Ithenna F’Jehovah!

“Dejjem ithennew fil-​Mulej. Għal darb’oħra se ngħid, Ithennew!”—FILIPPIN 4:4.

1. Għala nistgħu nitħassbu dwar x’ried ifisser Pawlu meta qal li l-​Kristjani għandhom dejjem jithennew?

ILLUM IL-​ĠURNATA, raġunijiet għall-​hena jistgħu jidhru ftit u rari. Bnedmin magħmulin mit-​trab, saħansitra Kristjani ġenwini, jiltaqgħu maʼ sitwazzjonijiet li jikkaġunaw niket​—qagħad, nuqqas taʼ saħħa, il-​mewt tal-​maħbubin tagħhom, problemi taʼ personalità, jew oppożizzjoni minn membri tal-​familja jew ħbieb taʼ qabel li ma jemmnux. Mela kif irridu nifhmu t-​twissija taʼ Pawlu, “Dejjem ithennew”? Meta wieħed iqis iċ-​ċirkostanzi taʼ dwejjaq u taʼ prova li lkoll kemm aħna rridu nissieltu magħhom, huwa dan saħansitra possibbli? Diskussjoni tal-​kuntest taʼ dawn il-​kelmiet se tgħinna niċċaraw din il-​ħaġa.

Ithennew​—Għala u Kif?

2, 3. X’inhi l-​importanza tal-​ferħ, kif muri fil-​każi taʼ Ġesù u taʼ l-​Iżraeliti tal-​qedem?

² “Dejjem ithennew fil-​Mulej. Għal darb’oħra se ngħid, Ithennew!” Dan jistaʼ jfakkarna fil-​kelmiet diretti lill-​Iżraeliti xi 24 seklu ilu: “Il-​ferħ taʼ Jehovah huwa l-​post b’saħħtu tagħkom,” jew skond it-​traduzzjoni taʼ Moffatt: “Li tithennew fil-​Wieħed Etern huwa s-​saħħa tagħkom.” (Neħemija 8:10) Il-​ferħ jipprovdi saħħa u huwa bħal post b’saħħtu li fih wieħed jistaʼ jirtira għal faraġ u protezzjoni. Il-​ferħ kien strumentali biex jgħin saħansitra lir-​raġel perfett Ġesù sabiex jissaporti. “Għall-​ferħ li tqiegħed quddiemu hu ssaporta zokk tat-​tortura, billi stmerr l-​għajb, u qagħad bil-​qiegħda fuq il-​leminija tat-​tron t’Alla.” (Ebrej 12:2) B’mod ċar, li tkun tistaʼ tithenna meta tkun iffaċċjat minn diffikultajiet huwa vitali għas-​salvazzjoni.

³ Qabel ma daħlu fl-​Art Imwiegħda, l-​Iżraeliti kienu ġew ikkmandati: “Trid tithenna minħabba t-​tajjeb kollu li Jehovah Alla tiegħek ta lilek u lin-​nies taʼ darek, int u l-​Levita u r-​resident barrani li qiegħed f’nofsok.” Il-​konsegwenzi taʼ li tonqos li taqdi lil Jehovah bl-​hena se jkunu ħorox. “Dawn il-​maledizzjonijiet kollha ċertament li se jiġu fuqek u jiġru warajk u jgħadduk sakemm tkun ġejt miġjub fix-​xejn . . . minħabba l-​fatt li ma qdejtx lil Jehovah Alla tiegħek bl-​hena u ferħ tal-​qalb għall-​abbundanza taʼ kollox.”—Dewteronomju 26:11; 28:45-47.

4. Għala nistgħu aħna nonqsu li nithennew?

⁴ Huwa imperattiv, għalhekk, li l-​fdal midlukin tal-​lum u sħabhom in-​“ngħaġ oħrajn” jithennew! (Ġwann 10:16) Pawlu, billi rrepeta l-​parir tiegħu, “għal darb’oħra se ngħid,” enfasizza l-​importanza taʼ li nithennew minħabba l-​ġid kollu li Jehovah għamel għalina. Aħna hekk nagħmlu? Jew tant niġu involuti fir-​rutina tal-​ħajja taʼ kuljum li xi drabi ninsew il-​ħafna raġunijiet li għandna biex nithennew? Jinġemgħu l-​problemi tant li jaħbu minn quddiem għajnejna s-​Saltna u l-​barkiet tagħha? Inħallu aħna affarijiet oħrajn​—li ma nobdux il-​liġijiet t’Alla, ninjoraw il-​prinċipji divini, jew nittraskuraw l-​obbligi Kristjani—jisirqulna l-​ferħ tagħna?

