Dinja Ġdida Hi fil-​Qrib!

KAPIJIET taʼ stati qalu ħafna dwar ordni dinjija ġdida li huma se jagħmlu. Huma jitkellmu dwar kif se jeħilsu lid-​dinja mill-​biżaʼ u t-​tfixkil taʼ kooperazzjoni bejn popli u stati. Imma se jkun il-​bniedem li jġib dinja ġdida?

L-umanità kellha sekli sħaħ biex tistabbilixxi dinja taʼ paċi u sigurtà. Bla dubju, ħafna kienu sinċieri ferm fi sforzi bħal dawn. Kienet x’kienet l-​istruttura taʼ gvernijiet maħluqin mill-​bnedmin biex iwettqu oġġettivi bħal dawn, madankollu, il-​kelmiet tal-​Bibbja taw prova li kienu veri: “Ma jappartjenix lill-​bniedem li miexi saħansitra li jidderieġi l-​pass tiegħu.”−Ġeremija 10:23.

Dinja Ġdida Mwiegħda

Sadattant, l-​istess Kelma spirata t’Alla tipprovdi assigurazzjoni li se jkun hemm dinja ġdida. Wara li bassar it-​tmiem taʼ sistema taʼ affarijiet qadima, l-​appostlu Kristjan Pietru ddikjara: “Hemm smewwiet ġodda u art ġdida li aħna qegħdin nistennew skond il-​wegħda tiegħu, u f’dawn it-​tjieba għandha tgħammar.”−2 Pietru 3:10-13.

Taʼ min hi din il-​wegħda? Hija mogħtija minn ħadd ħlief Jehovah, “l-​Iktar Għoli fuq l-​art kollha.” (Salm 83:18) Hu se jwettaq dak li ma jistax iwettaq il-​bniedem. Iva, Alla Jehovah se jġib dinja ġdida. Imma meta?

Dinja Ġdida Qrib Ferm!

Qabel ma d-​dinja ġdida mwiegħda t’Alla ssir realtà fuq skala sħiħa, id-​“dinja” preżenti, jew “sistema taʼ affarijiet,” trid tiġi fit-​tmiem. Dwar dan, id-​dixxipli taʼ Ġesù Kristu staqsew: “Għidilna, meta se jkunu dawn l-​affarijiet? u x’se jkun is-​sinjal tal-​miġja tiegħek, u tat-​tmiem tad-​dinja?” (Mattew 24:3, King James Version) Bhalma tpoġġiha b’iktar eżattezza n-​New World Translation, is-​segwaċi taʼ Ġesù staqsew: “Għidilna, Meta se jkunu dawn l-​affarijiet, u x’se jkun is-​sinjal tal-​preżenza tiegħek u tal-​konklużjoni tas-​sistema taʼ affarijiet?”

Bi tweġiba, Ġesù bassar ħafna fatturi tas-​sinjal tal-​preżenza inviżibbli tiegħu bħala personaġġ spirtu fil-​qawwa tas-​Saltna. (1 Pietru 3:18) Per eżempju, hu qal: “Ġens se jqum kontra ġens u saltna kontra saltna, u se jkun hemm nuqqas taʼ ikel u terremoti f’post wara l-​ieħor.” Minn “bidu taʼ weġgħat taʼ hemm” fl-​1914, “din il-​ġenerazzjoni” li Ġesù alluda għaliha esperjenzat gwerar li ma qatgħu xejn, nuqqas taʼ ikel, u terremoti bħala parti mis-​sinjal tal-​preżenza inviżibbli tiegħu.​—Mattew 24:​7, 8, 34.

Il-gwerar inkwetaw lil din il-​ġenerazzjoni bħal qatt qabel mis-​sena 1914 ’il hawn. L-​Ewwel Gwerra Dinjija huwa stmat li swiet 14-il miljun ħajja. Matul it-​Tieni Gwerra Dinjija, 55 miljun persuna li jikkumbattu u ċivili kienu maqtulin. Ħeqq, mill-​1914 ’il hawn ’il fuq minn 100 miljun ruħ ġew maqtulin fi gwerra! Ċertament, dan jimmarka parti mis-​sinjal tal-​preżenza taʼ Ġesù.

