Wara li Adam u Eva tkeċċew mill-​ġnien tal-​Għeden, huma kellhom ħafna tfal. L-​ewwel tifel tagħhom, Kajjin, sar bidwi, u t-​tieni tifel, Abel, sar ragħaj.

Darba waħda, Kajjin u Abel taw offerti lil Ġeħova. Taf x’inhi offerta? Hi rigal speċjali. Ġeħova kien ferħan bl-​offerta taʼ Abel, imma ma kienx ferħan b’taʼ Kajjin. Minħabba f’hekk, Kajjin irrabja ħafna. Ġeħova wissa lil Kajjin li r-​rabja tiegħu setgħet twasslu biex jagħmel xi ħaġa ħażina. Imma Kajjin ma semax minnu.

Minflok, Kajjin qal lil Abel: ‘Ejja fl-​għalqa miegħi.’ Xħin kienu waħedhom fl-​għalqa, Kajjin attakka lil ħuh u qatlu. Ġeħova x’għamel dwar dan? Ġeħova kkastiga lil Kajjin billi bagħtu ’l bogħod mill-​familja tiegħu. Kajjin qatt ma kien se jitħalla jerġaʼ jiġi lura.

X’nistgħu nitgħallmu minn dan? Aħna għandna mnejn nibdew inħossuna rrabjati jekk l-​affarijiet ma jmorrux kif naħsbu li għandhom imorru. Jekk inħossu r-​rabja tikber fina—jew jekk oħrajn jiftħulna għajnejna għax jinnotaw ir-​rabja tagħna—aħna għandna mill-​ewwel nikkontrollaw u nbiddlu l-​mod kif inħossuna qabel ma r-​rabja tikkontrolla lilna.

Talli Abel ħabb lil Ġeħova u għamel it-​tajjeb, Ġeħova qatt mhu se jinsieh. Alla se jirxoxta lil Abel meta Hu jagħmel l-​art ġenna.

Maż-​żmien, kien hemm ħafna nies fuq l-​art. Ħafna minnhom kienu ħżiena. Anke xi anġli fis-​sema saru ħżiena. Huma telqu l-​post tagħhom fis-​sema biex jiġu hawn fuq l-​art. Taf għala għamlu hekk? Biex b’hekk huma setgħu jinbidlu fi rġiel umani u jiżżewġu nisa.

In-​nisa kellhom ulied subien minn dawn l-​anġli. Dawn is-​subien kibru u kienu b’saħħithom ħafna u saru bulijiet. Huma kienu jweġġgħu lin-​nies. Ġeħova ma setax iħalli l-​affarijiet jibqgħu sejrin hekk. Allura, iddeċieda li jeqred lin-​nies ħżiena b’dulluvju.

Imma kien hemm raġel li kien differenti. Hu kien iħobb lil Ġeħova. Kien jismu Noè. Hu kellu mara u tliet subien, Sem, Ħam, u Ġafet, u kull wieħed minnhom kellu mara. Ġeħova qal lil Noè biex jibni arka kbira, li hi kaxxa kbira tal-​injam li tistaʼ tifflowtja fuq l-​ilma, biex hu u l-​familja tiegħu jkunu jistgħu jsalvaw mid-​Dulluvju. Ġeħova qal ukoll lil Noè biex idaħħal ħafna annimali ġewwa l-​arka biex huma wkoll jibqgħu ħajjin.

Noè mill-​ewwel beda jibni l-​arka. Hu u l-​familja tiegħu damu madwar 50 sena biex jibnuha. Huma bnew l-​arka eżatt kif kien qalilhom Ġeħova. Matul dak iż-​żmien, Noè wissa lin-​nies dwar li kien ġej Dulluvju. Imma ħadd ma semaʼ minnu.

Fl-​aħħar, kien wasal il-​ħin biex jidħlu fl-​arka. Ejja naraw x’ġara mbagħad.