5. Persuna mhix raġonevoli għala ssibha diffiċli biex tithenna?

⁵ “Ħallu r-​raġonevolezza tagħkom issir magħrufa mill-​bnedmin kollha. Il-​Mulej qrib.” (Filippin 4:5) Wieħed li mhux raġonevoli nieqes mill-​bilanċ. Forsi jonqos li jieħu ħsieb saħħtu b’mod xieraq, billi jissottometti lil ġismu għal tensjoni jew anzjetà bla bżonn. Forsi ma tgħallimx li jaċċetta l-​limitazzjonijiet tiegħu u li jgħix fi qbil magħhom. Forsi jagħmel miri għoljin wisq għalih innifsu u mbagħad jipprova jilħaqhom jiġri x’jiġri. Jew forsi juża l-​limitazzjonijiet tiegħu bħala skuża biex imajna jew isir inqas diliġenti. Billi jkun nieqes mill-​bilanċ u billi ma jkunx raġonevoli, isibha diffiċli biex jithenna.

6. (a) Kristjani sħabna x’għandhom jaraw fina, u meta biss se jkun dan il-​każ? (b) Il-​kliem taʼ Pawlu fit-​2 Korintin 1:24 u Rumani 14:4 kif jgħinna nkunu raġonevoli?

⁶ Saħansitra jekk opponenti jħarsu lejna bħala fanatiċi, Kristjani sħabna għandhom dejjem ikunu jistgħu jaraw ir-​raġonevolezza tagħna. U hekk se jagħmlu jekk inkunu bbilanċjati u ma nistennewx perfezzjoni kemm minna nfusna u kemm minn oħrajn. Fuq kollox, irridu nżommu lura milli nimponu tagħbijiet fuq oħrajn li jaqbżu l-​limitu taʼ dak li tikkmanda l-​Kelma t’Alla. L-​appostlu Pawlu qal: “Mhux li aħna s-​sidien fuq il-​fidi tagħkom, imma aħna ħaddiema mseħbin għall-​ferħ tagħkom.” (2 Korintin 1:24) Bħala wieħed li qabel kien Fariżew, Pawlu kien jaf tajjeb li regoli riġidi mqegħdin u imposti minn dawk fl-​awtorità joħonqu l-​ferħ, fil-​waqt li suġġerimenti taʼ għajnuna offruti minn ħaddiema mseħbin iżiduh. Il-​fatt li “l-​Mulej qrib” għandu jfakkar lill-​persuna raġonevoli li m’għandniex ‘niġġudikaw il-​qaddej tad-​dar taʼ ħaddieħor. Għal sidu stess jieqaf jew jaqaʼ.’—Rumani 14:4.

7, 8. Il-​Kristjani għala għandhom jistennew li jkollhom problemi, u madankollu kif inhu possibbli għalihom li jibqgħu jithennew?

⁷ “Tkunu anzjużi fuq xejn, imma f’kollox bit-​talb u bit-​tħannin flimkien maʼ radd il-​ħajr ħallu l-​petizzjonijiet tagħkom ikunu mgħarrfin lil Alla.” (Filippin 4:6) Aħna llum qegħdin nesperjenzaw iż-​“żminijiet kritiċi li iebes biex issib tarfhom” li kiteb dwarhom Pawlu. (2 Timotew 3:1-5) Mela l-​Kristjani jridu jistennew li jkunu ffaċċjati bi problemi. Il-​kelmiet taʼ Pawlu “dejjem ithennew” ma jeskludux il-​possibiltà li Kristjan leali jistaʼ kultant ikollu waqtiet taʼ qtugħ il-​qalb jew skuraġġiment. Fil-​każ taʼ Pawlu stess, hu b’mod realistiku ammetta: “Aħna ppressati b’kull mod, imma mhux imrassin li ma niċċaqalqux; aħna mħawdin, imma mhux assolutament mingħajr ebda mod taʼ ħruġ; aħna ppersegwitati, imma mhux imħollijin lampa stampa; aħna mitfugħin ’l isfel, imma mhux meqrudin.” (2 Korintin 4:8, 9) Il-​ferħ taʼ Kristjan, madankollu, itaffi u eventwalment jegħleb perijodi temporanji taʼ anzjetà u niket. Jagħti s-​saħħa neċessarja biex inkomplu nimbottaw ’il quddiem, billi qatt ma ninsew il-​ħafna raġunijiet li għandna biex nithennew.