Nuqqas taʼ ikel, ukoll imbassar minn Kristu, ikkaġuna ħsarat kbar f’ħafna pajjiżi wara kull waħda miż-​żewġ gwerar dinjin. Minkejja l-​avvanzi tax-​xjenza, kważi kwart tal-​art jinsab bil-​ġuħ illum. Kull sena, miljuni taʼ tfal u oħrajn imutu minħabba n-​nuqqas taʼ nutriment. Tgħid The World Book Encyclopedia: “Il-​biċċa l-​kbira tal-​pajjiżi li qed jiżżviluppaw tal-​Afrika, l-​Asja, u l-​Amerka Latina bilkemm għandhom ikel biżżejjed għan-​nies tagħhom. Miljuni f’dawn il-​pajjiżi jispiċċaw bil-​ġuħ. Meta l-​produzzjoni tal-​ikel jew l-​ikel impurtat jonqsu għal xi raġuni jew oħra, jistaʼ jkun hemm il-​ġuħ u eluf jew miljuni taʼ nies jistgħu jmutu.”

Terremoti ħasdu ħafna ħajjiet matul din il-​ġenerazzjoni li qed timmarka “ż-​żmien tat-​tmiem.” (Danjel 12:4) Stimi taʼ dawk li ntlaqtu bit-​terremoti jvarjaw. Imma mill-​1914 ’il hawn il-​qerda permezz tat-​terremoti żdiedet mal-​art kollha, u dawn swew mijiet taʼ eluf taʼ ħajjiet. Billi kkummentat fuq tnejn minn dawn, il-​Yorkshire Post tad-​19 ttottubru, 1989, stqarret: “Fl-​1920 terremot fil-​provinċja Ċiniża taʼ Ġiangsu qatel 180,000, u fit-​28 taʼ Lulju, 1976 iċ-​Ċina sofriet l-​agħar terremot fl-​istorja moderna tagħha. Tal-​inqas 240,000 mietu meta l-​belt taʼ Tangshan li tinsab fil-​Grigal kienet kważi mġarrfa kompletament minn terremot li ġie mkejjel 7.8 fuq l-​iskala Richter.” Il-​gazzetta tat lista taʼ iktar minn 30 terremoti kbar oħra fis-​seklu 20.

L-attività tal-​ippridkar tas-​Saltna kienet ukoll imbassra bħala wieħed mill-​fatturi tas-​sinjal tal-​preżenza inviżibbli taʼ Ġesù. Hu qal lid-​dixxipli li staqsewh: “Din l-​aħbar tajba tas-​saltna se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.” (Mattew 24:14) Kif ipprofetizza Ġesù, dan ix-​xogħol taʼ ppridkar qed jiġi mwettaq issa mal-​art kollha f’212-il art minn iktar minn 4,000,000 Xhieda taʼ Jehovah.

It-twettieq tal-​ġurnata tal-​lum taʼ dawn il-​profeziji u taʼ profeziji oħrajn jagħti prova li aħna tabilħaqq qed ingħixu fl-​“aħħar jiem.” (2 Timotew 3:1-5) Eżatt quddiemna hemm it-​“tribulazzjoni kbira” li wkoll ġiet imbassra minn Ġesù Kristu. Billi tilħaq il-​quċċata fil-​“gwerra tal-​jum il-​kbir t’Alla li Jistaʼ Kollox” f’Har–​Magedon, hi se ġġib tmiem fuq is-​sistema taʼ affarijiet mill-​agħar preżenti. (Mattew 24:21; Rivelazzjoni 16:​14-16) Imbagħad id-​dinja ġdida mwiegħda t’Alla se ssir realtà.a

Barkiet li l-​Bnedmin ma Jistgħux Iġibu

Kapijiet taʼ stati ftaħru dwar ordni dinjija ġdida li għamlu huma stess. Imma Jehovah, dak Alla tas-​sema u tal-​art, qatt ma staqsa lill-​bnedmin biex jissostitwixxu s-​sistema preżenti b’dinja ġdida. Hu nnifsu se jagħmel dan fil-​jum u s-​siegħa li hu biss jaf. (Mattew 24:​34, 36) Ix-​xwejjaħ appostlu Ġwanni kellu din il-​ħarsa bil-​quddiem taʼ dak li Alla, mhux il-​bniedem, se jagħmel:

“Jien rajt sema ġdid u art ġdida; għax is-​sema taʼ qabel u l-​art taʼ qabel kienu għaddew u l-​baħar ma għadux iktar. Jien rajt ukoll il-​belt qaddisa, Ġerusalemm Ġdida, nieżla mis-​sema mingħand Alla u mħejjija bħal għarusa mżejna għal żewgħa. Maʼ dak smajt leħen qawwi mit-​tron igħid: ‘Ħares! It-​tinda t’Alla hi mal-​bnedmin, u hu se jgħammar magħhom, u huma se jkunu l-​popli tiegħu. U Alla nnifsu se jkun magħhom. U se jimsaħ kull demgħa minn għajnejhom, u l-​mewt ma tkunx iżjed, u la l-​għali u la l-​biki u lanqas l-​uġigħ ma jkunu iżjed. L-​affarijiet taʼ qabel għaddew.’ U Dak bil-​qiegħda fuq it-​tron qal: ‘Ħares! Qed nagħmel l-​affarijiet kollha ġodda.’ Ukoll, hu jgħid: ‘Ikteb, għaliex dawn il-​kelmiet huma fidili u veri.”ˈ​—Rivelazzjoni 21:1-5.

