u lill-​Kelma tiegħu?

² Li nafdaw f’Jehovah u napplikaw il-​prinċipji tal-​Bibbja jġibu benefiċċji prattiċi kuljum. Prova taʼ dan tinsab fil-​ħajjiet tal-​miljuni tax-​Xhieda taʼ Jehovah madwar id-​dinja li kellhom il-​konvinzjoni u l-​kuraġġ biex japplikaw il-​pariri tal-​Bibbja. Għalihom, fiduċja fil-​Ħallieq u fil-​Kelma tiegħu tat prova li hija mqiegħda tajjeb. (Salm 9:10, 11 [Salm 9:9, 10, NW]) Li jobdu l-​kmandamenti t’Alla għamilhom nies aħjar f’dawk li huma ndafa, onestà, bżulija, rispett għall-​ħajja u għall-​affarijiet taʼ l-​oħrajn, u moderazzjoni fl-​ikel u x-​xorb. Ressaqhom lejn imħabba u taħriġ xierqa ġewwa ċ-​ċirku tal-​familja​—li jkunu ospitabbli, paċenzjużi, mimlijin ħniena, u jaħfru—​kif ukoll rigward bosta affarijiet oħrajn. Huma kienu kapaċi jevitaw b’mod estensiv il-​frott ħażin tar-​rabja, mibegħda, qtil, invidja, biżaʼ, għażż, kburija, gideb, ikkalunnjar, taħlit sesswali, u immoralità. (Salm 32:10) Imma Alla jagħmel iżjed milli jwiegħed riżultat tajjeb għal dawk li jżommu l-​liġijiet tiegħu. Ġesù qal li dawk li jsegwu l-​mogħdija Kristjana kellhom jirċievu “minn issa, f’din id-​dinja stess, . . .  għal mitt darba iktar, . . .  ommijiet u wlied u egħlieqi flimkien maʼ persekuzzjonijiet, u l-​ħajja taʼ dejjem fiż-​żmien li ġej.”—Mark 10:29, 30.

Evita Li Tafda F’Għerf Dinji

3. F’li jkomplu jafdaw f’Jehovah u fil-​Kelma tiegħu, il-​Kristjani b’liema problemi xi kultant jiġu ffaċċjati?

³ Problema għal bnedmin imperfetti hija li għandhom it-​tendenza li jċekknu jew jinsew dak li Alla jirrikjedi. Faċilment jibdew jaħsbu li huma jafu l-​aħjar jew li għerf min-​nies intellettwali taʼ did-dinja huwa superjuri għal dak t’Alla, li huwa iżjed aġġornat. Qaddejja t’Alla jistgħu wkoll jiżviluppaw din l-​attitudni, peress li jgħixu f’nofs did-dinja. B’hekk, waqt li jestendi l-​istedina taʼ mħabba biex nisimgħu mill-​pariri tiegħu, Missierna tas-​sema jinkludi wkoll twissijiet xierqa: “Ibni, tinsiex it-​tagħlim tiegħi, iżda żomm f’qalbek il-​kmandamenti tiegħi; għax għomor twil u ħafna snin, u riżq tajjeb iġibulek. Ittama fil-​Mulej b’qalbek kollha, u tafdax fil-​għaqal tiegħek. Fih aħseb f’kull ma tagħmel, u hu jwittilek triqatek. Toqgħodx taħseb kemm inti għaref, imma ibżaʼ mill-​Mulej u warrab mill-​ħażen.”​—Proverbji 3:​1, 2, 5-7.

4. “L-​għerf taʼ din id-​dinja” kemm huwa mifrux, u għala huwa “bluha għal Alla”?

