Ġeħova Jħarreġ lir-Rgħajja għall-Merħla Tiegħu
“Il-Mulej jagħti l-għerf, minn fommu ġej it-tagħrif u d-dehen.”—PROVERBJI 2:6.
1, 2. L-irġiel mgħammdin għala jirsistu għal iktar responsabbiltajiet fil-kongregazzjoni?
“META ġejt maħtur bħala anzjan kont verament ferħan,” jgħid Nick, li ilu jaqdi bħala indokratur għal sebaʼ snin. “Qist dan il-privileġġ bħala opportunità biex inkabbar is-servizz tiegħi lil Ġeħova. Ħassejt li kelli nuri gratitudni kbira għal dak kollu li għamel miegħi. Ridt ukoll ngħin lill-membri tal-kongregazzjoni bl-aħjar mod possibbli, li ngħinhom bl-istess mod li anzjani oħrajn għenu lili.” Madankollu, flimkien mal-ferħ kellu wkoll xi ftit tħassib. “Ladarba ma kontx għadni għalaqt it-30 sena meta ġejt maħtur,” ikompli Nick, “kont inkwetat li ma kellix l-abbiltajiet li kien hemm bżonn—id-dehen u l-għerf—biex nirgħa l-kongregazzjoni b’mod effettiv.”
2 L-uħud li Ġeħova jaħtarhom biex jirgħu l-merħla tiegħu għandhom ħafna raġunijiet biex ikunu ferħanin. L-appostlu Pawlu fakkar lill-anzjani t’Efesu dwar raġuni minnhom meta, billi kkwota lil Ġesù, qal: “Hemm iktar hena meta tagħti milli meta tirċievi.” (Atti 20:35) Għall-irġiel mgħammdin, il-fatt li jaqdu bħala qaddejja ministerjali jew bħala anzjani huwa mod ieħor kif jagħtu lil Ġeħova u lill-kongregazzjoni. Per eżempju, il-qaddejja ministerjali jaħdmu flimkien maʼ l-anzjani. Dawn il-qaddejja jieħdu ħsieb ukoll għadd taʼ inkarigi oħrajn li jieħdu ħafna ħin imma li huma neċessarji. Aħwa bħal dawn jiġu mqanqlin mill-imħabba għal Alla u għal għajrhom sabiex jagħtu servizz imprezzabbli.—Marku 12:30, 31.
3. Xi wħud għala għandhom mnejn iżommu lura milli jirsistu għall-privileġġi tal-kongregazzjoni?
3 Xi ngħidu għal raġel Kristjan li għandu mnejn iżomm lura milli jirsisti għall-privileġġ li jkun qaddej u eventwalment anzjan minħabba li ma jħossux kapaċi? Bħal Nick, hu għandu mnejn jinkwieta li m’għandux l-abbiltajiet li hemm bżonn biex ikun ragħaj effettiv. Bħala ħu mgħammed, tinsab int fost dawk li jħossuhom b’dan il-mod? Tħassib bħal dan huwa raġunevoli. Ġeħova jżomm lir-rgħajja maħturin responsabbli għall-mod kif jittrattaw lill-merħla. Ġesù qal: “Kulmin ngħata ħafna, ħafna jintalab mingħandu; u lil min jinkarigawh b’ħafna, jitolbu minnu iktar mis-soltu.”—Luqa 12:48.
4. Ġeħova kif jassisti lil dawk li hu jaħtar biex jieħdu ħsieb in-nagħaġ tiegħu?
