Nibqgħu Ħajjin f’‘Jum Jehovah’

“Jum il-​Mulej hu kbir, tal-​biżaʼ wisq, u min jiflaħ għalih?”—ĠOEL 2:11.

1. Għalkemm “tal-​biżaʼ wisq,” ‘jum Jehovah’ għala għandu jkun okkażjoni taʼ ferħ?

“TAL-​BIŻAʼ wisq”! Ġoel, il-​profeta t’Alla, hekk jiddeskrivih il-​‘jum il-​kbir taʼ Jehovah.’ Madankollu, aħna li nħobbu lil Jehovah u li ġejna għandu b’dedikazzjoni fuq il-​bażi tas-​sagrifiċċju bħala rahan taʼ Ġesù m’għandniex għalfejn nirtogħdu bil-​biżaʼ hekk kif joqrob jum Jehovah. Se jkun tassew jum li jqanqal il-​biżaʼ, imma se jkun ukoll jum taʼ salvazzjoni grandjuża, il-​jum taʼ ħelsien minn sistema taʼ affarijiet mill-​agħar li għakkset lill-​umanità għal eluf taʼ snin. B’antiċipazzjoni għal dak il-​jum, Ġoel jistieden lill-​poplu t’Alla ‘jifraħ u jithenna, għax ħwejjeġ kbar se jagħmel il-​Mulej,’ u jżid b’ċertezza: “Kull min isejjaħ isem il-​Mulej jinħeles.” Imbagħad fl-​arranġament tas-​Saltna t’Alla, “ikun hemm is-​salvazzjoni, kif qal il-​Mulej, u f’Ġerusalemm jibqgħu xi wħud li l-​Mulej isejjaħ.”—Ġoel 2:11, 21, 22; Ġoel 3:5 [Ġoel 2:32, New World Translation].

2. Fit-​twettiq taʼ l-​iskopijiet t’Alla, x’iseħħ (a) f’“jum il-​Mulej” (b) f’‘Jum Jehovah’?

² Dan il-​jum li jkexkex taʼ Jehovah m’għandux jiġi mfixkel maʼ “jum il-​Mulej” imsemmi f’Apokalissi 1:10. Dan taʼ l-​aħħar jinkludi t-​twettiq tas-​16-il viżjoni deskritti f’Apokalissi kapitli 1 sa 22. Jinkludi ż-​żmien tat-​twettiq tal-​ġrajjiet kollha li Ġesù bassar bi tweġiba għall-​mistoqsija tad-​dixxipli tiegħu: “Dan meta għad jiġri? U x’se jkun is-​sinjal tal-​miġja tiegħek u taʼ tmiem id-​dinja?” Il-​preżenza taʼ Ġesù fis-​sema kienet u għadha identifikata fuq l-​art b’affarijiet li jkexkxu bħal ‘gwerer, ġuħ, mibegħda, mard li jittieħed, u ksur tal-​liġi.’ Hekk kif komplew jiżdiedu dawn il-​gwajijiet, Ġesù pprovda faraġ lil bnedmin li jibżgħu minn Alla billi bagħtilhom lid-​dixxipli tiegħu taʼ żmienna jippridkaw “dan l-​Evanġelju tas-​Saltna . . . fid-​dinja kollha, biex il-​ġnus kollha jkollhom xhieda.” Imbagħad, bħala punt kruċjali taʼ jum il-​Mulej, ifaqqaʼ “t-​tmiem” tas-​sistema preżenti taʼ affarijiet, il-​jum li jkexkex taʼ Jehovah. (Mattew 24:3-14; Luqa 21:11) Dak ikun jum Jehovah li fih jesegwixxi ħaqq taʼ malajr fuq id-​dinja korrotta taʼ Satana. “[I]s-smewwiet u l-​art jitriegħdu! Iżda l-​Mulej ikun għall-​poplu tiegħu kenn.”—Ġoel 4:16 [Ġoel 3:16, NW].

