Imita l-​mogħdrija taʼ Ġeħova

1. Ġeħova kif għarraf lilu nnifsu lil Mosè? Dan għala hu importanti?

DARBA, Alla rrivela lilu nnifsu lil Mosè billi għarraflu ismu u ftit mill-​kwalitajiet Tiegħu. Ġeħova setaʼ enfasizza l-​qawwa jew l-​għerf tiegħu, imma minflok, l-​ewwel tkellem dwar li hu ħanin u grazzjuż—kwalitajiet li jenfasizzaw il-​mogħdrija tiegħu. (Aqra Eżodu 34:5-​7.) Mosè ried ikun jaf jekk Ġeħova kienx se jappoġġjah. Allura, Ġeħova enfasizza xi kwalitajiet li juru li tassew irid jgħin lill-​qaddejja tiegħu. (Eżodu 33:13) Kif iġiegħlek tħossok li tkun taf kemm Ġeħova jimpurtah minna? Dan l-​artiklu se jitkellem l-​iktar fuq il-​mogħdrija, jiġifieri li wieħed iħoss għas-​sofferenzi t’oħrajn u jkun jixtieq jgħinhom.

2, 3. (a) X’juri li huwa naturali għall-​bnedmin biex iħossu mogħdrija? (b) Għala għandna nitgħallmu iżjed dwar il-​mogħdrija?

² Ġeħova hu mimli mogħdrija, u l-​bnedmin ġew magħmulin fuq ix-​xbieha tiegħu. Allura hu naturali għall-​bnedmin li jimpurtahom minn oħrajn. Anke dawk li ma jafux lil Ġeħova spiss juru mogħdrija. (Ġenesi 1:27) Fil-​Bibbja nsibu ħafna rakkonti taʼ nies li wrew mogħdrija. Pereżempju, meta Salamun ried ikun jaf liema miż-​żewġ nisa kienet omm it-​tarbija, hu ttestjahom billi ordna li t-​tarbija tinqasam min-​nofs. L-​omm tqanqlet bil-​kbir għat-​tarbija tagħha, allura talbet bil-​ħniena lis-​sultan biex jagħti lil binha lill-​mara l-​oħra. (1 Slaten 3:23-​27) Eżempju ieħor taʼ mogħdrija hu dak taʼ bint il-​Fargħun. Meta sabet lil Mosè tarbija rrealizzat li kien Ebrew u li suppost kellu jinqatel. Imma “hi tħassritu” u ddeċidiet li trabbih bħala binha.—Eżodu 2:5, 6.

³ Għala għandna nitgħallmu iżjed dwar il-​mogħdrija? Għaliex Ġeħova jridna nimitawh. (Efesin 5:1) Għalkemm ġejna maħluqin b’tali mod li nuru mogħdrija, aħna imperfetti u għandna t-​tendenza li nkunu egoisti. Kultant forsi ma jkunx faċli għalina biex niddeċiedu jekk ngħinux lil oħrajn jew jekk niffokawx fuqna nfusna. X’jistaʼ jgħinna ninteressaw ruħna iktar f’oħrajn? L-​ewwel, ejja nikkunsidraw kif Ġeħova u oħrajn urew mogħdrija. It-​tieni, ejja naraw kif aħna nistgħu nimitaw il-​mogħdrija t’Alla u għala hu tajjeb għalina li nagħmlu dan.

ĠEĦOVA—L-​EŻEMPJU PERFETT TAL-​MOGĦDRIJA

4. (a) Ġeħova għala bagħat l-​anġli f’Sodoma? (b) X’nistgħu nitgħallmu mill-​esperjenza tal-​familja taʼ Lot?