⁴ L-​għerf taʼ did-dinja huwa disponibbli bl-​abbundanza u minn ħafna sorsi. Hemm ħafna istituzzjonijiet taʼ tagħlim, u ‘l-​ktib taʼ kotba joktor bla heda.’ (Koħelet 12:12) Issa l-​hekk imsejħa information superhighway tad-​dinja tal-​kompjuters twiegħed li tipprovdi informazzjoni bla limiti fuq kważi kwalunkwe suġġett. Imma li jkollha dan l-​għarfien kollu għad-​dispożizzjoni tagħha ma jagħmilx lid-​dinja iktar għaqlija jew isolvi l-​problemi tagħha. Minflok, is-​sitwazzjoni dinjija qiegħda tmur għall-​agħar kuljum. Wieħed jistaʼjifhem għala l-​Bibbja tgħidilna li “l-​għerf taʼ din id-​dinja hu bluha quddiem Alla.”—1 Korintin 3:19, 20.

5. Il-​Bibbja liema twissijiet tagħtina rigward “l-​għerf taʼ din id-​dinja”?

⁵ Matul dil-parti finali taʼ l-​aħħar jiem, huwa biss mistenni li l-​qarrieq il-​kbir, Satana x-​Xitan, jitfaʼ valanga taʼ gideb fi sforz biex idgħajjef minn taħt il-​fiduċja fil-​verità tal-​Bibbja. Kritiċi sofistikati żżejjed ipproduċew abbundanza taʼ kotba spekulattivi li jisfidaw l-​awtentiċità tal-​Bibbja u dwar kemm hija taʼ min jorbot fuqha. Pawlu wissa lil sieħbu Kristjan: “Timotju, ħares sewwa dak li kien afdat f’idejk. Aħrab il-​kliem profan u fieragħ u l-​kontradizzjonijiet taʼ l-​għerf falz, li xi wħud ħaddnuh u tbiegħdu mill-​fidi.” (1 Timotju 6:20, 21) Il-​Bibbja tissokta twissi: “Qisu li ħadd ma jassarkom b’filosofija u kliem qarrieq u fieragħ skond dak li hu ġej mill-​bnedmin; skond il-​prinċipji tad-​dinja u mhux taʼ Kristu.”—Kolossin 2:8.

Iġġieled Lit-​Tendenza Li Tiddubita

6. Il-​viġilanza għala hija neċessarja biex tevita li dubji jrabbu għeruq fil-​qalb?

⁶ Tattika makakka oħra tax-​Xitan hija ż-​żrigħ taʼ dubji fil-​moħħ. Huwa dejjem attent biex jara xi dgħjufija fil-​fidi u jisfruttaha. Kull min jesperjenza dubji għandu jiftakar li l-​wieħed wara dubji bħal dawn huwa dak li qal lil Eva: “Tassew li Alla qalilkom: ‘La tiklux mis-​siġar kollha tal-​ġnien?’” Ladarba t-​Tentatur kien żaraʼ dubju f’moħħha, il-​pass li kien imiss kien li jgħidilha gidba, li hi emmnet. (Ġenesi 3:1, 4, 5) Biex nevitaw li l-​fidi tagħna tiġi meqruda mid-​dubju bħalma kienet t’Eva, għandna bżonn noqogħdu attenti. Jekk xi nitfa dubju dwar Jehovah, il-​Kelma tiegħu, jew l-​organizzazzjoni tiegħu beda jitlajja f’qalbek, ħu passi taʼ malajr biex teliminah qabel ma jiggrava f’xi ħaġa li tistaʼ teqred il-​fidi tiegħek.—Qabbel 1 Korintin 10:12.

7. X’jistaʼ jsir biex tqaċċat id-​dubji mill-​għeruq?

⁷ X’jistaʼ jsir? Għal darb’oħra, it-​tweġiba hija biex tafda f’Jehovah u fil-​Kelma tiegħu. “Jekk xi ħadd minnkom jonqsu l-​għerf, għandu jitlob lil Alla, li jagħti lil kulħadd b’id miftuħa u bla ma jċanfar ’il ħadd, u jagħtihulu. Mela ħa jitlob bil-​fidi, bla ma jitħasseb xejn, għax min jitħasseb ikun jixbah lill-​mewġ tal-​baħar imqanqal u mqalleb bir-​riħ.” (Ġakbu 1:5, 6; 2 Pietru 3:17, 18) Mela talb ħerqan lil Jehovah huwa l-​ewwel pass. (Salm 62:8) Imbagħad, toqgħodx taħsibha biex titlob għajnuna mingħand indokraturi taʼ mħabba fil-​kongregazzjoni. (Atti 20:28; Ġakbu 5:14, 15; Ġuda 22) Huma se jgħinuk issib is-​sors tad-​dubji tiegħek, li għandu mnejn ikun dovut għall-​kburija jew xi ħsieb żbaljat.

