Nilħqu l-​Qlub bl-​Arti tal-​Persważjoni

LIL ħafna nies, il-​kelma “persważjoni” ma tantx tinżlilhom. Dak li jkun jistaʼ jiġih f’moħħu xi aġent fitt jew xi riklam iddisinjat biex iqarraq jew jimmanipula lill-​konsumatur. Anki fil-​Bibbja, l-​idea taʼ persważjoni xi kultant ikollha konnotazzjonijiet negattivi u ġġorr il-​ħsieb taʼ taħsir jew żvijar. Per eżempju, l-​appostlu Kristjan Pawlu kiteb lill-​Galatin: “Kontu tiġru sewwa. Min fixkilkom li ma toqogħdux għas-​sewwa? Din il-​persważjoni m’hijiex ġejja minn dak li sejjħilkom.” (Galatin 5:7, 8) Pawlu wissa wkoll lill-​Kolossin biex ma jħallu lil ħadd ‘iqarraq bihom bi kliem li jiġbidhom għal miegħu.’ (Kolossin 2:4) Persważjoni bħal din tiddependi minn argumenti makakki msejsa fuq bażi falza.

Fit-tieni ittra tiegħu lil Timotju, madankollu, l-​appostlu Pawlu uża l-​idea taʼ persważjoni f’sens differenti. Hu kiteb: “Int ibqaʼ miexi f’dak li tgħallimt u emmint bis-​sħiħ [“ġejt ipperswadut biex temmen,” NW], għax taf mingħand min tgħallimtu.” (2 Timotju 3:14) F’li ‘jiġi pperswadut biex jemmen,’ Timotju ma kienx qed jiġi mmanipulat minn ommu u nanntu, li mingħandhom tgħallem veritajiet Skritturali.—2 Timotju 1:5.a

Waqt li kien qed jinżamm taħt arrest ġewwa daru f’Ruma, Pawlu ta xiehda bir-​reqqa lil ħafna, billi “għamel kemm felaħ biex jipperswadihom permezz tal-​Liġi taʼ Mosè u l-​Profeti ħalli jemmnu f’Ġesù Kristu.” (Atti 28:23) Kien qiegħed Pawlu jqarraq bl-​udjenza tiegħu? Dażgur li le! Jidher ċar, allura, li l-​persważjoni m’hijiex dejjem xi ħaġa ħażina.

Meta wżat f’sens pożittiv, l-​għerq tal-​kelma Griega tradotta “tipperswadi” jfisser li tikkonvinċi, li tbiddel il-​ħsieb tal-​moħħ permezz taʼ raġunar sod u loġiku. B’hekk għalliem jistaʼ jibni fuq xi bażi Skritturali billi juża l-​persważjoni biex irawwem f’oħrajn konvinzjoni f’verità Biblika. (2 Timotju 2:15) Tabilħaqq, din kienet karatteristika tal-​ministeru taʼ Pawlu. Anki Demetriju l-​arġentier, li kien iqis lit-​tagħlim Kristjan bħala li huwa falz, innota: “Dan Pawlu qiegħed idawwar u jaqleb ħafna nies, mhux biss f’Efesu, imma tistaʼ tgħid fl-​Asja kollha. Qiegħed jgħidilhom li allat maħduma bl-​idejn ma huma allat xejn.”—Atti 19:26.

Nużaw il-​Persważjoni fil-​Ministeru

Ġesù Kristu istruwixxa lis-​segwaċi tiegħu: “Morru, mela, agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu, u għallmuhom iħarsu dak kollu li ordnajtilkom jien. U ara, jiena magħkom dejjem, sa l-​aħħar taż-​żmien.” (Mattew 28:19, 20) F’iktar minn 230 pajjiż, ix-​Xhieda taʼ Jehovah qegħdin jobdu dan il-​kmand. Kull xahar matul is-​sena taʼ servizz tagħhom 1997, ikkonduċew medja taʼ 4,552,589 studju tal-​Bibbja fid-​djar madwar id-​dinja.

Jekk int għandek il-​privileġġ li tikkonduċi studju tal-​Bibbja fid-​dar, għandek mnejn tkun tistaʼ tantiċipa xi sfidi fejn ikollok tuża l-​arti tal-​persważjoni. Per eżempju, nagħmlu mod li fis-​sessjoni li jmiss taʼ l-​istudju, tqum xi mistoqsija rigward it-​Trinità. Xi ngħidu jekk tkun taf li l-​istudent tiegħek jemmen f’din id-​duttrina? Tistaʼ tagħtih xi pubblikazzjoni li tiddiskuti dak is-​suġġett. Wara li jkun qraha, għandek mnejn issib li hu ġie pperswadut li Alla u Ġesù m’humiex l-​istess. Imma jekk jibqagħlu xi mistoqsijiet, kif tistaʼ tissokta?