⁸ Meta jqumu l-​problemi, hi x’inhi n-​natura tagħhom, il-​Kristjan ferrieħi jittallab bl-​umiltà għall-​għajnuna taʼ Jehovah permezz tat-​talb. Ma jċedix għal anzjetà estrema. Wara li jagħmel dak li hu nnifsu jistaʼ b’mod raġonevoli biex isolvi l-​problema, iħalli r-​riżultat f’idejn Jehovah fi qbil maʼ l-​istedina: “Ixħet it-​tagħbija tiegħek fuq Jehovah innifsu, u hu nnifsu se jsostnik.” Sadattant, il-​Kristjan ikompli jirringrazzja lil Jehovah għat-​tjubija kollha Tiegħu.—Salm 55:22; ara wkoll Mattew 6:25-34.

9. Għarfien tal-​verità kif jagħti paċi tal-​moħħ, u x’effett tajjeb għandu dan fuq Kristjan?

⁹ “[I]l-paċi t’Alla li tisboq kull ħsieb se tgħasses lil qlubkom u l-​qawwiet mentali tagħkom permezz taʼ Kristu Ġesù.” (Filippin 4:7) Għarfien taʼ verità tal-​Bibbja jeħles il-​moħħ taʼ Kristjan minn qerq u jgħinu jiżżviluppa mudelli taʼ ħsieb b’saħħithom. (2 Timotew 1:13) Hu b’hekk jiġi mgħejjun biex jevita mġiba ħażina jew bla għaqal li tistaʼ tipperikola relazzjonijiet taʼ paċi maʼ oħrajn. Minflok ma jiġi frustrat minħabba inġustizzja jew ħażen, ipoġġi l-​fiduċja tiegħu f’Jehovah biex isolvi l-​problemi taʼ l-​umanità permezz tas-​Saltna. Paċi tal-​moħħ bħal din tgħasses lil qalbu, iżżomm il-​motivi tiegħu puri, u tiggwida l-​ħsieb tiegħu fil-​mogħdija tat-​tjieba. Motivi puri u ħsieb xieraq, mill-​banda l-​oħra, jipprovdu raġunijiet bla għadd għall-​hena, minkejja problemi u pressjonijiet miġjubin minn dinja kaotika.

10. Il-​ferħ veru jistaʼ jiġi esperjenzat biss billi nitkellmu u naħsbu dwar liema ħaġa?

¹⁰ “Fl-​aħħarnett, ħuti, l-​affarijiet kollha li huma veri, l-​affarijiet kollha li huma taʼ tħassib serju, l-​affarijiet kollha li huma taʼ tjieba, l-​affarijiet kollha li huma kasti, l-​affarijiet kollha li huma taʼ min iħobbhom, l-​affarijiet kollha li jitkellmu tajjeb dwarhom, il-​virtujiet kollha li hemm u l-​affarijiet kollha li jistħoqqilhom tifħir li hemm, komplu ikkunsidraw dawn l-​affarijiet.” (Filippin 4:8) Kristjan ma jsib ebda gost f’li jitkellem jew jaħseb dwar affarijiet ħżiena. Dan awtomatikament jelimina ħafna mid-​divertiment li tipprovdi d-​dinja. Ħadd ma jistaʼ jżomm ferħ Kristjan jekk jimla moħħu u qalbu bil-​gideb, ċajt iblah, u affarijiet li huma bla tjieba, immorali, bla virtù, taʼ mibgħeda, u mistmerrin. Ngħiduha kif inhi, ħadd ma jistaʼ jsib ferħ veru billi jimla moħħu u qalbu bil-​ħmieġ. Fid-​dinja korrotta taʼ Satana, kemm hu edifikanti li tkun taf li l-​Kristjani għandhom tant affarijiet tajbin fuqiex jaħsbu u jiddiskutu!