8. Ħsieb apostat taʼ spiss kif jibda, u x’inhu r-​rimedju?

⁸ Introduċewlek il-​qari jew l-​għoti taʼ widen għal ideat apostati jew filosofiji dinjin dubji velenużi? B’għaqal, il-​Bibbja twissi: “Agħmel mill-​aħjar biex iġġib ruħek quddiem Alla, bħala bniedem li għadda mill-​prova, bħala ħaddiem li m’għandux mniex jistħi, li jxandar bir-​reqqa l-​kelma tal-​verità. Aħrab it-​tpaċpiċ fieragħ u ħażin, għax dawk li jitkellmu hekk jibqgħu sejrin mill-​ħażin għall-​agħar u kliemhom jinfirex bħal kankrena.” (2 Timotju 2:15-17) Huwa taʼ interess li ħafna li saru vittmi t’apostasija bdew fid-​direzzjoni żbaljata billi l-​ewwel ilmentaw dwar kif ħassewhom li kienu qegħdin jiġu ttrattati fl-​organizzazzjoni taʼ Jehovah. (Ġuda 16) Li jsibu difetti fit-​twemmin ġie iktar tard. Sewwa sew bħalma tabib jaġixxi malajr biex jaqtaʼ barra kankru, aġixxi malajr biex toħroġ ’il barra mill-​moħħ kwalunkwe tendenza li tilmenta, li ma tkunx sodisfatt bil-​mod kif isiru l-​affarijiet fil-​kongregazzjoni Kristjana. (Kolossin 3:13, 14) Aqtaʼ ’l barra kwalunkwe ħaġa li tinkuraġġixxi dubji bħal dawn.—Mark 9:43.

9. Rutina teokratika tajba kif se tgħinna nibqgħu b’saħħitna fil-​fidi?

⁹ Żomm qrib taʼ Jehovah u l-​organizzazzjoni tiegħu. Lealment imita lil Pietru, li stqarr b’mod deċiż: “Mulej, għand min immorru? Inti għandek il-​kliem tal-​ħajja taʼ dejjem.” (Ġwann 6:52, 60, 66-68) Qis li jkollok skeda tajba taʼ studju tal-​Kelma taʼ Jehovah sabiex iżżomm il-​fidi tiegħek b’saħħitha, bħal tarka kbira, kapaċi ‘titfi l-​vleġeġ kollha tan-​nar tal-​ħażin.’ (Efesin 6:16) Ibqaʼ attiv fil-​ministeru Kristjan, aqsam b’imħabba l-​messaġġ tas-​Saltna m’oħrajn. Kuljum, immedita b’apprezzament fuq kif Jehovah bierkek. Kun grat li għandek għarfien tal-​verità. Li tagħmel dawn l-​affarijiet kollha f’rutina Kristjana tajba se jgħinek biex tkun hieni, tissaporti, u tibqaʼ ħieles mid-​dubji.—Salm 40:4; Filippin 3:15, 16; Lhud 6:10-12.