4 Jistenna Ġeħova li l-qaddejja u l-anzjani li jaħtar iġorru t-tagħbija miżjuda tagħhom waħedhom? Għall-kuntrarju, hu jipprovdi assistenza prattika li tgħinhom mhux biss biex ikampaw, imma wkoll biex jirnexxu. Kif ġie diskuss fl-artiklu taʼ qabel, Ġeħova jagħtihom l-ispirtu qaddis, li l-frott tiegħu jgħinhom jieħdu ħsieb in-nagħaġ b’tenerezza. (Atti 20:28; Galatin 5:22, 23) Barra minn hekk, Ġeħova jagħtihom l-għerf, l-għarfien, u d-dehen. (Proverbji 2:6) Kif jagħmel dan? Ejja niddiskutu tliet modi li bihom Ġeħova jħarreġ lill-individwi li hu jaħtar biex jieħdu ħsieb in-nagħaġ tiegħu.
Imħarrġin minn Rgħajja taʼ l-Esperjenza
5. Pietru u Ġwanni għala kienu rgħajja effettivi?
5 Meta l-appostli Pietru u Ġwanni ġew quddiem is-Sinedriju, l-imħallfin taʼ dik il-qorti, li mill-ħarsa tad-dinja kienu għorrief, qiesu lil dawn l-irġiel li kien hemm quddiemhom bħala li kienu “komuni u taʼ ftit skola.” Fir-realtà, huma setgħu jaqraw u jiktbu, imma ma kienu rċivew l-ebda taħriġ rabbiniku fl-istudju taʼ l-Iskrittura. Minkejja dan, Pietru u Ġwanni flimkien mad-dixxipli l-oħra taw prova li kienu għalliema effettivi, tant li qanqlu lil ħafna minn dawk li kienu jisimgħuhom biex jibdew jemmnu. Dawn l-irġiel ordinarji kif irnexxielhom isiru għalliema mill-aqwa? Wara li semgħet lil Pietru u lil Ġwanni, il-qorti ‘ntebħet li dawn kienu jkunu maʼ Ġesù.’ (Atti 4:1-4, 13) Veru, huma kienu rċivew l-ispirtu qaddis. (Atti 1:8) Imma kien ukoll ovvju—anki għall-imħallfin li kienu għomja spiritwalment—li Ġesù kien ħarreġ lil dawk l-irġiel. Waqt li kien għadu magħhom fuq l-art, Ġesù għallem lill-appostli mhux biss kif jiġbru lil dawk l-uħud bħal nagħaġ, imma wkoll kif jirgħuhom wara li jsiru parti mill-kongregazzjoni.—Mattew 11:29; 20:24-28; 1 Pietru 5:4.
6. Ġesù u Pawlu liema eżempju taw fit-taħriġ t’oħrajn?
6 Wara li Ġesù ġie rxoxtat, hu kompla jħarreġ lil dawk li kien ħatar bħala rgħajja. (Rivelazzjoni 1:1; 2:1–3:22) Per eżempju, hu għażel personalment lil Pawlu u ħa ħsieb it-taħriġ tiegħu. (Atti 22:6-10) Pawlu apprezza t-taħriġ li ħa u qasam dak li tgħallem m’anzjani oħrajn. (Atti 20:17-35) Per eżempju, hu investa ħafna ħin u enerġija biex iħarreġ lil Timotju sabiex isir “ħaddiem” fis-servizz t’Alla, “li m’għandux minn xiex jistħi.” (2 Timotju 2:15) Bejn dawn iż-żewġt irġiel ifformat rabta mill-qrib. Iktar qabel, Pawlu kiteb dwar Timotju: “Bħal iben maʼ missieru tjassar miegħi biex iġib l-aħbar tajba ’l quddiem.” (Filippin 2:22) Pawlu ma fittixx li jagħmel lil Timotju jew lil xi ħaddieħor dixxiplu tiegħu nnifsu. Minflok, hu inkuraġġixxa lil sħabu fit-twemmin biex ‘jimitaw lilu, bħalma hu imita lil Kristu.’—1 Korintin 11:1.
7, 8. (a) Liema eżempju juri li meta l-anzjani jimitaw lil Ġesù u lil Pawlu jkun hemm riżultati tajbin? (b) L-anzjani meta għandhom jibdew iħarrġu lil uħud li għandhom il-prospett li jsiru qaddejja ministerjali u anzjani?
