Ukulingana ne Luka
2 Nomba mwe yayo amanda, e Ogasitasi Kaisare wafumizye isundo lya kuti awantu wonsinye munsi wazipizile ukulembesya. 2 (Ukulembesya kwa kutalicilapo kwatalisile lyo e Kwiliniasi we kateka mu Siria.) 3 Acino cila muntu wayile mukulembesya ku musumba wa kumwawo. 4 Ne Jozefu nye wafumile ku Galili mu musumba wa Nazaleti aya ku Yudeya mu musumba wa kwe Devedi wuno wukakwitwa ukuti Betelehemu. Wacisile wo-o pa mulandu wakuti walinji awa mu lupwa lwa kwe Devedi. 5 Wayile ponga ne Mariya umuci, lyo ali mupipi nu kukwata umwana. 6 Pano wacilinji wali koko, impindi yafisile iyakuti apape. 7 Wizile apapa umwana umonsi e katote, swinya wamupomvile imyenda amulalika na mu musuwa, amuno kutalinji e lumu* umwakulala aweni.
8 Mwe conye icitungu mwalinji wakacema wano walinji mu mpanga wakulonda ing’onzi zyawo uwusiku. 9 Paponye umungeli wa kwe Yehova* wimilile pano wakacema walinji, nu luswepo lwa kwe Yehova* aluwala ukuwazinguluka icakuti watinile nkaninye. 10 Lelo umungeli wa wanenile ukuti: “Mutatina, amuno namiletela ilyasi lizima lino lililenga awantu wonsinye ukusecelela. 11 Ilelo, mu musumba wa kwe Devedi mukwasilwe wino alimipususya, we-e we Klistu, we Tatakulu. 12 Cino mwandi muye mukamanyileko aco-o: Mwandi mukazane akanya wakapomvile mu myenda, swinya wakalalisile na mu musuwa.” 13 Paponye wakacema waweni iwumba lya wangeli, apali ponga nawenye umungeli wakulumbanya e Leza, wakuti: 14 “Tulumbanye Leza mwiyulu, na munsi muwe umutende ku wantu wano akalola ukuti awazima.”
15 Pano awangeli wafumilepo nu kunyocela kwi yulu, wakacema wasyazile wakulanda wakuti: “Tuyani ku Betelehemu pakuti tukalole cino cacitika ukulingana na vino Yehova* watunena.” 16 Acino paponye wayile, awazana e Mariya ne Jozefu na kanya kalazile mu musuwa. 17 Walile walola umwana, wasimisile vyonsinye vino umungeli wawanenile pe we-e umwana. 18 Swinya wonsinye wano wivwileko vino wakacema walanzile wazungusile nkaninye, 19 lelo e Mariya watalisile ukwelenganya uwupiliwulo we ya-a mazwi nu kuyasunga mu mwezo wakwe. 20 Wakacema wanyocezile ku ng’onzi zyawo lyo wakulumbanya Leza nu kumusalifya pe vino wivwile nu kulola, ndiwulyanye vino wawanenile.
21 Pa wanda waciti 8 ukufuma pano wakwatizilwe, wamuzembuluzile nu kumwita izina lyakuti Yesu. Lyo-o izina alino umungeli wamwinisile lyo Mariya atani awe pa wukulu.
22 Swinya pano impindi yafisile iyakuti wamusangulule ukulingana ni sundo lya kwe Mozesi, e Mariya ne Jozefu wamutwazile ku Yerusalemu pakuti wakamupe kwe Yehova,* 23 ndi wulyanye vino calembwa mwi sundo lya kwe Yehova ukuti: “Umwana umonsi e katote azipizile ukupwa kwe Yehova.”* 24 Wapile inzuwi ukulingana na vino isundo lya kwe Yehova* lyalanzile ukuti: “Intozi ziwili nanti utwana twankunda tuwili.”