⁴ Il-​Bibbja fiha ħafna eżempji tal-​mogħdrija taʼ Ġeħova. Pereżempju, aħseb dwar x’għamel għal Lot. Lot kien raġel sewwa li kien “imnikket ferm” minħabba n-​nies immorali taʼ Sodoma u Gomorra. Dawn in-​nies ma kellhomx rispett lejn Alla, u Ġeħova ddeċieda li kien jistħoqqilhom il-​mewt. (2 Pietru 2:7, 8) Ġeħova bagħat anġli għand Lot biex jgħidulu li Sodoma u Gomorra kellhom jinqerdu u li kien jeħtieġ li jaħrab. Il-​Bibbja tgħid: “Meta [Lot] baqaʼ jitnikker, iż-​żewġ [anġli] qabduh minn idu, lilu, lil martu u liż-​żewġt ibniet tiegħu, minħabba l-​mogħdrija taʼ Ġeħova għalih, u ħarġuh u ħallewh barra l-​belt.” (Ġenesi 19:16) Bħalma Ġeħova fehem is-​sitwazzjoni taʼ Lot, aħna nistgħu nkunu żguri li hu jifhem kwalunkwe diffikultà li ngħaddu minnha.—Isaija 63:7-​9; Ġakbu 5:11; 2 Pietru 2:9.

5. Il-​Kelma t’Alla kif tgħallimna nuru l-​mogħdrija?

⁵ Ġeħova wkoll għallem lin-​nies juru mogħdrija. Aħseb dwar waħda mil-​liġijiet li ta lil Iżrael. Jekk persuna kellha d-​dejn maʼ xi ħadd, dak li sellifha l-​flus setaʼ jieħu l-​libsa tagħha bħala garanzija li din il-​persuna kellha tħallas il-​flus lura. (Aqra Eżodu 22:26, 27.) Iżda min jislef kellu jirritorna l-​libsa lill-​persuna sa nżul ix-​xemx biex din tkun tistaʼ tibqaʼ sħuna matul il-​lejl. Xi ħadd li ma kellux mogħdrija forsi ma kienx ikun irid jagħti l-​libsa lura, imma Ġeħova għallem lin-​nies tiegħu jħennu għal ħaddieħor. X’jgħallimna l-​prinċipju wara din il-​liġi? Qatt tinjora l-​bżonnijiet taʼ Kristjan sieħbek. Jekk nistgħu nkunu t’għajnuna għal xi ħu jew oħt li tkun qed tbati, aħna se nkunu rridu nagħmlu dan.—Kolossin 3:12; Ġakbu 2:15, 16; aqra l-​1 Ġwanni 3:17.

6. X’nistgħu nitgħallmu mill-​mogħdrija taʼ Ġeħova lejn l-​Iżraelin li dinbu?

⁶ Ġeħova ħass mogħdrija għall-​Iżraelin anke meta dinbu kontrih. Naqraw: “Ġeħova, l-​Alla taʼ missirijiethom, baqaʼ jibgħat iwissihom permezz tal-​messaġġiera tiegħu, jibgħat darba wara l-​oħra, għaliex ħass mogħdrija għall-​poplu tiegħu u għall-​post fejn jgħammar hu.” (2 Kronaki 36:15) B’mod simili, aħna għandna nħossu mogħdrija għal dawk li għadhom ma jafux lil Ġeħova imma li forsi għad jindmu u jsiru ħbiebu. Ġeħova ma jrid lil ħadd jinqered fil-​ġudizzju li ġej. (2 Pietru 3:9) Allura waqt li għad baqaʼ ż-​żmien, aħna rridu naqsmu l-​messaġġ taʼ twissija tiegħu maʼ kull min nistgħu u ngħinu lil kemm jistaʼ jkun nies biex jibbenefikaw mill-​mogħdrija t’Alla.

7, 8. Din il-​familja għala emmnet li Ġeħova kien wera mogħdrija magħhom?