Raġunijiet Bla Għadd Għall-​Hena

11. (a) X’ma għandux jittieħed ħafif ħafif, u għala le? (b) Attendenza għal konvenzjoni internazzjonali x’effett kellha fuq delegat u martu?

¹¹ Meta nitkellmu dwar raġunijiet għall-​hena, ejjew ma ninsewx il-​fratellanza internazzjonali tagħna. (1 Pietru 2:17) Fil-​waqt li gruppi nazzjonali u etniċi dinjin jesprimu mibgħeda intensa lejn xulxin, il-​poplu t’Alla jersqu eqreb lejn xulxin fl-​imħabba. L-​unità tagħhom hija evidenti b’mod speċjali f’konvenzjonijiet internazzjonali. Dwar dik li nżammet fl-​1993 fi Kiev, l-​Ukrajna, delegat mill-​Istati Uniti kiteb: “Id-​dmugħ taʼ ferħ, l-​għajnejn jixgħelu, it-​tgħanniq kontinwu bħal ġo familja, u t-​tislijiet mibgħutin min-​naħa għall-​oħra taʼ l-​istadju minn gruppi jxejru umbrelel ikkuluriti u mkatar li b’mod ċar taw evidenza taʼ unità teokratika. Qlubna jimtlew bil-​kburija għal dak li Jehovah wettaq b’mod mirakoluż fil-​fratellanza dinjija. Dan effettwa lil marti u lili b’mod profond u żied tifsir ġdid mal-​fidi tagħna.”

12. Isaija 60:22 kif qed jiġi mwettaq quddiem għajnejna stess?

¹² Kemm huwa taʼ tisħiħ tal-​fidi għall-​Kristjani llum li jaraw profeziji tal-​Bibbja jitwettqu quddiem għajnejhom stess! Ikkunsidra, per eżempju, il-​kelmiet taʼ Isaija 60:22: “Il-​wieħed ċkejken innifsu se jsir elf, u l-​wieħed żgħir ġens setgħan. Jien innifsi, Jehovah, se ngħaġġlu f’waqtu stess.” Fit-twelid tas-​Saltna fl-​1914, biss 5,100​—wieħed ċkejken—​kienu attivi fl-​ippridkar. Imma matul dawn l-​aħħar ħames snin, id-​daqs tal-​fratellanza dinjija żdied b’rata medja taʼ 5,628 Xhieda mgħammdin ġodda kull ġimgħa! Fl-​1993, intlaħqet quċċata taʼ 4,709,889 ministri attivi. Immaġina ftit! Dan ifisser li “l-​wieħed ċkejken” taʼ l-​1914 hu litteralment qrib li jsir “elf”!

13. (a) X’kien qiegħed jiġri mill-​1914 ’l hawn? (b) Ix-​Xhieda taʼ Jehovah kif josservaw il-​prinċipju tal-​kliem taʼ Pawlu fit-​2 Korintin 9:7?

¹³ Mill-​1914 ’l hawn is-​Sultan Messjaniku ħareġ irażżan f’nofs l-​għedewwa tiegħu. Il-​ħakma tiegħu ġiet appoġġjata minn segwaċi umani ħerqanin li jikkontribwixxu ħin, saħħa, u flus biex iwettqu x-​xogħol dinji taʼ ppridkar kif ukoll kampanja internazzjonali taʼ bini. (Salm 110:2, 3) Ix-​Xhieda taʼ Jehovah jithennew li kontribuzzjonijiet monetarji qegħdin isiru biex dawn l-​attivitajiet jitlestew, saħansitra għalkemm il-​flus kważi qatt ma jissemmew fil-​laqgħat tagħhom.a (Qabbel 1 Kronaki 29:9.) Il-​Kristjani veri m’għandhomx għalfejn jiġu mbottati biex jagħtu; iqisuh bħala privileġġ li jappoġġjaw lis-​Sultan tagħhom sal-​punt li jippermettu ċ-​ċirkostanzi tagħhom, kull wieħed “sewwa sew bħalma għamel riżoluzzjoni f’qalbu, mhux kontra qalbu jew għax bil-​fors.”—2 Korintin 9:7.

