Kristu Jkellem lill-​Kongregazzjonijiet

“Dan jgħidlek Dak li għandu s-​sebaʼ kwiekeb f’idu l-​leminija.”—APOKALISSI 2:1.

1, 2. Għala għandu jinteressana dak li Kristu qal lil sebaʼ kongregazzjonijiet fl-​Asja Minuri?

ĠESÙ KRISTU, l-​Iben uniġenitu taʼ Jehovah, huwa l-​Kap tal-​kongregazzjoni Kristjana. Sabiex lill-​kongregazzjoni tas-​segwaċi midlukin tiegħu jżommha bla tebgħa, Kristu juża l-​ħatra tiegħu bħala kap biex ifaħħarhom u jikkoreġihom. (Efesin 5:​21-27) Hemm xi eżempji taʼ dan f’Apokalissi kapitli 2 u 3, li fihom insibu l-​messaġġi qawwija u kollha mħabba li Ġesù ta lil sebaʼ kongregazzjonijiet fl-​Asja Minuri.

² Qabel ma semaʼ l-​kliem li Ġesù qal lis-​sebaʼ kongregazzjonijiet, l-​appostlu Ġwanni kellu viżjoni taʼ “jum il-​Mulej.” (Apokalissi 1:10) Dak il-​“jum” beda meta s-​Saltna Messjanika ġiet stabbilita fl-​1914. Għalhekk, dak li Kristu qal lill-​kongregazzjonijiet huwa taʼ importanza vitali f’dawn l-​aħħar jiem. L-​inkuraġġiment u l-​pariri tiegħu jgħinuna nkampaw maʼ dan iż-​żmien iebes.—2 Timotju 3:​1-5.

3. Xi jfissru b’mod simboliku l-​“kwiekeb,” l-​“anġli,” u l-​“kandelabri tad-​deheb” li ra l-​appostlu Ġwanni?

³ Ġwanni ra lil Ġesù Kristu glorifikat, bis-​“sebaʼ kwiekeb f’idu l-​leminija” u “jimxi fost is-​sebaʼ kandelabri tad-​deheb,” jew kongregazzjonijiet. Il-​“kwiekeb” huma l-​“anġli tas-​sebaʼ [“kongregazzjonijiet,” NW].” (Apokalissi 1:20; 2:1) Il-​kwiekeb kultant huma simbolu tal-​ħlejjaq spirti anġeliċi, iżda Kristu ma kienx se juża bniedem biex iniżżel bil-​miktub messaġġ għall-​ħlejjaq spirti. Għalhekk, huwa loġiku li dawn il-​“kwiekeb” jirrappreżentaw lill-​indokraturi midlukin bl-​ispirtu, jew lill-​ġemgħat taʼ l-​anzjani. Il-​kelma “anġli” tirreferi għall-​irwol tagħhom bħala messaġġiera. Minħabba li l-​organizzazzjoni t’Alla kibret, “il-​prokuratur leali” ħatar ukoll irġiel kwalifikati min-​“nagħaġ oħra” taʼ Ġesù biex jaqdu bħala indokraturi.—Luqa 12:​42-44, NW; Ġwann 10:16.

4. L-​anzjani kif jibbenefikaw meta joqogħdu attenti għal dak li Kristu jgħid lill-​kongregazzjonijiet?

⁴ Il-​“kwiekeb” qegħdin fl-​id il-​leminija taʼ Ġesù—taħt il-​qawwa, il-​kontroll, il-​favur, u l-​protezzjoni tiegħu. Għalhekk huma jridu jagħtu kont lilu. Jekk l-​anzjani taʼ llum jagħtu kas taʼ dak li qal lis-​sebaʼ kongregazzjonijiet, huma se jaraw kif jistgħu jkampaw maʼ sitwazzjonijiet simili. M’għandniex xi ngħidu, il-​Kristjani kollha jridu jisimgħu mill-​Iben t’Alla. (Mark 9:7) Allura, x’nistgħu nitgħallmu jekk noqogħdu attenti għal dak li Kristu jgħid lill-​kongregazzjonijiet?