Jehovah Jaġixxi fi Żmien Noè

3. Il-​kundizzjonijiet illum kif inhuma l-​istess bħal dawk taʼ żmien Noè?

³ Il-​kundizzjonijiet fid-​dinja llum huma l-​istess bħal dawk taʼ “żmien Noè” ’l fuq minn 4,000 sena ilu. (Luqa 17:26, 27) F’Ġenesi 6:5, naqraw: “[I]l-Mulej ra li l-​ħażen tal-​bnedmin kien kiber fuq l-​art; u f’qalbu ma kienx għajr li jfassal il-​ħażen il-​jum kollu.” Kemm jixbah dan lid-​dinja tal-​lum! Il-​ħażen, ir-​regħba, u n-​nuqqas taʼ mħabba ssibhom kulfejn iddawwar wiċċek. Xi drabi forsi naħsbu li t-​taħsir morali tal-​bniedem laħaq l-​iżjed livell baxx tiegħu. Imma l-​profezija taʼ l-​appostlu Pawlu rigward “l-​aħħar tad-​dinja” qed tibqaʼ titwettaq: “[I]n-nies il-​ħżiena u l-​uċuħ b’oħra jmorru mill-​ħażin għall-​agħar, iqarrqu u jitqarrqu.”—2 Timotju 3:1, 13.

4. Il-​qima falza x’effett kellha fi żminijiet bikrin?

⁴ Setgħet ir-​reliġjon iġġib serħan għall-​umanità fi żmien Noè? Għall-​kuntrarju, reliġjon apostata bħal dik li kienet teżisti dak iż-​żmien kienet se żżidhom iżjed il-​kundizzjonijiet taʼ ħerba. L-​ewwel ġenituri tagħna ċedew għat-​tagħlim falz tas-​“Serp tal-​qedem, li hu msejjaħ id-​Demonju u x-​Xitan.” Fit-​tieni ġenerazzjoni minn Adam “bdew isejjħu isem il-​Mulej,” milli jidher b’mod midgħi. (Apokalissi 12:9; Ġenesi 3:3-6; 4:26) Iktar tard, anġli ribellużi, li ċaħdu li jagħtu lil Alla devozzjoni esklussiva, immaterjalizzaw iġsma umani sabiex ikollhom relazzjonijiet sesswali illeċiti maʼ wlied bniet sbieħ tal-​bnedmin. Dawn in-​nisa welldu ġganti taʼ natura mħallta, imsejħin Nefilim, li kienu jgħakksu u jaħqru lill-​bnedmin. Taħt din l-​influwenza demonika, ‘kull ħliqa ħajja għawġet triqitha fuq l-​art.’—Ġenesi 6:1-12.

5. B’referenza għall-​ġrajjiet taʼ żmien Noè, Ġesù liema twissija taʼ periklu jagħtina?

⁵ Kien hemm familja waħda, però, li żammet l-​integrità lejn Jehovah. Għalhekk, Alla salva lil “Noè, il-​ħabbâr tal-​ġustizzja, u sebgħa min-​nies oħra . . . meta bagħat id-​dulluvju fuq id-​dinja tal-​ħażen.” (2 Pietru 2:5) Dik l-​Għarqa ffigurat bil-​quddiem il-​jum li jkexkex taʼ Jehovah, jum li jimmarka t-​tmiem taʼ din is-​sistema taʼ affarijiet u li dwaru Ġesù pprofetizza: “Dwar dak il-​jum u s-​siegħa ħadd ma jaf xejn la meta se jaslu, la l-​anġli tas-​sema u lanqas l-​Iben; ħadd ħlief il-​Missier waħdu. Bħal fi żmien Noè, hekk tkun il-​miġja taʼ Bin il-​bniedem. Għax kif fiż-​żmien taʼ qabel id-​dilluvju kienu jieklu u jixorbu, jiżżewwġu u jżewwġu sa dakinhar li Noè daħal fl-​arka, u b’xejn ma ntebhu sa ma wasal id-​dilluvju u ġarr lil kulħadd, hekk tkun il-​miġja taʼ Bin il-​bniedem.” (Mattew 24:36-39) Aħna ninsabu f’sitwazzjoni simili llum, u għalhekk Ġesù jwiddibna biex ‘noqogħdu attenti għalina nfusna, u nishru, billi nitolbu l-​ħin kollu ħalli nkunu nifilħu ngħaddu minn kulma għandu jiġri.’—Luqa 21:34-36.

Il-​Kastig Ġudizzjarju taʼ Jehovah fuq Sodoma u Gomorra

6, 7. (a) Il-​ġrajjiet taʼ żmien Lot x’jiffiguraw bil-​quddiem? (b) Dan liema twissija ċara jipprovdilna?

