Nieħdu Ħsieb l-​Iltiema u r-​Romol fl-​Hemm Tagħhom

M’huwiex diffiċli biex wieħed jirrikonoxxi li qed ngħixu f’dinja mingħajr imħabba. Meta kien qed jirreferi għax-​xorta taʼ nies li jkunu qed jgħixu matul “l-​aħħar tad-​dinja,” l-​appostlu Pawlu kiteb: “Ikun żmien iebes. Il-​bnedmin jingħataw għall-​imħabba tagħhom infushom, . . . bla qalb [‘ma jkollhom ebda affezzjoni naturali, NW].” (2 Timotju 3:​1-3) Kemm hu minnu dan il-​kliem!

L-​AMBJENT morali taʼ żmienna huwa wieħed mir-​raġunijiet għala ħafna nies ma tantx tiġihom ħniena minn oħrajn. In-​nies huma ferm inqas interessati fil-​benesseri t’oħrajn, saħansitra f’xi każi, lanqas f’dak tal-​membri tal-​familja tagħhom stess.

Dan jeffettwa b’mod ħażin lil ħafna wħud li, minħabba diversi ċirkustanzi, jispiċċaw fqar. In-​numru taʼ romol u ltiema qiegħed dejjem jiżdied minħabba l-​gwerer, diżastri naturali, u ċ-​ċaqliq minn post għall-​ieħor tar-​refuġjati. (Koħèlet 3:19) “Iktar minn miljun [tifel u tifla] spiċċaw iltiema jew separati mill-​familji tagħhom minħabba l-​gwerra,” jistqarr rapport mill-​Fond tal-​Ġnus Magħquda għat-​Tfal. Barra minn hekk, hemm ukoll numru kbir t’ommijiet waħedhom, abbandunati, jew divorzjati li għandhom ix-​xogħol diffiċli taʼ li jmexxu ’l quddiem u jrabbu lill-​familji tagħhom mingħajr l-​appoġġ tar-​raġel. Is-​sitwazzjoni qed tkompli tiggrava minħabba l-​fatt li xi pajjiżi qed jiffaċċjaw kriżi ekonomika serja, u dan iwassal biex ħafna miċ-​ċittadini tagħhom jgħixu f’faqar estrem.

Meta nqisu dan kollu, hemm xi raġġ dawl għal dawk li għaddejjin mill-​hemm? Kif tistaʼ tittaffa s-​sofferenza tar-​romol u l-​iltiema? Qatt xi darba se tintemm din il-​problema?

Attenzjoni bl-​Imħabba fi Żminijiet Bibliċi

Li wieħed jieħu ħsieb il-​bżonnijiet fiżiċi u spiritwali tar-​romol u l-​iltiema dejjem kien parti integrali mill-​qima lejn Alla. Meta kienu jaħsdu l-​qamħ jew il-​frott tagħhom, l-​Iżraelin ma kinux jiġbru dak li kien jibqaʼ fl-​għelieqi, jew ilaqqtu wara xulxin. It-​tilqit kellu jitħalla “għall-​barrani u l-​iltim u l-​armla.” (Dewteronomju 24:​19-21) Il-​Liġi taʼ Mosè speċifikat: “La taħqrux l-​armla jew l-​iltim.” (Eżodu 22:​21, 22 [22:​22, 23, NW]) Ir-​romol u l-​iltiema li titkellem dwarhom il-​Bibbja jirrappreżentaw b’mod xieraq lil iktar nies fqar, peress li minħabba l-​mewt tar-​raġel u tal-​missier jew taż-​żewġ ġenituri, il-​membri tal-​familja li jibqgħu ħajjin għandhom mnejn jitħallew waħedhom u fqar. Il-​patrijarka Ġob stqarr: “Kont neħles il-​fqir li jittallab l-​għajnuna, u l-​iltim li ma kellux min jaqbeż għalih.”—Ġob 29:12.