14. Liema kundizzjoni fost il-​poplu t’Alla saret tidher mill-​1919 ’l hawn, billi tathom liema raġuni biex jithennew?

¹⁴ Ir-​restawrazzjoni tal-​qima vera mbassra fost il-​poplu t’Alla rriżultat fil-​ħolqien taʼ ġenna spiritwali. Mill-​1919 ’l hawn b’mod progressiv estendiet il-​fruntieri tagħha. (Salm 14:7; Isaija 52:9, 10) Ir-​riżultat? Il-​Kristjani veri jesperjenzaw “eżaltazzjoni u hena.” (Isaija 51:11) Il-​frott tajjeb li jirriżulta huwa evidenza taʼ dak li kapaċi jwettaq l-​ispirtu qaddis t’Alla permezz taʼ bnedmin imperfetti. Il-​kredtu u l-​unur kollu jmur għal Jehovah, imma liema privileġġ akbar jistaʼ jkun hemm milli ssir ħaddiem imsieħeb m’Alla? (1 Korintin 3:9) Jehovah hu qawwi biżżejjed biex jikkaġuna l-​ġebel, jekk hemm bżonn, li jgħajjat il-​messaġġ tal-​verità. Minkejja dan, hu għażel li ma jirrikorrix għal dan il-​metodu imma, minflok, li jqanqal ħlejjaq ħerqanin magħmulin mit-​trab biex iwettqu r-​rieda tiegħu.—Luqa 19:40.

15. (a) Liema ġrajjiet moderni nsegwu b’interess? (b) Lejn liema ġrajja qegħdin inħarsu ’l quddiem b’ferħ?

¹⁵ Mimlijin reverenza profonda, il-​qaddejja taʼ Jehovah issa jinnotaw il-​ġrajjiet dinjin hekk kif dawn iwettqu profeziji notevoli tal-​Bibbja. Il-​ġnus qegħdin jipprovaw iebes​—imma għalxejn—​biex jiksbu paċi stabbli. Ġrajjiet qegħdin iġegħluhom jirrikorru għand l-​organizzazzjoni tal-​Ġnus Magħquda biex taġixxi f’inħawi taʼ inkwiet fid-​dinja. (Rivelazzjoni 13:15-17) Sadattant, in-​nies t’Alla diġà qegħdin iħarsu ’l quddiem b’antiċipazzjoni kbira lejn waħda mill-​iktar ġrajjiet taʼ ferħ li qatt tistaʼ sseħħ, waħda li qiegħda toqrob kuljum. “Ejjew nithennew u nkunu ferħanin ferm, u ejjew nagħtuh il-​glorja, għaliex iż-​żwieġ tal-​Ħaruf wasal u martu ħejjiet lilha nfisha.”—Rivelazzjoni 19:7.

L-​Ippridkar​—Tagħbija Jew Ferħ?

16. Uri kif li jonqos li jipprattika dak li tgħallem jistaʼ jisraq il-​ferħ taʼ Kristjan.

¹⁶ “L-​affarijiet li tgħallimtu kif ukoll aċċettajtu u smajtu u rajtu f’konnessjoni miegħi, ipprattikaw dawn; u dak Alla taʼ paċi se jkun magħkom.” (Filippin 4:9) Billi jipprattikaw dak li tgħallmu, il-​Kristjani jistgħu jistennew li jirċievu l-​barka t’Alla. Waħda mill-​iktar affarijiet importanti li tgħallmu hija l-​bżonn li jippridkaw l-​aħbar tajba lil oħrajn. Tabilħaqq, min jistaʼ jgawdi paċi tal-​moħħ jew ikun ferħan jekk iżomm lura informazzjoni minn persuni taʼ qalb onesta li l-​istess ħajjiet tagħhom jiddependu fuq li jisimgħuha?—Eżekjel 3:17-21; 1 Korintin 9:16; 1 Timotew 4:16.