Insegwu D-​Direzzjoni Taʼ Jehovah Fiż-​Żwieġ

10. Għala huwa speċjalment importanti li tistrieħ fuq Jehovah għall-​gwida fiż-​żwieġ Kristjan?

¹⁰ Meta għamel arranġament biex ir-​raġel u l-​mara jgħixu flimkien bħala koppja miżżewġa, Jehovah kellu l-​iskop mhux biss li jimla’ l-​art b’mod komdu imma wkoll biex isebbaħ l-​hena tagħhom. Madankollu, id-​dnub u l-​imperfezzjoni ġabu problemi serji fir-​relazzjoni taż-​żwieġ. Il-​Kristjani m’humiex eżentati minn dawn, ladarba huma wkoll imperfetti u jesperjenzaw il-​pressjonijiet tal-​għixien fiż-​żmien taʼ llum. Xorta waħda, sal-​punt li huma jafdaw f’Jehovah u fil-​Kelma tiegħu, il-​Kristjani jistgħu jkollhom suċċess tajjeb fiż-​żwieġ u fit-​trobbija tat-​tfal tagħhom. Fi żwieġ Kristjan m’hemmx post għal prattiċi u mġiba dinjin. Il-​Kelma t’Alla tammonina: “Ħalli jkun iż-​żwieġ tagħkom miżmum fil-​ġieh minn kulħadd u s-​sodda taż-​żwieġ bla tinġis, għax Alla għad jagħmel ħaqq miż-​żienja u mill-​adulteri.”—Lhud 13:4.

11. F’li jsolvu problemi fiż-​żwieġ, x’għandu jiġi rrikonoxxut miż-​żewġ imseħbin?

¹¹ Iż-​żwieġ li huwa mwettaq skond il-​pariri tal-​Bibbja għandu klima taʼ mħabba, rabta, u sigurtà. Kemm ir-​raġel u kemm il-​mara jifhmu u jirrispettaw il-​prinċipju taʼ l-​istat taʼ kap. Meta jqumu diffikultajiet, taʼ spiss ikunu dovuti għal xi negliġenza fl-​applikar tal-​pariri Bibliċi. F’li tiġi solvuta problema fit-​tul, huwa vitali li ż-​żewġ imseħbin jiffokaw onestament fuq x’inhi realment il-​problema u jaħdmu fuq ir-​raġunijiet iktar milli fuq is-​sintomi. Jekk diskussjonijiet riċenti wasslu għal ftit jew xejn qbil, il-​koppja tistaʼ titlob għal għajnuna imparzjali mingħand indokratur taʼ mħabba.

12. (a) Il-​Bibbja fuq liema problemi komuni fiż-​żwieġ tipprovdi pariri? (b) Għala hemm il-​ħtieġa min-​naħa taż-​żewġ imseħbin li jagħmlu l-​affarijiet kif irid Jehovah?

¹² Tinvolvi l-​problema komunikazzjoni, rispett għas-​sentimenti taʼ xulxin, rispett għall-​istat taʼ kap, jew kif jittieħdu d-​deċiżjonijiet? Għandha x’taqsam mat-​trobbija tat-​tfal, jew l-​ibbilanċjar taʼ bżonnijiet sesswali? Jew hija l-​baġit tal-​familja, ir-​rikreazzjoni, l-​isħubija, jekk il-​mara għandhiex toħroġ taħdem, jew fejn se toqgħodu? Hi x’inhi l-​problema, il-​Bibbja tagħti pariri prattiċi jew direttament permezz taʼ liġijiet jew indirettament permezz taʼ prinċipji. (Mattew 19:4, 5, 9; 1 Korintin 7:1-40; Efesin 5:21-23, 28-33; 6:1-4; Kolossin 3:18-21; Titu 2:4, 5; 1 Pietru 3:1-7) Meta ż-​żewġ imseħbin jieqfu milli jagħmlu talbiet egoistiċi u jħallu l-​imħabba jkollha l-​espressjoni sħiħa tagħha fiż-​żwieġ tagħhom, hena akbar tirriżulta. Irid ikun hemm xewqa kbira min-​naħa taż-​żewġ imseħbin li jagħmlu l-​bidliet meħtieġa, li jagħmlu l-​affarijiet kif irid Jehovah. “Min jagħti widen għall-​Kelma jmur tajjeb; hieni hu min jafda fil-​Mulej!”—Proverbji 16:20.

