Il-​Ħarsa tal-​Bibbja

Alla Kif Iħares Lejn l-​Affarijiet li Jgħinuk Tagħti Qima?

L-​għajnuniet fiżiċi biex titlob huma komuni fil-​Buddiżmu, fil-​Ħinduiżmu, fl-​Islam, fil-​Ġudaiżmu, fir-​reliġjon Kattolika Rumana, u fir-​reliġjon Ortodossa tal-​Lvant. Għalhekk, ħafna miljuni taʼ nies kważi f’kull pajjiż jemmnu li affarijiet bħal dawn jgħinuhom jitolbu ’l Alla, jirbħu l-​approvazzjoni tiegħu, jew jiksbu barkiet. Il-​Bibbja x’tgħallem?

L-​UŻU taʼ l-​affarijiet li jgħinuk titlob imur lura eluf taʼ snin. Per eżempju, fil-​post fejn kien hemm Ninwe tal-​qedem, xi arkeoloġi sabu statwa taʼ “żewġ nisa bil-​ġwienaħ bil-​wieqfa quddiem is-​siġra sagra f’pożizzjoni taʼ talb; huma . . . kellhom [f’idhom] ix-​xellugija girlanda jew kuruna tar-​Rużarju.”—The Catholic Encyclopedia.

X’inhu l-​iskop tal-​kuruni tar-​Rużarju? L-​istess enċiklopedija twieġeb: “Kulmeta kwalunkwe talba trid tiġi ripetuta għal ħafna drabi hemm it-​tendenza li jintuża xi apparat mekkaniku li jagħmilha iktar faċli milli kieku l-​individwu jkollu joqgħod jgħodd fuq is-​swabaʼ.”

Ir-roti tat-​talb jagħmluha saħansitra iktar faċli biex it-​talb jiġi ripetut. Kull dawra tar-​rota, sew jekk bl-​id, bir-​riħ, bl-​ilma, jew bl-​elettriku, titqies bħala li hi ekwivalenti għal talba. Ir-​roti tat-​talb spiss huma użati flimkien maʼ mantras—versi u inkanteżmi mistiċi. Ikkunsidra kif iħossu Alla dwar dawn l-​affarijiet.

“Toqgħodx Tirripeti l-​Istess Ħaġa”

Ġesù Kristu, li hu rikonoxxut bħala profeta t’Alla anki minn miljuni taʼ nies li m’humiex Kristjani, spjega l-​ħarsa tal-​Ħallieq lejn it-​talb ripetut, billi qal: “Meta titlob, toqgħodx tirripeti l-​istess ħaġa, bħalma jagħmlu n-​nies tal-​ġnus, għax dawn jimmaġinaw li se jinstemgħu għax jużaw ħafna kliem.”a—Mattew 6:7.

Għalhekk, ladarba Alla ma japprovax li “tirripeti l-​istess ħaġa,” huwa loġiku nikkonkludu li l-​użu t’oġġetti simili bħala għajnuna għal talb ripetut m’huwiex aċċettabbli? Fi qbil maʼ dan, il-​Bibbja ma ssemmix li xi qaddej leali taʼ l-​Alla l-​veru qatt uża xi kuruna tar-​Rużarju, rota tat-​talb, jew xi oġġett ieħor għall-​qima. Ir-​raġunijiet jidhru iktar ċari meta nifhmu x’inhu t-​talb u x’inhu l-​iskop tiegħu.

Talb li Jogħġob lil Alla

Fit-​talba mudell taʼ Ġesù, hu rrefera speċifikament għal Alla bħala “Missierna.” Iva, il-​Ħallieq tagħna m’huwiex xi esseri mbiegħed jew qawwa misterjuża li għandha tiġi msikkta minn xi inkanteżmu, ritwal, jew mantra. Minflok, hu Missier kollu mħabba, u jridna nirrikonoxxuh b’dan il-​mod u nħobbuh. “Jien inħobb lill-​Missier,” qal Ġesù. (Ġwanni 14:31) Profeta f’Israel tal-​qedem qal: “O Ġeħova, int Missierna.”—Isaija 64:8.