17. L-​attività taʼ ppridkar tagħna għala għandha dejjem tkun sors taʼ ferħ?

¹⁷ Kemm huwa taʼ ferħ li ssib persuni bħal ngħaġ ħerqanin li jitgħallmu dwar Jehovah! Tabilħaqq, dawk li jaqdu bil-​motiv tajjeb dejjem se jsibu s-​servizz tas-​Saltna bħala sors taʼ ferħ. Dan huwa għaliex ir-​raġuni ewlenija li tkun Xhud taʼ Jehovah hija biex tfaħħar lil Ismu u biex tappoġġja l-​pożizzjoni Tiegħu bħala Ħakkiem Sovran. (1 Kronaki 16:31) Dak li jirrikonoxxi dan il-​fatt se jithenna saħansitra meta n-​nies b’mod mhux għaqli jirrifjutaw l-​aħbar tajba li jġib. Hu jaf li l-​ippridkar lil nies li ma jemmnux xi darba se jintemm; it-​tifħir lil isem Jehovah se jibqaʼ għal dejjem.

18. Liema ħaġa tqanqal lil Kristjan biex jagħmel ir-​rieda taʼ Jehovah?

¹⁸ Il-​vera reliġjon tqanqal lil dawk li jipprattikawha biex jagħmlu l-​affarijiet meħtiġin minn Jehovah, mhux għax ikollhom jagħmluhom, imma għax iridu huma. (Salm 40:8; Ġwann 4:34) Ħafna nies isibu dan diffiċli biex jifhmuh. Waħda mara darba qalet lil waħda Xhud li ġiet iżżurha: “Taf xejn, ħaqqkom prosit. Jien ċertament qatt ma nasal li mmur minn dar għal dar nippriedka dwar ir-​reliġjon tiegħi kif qegħdin tagħmlu intom.” Bi tbissima x-​Xhud wieġbet: “Nistaʼ nifhem kif tħossok. Qabel ma sirt waħda mix-​Xhieda taʼ Jehovah, ma kontx noħlomha li mmur għand nies oħrajn biex nitkellem dwar reliġjon. Imma issa rrid.” Il-​mara ħasbet għal ftit mumenti u mbagħad ikkonkludiet: “Ovvjament ir-​reliġjon tiegħek għandha xi ħaġa x’toffri li tiegħi m’għandhiex. Forsi jmissni ninvestiga.”

19. Għala huwa issa ż-​żmien li nithennew bħal qatt qabel?

¹⁹ It-​test tas-​sena għall-​1994, muri b’mod prominenti fis-​Swali tas-​Saltna tagħna, regolarment ifakkarna: “Afda f’Jehovah b’qalbek kollha.” (Proverbji 3:5) Jistaʼ jkun hemm raġuni akbar biex nithennew milli li nkunu nistgħu npoġġu l-​fiduċja tagħna f’Jehovah, il-​post b’saħħtu tagħna li fih insibu refuġju? Salm 64:10 jispjega: “[I]l-wieħed twajjeb se jithenna f’Jehovah u tabilħaqq se jieħu refuġju fih.” Dan m’huwiex iż-​żmien biex inkunu indeċiżi jew inċedu. Kull xahar li jgħaddi jġibna eqreb lejn ir-​realtà taʼ dak li qaddejja taʼ Jehovah ilhom jixxennqu biex jaraw minn żmien Abel. Issa huwa ż-​żmien biex nafdaw f’Jehovah b’qalbna kollha, billi nafu li qatt qabel ma kellna daqstant raġunijiet biex nithennew! (w94 9/1)

[Nota taʼ taħt]

Kif Se Twieġeb Int?

◻ Għala, skond Neħemija 8:10, għandna nithennew?

◻ Dewteronomju 26:11 u 28:45-47 kif juru l-​importanza taʼ li nithennew?

◻ Filippin 4:4-9 kif jistaʼ jgħinna biex dejjem nithennew?

◻ It-​test tas-​sena għall-​1994 x’raġuni jagħtina biex nithennew?

[Stampa f’paġna 30]

Xhieda Russi u Ġermaniżi jithennew li jkunu parti minn fratellanza internazzjonali