Żgħażagħ​—Agħtu Widen Għall-​Kelma T’Alla

13. Għala m’huwiex faċli għal żgħażagħ Kristjani li jikbru b’fidi b’saħħitha f’Jehovah u fil-​Kelma tiegħu?

¹³ M’huwiex faċli għal żgħażagħ Kristjani li jikbru b’saħħithom fil-​fidi meta d-​dinja mill-​agħar hija madwarhom. Raġuni waħda hija li “d-​dinja kollha qiegħda taħt idejn il-​ħażin,” Satana x-​Xitan. (1 Ġwann 5:19) Iż-​żgħażagħ huma taħt attakk minn dan l-​għadu feroċi li jistaʼ jagħmel il-​ħażin jidher tajjeb. L-​attitudnijiet taʼ jien l-​ewwel, l-​ambizzjonijiet egoistiċi, il-​leblibiet għal dak li huwa immorali u krudil, u l-​ġiri mhux normali wara l-​pjaċiri​—dawn kollha jingħaqdu flimkien f’mudell wieħed taʼ ħsieb, komuni u dominanti deskritt fil-​Bibbja bħala “l-​ispirtu li issa jaħdem f’ulied id-​diżubbidjenza.” (Efesin 2:1-3, KŻ) Satana ppromwova b’makakkerija dan l-​“ispirtu” f’kotba taʼ l-​iskola, f’ħafna mill-​mużika disponibbli, fl-​isport, u f’għamliet oħrajn taʼ divertiment. Il-​ġenituri għandhom bżonn jkunu attenti biex jikkompensaw għal influwenzi bħal dawn billi jgħinu lil uliedhom jikbru jafdaw f’Jehovah u fil-​Kelma tiegħu.

14. Iż-​żgħażagħ kif jistgħu ‘jaħarbu mill-​ġibdiet taż-​żgħożija’?

¹⁴ Pawlu ta parir bħal taʼ missier liż-​żagħżugħ sieħbu Timotju: “Aħrab il-​ġibdiet taż-​żgħożija; fittex bil-​ħerqa s-​sewwa, il-​fidi, l-​imħabba u s-​sliem, flimkien maʼ dawk li jsejħu ’l l-​Mulej b’qalb safja.” (2 Timotju 2:22) Fil-​waqt li mhux il-​“ġibdiet taż-​żgħożija” kollha huma ħżiena fihom infushom, iż-​żgħażagħ għandhom ‘jaħarbu’ minnhom f’li m’għandhomx iħallu lil dawn l-​affarijiet ikunu taʼ preokkupazzjoni, billi jħallulhom ftit, jew xejn, ħin għal interessi divini. Bodybuilding, sport, mużika, divertiment, passatempi, u vvjaġġar, fil-​waqt li m’humiex neċessarjament ħżiena, jistgħu jkunu nassa jekk isiru l-​affarijiet importanti fil-​ħajja. Aħrab kompletament minn konversazzjoni mingħajr skop, milli tiġġerra barra, minn interess mhux normali fis-​sess, milli toqgħod ma tagħmel xejn u tiddejjaq, u milli tilmenta fuq li m’intix mifhum mill-​ġenituri tiegħek.

15. Liema affarijiet jistgħu jiġru fil-​privatezza tad-​dar li jistgħu jikkontribwixxu biex żgħażagħ jgħixu ħajja doppja?

¹⁵ Saħansitra fil-​privatezza tad-​dar, il-​periklu jistaʼ jħuf għaż-​żgħażagħ. Jekk wieħed jara programmi tat-​televixin u vidjos immorali jew vjolenti, ix-​xewqa biex jagħmel affarijiet ħżiena tistaʼ titħawwel. (Ġakbu 1:14, 15) Il-​Bibbja tagħti l-​parir: “O intom li tħobbu l-​Mulej, obogħdu l-​ħażen!” (Salm 97:10, KŻ; 115:11) Jehovah jaf jekk xi ħadd ikun qiegħed jipprova jgħix ħajja doppja. (Proverbji 15:3) Żgħażagħ Kristjani, ħarsu madwar il-​kamra tagħkom. Għandkom stampi mdendlin mal-​ħitan t’artisti immorali tad-​dinja taʼ l-​isport jew tal-​mużika, jew għandkom imdendlin affarijiet li jibnu u li huma tfakkiriet tajbin? (Salm 101:3) Fil-​gwardarobba tagħkom, għandkom ilbies modest, jew jirriflettu xi ftit mill-​ħwejjeġ tagħkom l-​istili estremi fl-​ilbies taʼ did-dinja? B’modi sottili x-​Xitan jistaʼ jaqbadkom f’nassa jekk iċċedu għat-​tentazzjoni biex idduqu dak li huwa ħażin. Il-​Bibbja b’mod għaqli tagħti l-​parir: “Kunu meqjusa u għassu. L-​għadu tagħkom ix-​xitan qisu ljun igħajjat, idur u jfittex ’il min sa jiblaʼ.”—1 Pietru 5:8.