7 Billi jimitaw lil Ġesù u lil Pawlu, rgħajja taʼ l-esperjenza jieħdu l-inizjattiva biex iħarrġu lill-aħwa rġiel mgħammdin, b’riżultati tajbin simili. Ikkunsidra l-esperjenza taʼ Chad. Hu trabba f’dar maqsuma reliġjożament, imma reċentement inħatar bħala anzjan. Hu jgħid: “Matul is-snin, diversi anzjani taʼ l-esperjenza għenuni nagħmel progress spiritwali. Imma minħabba li missieri ma kienx taʼ l-istess twemmin, dawk l-anzjani wrew interess partikulari fija u saru bħal missirijiet spiritwali għalija. Huma ħadu l-ħin biex iħarrġuni fil-ministeru, u iktar tard, anzjan partikulari ħarriġni biex nieħu ħsieb l-inkarigi tal-kongregazzjoni li rċivejt.”
8 Kif turi l-esperjenza taʼ Chad, rgħajja għaqlin jibdew iħarrġu lil dawk li għandhom il-prospett li jsiru qaddejja ministerjali u anzjani ħafna qabel ma dawn jagħmlu biżżejjed progress biex jikkwalifikaw għal privileġġi bħal dawn. Għala? Minħabba li l-Bibbja tikkmanda li kemm il-qaddejja ministerjali u kemm l-anzjani għandhom jilħqu livell morali u spiritwali għoli qabel ma jinħatru biex jaqdu. L-ewwel huma jridu “jgħaddu minn prova jekk jistħoqqilhomx.”—1 Timotju 3:1-10.
9. Liema responsabbiltà għandhom ir-rgħajja maturi, u għala?
9 Jekk l-aħwa rġiel mgħammdin iridu jgħaddu minn prova, ikun biss xieraq jekk l-ewwel jiġu mħarrġin. Biex nagħtu eżempju: Jekk student fl-iskola jiġi mitlub jagħmel eżami diffiċli li għalih l-għalliema ma jipprovdulu l-ebda taħriġ speċifiku, sejjer l-istudent jgħaddi mill-eżami? Wisq probabbli hu se jfalli. Għalhekk, it-taħriġ huwa bżonnjuż. Madankollu, għalliema diliġenti jħarrġu lill-istudenti mhux biss biex jgħaddu mill-eżami, imma wkoll biex jużaw l-għarfien li jkunu kisbu. B’mod simili, anzjani diliġenti jgħinu lill-aħwa rġiel mgħammdin jikkultivaw kwalitajiet li huma meħtieġa minn raġel maħtur billi jipprovdulhom taħriġ speċifiku. Huma jagħmlu dan mhux biss biex jgħinu lil dawn l-aħwa jinħatru ħalli jaqdu, imma wkoll sabiex jgħinuhom isiru kapaċi jieħdu ħsieb il-merħla b’mod adegwat. (2 Timotju 2:2) M’għandniex xi ngħidu, l-aħwa rġiel mgħammdin iridu jagħtu s-sehem tagħhom u jaħdmu iebes sabiex ikunu jistgħu jilħqu l-kwalifiki li huma meħtieġa minn qaddej ministerjali jew anzjan. (Titu 1:5-9) Minkejja dan, meta jkunu lesti li jħarrġu lil dawk li jkunu qed jirsistu għal iktar responsabbiltajiet fil-kongregazzjoni, ir-rgħajja taʼ l-esperjenza jistgħu jgħinuhom jagħmlu progress iktar mgħaġġel.
10, 11. Ir-rgħajja kif jistgħu jħarrġu lil oħrajn għal iktar privileġġi?