Kif nistgħu nersqu qrib lejn Ġeħova bħala Missierna tas-​sema? (Ġakbu 4:8) Bħal f’kull relazzjoni, aħna nersqu eqreb lejn Alla permezz taʼ komunikazzjoni miż-​żewġ naħat. Alla “jkellimna” permezz tal-​paġni tal-​Bibbja—il-​Kelma miktuba tiegħu—li fiha jirrivela l-​attivitajiet, il-​personalità, u l-​iskop tiegħu għalina. (2 Timotju 3:16) Min-​naħa l-​oħra, aħna nitkellmu m’Alla permezz tat-​talb, jew billi meta nkellmuh nuruh qima. M’għandniex xi ngħidu, talb bħal dan għandu jkun sinċier u intimu, mhux formali jew bħala rutina.

Ikkunsidra dan: Ġo familja magħquda u kollha mħabba, tfal li huma normali u intelliġenti kif se jikkomunikaw mal-​ġenituri tagħhom? Se jgħidu l-​istess kliem jew frażijiet b’mod ripetut, forsi billi jgħoddu r-​ripetizzjonijiet permezz taʼ xi teknika? Dażgur li le! Minflok, dawn bis-​sinċerità kollha se jitkellmu bis-​sens u bir-​rispett.

It-talb lil Alla tistaʼ tgħid li għandu jkun l-​istess. Tabilħaqq, nistgħu nitkellmu maʼ Missierna tas-​sema dwar kull ħaġa li tikkonċernana. Filippin 4:6, 7 jgħid: “Tkunu ansjużi fuq xejn, imma f’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu; u l-​paċi t’Alla . . . tgħasses lil qalbkom u l-​qawwa mentali tagħkom.” Naturalment, meta aħna nkunu ansjużi fuq xi ħaġa, jistaʼ jkun li nitolbu spiss dwar il-​kwistjoni. Imma dan mhux l-​istess bħal meta tirripeti xi ħaġa kelma b’kelma.—Mattew 7:7-11.

Il-Bibbja fiha ħafna eżempji taʼ talb li jogħġob lil Alla, inkluż salmi, jew għanjiet, u talb li qalu Ġesù nnifsu.b (Salmi 17 u 86, sopraskrizzjonijiet; Luqa 10:21, 22; 22:40-44) Tistaʼ taqra waħda mit-​talb taʼ Ġesù fi Ġwanni kapitlu 17. Ħu ftit minuti biex taqraha. Hekk kif tagħmel dan, innota kif Ġesù fetaħ qalbu m’Alla. Ukoll, osserva l-​mod kif talab mingħajr egoiżmu—kif it-​talb tiegħu rrifletta l-​imħabba profonda tiegħu għas-​segwaċi tiegħu. “Missier Qaddis,” qal hu, ‘ħarishom minħabba l-​Ħażin,’ Satana.—Ġwanni 17:11, 15.

Jidher il-​kliem taʼ Ġesù xi ftit formali jew mekkaniku? Dażgur li le! X’eżempju mill-​aqwa ħallielna! Iva, dawk kollha li jridu jersqu lejn l-​Alla l-​veru għandhom isiru jafuh sew bħala individwu. Imbagħad, motivati mill-​imħabba bbażata fuq dak l-​għarfien, huma għandhom jiċħdu drawwiet u prattiċi reliġjużi li ma jogħġbux lil Alla. Lil uħud bħal dawn, Ġeħova jgħidilhom: “Inkun missier għalikom, u intom tkunu għalija wlied subien u bniet.”—2 Korintin 6:17, 18.

[Noti taʼ taħt]

QATT ĦSIBT DWAR DAN?

◼ Jistaʼ l-​parir taʼ Ġesù kontra t-​talb ripetut japplika għall-​użu tal-​kuruni tar-​Rużarju u r-​roti tat-​talb?—Mattew 6:7.

◼ It-​talb tagħna x’għandu jikxef dwar kif inħarsu lejn Alla?—Isaija 64:8.

◼ Jekk niċħdu twemmin reliġjuż falz, Alla kif se jħares lejna?—2 Korintin 6:17, 18.