16. Il-​pariri tal-​Bibbja kif jistgħu jgħinu lil żagħżugħ jagħmel lil dawk li huma importanti f’ħajtu kburin bih?

¹⁶ Il-​Bibbja tgħidlek biex tgħasses maʼ min tagħmilha. (1 Korintin 15:33) Dawk li tagħmilha magħhom għandhom ikunu dawk li jibżgħu minn Jehovah. Iċċedix għall-​pressjoni minn dawk taʼ mparek. (Salm 56:10 [Salm 56:11, NW]; Proverbji 29:25)Obdi mill-​ġenituri tiegħek li għandhom il-​biżaʼ t’Alla. (Proverbji 6:20-22; Efesin 6:1-3) Strieħ fuq l-​anzjani għal direzzjoni u inkuraġġiment. (Isaija 32:1, 2) Żomm moħħok u għajnejk fuq valuri u miri spiritwali. Fittex opportunitajiet biex tagħmel avvanz spiritwali u biex tipparteċipa f’attivitajiet tal-​kongregazzjoni. Tgħallem kif tagħmel affarijiet b’idejk. Ikber sod u b’saħħtek fil-​fidi, u mbagħad se tagħti prova li int tassew int xi ħadd​—xi ħadd denju tal-​ħajja fid-​dinja ġdida taʼ Jehovah! Missierna tas-​sema se jkun kburi bik, il-​ġenituri tiegħek taʼ l-​art se jitgħaxxqu bik, u ħutek Kristjani se jiġu inkuraġġiti bik. Dak huwa li jgħodd!—Proverbji 4:1, 2, 7, 8.

17. Liema benefiċċji jiġu għand dawk li jafdaw f’Jehovah u fil-​Kelma tiegħu?

¹⁷ Bi frażi poetika s-​salmista kien ispirat biex jikteb: “Ebda ġid ma jiċħad il-​Mulej lil min jimxi bis-​sewwa. Mulej taʼ l-​eżerċti, hieni l-​bniedem li jittama fik!” (Salm 84:12, 13 [Salm 84:11, 12, NW]) Iva, hena u suċċess, mhux diżappunt u falliment, huwa dak li jiġi għand dawk kollha li jafdaw f’Jehovah u fil-​Kelma tiegħu, il-​Bibbja.—2 Timotju 3:14, 16, 17. (w96 2/1)

Kif Twieġeb Int?

◻ Il-​Kristjani għala m’għandhomx ipoġġu l-​fiduċja tagħhom fl-​“għerf taʼ din id-​dinja”?

◻ X’għandu jsir jekk wieħed qiegħed jesperjenza xi dubji?

◻ Li tagħmel l-​affarijiet kif irid Jehovah kif iġib suċċess u hena fiż-​żwieġ?

◻ Il-​Bibbja kif tgħin liż-​żgħażagħ biex ‘jaħarbu mill-​ġibdiet taż-​żgħożija’?

[Stampa f’paġna 29]

Il-​Kristjani jduru lejn Jehovah u l-​Kelma tiegħu fil-​waqt li jwarrbu bħala bluha “l-​għerf taʼ din id-​dinja”

[Stampa f’paġna 31]

Familji li jafdaw f’Jehovah u fil-​Kelma tiegħu għandhom suċċess tajjeb u hena