⁶ Ftit mijiet taʼ snin wara d-​Dilluvju, meta d-​dixxendenti taʼ Noè kienu mmoltiplikaw fuq l-​art, ir-​raġel leali Abraham u neputih Lot kienu xhieda li raw b’għajnejhom jum ieħor li jkexkex taʼ Jehovah. Lot u l-​familja tiegħu kienu jgħixu fil-​belt taʼ Sodoma. Flimkien maʼ Gomorra, il-​belt ġirien, din kienet inħakmet minn immoralità sesswali li tqażżek. Il-​materjaliżmu wkoll kien mira ewlenija, li finalment effettwa saħansitra lil mart Lot. Jehovah kien qal lil Abraham: “Hemm l-​għajta qawwija taʼ Sodoma u Gomorra u t-​toqol kbir taʼ dnubhom.” (Ġenesi 18:20) Abraham appella lil Jehovah biex jeħles lil dawk l-​ibliet minħabba wħud twajbin li kien hemm fihom, imma Jehovah ddikjara li ma setaʼ jsib lanqas saħansitra għaxart irġiel twajbin hemmhekk. Anġli mingħand Alla għenu lil Lot u liż-​żewġ uliedu bniet biex jaħarbu lejn il-​belt taʼ Sogħar li kienet qrib.

⁷ Imbagħad x’ġara? Waqt li jqabbel “l-​aħħar jiem” (NW) taʼ żmienna maʼ dawk taʼ żmien Lot, Luqa 17:28-30 jirrapporta: “L-​istess bħalma ġara fi żmien Lot; kienu jieklu, jixorbu, jixtru, ibigħu, iħawwlu, jibnu, imma dak in-​nhar li Lot ħareġ minn Sodoma, Alla bagħat xita taʼ nar u kubrit mis-​sema u qeridhom ilkoll. Hekk ikun il-​Jum li fih jidher Bin il-​bniedem.” Dak li għaddew minnu Sodoma u Gomorra f’dak il-​jum li jkexkex taʼ Jehovah jagħtina twissija ċara f’dan iż-​żmien tal-​preżenza taʼ Ġesù. Il-​ġenerazzjoni moderna taʼ l-​umanità wkoll ‘ingħatat għaż-​żína u ntelqet wara l-​pjaċiri kontra n-​natura.’ (Ġuda 7) Iktar minn hekk, l-​attitudnijiet sesswali immorali taʼ żmienna kienu u għadhom responsabbli għall-​ħafna “mard li jittieħed” imbassar minn Ġesù għal dan iż-​żmien.—Luqa 21:11.

Iżrael Jaħsad ir-​“Riefnu”

8. Iżrael sa liema punt żamm il-​patt maʼ Jehovah?

⁸ Fiż-​żmien xieraq tiegħu, Jehovah għażel lil Iżrael biex ikun ‘il-​wirt speċjali tiegħu minn fost il-​popli kollha’ u “saltna taʼ qassisin u ġens qaddis.” Imma dan kien jiddependi fuq jekk kinux ‘jisimgħu leħnu u jżommu l-​patt tiegħu.’ (Eżodu 19:5, 6) Onorawh huma dan il-​privileġġ grandjuż? Xejn affattu! Veru, kien hemm individwi leali minn dak il-​ġens li qdewh fedelment​—Mosè, Samwel, David, Ġosafat, Ħeżekija, Ġosija, kif ukoll profeti u profetessi devoti. Madankollu, il-​ġens bħala poplu kien żleali. Maż-​żmien, is-​saltna nqasmet fi tnejn​—Iżrael u Ġuda. Fil-​biċċa l-​kbira, iż-​żewġt iġnus inqabdu fin-​nassa tal-​qima pagana u fi drawwiet oħrajn li jġibu diżunur lil Alla u li kienu ħadu minn pajjiżi ġirien.—Eżekjel 23:49.

9. Jehovah kif iġġudikaha lis-​saltna ribelluża taʼ l-​għaxar tribujiet?

⁹ Jehovah kif iġġudikahom l-​affarijiet? Bħal dejjem, ħareġ twissija, fi qbil mal-​prinċipju li nsibu f’Għamos: “Ebda ħaġa ma jagħmel Sidi l-​Mulej, jekk ma jurix il-​ħwejjeġ moħbija tiegħu lill-​qaddejja tiegħu l-​profeti.” Għamos innifsu pproklama niket għas-​saltna tat-​Tramuntana taʼ Iżrael: “L-​għala triduh Jum il-​Mulej? Dlam hu, u mhux dawl.” (Għamos 3:7; 5:18) Jerġaʼ, Ħosegħa, il-​profeta sieħeb Għamos, iddikjara: “Ladarba huma jiżirgħu r-​riħ, għad jaħsdu r-​riefnu.” (Ħosegħa 8:7) Fis-​sena 740 Q.E.K., Jehovah uża l-​armata Assirjana biex teqred lis-​saltna tat-​Tramuntana taʼ Iżrael darba għal dejjem.