10 Rgħajja taʼ l-esperjenza b’liema modi speċifiċi jistgħu jħarrġu lil oħrajn biex jieħdu ħsieb il-privileġġi tal-kongregazzjoni? L-ewwelnett, billi jieħdu interess fl-aħwa rġiel li hemm fil-kongregazzjoni—billi jaħdmu magħhom regolarment fil-ministeru taʼ l-għalqa u jgħinuhom itejbu l-abbiltà tagħhom sabiex ikunu jistgħu ‘jimmaniġġaw sew il-kelma tal-verità.’ (2 Timotju 2:15) Rgħajja maturi jiddiskutu maʼ dawn l-aħwa rġiel il-ferħ li jiġi meta taqdi lil oħrajn u s-sodisfazzjon li huma nfushom se jħossu meta jagħmlu u jilħqu miri spiritwali. B’qalb tajba, huma wkoll joffru suġġerimenti speċifiċi dwar kif ħu jistaʼ jitjieb biex ‘isir eżempju għall-merħla.’—1 Pietru 5:3, 5.
11 Meta ħu jiġi maħtur bħala qaddej ministerjali, rgħajja għaqlin ikomplu jħarrġuh. Bruce, li qeda bħala anzjan għal għaxriet taʼ snin, jgħid: “Inħobb noqgħod bil-qiegħda maʼ qaddej li jkun għadu kif inħatar u nirrivedi miegħu l-istruzzjonijiet pubblikati mill-ilsir leali u għaqli. Naqraw ukoll linji taʼ gwida li huma konnessi maʼ l-inkarigu speċifiku tiegħu, u mbagħad inħobb naħdem miegħu sakemm ikun familjari maʼ l-inkarigi tiegħu.” Hekk kif qaddej jikseb l-esperjenza, hu jistaʼ wkoll jiġi mħarreġ biex jagħmel xogħol pastorali. “Meta nieħu qaddej ministerjali miegħi fuq xi żjara pastorali,” ikompli Bruce, “ngħinu jagħżel skritturi speċifiċi li jinkuraġġixxu u jimmotivaw lill-individwu jew lill-familja li nkunu se nżuru. Jekk qaddej irid isir ragħaj effettiv, huwa essenzjali li jitgħallem kif juża l-Iskrittura b’tali mod li jmiss il-qalb.”—Ebrej 4:12; 5:14.
12. Rgħajja taʼ l-esperjenza kif jistgħu jħarrġu lil dawk li jkunu għadhom kif inħatru bħala anzjani?
12 Rgħajja li jkunu għadhom kif ġew maħturin ukoll jistgħu jibbenefikaw bil-kbir minn iktar taħriġ. Nick, li ssemma qabel, jgħid: “B’mod partikulari, żewġ indokraturi akbar fl-età tawni taħriġ li kien verament t’għajnuna. Ġeneralment, dawn l-anzjani kienu jifhmu kif ċerti kwistjonijiet għandhom jiġu trattati. Huma dejjem qagħdu jisimgħuni bil-paċenzja u kienu jikkunsidraw bis-serjetà l-opinjoni tiegħi—anki meta ma kinux jaqblu maʼ dak li nkun għedt. Tgħallimt ħafna mill-fatt li qgħadt nosserva l-mod umli u mimli rispett kif jittrattaw maʼ l-aħwa fil-kongregazzjoni. Dawn l-anzjani enfasizzaw il-bżonn li nuża l-Bibbja bis-sengħa meta nittratta l-problemi jew meta nagħti inkuraġġiment.”
Imħarrġin mill-Kelma t’Alla
13. (a) Ħu x’għandu bżonn sabiex ikun ragħaj effettiv? (b) Ġesù għala qal: “Dak li ngħallem m’huwiex tiegħi”?