Agħti widen sew. Dan se jgħinek tiddetermina x’jemmen diġà l-​istudent tiegħek fuq xi suġġett partikulari. Per eżempju, jekk l-​istudent tiegħek jgħid, “Jien nemmen fit-​Trinità,” tistaʼ mill-​ewwel tibda diskussjoni Skritturali biex turi li din id-​duttrina hija falza. Imma jeżisti diversi twemmin rigward it-​Trinità. Forsi l-​istudent tiegħek jemmen f’xi ħaġa li hija wisq differenti minn kif tiddefinixxiha int id-​duttrina tat-​Trinità. L-​istess ħaġa tgħodd għal twemmin ieħor, bħar-​riinkarnazzjoni, l-​immortalità tar-​ruħ, u s-​salvazzjoni. Mela agħti widen sew qabel ma titkellem. Tassumi xejn dwar x’jemmen l-​istudent tiegħek.—Proverbji 18:13.

Saqsi mistoqsijiet. Dawn jistgħu jinkludu: ‘Minn dejjem kont temmen fit-​Trinità? Qatt għamilt studju bir-​reqqa taʼ x’tgħid il-​Bibbja dwar dan is-​suġġett? Li kieku Alla kien parti minn xi trinità, il-​Kelma tiegħu, il-​Bibbja, ma kinitx se tgħidilna dan b’mod ċar u dirett?’ Int u tgħallem lill-​istudent, ieqaf kultant biex tistaqsih mistoqsijiet bħal dawn: ‘Dak li għaddejna s’issa jagħmel sens għalik?’ ‘Taqbel maʼ din l-​ispjegazzjoni?’ Billi bis-​sengħa ssaqsi l-​mistoqsijiet, int tkun qiegħed tinvolvi lill-​istudent fil-​proċess tat-​tagħlim. Hu m’għandux sempliċement joqgħod jismaʼ lilek tispjega fuq xi suġġett.

Uża raġunar sod. Int u tiddiskuti d-​duttrina tat-​Trinità, per eżempju, tistaʼ tgħid lill-​istudent tiegħek: ‘Meta Ġesù ġie mgħammed, instemaʼ leħen mis-​sema, jgħid: “Inti Ibni l-​għażiż: fik sibt l-​għaxqa tiegħi.” Li kieku Alla kien verament qiegħed jiġi mgħammed hawn fuq l-​art, kien hu se jsemmaʼ leħnu sas-​sema u lura sabiex dak il-​kliem ikun jistaʼ jinstemaʼ fuq l-​art? Ma kienx ikun b’hekk qiegħed iqarraq? Se jagħmel Alla, “li ma jigdibx,” ħaġa qarrieqa bħal din?’—Luqa 3:21, 22; Titu 1:1, 2.

Raġunar sod ippreżentat bit-​tattika huwa taʼ spiss effettiv ġmielu. Ikkunsidra l-​eżempju taʼ waħda mara li se nsejħulha Barbara. Tul ħajjitha, minn dejjem kienet temmen li Ġesù kien Alla u parti minn trinità li tinkludi lill-​ispirtu s-​santu. Imma mbagħad wieħed mix-​Xhieda taʼ Jehovah qalilha li Alla u Ġesù huma żewġ individwi distinti, u wrieha skritturi biex isaħħaħ l-​istqarrija tiegħu.b Barbara ma setgħetx tmieri l-​Bibbja. Fl-​istess ħin, ħassitha frustrata. Wara kollox, hi kienet tgħożżha d-​duttrina tat-​Trinità.

Ix-​Xhud qagħad jirraġuna bil-​paċenzja maʼ Barbara. “Li kieku kont qed tipprova tgħallimni li żewġ persuni huma ugwali,” hu staqsieha, “liema relazzjoni ġewwa l-​familja kont tuża biex iġġib eżempju?” Hi qagħdet taħseb ftit u mbagħad wieġbet: “Forsi nuża żewġt aħwa.” “Eżattament,” weġibha x-​Xhud. “Forsi anki tewmin identiċi. Imma hu u jgħallimna biex inħarsu lejn Alla bħala l-​Missier u lejh bħala l-​Iben, x’messaġġ kien qiegħed jgħaddilna Ġesù?” “Issa qed nifhem,” wieġbet Barbara, b’għajnejha jixegħlu. “Hu qiegħed jiddeskrivi lil wieħed minnhom bħala akbar fiż-​żmien u b’iktar awtorità.”

“Iva,” wieġeb ix-​Xhud, “u s-​semmiegħa Lhud li kellu Ġesù, billi kienu jgħixu f’soċjetà patrijarkali, kienu żgur se jaslu għal dik il-​konklużjoni.” Biex jisħaq il-​punt tiegħu, ix-​Xhud ikkonkluda: “Jekk aħna ħriġna b’eżempju li tant jixraq biex ngħallmu l-​ugwaljanza​—dak taʼ l-​aħwa jew tewmin identiċi—​żgur li Ġesù, l-​Għalliem il-​Kbir, setaʼ jagħmel l-​istess hu wkoll. Minflok, hu uża t-​termini ‘missier’ u ‘iben’ biex jiddeskrivi r-​relazzjoni bejnu u bejn Alla.”