Jehovah Jitlob Rendikont Mingħand Ġuda Apostata

10, 11. (a) Jehovah għala ma riedx jaħfirha lil Ġuda? (b) Liema affarijiet mistmerra kienu kkorrompew lill-​ġens?

¹⁰ Jehovah bagħat ukoll lill-​profeti tiegħu għand is-​saltna taʼ Ġuda fin-​Nofsinhar. Xorta waħda, slaten taʼ Ġuda bħal Manassi u s-​suċċessur tiegħu, Amon, baqgħu jagħmlu dak li kien ħażin f’għajnejn Alla, ixerrdu “kotra kbira taʼ demm bla ħtija” u ‘jservu u jqimu allat foloz.’ Għalkemm Ġosija bin Amon għamel is-​sewwa f’għajnejn Jehovah, is-​slaten li ġew warajh, kif ukoll il-​poplu, reġgħu għodsu fil-​ħażen, u b’hekk “il-​Mulej ma riedx jaħfer.”—2 Slaten 21:16-21; 24:3, 4.

¹¹ Jehovah ddikjara permezz tal-​profeta tiegħu Ġeremija: “Ħwejjeġ li jkexkxu u jwerwru ġraw fil-​pajjiż: Il-​profeti jħabbru l-​gideb, u l-​qassisin imexxu skond kapriċċihom, u l-​poplu tiegħi hekk iħobb! X’se tagħmlu meta t-​tmiem jasal?” Il-​ġens taʼ Ġuda kien sar ħati tad-​demm għall-​aħħar, u n-​nies tiegħu kienu saru korrotti permezz taʼ serq, qtil, twettiq taʼ adulterju, ħalf taʼ ġuramenti foloz, mixi wara allat oħrajn, u affarijiet mistmerra oħrajn. It-​tempju t’Alla kien sar “għar tal-​ħallelin.”—Ġeremija 2:34; 5:30, 31; 7:8-12.

12. Jehovah kif issokta jikkastiga lil Ġerusalemm li kienet tatu daharha?

¹² Jehovah ddikjara: “Se nġib il-​ħsara mit-​tramuntana [mill-Kaldea], u qerda kbira.” (Ġeremija 4:6) B’hekk, hu daħħal il-​Qawwa Dinjija Babilonjana, li dak iż-​żmien kienet “il-​martell taʼ l-​art kollha,” biex lil Ġerusalemm li kienet tatu daharha jkissirha bit-​tempju tagħha b’kollox. (Ġeremija 50:23) Fis-​sena 607 Q.E.K., wara assedju aħrax, il-​belt waqgħet taħt l-​id setgħana taʼ Nabukodonosor. “U s-​sultan taʼ Babilonja qatel lil ulied [is-Sultan] Sedekija f’Ribla taħt għajnejh, u qatel ukoll is-​sultan taʼ Babilonja l-​kbarat kollha taʼ Ġuda[.] Mbagħad ’il Sedekija qalagħlu għajnejh, u rabtu bil-​ktajjen biex jieħdu lejn Babilonja. U l-​palazz tas-​sultan u d-​djar tal-​poplu, il-​Kaldin tawhom in-​nar, u s-​swar taʼ Ġerusalemm ġarrfuhom. U l-​bqija tal-​poplu, li kien fadal fil-​belt, u dawk li kienu ċedew, u l-​bqija tal-​poplu li kien fadal, Nebużaradan, kmandant taʼ l-​għases, ħadhom fl-​eżilju f’Babilonja.”—Ġeremija 39:6-9.