Lill-​Anġlu f’Efesu

5. X’tip taʼ belt kienet Efesu?

⁵ Ġesù faħħar u widdeb lill-​kongregazzjoni f’Efesu. (Aqra Apokalissi 2:​1-7.) It-​tempju enormi taʼ l-​alla mara Artemi kien wieqaf f’dan iċ-​ċentru kummerċjali għani u reliġjuż fil-​kosta tal-​punent taʼ l-​Asja Minuri. Għalkemm Efesu kienet invażata bl-​immoralità, ir-​reliġjon falza, u l-​prattiċi tal-​maġija, Alla bierek il-​ministeru taʼ l-​appostlu Pawlu u oħrajn f’din il-​belt.—Atti, kapitlu 19.

6. Il-​Kristjani leali llum kif huma bħal dawk t’Efesu tal-​qedem?

⁶ Kristu faħħar lill-​kongregazzjoni t’Efesu billi qalilha: “Jiena naf l-​opri tiegħek, u l-​keded li tieħu, u s-​sabar tiegħek, naf li int lill-​ħżiena ma tiflaħx għalihom, u li ġa stħarriġt lil dawk li jriduha taʼ appostli bla ma huma, u sibthom qarrieqa.” Illum, il-​kongregazzjonijiet tas-​segwaċi veri taʼ Ġesù għandhom rapport simili taʼ opri tajbin, xogħol iebes, u sabar. Huma ma jifilħux lill-​aħwa foloz li jriduha t’appostli. (2 Korintin 11:​13, 26) Bħal dawk f’Efesu, il-​Kristjani leali llum ‘ma jifilħux lill-​ħżiena.’ Għalhekk, biex iżommu s-​safa tal-​qima taʼ Jehovah u jipproteġu lill-​kongregazzjoni, huma ma jissiħbux maʼ l-​apostati li ma jindmux.—Galatin 2:​4, 5; 2 Ġwann 8-11.

7, 8. Liema problema serja kellha l-​kongregazzjoni f’Efesu, u aħna kif nistgħu nkampaw f’sitwazzjoni simili?

⁷ Madankollu, il-​Kristjani f’Efesu kellhom problema serja. Ġesù qalilhom: “Imma kontra tiegħek għandi li inti ħallejt dik l-​imħabba li kont urejt fil-​bidu.” Il-​membri tal-​kongregazzjoni kellhom bżonn jerġgħu jkebbsu l-​imħabba li kellhom fil-​bidu għal Jehovah. (Mark 12:​28-30; Efesin 2:4; 5:​1, 2) Anki aħna rridu noqogħdu attenti li ma nitilfux l-​imħabba li kellna għal Alla fil-​bidu. (3 Ġwann 3) Iżda xi ngħidu jekk ix-​xewqa għall-​għana materjali jew il-​ġiri wara l-​pjaċiri qed isiru l-​iktar affarijiet importanti f’ħajjitna? (1 Timotju 4:8; 6:​9, 10) F’dan il-​każ, irridu nitolbu għall-​għajnuna t’Alla biex minflok dawn l-​inklinazzjonijiet niżviluppaw imħabba profonda għal Jehovah u gratitudni għal dak kollu li hu u Ibnu għamlu magħna.—1 Ġwann 4:​10, 16.

⁸ Kristu ħeġġeġ lill-​Efesin: “Mela issa ġib quddiem għajnejk fiex waqajt, indem, u erġaʼ aqbad l-​opri tiegħek tal-​bidu.” X’kien se jiġri jekk ma jagħmlux hekk? Ġesù kompla jgħid: “Għax inkella niġik u nneħħilek il-​kandelabru tiegħek minn postu.” Kieku n-​nagħaġ kollha kellhom jitilfu l-​imħabba li kellhom fil-​bidu, “il-​kandelabru,” jew il-​kongregazzjoni, ma kienx se jibqaʼ jeżisti. Bħala Kristjani żelużi, mela, jalla dejjem naħdmu iebes biex inżommu l-​kongregazzjoni tixgħel spiritwalment.—Mattew 5:​14-16.

