Stedinhom Jiġu

¹ Stedina li ħarġet sekli ilu issa qed tinstemaʼ f’233 pajjiż madwar id-​dinja: “Ħalli mmorru u nitilgħu fuq l-​għolja tal-​Mulej, . . . biex jgħallimna triqatu, u nimxu fil-​mogħdijiet tiegħu.” (Is. 2:3) Wieħed mill-​aqwa modi kif nistgħu ngħinu lin-​nies jagħmlu progress spiritwali li jwassal għall-​ħajja taʼ dejjem huwa li nidderiġuhom lejn l-​organizzazzjoni taʼ Jehovah.

² Xi pubblikaturi jistgħu jaħsbuha darbtejn biex jistiednu lin-​nies lejn is-​Sala tas-​Saltna qabel ma dawn ikunu għamlu progress konsiderevoli fl-​istudju tal-​Bibbja fid-​dar. Madankollu, xi kultant in-​nies jibdew jattendu għal-​laqgħat tal-​kongregazzjoni saħansitra qabel ma jkun jistaʼ jinbeda studju tal-​Bibbja magħhom. Ma rridux indumu ma nestendu stedina mill-​qalb u ninkuraġġixxu lin-​nies jiġu għal-​laqgħat.

³ X’Għandek Tagħmel: Uża tajjeb il-​volantini biex tinforma lin-​nies dwar il-​laqgħat lokali tagħna. Semmi li l-​laqgħat huma b’xejn u li qatt ma jsir xi ġbir. Spjega kif isiru l-​laqgħat. Indika li fil-​fatt dawn huma korsijiet taʼ studju tal-​Bibbja u li l-​materjal taʼ studju jiġi pprovdut biex kulħadd ikun jistaʼ jsegwih. Iġbed l-​attenzjoni għall-​fatt li dawk li jattendu kellhom tipi taʼ trobbija differenti u ġejjin minn diversi livelli soċjali u ekonomiċi fil-​ħajja. Semmi li dawk li jattendu huma nies minn dawk l-​inħawi u li tfal taʼ kull età jistgħu jiġu bil-​qalb kollha. Għandna nistiednu lil dawk li nistudjaw magħhom, u noffru li ngħinuhom bi kwalunkwe mod biex jattendu.

⁴ Waħda mill-​aħħar affarijiet iddokumentati fil-​Bibbja hija stedina kordjali biex nieħdu sehem mill-​provvedimenti taʼ Jehovah għall-​ħajja: “L-​Ispirtu u l-​Għarusa jgħidu: ‘Ejja!’ . . . U min hu bil-​għatx, ħa jiġi, ħa jieħu b’xejn min irid l-​ilma tal-​Ħajja.” (Apk. 22:17) M’hemm l-​ebda sostitut għal li nistiednu lil ħaddieħor jattendi għal-​laqgħat tagħna.

⁵ Isaija 60:8 profetikament jiddeskrivi lill-​mijiet t’eluf taʼ wħud ġodda li jagħtu tifħir u li issa ġejjin fil-​kongregazzjonijiet tal-​poplu t’Alla bħal ħamiem li “bħal sħab jittajru, bħal ħamiem lejn il-​bejtiet tagħhom.” Ilkoll nistgħu nistiednu lil uħud ġodda għal-​laqgħat tagħna u nagħmluhom iħossuhom milqugħin. B’dan il-​mod, inkunu qed nikkooperaw maʼ Jehovah hekk kif hu jgħaġġel ix-​xogħol taʼ ġbir.​—Is. 60:22.