13 Tabilħaqq, il-Kelma t’Alla, il-Bibbja, fiha liġijiet, prinċipji, u eżempji li ragħaj għandu bżonn sabiex “ikun kapaċi għalkollox, armat bis-sħiħ għal kull għemil tajjeb.” (2 Timotju 3:16, 17) Ħu għandu mnejn ikollu edukazzjoni sekulari tajba, imma l-għarfien taʼ l-Iskrittura u l-mod kif japplikaha se jgħinuh ikun ragħaj effettiv. Ikkunsidra l-eżempju taʼ Ġesù. Hu kien l-iktar wieħed li kellu għarfien, l-iktar wieħed għaqli, u l-iktar ragħaj spiritwali għaref li qatt mexa fuq l-art; madankollu, lanqas hu ma straħ fuq l-għerf tiegħu meta għallem lin-nagħaġ taʼ Ġeħova. Hu qal: “Dak li ngħallem m’huwiex tiegħi, imma taʼ dak li bagħatni.” Ġesù għala ta kredtu lil Missieru tas-sema? Hu spjega: “Min jitkellem minnu nnifsu jfittex il-glorja tiegħu stess.”—Ġwanni 7:16, 18.
14. Ir-rgħajja kif jevitaw li jfittxu l-glorja għalihom infushom?
14 Rgħajja leali jevitaw li jfittxu l-glorja għalihom infushom. Huma jibbażaw il-pariri u l-inkuraġġiment li jagħtu fuq il-Kelma t’Alla u mhux fuq l-għerf tagħhom stess. Huma jifhmu li l-inkarigu taʼ ragħaj huwa li jgħin lin-nagħaġ jiksbu “l-moħħ taʼ Kristu,” u mhux il-moħħ taʼ l-anzjani. (1 Korintin 2:14-16) Per eżempju, xi ngħidu jekk anzjan li kien qed jgħin lil xi koppja tittratta d-diffikultajiet fiż-żwieġ jibbaża l-parir tiegħu fuq l-esperjenza tiegħu stess minflok fuq il-prinċipji Bibliċi u l-informazzjoni li ppubblika “l-ilsir leali u għaqli”? (Mattew 24:45) Il-parir tiegħu għandu mnejn ikun skond l-għarfien limitat tiegħu u influwenzat iżżejjed mid-drawwiet lokali. M’għandniex xi ngħidu, xi drawwiet m’humiex ħżiena fihom infushom, u l-anzjan għandu mnejn ikollu esperjenza fil-ħajja. Imma n-nagħaġ jibbenefikaw l-iktar meta r-rgħajja jinkuraġġuhom biex jisimgħu leħen Ġesù u l-kliem taʼ Ġeħova minflok ma jisimgħu l-ħsibijiet tal-bniedem jew il-prinċipji tad-drawwiet lokali.—Salm 12:7 (12:6, NW); Proverbji 3:5, 6.
Imħarrġin mill-“Ilsir Leali u Għaqli”
15. Ġesù liema inkarigu ta lill-“ilsir leali u għaqli,” u liema hi raġuni waħda għala din il-klassi taʼ l-ilsir kellha suċċess?
15 Rgħajja bħall-appostlu Pietru, Ġwanni, u Pawlu kienu kollha membri tal-grupp li Ġesù ddeskriva bħala l-“ilsir leali u għaqli.” Din il-klassi taʼ l-ilsir hija magħmula minn ħut Ġesù fuq l-art li huma midlukin bl-ispirtu, u li t-tama tagħhom hi li jaħkmu maʼ Kristu fis-sema. (Rivelazzjoni 5:9, 10) Matul dawn l-aħħar jiem taʼ din is-sistema, in-numru taʼ ħut Kristu li fadal fuq l-art naqas, bħalma nafu li kellu jiġri. Madankollu, ix-xogħol li Ġesù inkarigahom biex iwettqu—l-ippridkar taʼ l-aħbar tajba tas-Saltna qabel ma jiġi t-tmiem—issa huwa mifrux iktar minn qatt qabel. Minkejja dan, il-klassi taʼ l-ilsir kellha suċċess kbir! Għala? Sa ċertu punt minħabba li ħarrġet lil xi membri tan-“nagħaġ oħrajn” sabiex ikunu jistgħu jassistuha fix-xogħol taʼ l-ippridkar u tat-tagħlim. (Ġwanni 10:16; Mattew 24:14; 25:40) Illum, l-akbar parti minn dan ix-xogħol qed issir minn dan il-grupp leali.