9. X’għandha tkun il-​ħarsa tagħna lejn is-​settarjaniżmu?

⁹ L-​Efesin kellhom ħaġa favur tagħhom, dik li kienu jobogħdu “l-​opri [“tas-​setta,” NW] taʼ Nikola.” Minbarra dak li jintqal f’Apokalissi, m’hemm xejn ċert dwar l-​oriġini, il-​prattiċi, u t-​tagħlim taʼ din is-​setta. Madankollu, ladarba Ġesù kkundanna l-​fatt li wieħed isegwi lil xi bniedem, jeħtieġ li nibqgħu nobogħdu s-​settarjaniżmu, bħalma kienu jagħmlu l-​Kristjani f’Efesu.—Mattew 23:10.

10. X’se jgawdu dawk li jagħtu kas x’jgħid l-​ispirtu?

¹⁰ “Min għandu widnejn, ħa jismaʼ xi jgħid l-​Ispirtu [“lill-​kongregazzjonijiet,” NW],” qal Kristu. Meta kien fuq l-​art, Ġesù tkellem taħt l-​influwenza taʼ l-​ispirtu t’Alla. (Isaija 61:1; Luqa 4:​16-21) Għalhekk, għandna noqogħdu attenti għal dak li Alla jgħid issa permezz tiegħu, billi juża l-​ispirtu qaddis. Taħt id-​direzzjoni taʼ l-​ispirtu, Ġesù wiegħed: “Lir-​rebbieħ nagħtih jiekol mis-​siġra tal-​Ħajja li hemm fil-​Ġenna taʼ Alla.” Għall-​midlukin li jagħtu kas x’jgħid l-​ispirtu, dan ifisser immortalità fis-​sema “fil-​Ġenna taʼ Alla,” jew fil-​preżenza taʼ Jehovah innifsu. Dawk tal-​“kotra kbira,” li wkoll jisimgħu dak li jgħid l-​ispirtu, se jgawdu ġenna taʼ l-​art fejn se jixorbu mix-​“xmara taʼ l-​ilma tal-​Ħajja” u se jsibu l-​fejqan mill-​“weraq tas-​siġra” li hemm maġenbha.—Apokalissi 7:9; 22:​1, 2; Luqa 23:43.

11. Kif nistgħu ninkuraġġixxu l-​imħabba għal Jehovah?

¹¹ L-​Efesin kienu tilfu l-​imħabba li kellhom fil-​bidu, imma xi ngħidu jekk qed tiżviluppa sitwazzjoni simili f’xi kongregazzjoni llum? Ejja b’mod individwali ninkuraġġixxu l-​imħabba għal Jehovah billi nitkellmu dwar il-​mod kif jaġixxi bl-​imħabba. Nistgħu nesprimu l-​gratitudni tagħna għall-​imħabba li Alla wera magħna meta pprovda l-​fidwa permezz taʼ Ibnu l-​għażiż. (Ġwann 3:16; Rumani 5:8) Meta jkun xieraq, nistgħu nsemmu l-​imħabba t’Alla fil-​kummenti tagħna u meta jkollna xi parti fil-​laqgħat. Nistgħu nuru l-​imħabba tagħna għal Jehovah billi nfaħħru ’l ismu fil-​ministeru Kristjan. (Salm 145:​10-13) Iva, il-​kliem u l-​azzjonijiet tagħna jistgħu jgħinu ħafna biex inkebbsu jew insaħħu l-​imħabba li l-​kongregazzjoni kellha fil-​bidu.

