Kif il-Ġenituri Jistgħu Jgħinu?

ORGANIZZAZZJONI taʼ l-edukazzjoni fl-Istati Uniti tħeġġeġ lill-istudenti taʼ l-iskola sekondarja biex jidħlu għal din il-biċċa xogħol: “Uru li intom lesti tagħtu minnkom infuskom sal-limitu.” Sforzati biex jilħqu l-miri tagħhom, xi żgħażagħ jipprovaw jagħmlu iktar milli tippermetti s-saħħa fiżika tagħhom. Madeline Levine li ssemmiet fl-artiklu taʼ qabel, kitbet: “Bejn korsijiet akkademiċi avanzati, ħafna attivitajiet li m’humiex fil-kurrikulu taʼ l-iskola, preparazzjoni minn qabel għall-iskola sekondarja jew il-kulleġġ, u privat b’għalliema speċjali biex jgħinuhom jagħmlu dak kollu li hu possibbli biex javanzaw l-istudji tagħhom, ħafna tfal isibu ruħhom bi skeda mimlija wisq sal-punt li tkun taʼ theddida għal saħħithom.” Studenti f’din is-sitwazzjoni jistgħu jbatu minn ħsara fiżika u emozzjonali.

Jekk intom inkwetati dwar l-istress li jiffaċċjaw it-tfal tagħkom fl-iskola, morru l-iskola intom stess. Tkellmu ma’ l-għalliema, ma’ dawk li jagħtu l-pariri, u ma’ l-amministraturi. Għidulhom dak li tosservaw. Għandkom id-dritt li tagħmlu dan.

Il-Bibbja tinkuraġġixxi lill-ġenituri biex joqogħdu attenti ferm għall-iżvilupp t’uliedhom. Mosè qal lill-ġenituri fil-ġens taʼ Israel: ‘Daħħluhom sew [il-liġijiet t’Alla] f’qalb binkom u tkellmu dwarhom meta toqogħdu bil-qiegħda f’darkom u meta timxu fit-triq u meta timteddu u meta tqumu.’—Dewteronomju 6:7.

Ma tkunux qed tindaħlu fil-ħajja privata t’uliedkom jekk tieħdu interess kbir fl-edukazzjoni tagħhom. Dan juri li wliedkom għandhom l-appoġġ bi mħabba tagħkom. U dan jistaʼ jnaqqas ħafna l-istress li jkollhom it-tfal tagħkom fl-iskola.

[Stampa f’paġna 8, 9]

Tkellmu dwar il-livell taʼ l-istress t’uliedkom ma’ l-għalliema tagħhom u ma’ dawk li jagħtuhom il-pariri