16. Il-klassi taʼ l-ilsir kif tħarreġ lill-irġiel maħturin?
16 Il-klassi taʼ l-ilsir kif tipprovdi dan it-taħriġ? Fl-ewwel seklu, ir-rappreżentanti tal-klassi taʼ l-ilsir kellhom l-awtorità li jħarrġu u jaħtru indokraturi fil-kongregazzjonijiet, u min-naħa l-oħra, dawn kellhom iħarrġu lin-nagħaġ. (1 Korintin 4:17) L-istess illum. Il-Ġemgħa li Tiggverna—il-grupp żgħir t’anzjani midlukin li jirrappreżenta l-klassi taʼ l-ilsir—tawtorizza rrappreżentanti tagħha sabiex iħarrġu u jaħtru qaddejja u anzjani fl-għaxriet t’eluf taʼ kongregazzjonijiet li hawn madwar id-dinja. Barra minn hekk, il-Ġemgħa li Tiggverna torganizza skejjel sabiex il-membri tal-Kumitat tal-Fergħa, l-indokraturi li jivvjaġġaw, l-anzjani, u l-qaddejja ministerjali jiġu mħarrġin dwar kif inhu l-aħjar mod li bih jieħdu ħsieb in-nagħaġ. Iktar direzzjoni tingħata permezz taʼ ittri, artikli pubblikati fit-Torri taʼ l-Għassa, u permezz taʼ pubblikazzjonijiet oħrajn, bħalma hu l-ktieb Organizzati biex Nagħmlu r-Rieda taʼ Ġeħova.a
17. (a) Ġesù kif wera li għandu fiduċja fil-klassi taʼ l-ilsir? (b) Ir-rgħajja spiritwali kif jistgħu juru li għandhom fiduċja fil-klassi taʼ l-ilsir?
17 Ġesù tant kien fiduċjuż fil-klassi taʼ l-ilsir li hu ħatar lil din il-klassi fuq “kulma għandu”—jiġifieri, l-interessi spiritwali tiegħu kollha fuq l-art. (Mattew 24:47) Ir-rgħajja maħturin jagħtu prova li huma wkoll għandhom fiduċja fil-klassi taʼ l-ilsir billi japplikaw id-direzzjonijiet li jirċievu mill-Ġemgħa li Tiggverna. Iva, meta r-rgħajja jħarrġu lil oħrajn, huma jħallu lilhom infushom jiġu mħarrġin mill-Kelma t’Alla, u meta japplikaw it-taħriġ li tipprovdi l-klassi taʼ l-ilsir, huma jkunu qed jinkuraġġixxu l-għaqda fost il-merħla. Kemm aħna grati li Ġeħova ħarreġ lil irġiel li għandhom interess profond f’kull membru tal-kongregazzjoni Kristjana!
[Nota taʼ taħt]
a Pubblikat mix-Xhieda taʼ Ġeħova.
Int Kif Twieġeb?
• Rgħajja spiritwali maturi kif iħarrġu lil oħrajn?
• Ir-rgħajja għala ma jgħallmux fuq il-bażi tal-ħsibijiet tagħhom?
• Ir-rgħajja kif u għala juru fiduċja fil-klassi taʼ l-ilsir?
[Stampi f’paġna 25]
L-anzjani Kristjani jħarrġu rġiel iżgħar fil-kongregazzjoni
[Stampi f’paġna 26]
“L-ilsir leali u għaqli” jipprovdi taħriġ abbundanti għall-anzjani