Matul il-​jiem bikrin tal-​kongregazzjoni Kristjana, li wieħed jieħu ħsieb dawk imnikktin u tassew fil-​bżonn minħabba t-​telfa tal-​ġenituri jew tar-​raġel kien fattur distintiv tal-​qima vera. Billi kien jinteressa ruħu ħafna fil-​benesseri taʼ wħud bħal dawn, id-​dixxiplu Ġakbu kiteb: “Quddiem Alla u Missierna t-​tjieba safja u bla tebgħa hija din: iżżur l-​iltiema u r-​romol fl-​hemm tagħhom, u żżomm ruħek bla tinġis ’il bogħod mid-​dinja.”—Ġakbu 1:27.

Minbarra li semma l-​iltiema u r-​romol, Ġakbu wera wkoll interess profond għal oħrajn li kienu fqar u fil-​bżonn ħafna. (Ġakbu 2:​5, 6, 15, 16) L-​appostlu Pawlu wera l-​istess interess. Meta hu u Barnaba ngħataw l-​inkarigu tagħhom taʼ l-​ippridkar, waħda mill-​istruzzjonijiet li rċivew kienet li ‘jibqgħu jiftakru fil-​fqar.’ “Ħaġa li fittixt nagħmilha minn qalbi,” setaʼ jgħid Pawlu b’kuxjenza nadifa. (Galatin 2:​9, 10) Ir-​rakkont taʼ l-​attivitajiet tal-​kongregazzjoni Kristjana ftit wara li ġiet stabbilita nnota: “Ħadd minnhom ma kien jonqsu xejn . . . Mbagħad kien jitqassam kollox skond il-​ħtieġa taʼ kull wieħed.” (Atti 4:​34, 35) Iva, l-​arranġament li ġie stabbilit f’Iżrael tal-​qedem biex jieħdu ħsieb l-​iltiema, ir-​romol, u l-​fqar baqaʼ japplika fil-​kongregazzjoni Kristjana.

M’għandniex xi ngħidu, l-​għajnuna provduta kienet limitata u skond il-​mezzi tal-​kongregazzjonijiet individwali. Ma kinux iberbqu l-​flus bl-​addoċċ, u l-​għajnuna kienet tingħata lil dawk verament fil-​bżonn. L-​ebda Kristjan ma kellu jipprofitta ruħu minn dan l-​arranġament, u ma kellhiex titpoġġa tagħbija żejda fuq il-​kongregazzjoni. Dan kien muri b’mod ċar fl-​istruzzjonijiet taʼ Pawlu deskritti fl-​1 Timotju 5:​3-16. Hemmhekk naraw li jekk il-​qraba taʼ dawk fil-​bżonn setgħu jgħinuhom, kellhom ikunu huma li jerfgħuha din ir-​responsabbiltà. Ir-​romol fil-​bżonn kellhom jilħqu ċerti ħtiġijiet sabiex jikkwalifikaw għall-​għajnuna. Dan kollu jirrifletti l-​arranġament għaqli li Jehovah juża biex jieħu ħsieb dawk fil-​bżonn. Madankollu, dan juri wkoll li għandu jkun hemm bilanċ sabiex ħadd ma jipprofitta ruħu mill-​qalb tajba taʼ dak li jkun.—2 Tessalonikin 3:​10-12.

Nieħdu Ħsieb l-​Iltiema u r-​Romol Illum

Il-​prinċipji li l-​qaddejja t’Alla kienu jimxu fuqhom fil-​passat, rigward li juru interess f’dawk li jinsabu fl-​hemm u jgħinuhom, għadhom qed jiġu applikati fil-​kongregazzjonijiet tax-​Xhieda taʼ Jehovah. L-​imħabba taʼ l-​aħwa hija karatteristika li tispikka, sewwa sew bħalma stqarr Ġesù: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.” (Ġwann 13:35) Meta xi ħadd ikun fil-​bżonn jew jisfa vittma taʼ xi diżastru jew taʼ l-​effetti tal-​gwerra jew xi inkwiet ċivili, il-​bqija tal-​fratellanza internazzjonali tkun ħerqana biex issib modi kif tagħti għajnuna spiritwali u materjali. Ejja naraw xi esperjenzi li ġraw fi żmienna u li juru x’qed isir f’dan ir-​rigward.