⁷ Illum, ħafna mill-​qaddejja taʼ Ġeħova esperjenzaw il-​mogħdrija tiegħu. Pereżempju, matul is-​snin disgħin fil-​Bożnija, diversi gruppi taʼ razez differenti kienu qed jiġġieldu u joqtlu lil xulxin. Familja li tgħix hemm inkludiet tifel taʼ 12-​il sena li se nsejħulu Eldar. Eldar, ħuh, il-​ġenituri tiegħu, u Xhieda oħra kienu qed jivvjaġġaw f’karozza tal-​linja mill-​Bożnija għas-​Serbja. Kienu sejrin konvenzjoni li fiha l-​ġenituri taʼ Eldar kienu se jitgħammdu. Fil-​fruntiera, xi suldati indunaw li l-​familja kienet minn grupp taʼ razza differenti u ġegħluhom jinżlu mill-​karozza tal-​linja. Imbagħad ħallew lill-​bqija tal-​aħwa jkomplu bil-​vjaġġ tagħhom. Għaddew jumejn u s-​suldati ma ħallewx lill-​familja titlaq. Fl-​aħħar, l-​uffiċjal inkarigat sejjaħ lill-​uffiċjal taʼ fuqu u staqsieh x’kellu jagħmel bihom. Il-​familja kienet qiegħda proprju hemm u setgħu jisimgħu lill-​uffiċjal superjuri jwieġeb, “Aqbad u ħudhom ’il barra u sparalhom!”

⁸ Waqt li s-​suldati kienu qed jitkellmu, żewġ stranġieri resqu lejn il-​familja. Minn taħt l-​ilsien qalulhom li kienu Xhieda wkoll u li l-​aħwa fuq il-​karozza tal-​linja kienu qalulhom x’kien ġara. Iż-​żewġ Xhieda qalu lil Eldar u lil ħuh biex jitilgħu fil-​karozza tagħhom biex jaqsmu l-​fruntiera għax is-​suldati ma kinux qed jiċċekkjaw il-​karti tat-​tfal. Imbagħad, l-​aħwa qalu lill-​ġenituri biex jgħaddu minn wara taċ-​checkpoint u jiltaqgħu magħhom fuq in-​naħa l-​oħra tal-​fruntiera. Eldar tant kien imbeżżaʼ li ma kienx jaf jekk jidħaqx jew jibki. Il-​ġenituri tiegħu staqsew, “Taħsbu li sempliċement se jħalluna nitilqu?” Imma hekk kif tbiegħdu, kien daqslikieku s-​suldati ma rawhomx. Eldar u ħuh iltaqgħu mal-​ġenituri fuq in-​naħa l-​oħra tal-​fruntiera, u komplew sejrin il-​konvenzjoni. Kienu konvinti li Ġeħova kien wiġbilhom it-​talb tagħhom! Aħna nafu mill-​Bibbja li Ġeħova mhux dejjem jipproteġi direttament lill-​qaddejja tiegħu b’dan il-​mod. (Atti 7:58-​60) Imma f’dan il-​każ, Eldar qal: “Għalija kien bħallikieku l-​anġli għamew lis-​suldati u Ġeħova salvana.”—Salm 97:10.

9. Ġesù kif ħassu dwar il-​folol li marru warajh? (Ara l-​ewwel stampa.)

⁹ Ġesù kien eżempju eċċellenti tal-​mogħdrija. Hu tħassar lin-​nies għax ra li “kienu maltrattati u mferrxin bħal nagħaġ mingħajr ragħaj.” Allura x’għamel? Hu “beda jgħallimhom ħafna affarijiet.” (Mattew 9:36; aqra Marku 6:34.) B’kuntrast, il-​Fariżej ma kellhomx mogħdrija u ma ridux jgħinu lin-​nies. (Mattew 12:9-​14; 23:4; Ġwanni 7:49) Għandek int xewqa qawwija li tgħin lin-​nies u tgħallimhom dwar Ġeħova, bħal Ġesù?

10, 11. Huwa dejjem xieraq li nuru mogħdrija? Spjega.

