L-​Iżraelin telqu minn ħdejn il-​Muntanja Sinaj u għaddew mid-​deżert tal-​Faran biex imorru f’post jismu Kades. Hemmhekk, Ġeħova qal lil Mosè: ‘Ibgħat 12-​il spija, wieħed minn kull tribù, biex jitkixxfu l-​art taʼ Kangħan, l-​art li se nagħti lill-​Iżraelin.’ Allura Mosè għażel 12-​il raġel u qalilhom: ‘Morru Kangħan, u araw jekk l-​art hijiex tajba biex niżirgħu u nkabbru l-​ħxejjex. Araw ukoll jekk in-​nies humiex b’saħħithom jew le, u jekk jgħixux fit-​tined jew fil-​bliet.’ Dawn it-​12-​il spija, inkluż Ġożwè u Kaleb, irħewlha lejn Kangħan.

Wara 40 ġurnata, l-​ispiji ġew lura u ġabu magħhom tin, rummien, u għeneb. Huma rrakkontaw hekk lil Mosè: ‘L-​art hija tajba biex tagħti l-​ikel, imma n-​nies huma b’saħħithom u s-​swar tal-​bliet huma għoljin.’ Imbagħad Kaleb qal: ‘Żgur li nistgħu nirbħulhom. Ejja mmorru issa stess!’ Taf għala Kaleb qal hekk? Għax hu u Ġożwè kienu jafdaw f’Ġeħova. Imma l-​għaxar spiji l-​oħra qalu: ‘Le! In-​nies t’hemmhekk huma kbar ħafna, bħal ġganti! Ħdejhom konna nidhru qisna ġurati.’

L-​Iżraelin tilfu l-​kuraġġ, u beżgħu. Bdew igergru u jgħidu lil xulxin: ‘Għala għandna mmorru f’dan il-​pajjiż biex imbagħad joqtluna? Ejja nagħżlu mexxej ieħor u mmorru lura l-​Eġittu.’ Ġożwè u Kaleb qalulhom: ‘Tiħduhiex kontra Ġeħova, u tibżgħux. Ġeħova se jieħu ħsiebna.’ Imma l-​Iżraelin ma ridux jisimgħu. Anzi riedu joqtlu lil Ġożwè u lil Kaleb!

Ġeħova x’għamel? Hu qal lil Mosè: ‘Wara dak kollu li għamilt mal-​Iżraelin, huma xorta ma jridux jobduni. Għalhekk, se jibqgħu hawn fid-​deżert għal 40 sena, u hawn se jispiċċaw imutu. It-​tfal tagħhom biss flimkien maʼ Ġożwè u Kaleb se jgħixu fl-​art li jien wegħedt li nagħtihom.’

Ftit taż-​żmien wara, waqt li l-​Iżraelin kienu fid-​deżert, Koraħ, Datan, Abiram, u 250 oħra ħaduha kontra Mosè u Aron. Dawn qalulhom: ‘Issaportejniekom biżżejjed! Għala għandek tkun int il-​mexxej tagħna u Aron il-​qassis il-​kbir? Ġeħova mhuwiex biss miegħek u m’Aron, imma hu magħna wkoll.’ Ġeħova ma ħax gost. Għalih, dawn kienu qed jirribellaw kontrih!

Mosè qal lil Koraħ u lil dawk li ngħaqdu miegħu: ‘Għada ejjew it-​tabernaklu, u ġibu magħkom ir-​reċipjenti għall-​inċens mimlijin. Ġeħova se jurina lil min ikun għażel.’

L-​għada, Koraħ u l-​250 raġel marru biex jiltaqgħu maʼ Mosè ħdejn it-​tabernaklu. Hemmhekk huma ħarqu l-​inċens bħallikieku kienu qassisin. Ġeħova qal lil Mosè u lil Aron: ‘Infirdu minn maʼ Koraħ u l-​irġiel tiegħu.’

Għalkemm Koraħ kien mar jiltaqaʼ maʼ Mosè ħdejn it-​tabernaklu, Datan, Abiram, u l-​familji tagħhom ma ridux imorru. Ġeħova qal lill-​Iżraelin biex jersqu minn ħdejn it-​tined taʼ Koraħ, Datan, u Abiram. L-​Iżraelin resqu mill-​ewwel. Datan, Abiram, u l-​familji tagħhom ħarġu minn ġot-​tined tagħhom. F’daqqa waħda, l-​art infetħet u belgħethom kollha! Ħdejn it-​tabernaklu niżel nar mis-​sema u ħaraq lil Koraħ u lill-​250 raġel.

Imbagħad Ġeħova qal lil Mosè: ‘Ħu bastun mingħand il-​kap taʼ kull tribù, u ikteb isem kull wieħed fuq il-​bastun tiegħu. Imma fuq il-​bastun tat-​tribù taʼ Levi ikteb isem Aron. Poġġihom fit-​tabernaklu, u l-​bastun tar-​raġel li jien nagħżel se joħroġ il-​fjuri.’

L-​għada, Mosè ħareġ il-​bsaten kollha u wriehom lill-​kapijiet tat-​tribujiet. Il-​bastun t’Aron kellu l-​fjuri ħerġin minnu, u anki lewż misjur. B’dan il-​mod, Ġeħova wera ċar li hu kien għażel lil Aron biex ikun il-​qassis il-​kbir.