Pedro ma tantx jiftakarha lil ommu. Din mietet meta hu kellu biss sena u nofs. Meta Pedro kellu ħames snin, missieru miet ukoll. Għalhekk, Pedro spiċċa waħdu maʼ ħutu. Ix-​Xhieda taʼ Jehovah kienu diġà jmorru għand missieru, u b’hekk Pedro flimkien maʼ ħutu li kienu kollha akbar minnu bdew jagħmlu studju tal-​Bibbja fid-​dar.

Pedro jirrakkonta: “Il-​ġimgħa taʼ wara stess, bdejna nattendu għal-​laqgħat. Hekk kif konna nassoċjaw maʼ l-​aħwa, stajna nħossu l-​imħabba li kienu juru lejna. Il-​kongregazzjoni kienet bħal kenn għalija għax l-​aħwa kienu juruni mħabba u affezzjoni, bħallikieku kienu l-​ġenituri tiegħi.” Pedro jiftakar li wieħed mill-​anzjani Kristjani kien jistiednu d-​dar tiegħu. Hemmhekk Pedro kien jitkellem u jirrilassa maʼ din il-​familja. “Dawn il-​memorji huma għeżież ħafna għalija,” jgħid Pedro, li beda jippriedka dwar it-​twemmin tiegħu fl-​età taʼ 11-il sena u tgħammed meta kellu 15-il sena. Megħjunin minn dawk fil-​kongregazzjoni, ħutu l-​kbar ukoll għamlu ħafna progress b’mod spiritwali.

Hemm ukoll il-​każ taʼ David. Hu u oħtu t-​tewmija ġew abbandunati meta l-​ġenituri tagħhom isseparaw. Rabbewhom in-​nanniet tagħhom u waħda miz-​zijiet. “Meta kbirna u rrealizzajna f’liema sitwazzjoni konna, spiċċajna mimlijin inċertezzi u dwejjaq. Kellna bżonn xi ħaġa fuq xiex nistrieħu għall-​appoġġ. Ziti saret waħda mix-​Xhieda taʼ Jehovah, u grazzi għal dan, ġejna mgħallmin il-​verità tal-​Bibbja. L-​aħwa kienu juruna l-​affezzjoni u l-​ħbiberija tagħhom. Kienu jħobbuna ħafna u inkuraġġewna biex nilħqu miri u nibqgħu naħdmu għal Jehovah. Meta kelli madwar għaxar snin, kien jiġi għalija qaddej ministerjali biex nieħu sehem fil-​ministeru taʼ l-​għalqa. Ħu ieħor kien jieħu ħsieb l-​ispejjeż tiegħi meta nattendi għall-​konvenzjonijiet. Saħansitra kien hemm ħu ieħor li għenni biex inkun nistaʼ nagħti l-​kontribuzzjonijiet fis-​Sala tas-​Saltna.”

David tgħammed meta kellu 17-il sena, u iktar tard beda jaqdi fl-​uffiċċju tal-​fergħa tax-​Xhieda taʼ Jehovah fil-​Messiku. Anki issa hu jistqarr: “Hemm diversi anzjani li għandhom irwol sinifikanti fl-​edukazzjoni tiegħi u jagħtuni pariri siewja. B’dan il-​mod qed negħleb l-​inċertezzi tiegħi u s-​solitudni.”

Abel, anzjan f’kongregazzjoni ġewwa l-​Messiku li fiha hemm diversi romol fil-​bżonn, jirrakkonta: “Jien konvint li l-​akbar bżonn li għandhom ir-​romol hu l-​appoġġ emozzjonali. Xi drabi, jgħaddu minn perijodi taʼ dipressjoni; iħossuhom waħedhom. Għalhekk, huwa verament importanti li nkunu t’appoġġ, li nisimgħuhom. Aħna [l-anzjani tal-​kongregazzjoni] immorru nżuruhom taʼ spiss. Huwa importanti li nieħdu l-​ħin biex nagħtu attenzjoni għall-​problemi tagħhom. Dan jgħinhom iħossuhom imfarrġin spiritwalment.” Madankollu, kultant tkun meħtieġa wkoll l-​għajnuna ekonomika. “Issa qed nibnu dar għal oħt li hi armla,” irrakkonta Abel ftit żmien ilu. “Dan nagħmluh f’xi Sibtijiet u f’xi fil-​għaxijiet matul il-​ġimgħa.”