13. Min ġie salvat f’jum Jehovah tas-​sena 607 Q.E.K., u għala?

¹³ Jum li tabilħaqq iqanqal il-​biżaʼ! Iżda, xi ftit individwi li obdew lil Jehovah kienu fost dawk li nħelsu minn dak il-​ġudizzju bin-​nar. Fost dawn kien hemm ir-​Rekabin li ma kinux Iżraeliti u li kuntrarju għall-​Ġudeani wrew spirtu umli u ubbidjenti. Ġew salvati wkoll l-​ewnuku leali Għebed-melek, li kien salva lil Ġeremija mill-​mewt f’bir mimli ħama, u Bàruk, l-​iskrib leali taʼ Ġeremija. (Ġeremija 35:18, 19; 38:7-13; 39:15-18; 45:1-5) Kien lil uħud bħal dawn li Jehovah ddikjara: “Jien naf il-​pjanijiet li ħsibt għalikom, . . . pjanijiet taʼ ġid u mhux taʼ ħsara, li nagħtikom ġejjieni mimli tama.” Dik il-​wegħda kellha twettiq żgħir fis-​sena 539 Q.E.K. meta Lhud li kienu jibżgħu minn Alla nħelsu minn Ċiru, il-​konkwistatur taʼ Babilonja, u rritornaw biex jibnu mill-​ġdid il-​belt taʼ Ġerusalemm u t-​tempju tagħha. Dawk li llum joħorġu mir-​reliġjon Babilonjana u jiġu rrestawrati għall-​qima pura taʼ Jehovah jistgħu bl-​istess mod iħarsu ’l quddiem lejn futur glorjuż taʼ paċi eterna fil-​Ġenna restawrata taʼ Jehovah.—Ġeremija 29:11; Salm 37:34; Apokalissi 18:2, 4.

Id-​“Diqa [“Tribulazzjoni,” NW] Kbira” fl-​Ewwel Seklu

14. Jehovah għala ċaħad lil Iżrael għal dejjem?

¹⁴ Ejjew issa mmorru fl-​ewwel seklu E.K. Sa dak iż-​żmien il-​Lhud restawrati kienu għal darb’oħra waqgħu fl-​apostasija. Jehovah bagħat lill-​Iben uniġenitu tiegħu fuq l-​art biex ikun il-​Midluk, jew il-​Messija, tiegħu. Matul is-​snin 29 sa 33 E.K., Ġesù ppriedka maʼ l-​art kollha taʼ Iżrael, billi qal: “Indmu għax is-​Saltna tas-​Smewwiet waslet.” (Mattew 4:17) Iżjed minn hekk, hu ġabar u ħarreġ dixxipli biex jieħdu sehem miegħu f’li jipproklamaw l-​aħbar tajba tas-​Saltna. Kif irreaġixxew il-​ħakkiema tal-​Lhud? Huma infamaw lil Ġesù u finalment ikkommettew delitt faħxi meta tawh mewta agonizzanti fuq zokk tat-​tortura. Jehovah warrab lil-​Lhud milli jkunu l-​poplu tiegħu. Issa ċ-​ċaħda taʼ dak il-​ġens kienet permanenti.

15. Lhud niedma kienu pprivileġġjati li jwettqu liema ħaġa?

¹⁵ F’jum Pentekoste tas-​sena 33 E.K., Ġesù rxoxtat ferraʼ spirtu qaddis, u dan ta l-​qawwa lid-​dixxipli tiegħu biex ikellmu bl-​ilsna lil-​Lhud u l-​proseliti li kienu nġemgħu malajr. Waqt li indirizza l-​folla, l-​appostlu Pietru ddikjara: “Lil dan Ġesù, Alla qajjmu mill-​imwiet, u taʼ dan aħna lkoll x[h]ieda. . . . Mela [ħ]a jkun jaf fiż-​ż[g]ur il-​poplu kollu taʼ Iżrael li lil dan Ġesù, li intom sallabtuh, Alla għamlu Mulej u Messija.” Lhud onesti kif irreaġixxew? “Il-​kliem li semgħu laqtilhom qalbhom,” u għalhekk nidmu minn dnubiethom, u tgħammdu. (Atti 2:32-41) L-​ippridkar tas-​Saltna żdied, u sa 30 sena wara kien twassal “lill-​ħlejjaq kollha taħt is-​smewwiet.”—Kolossin 1:23.