25 Nomba kwalinji umonsi wumwi mu Yerusalemu uwi zina lyakuti Simeoni. Walinji amulungamane swinya watinanga Leza. Walindililanga impindi pano Leza walinji nu kusansamusya awina Israeli nu muzimu wa kwe Leza wamutungululanga. 26 E Leza wamusokololezile ukupitila mu muzimu ukuti atalifwa mpaka ayize alole e Klistu, Wino Yehova* wasola. 27 Umuzimu wa kwe Leza watunguluzile Simeoni ukuya kwi tempile, swinya pano awakwasi watwazile e Yesu kwi tempile pakuti wakacite ukulingana na vino isundo lyalanzile, 28 wasenzile umwana nu kumulema mu makasa atalika ukulumbanya e Leza akuti: 29 “Nomba Tatakulu we muno Ukatungulula Wonsinye, ukuleka umuwomvi wako afwe mu mutende, amuno waficilisya vino wamulayile, 30 Nalola na minso yanenye ya-a wino alipususya awantu 31 wino wewe wapekinye ukuti ayize alolecele ku wantu wonsinye, 32 aliwa we luswepo ku wantu wa mu nko, swinya alicindamika awantu wako awina Israeli.” 33 Pano e baba wakwe ne mama wakwe wivwile vino vyalanzilwe pe we-e umwana wazungusile nkaninye. 34 E Simeoni wa wapazile* anena ne Mariya e mama wa kwe we-e umwana ukuti: “Lola! We-e umwana awino alilenga awavule mu Israeli ukupona nu kukatuka, aliwa acimanyilo cino awantu waliwavwanjila uwuwi 35 (ne nawe ulicula ngati awino walasa ne panga umutali), pakuti amelenganyo yawavule yize yasokololwe.”
36 Nomba peyilyanye impindi kwalinji ne kasesema umwanaci uwizina lya kuti Ana, umwana wa kwe e Fanueli, uwa mu mwiko wa kwe Asheri. We-e umwanaci walinji amukote swinya wisile vye imyaka 7 ne wakwakwe ukufumilila pano watwaline, 37 walinji we mukamfwilwa uwa myaka 84. Atapuswanga pi tempile, wapepanga Leza uwusiku nu musanya, walekanga nu kulya swinya wapepanga amapepo yakulambilizya. 38 Pe yilyanye impindi wizile kwe woliwo nu kutalika ukusalifya Leza swinya watalisile ukulanda pe we-e umwana kwe wonsinye wano walindililanga ukuti e Leza ayize apususye Yerusalemu ku walwani wakwe.
39 Pano e Jozefu ne Mariya wacisile vyonsinye ukulingana ni Sundo lya kwe Yehova* wanyocezile ku Galili mu musumba wawo uwa ku Nazareti. 40 Umwana watwalilizile ukukula, ukuwoma nu kuwa na mano swinya e Leza wamupalanga.
41 Nomba cila mwaka awakwasi wakwe wayanga mukuzevya Icakupitililwa ku Yerusalemu. 42 Pano walinji ni myaka 12 wayile mukuzevya ukulingana nu lutambi. 43 Pano ukuzevya kwasizile watalisile ukuwela, lelo e Yesu weni wasyazile ku Yerusalemu, nomba awakwasi wakwe watamanyile ukuti asyazile. 44 Weni walolanga ngati ali pi wumba lya wantu wano walinji ponga nawo. Wizile awamanya lyo wapita nu wulendo wa wanda wonga. Watalisile ukumuvwamba mwa lupwa na mu viwuza 45 lelo watamuzanile, acino wanyocezile ku Yerusalemu mukumuvwamba. 46 Pansizi ya manda yatatu wamuzanile mwi tempile lyo yisile pakasi ka kwa kasambilizya akuteyelezya nu kuwakolowozya amawuzyo. 47 Lelo wonsinye wano wateyelezyanga kwe weliwe wazungusile vino wivwicisyanga nu kwasuka amawuzyo yano wamukolowozyanga. 48 Pano awakwasi wakwe wamuweni, wazungusile nkaninye, swinya e mama wakwe wamunenile ati: “Mwanane tewatusakamika. Nene ne baba wako tukuvwamvile nkaninye.” 49 Nawe wawasusile ukuti: “Nga cani cino temukumvwambila? Uzye mutatemumanyile ukuti nzipizile ukuwa mu ng’anda ya kwe Tata?” 50 Lelo watamanyile vino wasulanga.
51 E Yesu wapisile na wakwasi wakwe ku Nazareti swinya watwalilizile ukuwivwila.* E mama wakwe wasunzile ya-a amazwi yonsinye mu mwezo wakwe. 52 E Yesu wayanga akukula mu cimo na mano swinya e Leza na wantu wamukunzile.