Is-“sema ġdid” huwa s-​Saltna taʼ Ġesù Kristu. L-​“art ġdida” m’hijiex xi globu ieħor imma soċjetà ġdida taʼ nies fuq din il-​pjaneta​—kollha kemm huma sudditi ubbidjenti tas-​Saltna taʼ Kristu, mingħajr firdiet razzjali, nazzjonali, jew lingwistiċi. (Qabbel Salm 96:1.) Is-​sema u l-​art preżenti simboliċi​—is-​sistema taʼ affarijiet tax-​Xitan bl-​istruttura taʼ gvern influwenzata minn Satana u d-​demonji tiegħu​—se jkunu ġew meqrudin. (1 Ġwann 5:19) Għalkemm l-​ibħra litterali se jibqgħu, il-​baħar figurattiv tal-​umanità li hi mill-​agħar u li m’għandiex kwiet se jitneħħa. Il-​ħakkiema sħab taʼ Ġesù li se jkunu fis-​sema jiffurmaw Ġerusalemm Ġdida u f’għaqda miegħu jiffurmaw l-​organizzazzjoni kapitali li se tiggverna lis-​soċjetà twajba tal-​bnedmin. Alla se ‘jkollu t-​tinda’ mal-​umanità ubbidjenti b’mod rappreżentattiv waqt li huma jkunu qed jiġu rrikonċiljati bis-​sħiħ miegħu permezz taʼ Kristu matul Jum il-​Ġudizzju taʼ elf sena.​—Rivelazzjoni 14:1-4; 20:6.

Taħt il-​ħakma tas-​Saltna se jkun hemm bosta raġunijiet għall-​hena. L-​għali, il-​biki, u l-​uġigħ li jirriżulta minn mard, niket, u affarijiet bħal dawn se jkunu esperjenzi tal-​imgħoddi. Saħansitra l-​mewt li nfirxet għal fuq l-​umanità mill-​ewwel ġenitur tagħna, il-​midneb Adam, mhix se tkun iktar. (Rumani 5:12) X’ferħ se jkun hemm meta dan il-​kaġun dinji taʼ dmugħ se jkun telaq għal dejjem!

Mhux bnedmin mortali imma Alla nnifsu jagħti garanzija rigward dawn il-​barkiet. Huwa Dak li jgħid: “Ħares! Qed nagħmel l-​affarijiet kollha ġodda.” Iva, u Alla Jehovah qal lill-​appostlu Ġwanni: “Ikteb, għaliex dawn il-​kelmiet huma fidili u veri.”

Ħtiġijiet Bażiċi Ssodisfati bis-​Sħiħ

Fid-​dinja l-​ġdida magħmula minn Alla, l-​art fl-​aħħar mill-​aħħar se ssir ġenna. Dan huwa ċert, għax Ġesù wiegħed lil midneb mimli rimors li kien imdendel maġenbu: “Verament ingħidlek illum, Int se tkun miegħi fil-​Ġenna.” (Luqa 23:43) F’nofs kundizzjonijiet taʼ ġenna, ħtiġijiet umani bħalma huma l-​ikel u d-​djar se jkunu milħuqin bis-​sħiħ.

In-nuqqas taʼ ikel qed jiswa ħafna ħajjiet illum. Huma kemm huma nobbli l-​isforzi biex jitimgħu l-​imġewħin, ir-​regħba u fatturi oħra jżommu l-​bnedmin lura milli jsolvu problemi bħal dawn. Per eżempju, is-​Saturday Star, gazzetta taʼ Johannesburg, fl-​Afrika t’Isfel irrapportat: “Argumenti politiċi, żjieda fil-​prezz taż-​żejt u l-​għejja ġenerali minħabba l-​konflitti li donnhom qatt ma jintemmu tal-​Afrika qed jingħaqdu flimkien biex jittardjaw is-​serħan . . . Fis-​Sudan, wieħed mill-​pajjiżi li hu l-​iktar milqut, bejn 5 miljun u sitt miljun ruħ jistennew li jmutu bil-​ġuħ fl-​1991.” Imma l-​ġuħ se jiġi minsi fid-​dinja ġdida t’Alla. Taħt il-​ħakma tas-​Saltna “se jiġi li jkun hemm kotra taʼ qamħ fuq l-​art; fuq il-​quċċata tal-​muntanji se jkun hemm iżżejjed.”−Salm 72:16.