16. Jehovah kif immanuvra l-​ġrajjiet li wasslu biex hu jagħmel ħaqq minn Iżrael naturali?

¹⁶ Issa kien wasal iż-​żmien biex Jehovah jagħmel ħaqq minn Iżrael naturali, il-​poplu miċħud minnu. Eluf kbar taʼ nies, minn ġnus madwar id-​dinja magħrufa taʼ dak iż-​żmien, kienu nġabru fil-​kongregazzjoni Kristjana u kienu ġew midlukin bħala l-​“Iżrael [spiritwali] taʼ Alla.” (Galatin 6:16) Il-​ġens Lhudi taʼ dak iż-​żmien, iżda, kien waqaʼ f’korsa taʼ mibegħda u vjolenza settarja. Kuntrarju għal dak li kiteb Pawlu dwar ‘ubbidjenza lejn l-​awtoritajiet superjuri,’ huma rribellaw fl-​apert kontra l-​qawwa Rumana li kienet taħkem fuqhom. (Rumani 13:1) Jehovah milli jidher immanuvra l-​ġrajjiet li seħħew wara. Fis-​sena 66 E.K., leġjuni Rumani taħt il-​Ġeneral Gallus resqu biex jattakkaw lil Ġerusalemm. Ir-​Rumani fl-​attakk ippenetraw il-​belt sal-​punt li ħaffru mina minn taħt il-​ħajt tat-​tempju. Bħalma hu ddokumentat fl-​istorja taʼ Josefus, kien hemm tassew tribulazzjoni fuq il-​belt u fuq il-​poplu.a Imma f’daqqa waħda s-​suldati li kienu qed jattakkaw bdew jaħarbu. Dan ippermetta lid-​dixxipli taʼ Ġesù ‘jaħarbu lejn il-​muntanji,’ kif kienu ġew imwissijin fil-​profezija tiegħu li nsibu f’Mattew 24:15, 16.

17, 18. (a) Jehovah permezz taʼ liema tribulazzjoni għamel ħaqq mill-​ġens Lhudi? (b) Liema laħam ‘inħeles,’ u dan kien dell taʼ liema ħaġa?

¹⁷ Madankollu, l-​esekuzzjoni sħiħa tal-​ġudizzju taʼ Jehovah fil-​quċċata tat-​tribulazzjoni kienet għadha trid tiġi. Fis-​sena 70 E.K., il-​leġjuni Rumani, issa taħt il-​Ġeneral Titus, irritornaw biex jattakkaw. Din id-​darba l-​battalja kienet deċiżiva! Il-​Lhud, li kienu qed jiggwerraw saħansitra bejniethom, ma kinux iħabbtuha mar-​Rumani. Il-​belt u t-​tempju tagħha saru rmied. Iktar minn miljun Lhudi, li kienu saru għadma u ġilda, sofrew u mietu, u madwar 600,000 katavru ntefgħu ’l barra mill-​bibien tal-​belt. Wara li waqgħet il-​belt, 97,000 Lhudi ttieħdu rsiera, u ħafna minnhom mietu iktar tard fi spettakli gladjatorjali. Verament, l-​uniku laħam li salva matul is-​snin taʼ dik it-​tribulazzjoni kien dak tal-​Kristjani ubbidjenti li kienu ħarbu lejn il-​muntanji lil hinn mill-​Ġordan.—Mattew 24:21, 22; Luqa 21:20-22.

¹⁸ B’hekk, il-​profezija l-​kbira taʼ Ġesù dwar “tmiem id-​dinja” kellha l-​ewwel twettiq tagħha, li laħaq il-​quċċata tiegħu f’jum Jehovah li fih hu għamel ħaqq mill-​ġens Lhudi ribelluż fis-​snin 66-70 E.K. (Mattew 24:3-22) Madankollu, dak kien biss dell tal-​miġja taʼ “Jum il-​Mulej, kbir u tal-​biżaʼ,” it-​tribulazzjoni finali li dalwaqt tiblaʼ lid-​dinja kollha. (Ġoel 3:4 [Ġoel 2:31, NW]) Int kif tistaʼ ‘tinħeles’? L-​artiklu li jmiss jgħidilna.

[Nota taʼ taħt]

Mistoqsijiet Għal Reviżjoni

◻ “Jum il-​Mulej” kif inhu marbut maʼ ‘jum Jehovah’?

◻ Meta nirrevedu żmien Noè, liema twissija għandna nieħdu?

◻ Sodoma u Gomorra kif jipprovdu lezzjoni qawwija?

◻ Min ġie salvat mid-​“diqa kbira” taʼ l-​ewwel seklu?

[Stampi f’paġna 9]

Jehovah pprovda ħelsien għall-​familji taʼ Noè u taʼ Lot, kif ukoll fis-​snin 607 Q.E.K. u 70 E.K.