Lill-​Anġlu fi Żmirna

12. X’turina l-​istorja dwar Żmirna u l-​prattiċi reliġjużi li kienu jsiru fiha?

¹² Il-​kongregazzjoni fi Żmirna ġiet imfaħħra minn Kristu, “Dak li hu l-​Ewwel u l-​Aħħar, li kien mejjet u raġaʼ ħaj” permezz taʼ l-​irxoxt. (Aqra Apokalissi 2:​8-11.) Żmirna (issa Izmir, fit-​Turkija) kienet mibnija fil-​kosta tal-​punent fl-​Asja Minuri. Il-​Griegi waqqfu l-​belt, iżda n-​nies taʼ Lidja qerduha madwar is-​sena 580 Q.E.K. Is-​suċċessuri t’Alessandru l-​Kbir reġgħu bnew lil Żmirna fi nħawi ġodda. Din saret parti mill-​provinċja Rumana taʼ l-​Asja u kellha suċċess bħala ċentru kummerċjali li kien magħruf għall-​bini pubbliku mill-​aqwa li fih. Minħabba t-​tempju taʼ Tiberju Ċesari din saret ċentru għall-​qima taʼ l-​imperatur. L-​aduraturi kellhom jaħarqu nitfa inċens u jgħidu “Ċesari hu l-​Mulej.” Il-​Kristjani ma setgħux jagħmlu bħalhom għax għalihom “Ġesù hu l-​Mulej.” Minħabba f’hekk, kellhom ibatu t-​tribulazzjoni.—Rumani 10:9.

13. Għalkemm kienu foqra materjalment, il-​Kristjani fi Żmirna b’liema mod kienu għonja?

¹³ Minbarra t-​tribulazzjoni, il-​Kristjani fi Żmirna ssaportew il-​faqar, forsi wkoll batew minħabba restrizzjonijiet ekonomiċi għax ma ridux iqimu lill-​imperatur. Il-​qaddejja taʼ Jehovah taʼ llum m’humiex meħlusin minn provi bħal dawn. (Apokalissi 13:​16, 17) Għalkemm foqra materjalment, dawk li huma bħall-​Kristjani fi Żmirna huma għonja spiritwalment, u din hi l-​iktar ħaġa importanti!—Proverbji 10:22; 3 Ġwann 2.

14, 15. Liema faraġ jistgħu jiksbu l-​midlukin minn Apokalissi 2:10?

¹⁴ Ħafna mil-​Lhud fi Żmirna kienu “sinagoga tax-​Xitan” għaliex żammew maʼ tradizzjonijiet mhux skritturali, ċaħdu lill-​Iben t’Alla, u żebilħu lis-​segwaċi tiegħu li kienu midlukin bl-​ispirtu. (Rumani 2:​28, 29) Imma kemm faraġ jistgħu jiksbu l-​midlukin mill-​kliem li jmiss taʼ Ġesù! Hu jgħid: “Tibżax minn dak li se jkollok issofri; ara, id-​Demonju se jixħet ’il xi wħud minnkom fil-​ħabs biex iġarrabkom, u intom tgħaddu minn għaxart ijiem taʼ taħbit. Ibqaʼ fidil sal-​mewt, u jien nagħtik il-​kuruna tal-​ħajja.”—Apokalissi 2:10.

¹⁵ Ġesù ma beżax mill-​mewt għax appoġġa s-​sovranità taʼ Jehovah. (Filippin 2:​5-8) Għalkemm issa Satana qed jagħmel gwerra kontra l-​fdal midluk, dawn ma jibżgħux mill-​affarijiet li jkollhom isofru bħala grupp—tribulazzjoni, ħabs, jew mewt vjolenti. (Apokalissi 12:17) Huma se joħorġu rebbiħin fuq id-​dinja. U minflok xi girlanda tal-​fjuri li tispiċċa fix-​xejn, li kienet tintlibes bħala kuruna mir-​rebbieħa fil-​logħob pagan, Kristu jwiegħed lill-​midlukin li jiġu rxoxtati “l-​kuruna tal-​ħajja” bħala ħlejjaq immortali fis-​sema. X’għotja imprezzabbli!