¹⁰ Dan ma jfissirx li dejjem huwa xieraq li nuru mogħdrija. Pereżempju, is-​Sultan Sawl setaʼ ħaseb li kien qed juri mogħdrija meta ma qatilx lil Agag, li kien is-​sultan taʼ Għamalek u l-​għadu tal-​poplu t’Alla. Ukoll, Sawl ma qatilx l-​annimali kollha tal-​Għamalekin. Imma Ġeħova kien qal lil Sawl joqtol lill-​Għamalekin kollha u l-​annimali kollha tagħhom. Minħabba d-​diżubbidjenza taʼ Sawl, Ġeħova ċaħdu milli jkun sultan. (1 Samwel 15:3, 9, 15) Ġeħova hu l-​Imħallef ġust. Hu jistaʼ jaqra l-​qlub tan-​nies, u jaf meta m’għandhiex tintwera mogħdrija. (Lamentazzjonijiet 2:17; Eżekjel 5:11) Dalwaqt se jġib ġudizzju fuq dawk kollha li jirrifjutaw li jobduh. (2 Tessalonikin 1:6-​10) Dan mhux se jkun iż-​żmien biex Ġeħova juri mogħdrija man-​nies mill-​agħar. Madankollu, billi jeqridhom hu se juri mogħdrija man-​nies sewwa, li hu se jsalva.

¹¹ M’għandniex xi ngħidu, mhuwiex għalina li niġġudikaw min se jgħix jew min se jmut. Minflok, għandna bżonn nagħmlu kulma nistgħu issa biex ngħinu lin-​nies. B’liema modi prattiċi nistgħu nuru mogħdrija lejn oħrajn? Ikkunsidra xi suġġerimenti.

KIF AĦNA NISTGĦU NURU MOGĦDRIJA

12. Kif tistaʼ turi mogħdrija fil-​mod kif tittratta lil oħrajn?

¹² Kun t’għajnuna fil-​ħajja taʼ kuljum. Ġeħova jrid li l-​Kristjani juru mogħdrija mal-​ġirien tagħhom u maʼ ħuthom. (Ġwanni 13:34, 35; 1 Pietru 3:8) Tifsira waħda tal-​mogħdrija hi “li nsofru flimkien.” Persuna li turi mogħdrija tipprova tgħin lil dawk li jkunu qed ibatu. Allura għandna nfittxu għal opportunitajiet biex ngħinu lil oħrajn, forsi billi noffrulhom li nagħmlulhom xi biċċa xogħol jew qadja li jkollhom bżonn.—Mattew 7:12.

13. In-​nies t’Alla x’jagħmlu wara li jseħħu diżastri naturali?

¹³ Ħu sehem f’xogħol t’għajnuna waqt diżastri. Meta naraw in-​nies ibatu minħabba xi diżastru, inkunu rridu nuruhom mogħdrija. In-​nies taʼ Ġeħova huma magħrufin sew għall-​għajnuna li jagħtu f’mumenti bħal dawn. (1 Pietru 2:17) Pereżempju, oħt Ġappuniża kienet tgħix f’post milqut mit-​terremot u t-​tsunami tal-​2011. Hi qalet li ġiet “inkuraġġita u mfarrġa ħafna” meta rat volontieri ġejjin minn partijiet differenti tal-​Ġappun u minn pajjiżi oħra biex isewwu djar u Swali tas-​Saltna. Żiedet tgħid: “Din l-​esperjenza għenitni nirrealizza li Ġeħova u x-​Xhieda sħabna jimpurtahom minn oħrajn u li ħafna aħwa rġiel u nisa madwar id-​dinja kollha qed jitolbu għalina.”