Il-kenn huwa ħtieġa oħra tal-​bniedem li baqgħet mhix milħuqa b’mod adekwat fil-​każ taʼ ħafna fi żmienna. Miljuni qed igħixu f’daqsxejn taʼ gorboġ jew huma totalment bla dar. Skond The New York Times, f’pajjiż wieħed Orjentali, “f’kumpanija tal-​elettronika . . .. impjegati taʼ għoxrin sena qed iħabbtu wiċċhom maʼ lista li ilha 73 sena biex jakkwistaw dar,” u rapport tal-​gvern jindika li xi nies iridu jgħixu “fi mħażen, uffiċċji u saħansitra latrini.” Imma kemm se jkun differenti fid-​dinja l-​ġdida! Fil-​Ġenna futura, “ċertament li se jibnu djar u jgħammru fihom; u ċertament li se jħawlu egħlieqi tad-​dwieli u jieklu l-​frott tagħhom. Mhux se jibnu huma u xi ħadd ieħor igħammar; mhux se jħawlu huma u xi ħadd ieħor jiekol. Għax bħall-​jiem taʼ siġra se jkunu l-​jiem tal-​poplu tiegħi; u x-​xogħol taʼ jdejhom stess il-​magħżulin tiegħi se jużawh għalkollox.”−Isaija 65:​21, 22.

Problemi ekologiċi se jisparixxu fid-​dinja ġdida mwiegħda t’Alla. Tniġġis tal-​arja li qed ihedded is-​saħħa u jagħmel ħsara lill-​prodotti tal-​biedja mhux se jeżisti iktar. It-​tniġġis u l-​qerda tal-​postijiet fejn jimirħu l-​annimali li issa qed jipperikolaw numru bla għadd taʼ pjanti u speċi tal-​annimali mhux se jkunu taʼ theddida f’dak iż-​żmien. U fatturi bħalma hu l-​eżawriment tal-​ozone layer m’humiex se jipperikolaw il-​ħajja fuq l-​art. Ahna nistgħu nibqgħu żguri li Alla Jehovah se jsolvi dawn il-​problemi kollha, għax il-​Kelma tiegħu tassigurana li hu dalwaqt se ‘jġib f’rovina lil dawk li qed jirrovinaw l-​art.’​—Rivelazzjoni 11:18.

Fid-dinja l-​ġdida, il-​gwerer se jkunu affarijiet tal-​imgħoddi imma mhux għaliex il-​kapijiet taʼ stati jkunu rnexxielhom jiddiżarmaw lill-​ġnus. Minflok, Alla se jaġixxi fejn il-​ħakkiema politiċi fallew. Hu se jġib il-​paċi għall-​umanità ubbidjenti fi qbil mal-​kliem tas-​salmista: “Ejjew ilmħu l-​attivitajiet taʼ Jehovah, kif wettaq ġrajjiet tal-​iskantament fuq l-​art. Qiegħed iġiegħel il-​gwerer jieqfu sa tarf l-​art. Il-​qaws hu jaqsam fi tnejn u tassew ikisser il-​lanza f’biċċiet; il-​vaguni jaħraqhom fin-​nar.” (Salm 46:​8, 9) Bid-​dinja l-​ġdida mwiegħda t’Alla tant qrib, in-​nies ma jidħlux fi gwerer iktar imma se jgawdu l-​vera paċi u sigurtà.​—Mikea 4:​2-4.

Se Tkun Hemm Int?

Int tistaʼ tkun fiduċjuż fid-​dinja ġdida mwiegħda minn Alla Jehovah. Hu ma jigdibx. (Ebrej 6:​17, 18) Il-​Kelma tiegħu, il-​Bibbia, hija vera, u dak li twiegħed dejjem iseħħ.​—Ġwann 17:17.

L-aħbar tajba taʼ barkiet tal-​għaġeb għall-​umanità ubbidjenti hi dik li x-​Xhieda taʼ Jehovah jagħmlu ħilithom biex jaqsmu man-​nies kollha taʼ qalb onesta. Int għandek tagħmel kull sforz issa biex tikseb għarfien tal-​għan divin, u taġixxi fuq il-​wegħdi meraviljużi misjubin fl-​Iskrittura Mqaddsa. Din il-​korsa tistaʼ twasslek għal ħajja bla tmiem, għax Ġesù qal: “Dan ifisser il-​ħajja taʼ dejjem, li jieħdu għarfien dwarek, l-​uniku veru Alla, u dwar dak li inti bgħatt, Ġesù Kristu.” (Ġwann 17:3) Imbagħad int se jkollok il-​privileġġ li tgawdi żminijiet hienja li hemm quddiemek, għax id-​dinja ġdida t’Alla hi qrib!

[Nota taʼ taħt]