16. Jekk nagħmlu parti minn kongregazzjoni bħal dik taʼ Żmirna tal-​qedem, fuq liema kwistjoni għandna niffokaw l-​attenzjoni tagħna?

¹⁶ Xi ngħidu jekk aħna, kemm jekk it-​tama tagħna hija għas-​sema u kemm jekk għall-​art, nagħmlu parti minn kongregazzjoni bħal dik taʼ Żmirna tal-​qedem? F’dan il-​każ, ejja ngħinu lill-​aduraturi sħabna biex jiffokaw fuq ir-​raġuni ewlenija għala Alla jippermetti l-​persekuzzjoni—il-​kwistjoni tas-​sovranità universali. Kull Xhud taʼ Jehovah li jżomm l-​integrità jkun qed igiddeb lil Satana u juri li anki bniedem persegwitat jistaʼ jappoġġa bla ma jitħarrek id-​dritt t’Alla li jaħkem bħala s-​Sovran Universali. (Proverbji 27:11) Ejja ninkuraġġixxu lil Kristjani oħrajn biex jissaportu l-​persekuzzjoni u b’hekk jibqaʼ jkollna l-​privileġġ li ‘naqdu [lil Jehovah] bla biżaʼ, bil-​[“lealtà,” NW] u l-​qdusija quddiemu ħajjitna kollha’—saħansitra għal dejjem.—Luqa 1:​68, 69, 74, 75.

Lill-​Anġlu f’Pergamu

17, 18. Pergamu kienet iċ-​ċentru taʼ liema xorta taʼ qima, u x’setaʼ jiġri lil min kien jirrifjuta li jieħu sehem f’idolatrija bħal din?

¹⁷ Il-​kongregazzjoni taʼ Pergamu ġiet kemm imfaħħra kif ukoll koreġuta. (Aqra Apokalissi 2:​12-17.) Pergamu, belt li tinsab xi 80 kilometru lejn it-​tramuntana taʼ Żmirna, kienet invażata bir-​reliġjon pagana. Milli jidher, xi astroloġi Kaldin kienu ħarbu lejn dan il-​post minn Babilonja. Il-​morda kienu jmorru bi ħġarhom lejn Pergamu, fit-​tempju magħruf t’Asklepju, alla falz tal-​fejqan u l-​mediċina. Pergamu, bit-​tempju li kellha dedikat għall-​qima taʼ Ċesari Awgustu, ġiet imsejħa “ċ-​ċentru ewlieni tal-​qima taʼ l-​imperaturi fiż-​żmien taʼ l-​imperu tal-​bidu.”—Encyclopædia Britannica, 1959, Volum 17, paġna 507.

¹⁸ F’Pergamu kien hemm artal dedikat lil Żews. Il-​belt kienet ukoll ċentru taʼ qima t’allat bnedmin ispirata mix-​Xjaten. Mhux taʼ b’xejn li ntqal li l-​kongregazzjoni taʼ dan il-​post kienet tinsab “fejn hemm it-​tron tax-​Xitan”! Jekk aduratur li jappoġġa s-​sovranità taʼ Jehovah kien jirrifjuta li jagħti qima lill-​imperatur, dan setaʼ jingħata l-​mewt. Id-​dinja għadha taħt il-​qawwa tax-​Xitan, u issa s-​simboli nazzjonali qed jiġu meqjumin. (1 Ġwann 5:19) Mill-​ewwel seklu sa llum, ħafna Kristjani leali nqatlu bħala martri, bħal dak il-​wieħed li Ġesù sejjaħlu “Antipa, ix-​xhud fidil tiegħi, [li] qatluh hemm fostkom.” Alla Jehovah u Ġesù Kristu żgur li jiftakru lil qaddejja leali bħal dawn.—1 Ġwann 5:21.