14. Int kif tistaʼ tgħin lill-​morda u dawk imdaħħlin fiż-​żmien?

¹⁴ Għin lill-​morda u dawk imdaħħlin fiż-​żmien. Meta naraw nies ibatu minħabba l-​mard u l-​età avanzata, aħna nitħassruhom. Għandna sebaʼ mitt sena biex naraw dawn il-​problemi jispiċċaw, allura nitolbu biex tiġi s-​Saltna t’Alla. Sadattant, nagħmlu kulma nistgħu biex ngħinu lill-​morda u dawk imdaħħlin fiż-​żmien. Wieħed awtur kiteb li darba ommu, li kienet kbira fl-​età u tbati bil-​marda tal-​Alzheimer, ħammġet ħwejjiġha. Waqt li kienet qed tipprova tnaddaf, daqqet il-​qanpiena tal-​bieb. Kienu ġew żewġ Xhieda li s-​soltu kienu jżuruha. L-​aħwa nisa staqsewha jekk kellhiex bżonn xi ħaġa. Il-​mara qaltilhom: “Qed nistħi minnkom, imma iva.” L-​aħwa għenuha tnaddaf. Imbagħad għamlulha kikkra te u baqgħu jitkellmu magħha. Binha kien grat ħafna u qal li x-​Xhieda “jagħmlu dak li jippritkaw.” Tqanqlek il-​mogħdrija tiegħek lejn il-​morda u dawk imdaħħlin fiż-​żmien biex int tagħmel kulma tistaʼ ħalli tgħinhom?—Filippin 2:3, 4.

15. Ix-​xogħol tal-​ippritkar tagħna kif jgħin lil oħrajn?

¹⁵ Għin lin-​nies isiru jafu lil Ġeħova. L-​aħjar mod li bih nistgħu ngħinu lin-​nies hu billi ngħallmuhom dwar Alla u s-​Saltna tiegħu. Mod ieħor hu billi ngħinuhom jaraw għala l-​ubbidjenza għal-​livelli taʼ Ġeħova hi taʼ ġid għalihom. (Isaija 48:17, 18) Il-​ministeru hu mod meraviljuż li bih nonoraw lil Ġeħova u nuru mogħdrija lejn oħrajn. Tistaʼ int tagħmel iktar fil-​ministeru?—1 Timotju 2:3, 4.

IL-​MOGĦDRIJA HI TAʼ ĠID GĦALIK UKOLL!

16. Kif nibbenefikaw meta nuru mogħdrija?

¹⁶ Esperti tas-​saħħa mentali jgħidu illi li nuru mogħdrija jistaʼ jtejbilna saħħitna u r-​relazzjonijiet tagħna m’oħrajn. Meta tgħin lil min qed ibati se tħossok iżjed ferħan, iżjed fiduċjuż, tħossok inqas waħdek, u inqas negattiv. Li turi mogħdrija hu taʼ ġid għalik. (Efesin 4:31, 32) Meta l-​imħabba tqanqalna biex ngħinu lil oħrajn, aħna jkollna kuxjenza tajba għax nafu li nkunu qed nagħmlu dak li Ġeħova jrid. Il-​mogħdrija se tgħinna nkunu ġenituri, irġiel u nisa miżżewġin, u ħbieb aħjar. Flimkien maʼ dan, nies li juru mogħdrija lejn oħrajn ġeneralment se jiġu megħjunin meta jkollhom bżonn.—Aqra Mattew 5:7; Luqa 6:38.

17. Għala trid turi mogħdrija?

¹⁷ Għalkemm li nuru mogħdrija hu taʼ ġid għalina, ir-​raġuni ewlenija għala nagħmlu dan hi għaliex irridu nimitaw lil Ġeħova u nġibulu glorja. Hu s-​Sors tal-​imħabba u l-​mogħdrija. (Proverbji 14:31) Hu l-​eżempju perfett għalina. Allura ejja nagħmlu kulma nistgħu biex nimitaw lil Alla billi nuru mogħdrija. Imbagħad se nersqu iktar viċin taʼ ħutna u jkollna relazzjonijiet aħjar man-​nies taʼ madwarna.—Galatin 6:10; 1 Ġwanni 4:16.