Dwar l-​esperjenza tiegħu persunali biex jipprovdi l-​għajnuna lill-​iltiema u r-​romol, anzjan ieħor tal-​kongregazzjoni jgħid: “Jien nemmen li l-​iltiema għandhom ferm iktar bżonn taʼ l-​imħabba Kristjana mir-​romol. Innotajt li huma x’aktarx iħossuhom imwarrbin iktar milli jħossuhom tfal u adolexxenti oħrajn li għandhom iż-​żewġ ġenituri. Għandhom bżonn ħafna espressjonijiet t’affezzjoni mill-​aħwa. Huwa tajjeb li wieħed imur fuqhom wara l-​laqgħat biex jara kif inhuma. Hemm ħu miżżewweġ li safa ltim meta kien għadu żgħir ħafna. Jien dejjem immur nifraħ bih fil-​laqgħat, u hu jgħannaqni meta jarani. Dan isaħħaħ ir-​rabta taʼ mħabba vera bejn l-​aħwa.”

Jehovah “Jeħles lill-​Fqir”

Il-​fiduċja f’Jehovah hija fundamentali biex nittrattaw b’suċċess is-​sitwazzjoni tar-​romol u l-​iltiema. Dwar Jehovah jingħad: “Il-​Mulej li jħares lill-​barranin; hu li jżomm lill-​iltim u lill-​armla.” (Salm 146:9) Is-​soluzzjoni sħiħa għal problemi bħal dawn se tiġi biss permezz tas-​Saltna t’Alla taħt il-​ħakma taʼ Ġesù Kristu. Meta kien qed jiddeskrivi profetikament din il-​ħakma mill-​Messija, is-​salmista kiteb: “Hu jeħles lill-​fqir li jsejjaħlu, u lill-​imsejken li m’għandux min jgħinu. Iħenn għad-​dgħajjef u għall-​fqajjar; il-​ħajja tal-​fqajrin isalva.”—Salm 72:​12, 13.

Hekk kif it-​tmiem tas-​sistema preżenti t’affarijiet ikompli joqrob, il-​pressjonijiet li l-​Kristjani b’mod ġenerali jiffaċċjaw żgur li se jiżdiedu. (Mattew 24:​9-13) Kuljum hemm bżonn li l-​Kristjani juru iktar interess f’xulxin u jkollhom “imħabba sħiħa lejn xulxin.” (1 Pietru 4:​7-10) L-​irġiel Kristjani, speċjalment l-​anzjani, għandhom bżonn juru interess u mogħdrija lejn l-​iltiema. U n-​nisa maturi fil-​kongregazzjoni jistgħu joffru ħafna appoġġ lir-​romol u jkunu sors taʼ faraġ. (Titu 2:​3-5) Fil-​fatt, kulħadd jistaʼ jikkontribwixxi billi jieħu interess b’mod attiv f’uħud li jkunu għaddejjin minn xi hemm.

Il-Kristjani veri ma ‘jagħlqux qalbhom’ meta ‘jaraw ’il ħuhom fil-​bżonn.’ Huma konxji ħafna li joqogħdu attenti għat-​twissija taʼ l-​appostlu Ġwanni: “Uliedi, ma nħobbux bil-​kliem u t-​tpaċpiċ, imma bl-​għemil u bis-​sewwa.” (1 Ġwann 3:​17, 18) Mela ejja nieħdu ħsieb “l-​iltiema u r-​romol fl-​hemm tagħhom.”—Ġakbu 1:27.

[Kumment f’paġna 11]

“Ma nħobbux bil-​kliem u t-​tpaċpiċ, imma bl-​għemil u bis-​sewwa.” 1 Ġwann 3:18

[Stampi f’paġna 10]

Il-​Kristjani veri jieħdu ħsieb l-​iltiema u r-​romol materjalment,

spiritwalment,u emozzjonalment