19. Bagħlam x’għamel, u l-​Kristjani għalxiex iridu joqogħdu għassa?

¹⁹ Kristu tkellem ukoll dwar it-​“tagħlim taʼ Bagħlam.” Minħabba r-​regħba li kellu biex jikseb affarijiet materjali, il-​profeta falz Bagħlam ipprova jisħet lil Iżrael. Meta Alla bidel is-​saħta tiegħu f’barka, Bagħlam ħadem mas-​Sultan Balak taʼ Mowab u ħajjar lil ħafna Iżraelin għall-​idolatrija u l-​immoralità sesswali. L-​anzjani Kristjani jridu jkunu sodi għall-​ġustizzja daqskemm kien Fineħas, li aġixxa kontra l-​għemejjel taʼ Bagħlam. (Numri 22:​1–25:15; 2 Pietru 2:15:16; Ġuda 11) Fil-​fatt, il-​Kristjani kollha jridu joqogħdu għassa għall-​idolatrija u biex l-​immoralità sesswali ma tidħolx fil-​kongregazzjoni.—Ġuda 3, 4.

20. Jekk xi Kristjan qed jibda jadotta ideat apostati, x’għandu jagħmel?

²⁰ Il-​kongregazzjoni f’Pergamu kienet f’periklu kbir għaliex ippermettiet li f’nofsha jkun hemm “min qiegħed iżomm it-​tagħlim [“tas-​setta,” NW] taʼ Nikola.” Kristu qal lill-​kongregazzjoni: “Indem; inkella niġi bla telf taʼ żmien, u naħbat għalihom bix-​xabla taʼ fommi.” Dawk li jagħmlu parti minn xi setta jridu jagħmlu ħsara spiritwali lill-​Kristjani, u dawk li huma determinati li jinkuraġġixxu l-​firdiet u s-​setet m’humiex se jirtu s-​Saltna t’Alla. (Rumani 16:​17, 18; 1 Korintin 1:10; Galatin 5:​19-21) Jekk xi Kristjan qed jibda jadotta ideat apostati u jrid ixerridhom, hu għandu jieħu t-​twissija taʼ Kristu! Biex ma jispiċċax f’diżastru, għandu jindem u jfittex l-​għajnuna spiritwali taʼ l-​anzjani tal-​kongregazzjoni. (Ġakbu 5:​13-18) Huwa importanti li jaġixxi mill-​ewwel, għax Ġesù ġej malajr biex jagħmel ħaqq.

21, 22. Min jieħu sehem “mill-​manna l-​moħbija,” u din x’tissimbolizza?

²¹ Kristjani midlukin leali u sħabhom li huma leali wkoll m’għandhomx għalfejn jibżgħu mill-​ġudizzju li ġej. Hemm barkiet kbar lesti għal dawk kollha li jagħtu kas il-​parir li Ġesù ta bid-​direzzjoni taʼ l-​ispirtu qaddis t’Alla. Per eżempju, il-​midlukin li se joħorġu rebbiħin fuq id-​dinja se jiġu mistiedna biex jieklu ftit “mill-​manna l-​moħbija,” u se jingħataw “ċagħka bajda,” li fuqha hemm “isem ġdid.”

²² Alla pprovda l-​manna biex imantni lill-​Iżraelin matul l-​40 sena li għamlu jiġġerrew fid-​deżert. Ftit minn dan “l-​ikel,” jew il-​manna, kien jinżamm f’bieqja tad-​deheb fl-​arka tal-​patt u b’dan il-​mod kien ikun moħbi fil-​Post il-​Qaddis tat-​tabernaklu, fejn kien hemm dawl mirakoluż li jissimbolizza l-​preżenza taʼ Jehovah. (Eżodu 16:​14, 15, 23, 26, 33; 26:34; Lhud 9:​3, 4) Ħadd ma kellu l-​permess li jiekol minn din il-​manna l-​moħbija. B’danakollu, meta s-​segwaċi midlukin taʼ Ġesù jiġu rxoxtati huma jsiru immortali, u dan hu simbolizzat mill-​fatt li jieklu “mill-​manna l-​moħbija.”—1 Korintin 15:​53-57.