Fl-aħħar Barbara fehmet il-​punt, u aċċettatu. Qalbha kienet intlaħqet bl-​arti tal-​persważjoni.

Nittrattaw l-​Emozzjonijiet

Twemmin reliġjuż li jkun rabba l-​għeruq fil-​fond taʼ spiss jinvolvi element emozzjonali. Ikkunsidra l-​każ t’Edna, Kattolika devota. In-​neputijiet adolexxenti tagħha tawha provi Skritturali ċari li Alla u Ġesù m’humiex l-​istess persuna. Edna fehmet dak li semgħet. Madankollu, hi qalet bil-​ħlewwa imma b’mod sod: “Jien nemmen fit-​Trinità mqaddsa.”

Forsi int kellek xi esperjenza simili. Ħafna nies iqisu dawn id-​duttrini fir-​reliġjon tagħhom daqs li kieku kienu parti mill-​identità tagħhom infushom. Biex tipperswadi lil studenti tal-​Bibbja bħal dawn, hemm bżonn iktar minn loġika xotta jew saħansitra serje taʼ skritturi biex turi li l-​opinjoni taʼ dak li jkun hija waħda żbaljata. Sitwazzjonijiet bħal dawn jistgħu jissolvew billi tibbilanċja l-​arti tal-​persważjoni mal-​mogħdrija. (Qabbel Rumani 12:15; Kolossin 3:12.) M’għandniex xi ngħidu, għalliem effettiv għandu jkollu konvinzjonijiet sodi. Per eżempju, Pawlu uża frażijiet bħal “jiena żgur” u “jiena naf, u minn dan jiena żgur fil-​Mulej Ġesù.” (Rumani 8:38; 14:14) Madankollu, fil-​waqt li nesprimu l-​konvinzjonijiet tagħna, m’għandniex nużaw xi ton dommatiku jew taʼ qdusija, u lanqas m’għandna nkunu sarkastiċi jew degradanti aħna u nippreżentaw veritajiet Bibliċi. Aħna żgur li ma nixtiqux noffendu jew saħansitra ninsultaw lill-​istudent.—Proverbji 12:18.

Ikun ħafna iktar effettiv li tirrispetta t-​twemmin taʼ l-​istudent u tirrikonoxxi li hu għandu dritt jemmen hekk. Iċ-​ċavetta hija l-​umiltà. Għalliem umli ma jħossux li di natura hu superjuri għall-​istudent tiegħu. (Luqa 18:9-14; Filippin 2:3, 4) Il-​persważjoni li togħġob lil Alla tinkludi umiltà li, fil-​fatt, tkun qed tgħid: ‘Jehovah kollu ħniena għeni biex nagħraf dan. Ħa naqsamha miegħek.’

Lil sħabu Kristjani f’Korintu, Pawlu kitbilhom: “L-​armi tagħna għall-​ġlied m’humiex tad-​dinja; iżda għandhom il-​qawwa taʼ Alla biex iġarrfu l-​fortizzi. Aħna nwaqqgħu kull raġunament u kull kburija li tqum kontra l-​għarfien taʼ Alla u njassru kull ħsieb għall-​ubbidjenza lil Kristu.” (2 Korintin 10:4, 5) Illum, ix-​Xhieda taʼ Jehovah qegħdin jużaw il-​Kelma t’Alla biex iwaqqgħu kemm duttrini foloz kif ukoll prattiċi u karatteristiċi li jkunu rabbew l-​għeruq fil-​fond u li ma jogħġbux lil Alla. (1 Korintin 6:9-11) F’li jagħmlu dan, ix-​Xhieda jżommu f’moħħhom li b’imħabba Jehovah wera paċenzja magħhom. Kemm huma ferħanin li għandhom il-​Kelma tiegħu, il-​Bibbja, u li jużaw din l-​għodda qawwija biex jaqilgħu mill-​għeruq it-​tagħlim falz u jilħqu l-​qlub bl-​arti tal-​persważjoni!

[Noti taʼ taħt]

[Kaxxa f’paġna 23]

Kif Tilħaq Qalb l-​Istudent Tiegħek

◻ Itlob għad-​direzzjoni taʼ Jehovah biex tilħaq qalb l-​istudent tiegħek tal-​Bibbja.—Neħemija 2:4, 5; Isaija 50:4.

◻ Agħraf x’jemmen l-​istudent u għala jistaʼ jsib xi twemmin falz attraenti.—Atti 17:22, 23.

◻ B’mod ħelu u bil-​paċenzja, ibni argument loġiku u Skritturali fil-​waqt li żżomm bażi taʼ qbil bejnietkom.—Atti 17:24-34.

◻ Jekk ikun possibbli, saħħaħ il-​veritajiet Bibliċi b’tixbihat effettivi.—Mark 4:33, 34.

◻ Uri lill-​istudent il-​benefiċċji taʼ li jaċċetta għarfien eżatt mill-​Bibbja.—1 Timotju 2:3, 4; 2 Timotju 3:14, 15.