23. Xi jfissru ċ-​“ċagħka l-​bajda” u “l-​isem il-​ġdid”?

²³ Fil-​qrati Rumani, ċagħqa sewda kienet tfisser kundanna waqt li waħda bajda kienet tfisser ħelsien mill-​akkużi. Il-​fatt li Ġesù jagħti “ċagħka bajda” lill-​Kristjani midlukin li joħorġu rebbiħin jindika li hu jarahom bħala li huma innoċenti, safja, u nodfa. Peress li r-​Rumani kienu wkoll jużaw iċ-​ċagħaq bħala biljett biex jidħlu jaraw ġrajjiet importanti, iċ-​“ċagħka bajda” għandha mnejn tindika li l-​wieħed midluk jiddaħħal u jingħata post fis-​sema fiż-​żwieġ tal-​Ħaruf. (Apokalissi 19:​7-9) Jidher ċar li l-​“isem ġdid” ifisser il-​privileġġ taʼ li jkunu magħqudin maʼ Ġesù bħala werrieta sħabu fis-​Saltna tas-​sema. Kemm huwa taʼ inkuraġġiment dan għall-​midlukin u għal sħabhom fis-​servizz taʼ Jehovah li jittamaw li jgħixu f’ġenna fuq l-​art!

24. X’pożizzjoni għandna nieħdu fejn tidħol lapostasija?

²⁴ Huwa għaqli li niftakru li l-​kongregazzjoni taʼ Pergamu kienet fil-​periklu minħabba l-​apostati. Jekk xi sitwazzjoni simili thedded is-​saħħa tal-​kongregazzjoni li aħna nagħmlu parti minnha, ejja niċħdu għalkollox l-​apostasija u nibqgħu mexjin fil-​verità. (Ġwann 8:​32, 44; 3 Ġwann 4) Peress li għalliema foloz jew individwi miġbudin lejn l-​apostasija jistgħu jikkorrompu kongregazzjoni sħiħa, irridu nżommu waqfa soda kontra l-​apostasija, billi qatt ma nħallu li persważjoni malizzjuża ttellifna milli nobdu l-​verità.—Galatin 5:​7-12; 2 Ġwann 8-11.

25. Fl-​artiklu li jmiss, se jiġu diskussi l-​messaġġi taʼ Kristu lil liema kongregazzjonijiet?

²⁵ Kemm iġagħlek taħseb il-​kliem li għadna kif ikkunsidrajna li Ġesù glorifikat qal biex ifaħħar u jikkoreġi s-​sebaʼ kongregazzjonijiet fl-​Asja Minuri! Madankollu, immexxi mill-​ispirtu qaddis hu għad għandu ħafna x’jgħid lill-​erbaʼ kongregazzjonijiet li baqaʼ. Dawn il-​messaġġi, diretti lil Tjatira, Sardi, Filadelfja, u Laodiċija, se jiġu diskussi fl-​artiklu li jmiss.

Int Kif Twieġeb?

• Għala għandna noqogħdu attenti għal dak li Kristu għandu x’jgħid lill-​kongregazzjonijiet?

• Kif nistgħu ngħinu biex nerġgħu nkebbsu l-​imħabba li jkollha kongregazzjoni fil-​bidu?

• Għala nistgħu ngħidu li l-​Kristjani foqra materjalment fi Żmirna tal-​qedem kienu verament għonja?

• Meta nimmeditaw fuq is-​sitwazzjoni tal-​kongregazzjoni f’Pergamu, kif għandna nħarsu lejn l-​ideat apostati?

[Mappa f’paġna 10]

IL-​GREĊJA

L-​ASJA MINURI

Efesu

Żmirna

Pergamu

Tjatira

Sardi

Filadelfja

Laodiċija

[Stampa f’paġna 12]

Il-​“kotra kbira” se tgawdi ġenna fuq l-​art

[Stampi f’paġna 13]

Il-​Kristjani persegwitati ħarġu rebbieħa fuq id-​dinja