Ukulingana ne Luka
5 Wanda wumwi awantu wateyelezyanga kwe Yesu pano akusambilizya mu mbali ya luzi lwa Genesareti* swinya wamusunkanga. 2 E Yesu waweni amawato yawili yali mu mbali ya luzi lelo awalondo wa nswi watalinjimo amuno wacapanga amakonde. 3 Pano wakwezile mu wato wonga wuno walinji awa kwe Simoni, wamunenile ukuti awufuntusye katici ku cituntu. Mulyanye amuno wayile ayikala nga atalika ukusambilizya awantu. 4 Pano walesile ukulanda na wantu wanenile Simoni ukuti: “Twala uwato apazike, apano musumbile amakonde yinu pa minzi.” 5 Ne Simoni amwasuka ati: “Musambilizya, tuteyile amakonde yitu uwusiku wonsinye lelo tutalemilepo inswi nanti yimwi. Nomba pa mulandu wakuti avyo wambuzya, nacita wowonye.” 6 Pano wacisile wo-o, walemile inswi mvule icakuti na makonde yawo yatalisile ukulepuka. 7 Acino wisile awalondo wawuye wano walinji mu wato wunji ukuti wize wawavwe, swinya nawonye wizile awalonga mu wato mpaka awizula icakuti amawato yonsinye yawili yatalisile nu kusiwila. 8 Pano e Simoni waweni wo-o, wafukamizile Yesu nu kumunena ati: “Ntacindama uwakuti imbe mupipi na wewe Tatakulu, amuno ne muwembu.” 9 Walanzile wo-o pa mulandu wakuti weliwe na wonsinye wano walinji mu wato wazungusile pa nswi zino walemile 10 na walondo wawuyenye e Jemusi ne Yohani wa mwana Zebedi na wonye wazungusile. Lelo e Yesu wanenile e Simoni ukuti: “Utatina amuno ukufumilila ilelo lyo-o, wandi uwe we mulondo wa wantu.” 11 Acino watwazile amawato ku cituntu nu kusya vyonsinye, awakonka Yesu.
12 Wanda wumwi Yesu pano walinji mu musumba wumwi, kwalinji umonsi wino walinji na mambombo. Pano we-e umonsi waweni e Yesu, wayile kwe weliwe, apona pansi, afukama, nga mulambilizya ati: “Tatakulu ngu kulonda ungampozya. Uzye ukulonda ukumpozya?” 13 Acino Yesu wamulemile amunena ati: “Nkulonda, pola.” Nawe umonsi paponye apola mambombo. 14 Lelo e Yesu wamunenile ukuti atakanene uwili wensinye, acino wamunenile ukuti: “Yanga kwe simapepo pakuti akakulole, uye upe icawupe wulyanye vino Mozesi walanzile pakuti wasimapepo wakasinincizye ukuti upozile.” 15 Lelo ilyasi pe weliwe lyayanga likusalangana monsinye swinya awantu wayanga mukuteyelezya kwe weliwe nu kuti awapozye ku ndwala zyawo. 16 Nomba e Yesu wafumangapo nukuya ku vifulo kuno kwawanga akumyalale, aya mukupepa.
17 Wanda wumwi pano Yesu wasambilizyanga awantu, awafalisi na wakasambilizya wa masundo ukufuma mu twaya tonsinye utwa mu Galili, Yudeya ne Yerusalemu nawonye walinji kulyanye swinya e Yehova* wamupile amaka yakupozya. 18 Paponye awantu awamutwalila umonsi pa citanda wino atapitanga pa mulandu ni ndwala. Swinya welezizye ukumwinjizya muno Yesu walinji. 19 Nomba pano waposilwe ukumutwala, wakwezile pa musonje, awakankula, nga wamwinjizizya pa citanda pa nkolelo ya wantu wano walinji ponga ne Yesu. 20 Pano Yesu waweni isuwilo lyawo, wanenile umonsi wino walwile ukuti: “Nakutetela imembu zyako.” 21 Nga wakasambilizya wa masundo na wafalisi awatalika ukuwuzyanya wakuti: “Nga wenye we-e weweni wino akuponta? Amuno pasi wino angatetela imembu sukavye Leza.” 22 Lelo pano Yesu wamanyile vino welenganyanga, wawanenile ukuti: “Nga cani cino mukwelenganizizya vyovyo mu myezo yinu? 23 Uzye cani capepukapo, pa kunena we-e umulwale ukuti ‘nakutetela imembu zyako’ nu kumunena ukuti ‘katuka uwapita?’ 24 Lelo pakuti mwemwe mumanye ukuti Umwana wa muntu wawa na maka ayakutetela imembu mu nsi—” wanenile umulwale ukuti: “Nkukunena nkuti, katuka senda icitanda cako uye ku nga’nda.” 25 Nawe paponye wakatusile asenda cino walazilepo nu kuya ku nga’nda lyo kulumbanya Leza. 26 Wonsinye wano walinjipo wazungusile nu kulumbanya Leza swinya wivwile intete, awatalika ukulanda wakuti: “Tusitela tulolepo icamusango wo-o.”
27 Nomba pano wapitanga, wazanile e Levi ayisile pi ofesi lya wakasoncezya wa misonko, acino wamunenile ukuti: “Nzanga uwe we musambi wane.” 28 Nawe wasile vyonsinye nu kumukonka. 29 Nga Levi apanjila Yesu umuteweto mu ng’anda yakwe, swinya mwalinji iwumba ikulu ilya wakasoncezya wa misonko na wanji wano walyanga ponga nawo. 30 Nga Wafalisi na wakasambilizya wa masundo awatalika ukuyilizyanya kwe Yesu ati: “Acani cino ukalila nu kumwela ponga na wakasoncezya wa misonko na wawembu?” 31 Apano e Yesu wawasusile ukuti: “Awapuma wasilondekwa uwakuwapozya suka awalwale. 32 Ntiza mukwita walungamane, lelo niza mukwita awawembu ukuti walapile.”
33 Nawo wamunenile ukuti: “Awasambi wa kwe Yohani wakaleka ukulya swinya wakapepa, wonye avino na wasambi wa Wafalisi wakacita, lelo awasambi wako weni wakalya nu kumwa.” 34 Ne Yesu wawasusile ati: “Uzye mukwelenganya ukuti waciwuza wa kwe siwinga wazipizile ukuleka ukulya pano wacili wali ne siwinga? Co-o citange cicitike. 35 Lelo impindi yikwiza pano e siwinga walimusenda, apano awawuye walisyala waleka ukulya.”
36 E Yesu wawanenile ni cilanjililo cakuti: “Kusi wino angalepula icikamba ku cizwalo ca mwenda uwupya, akambatike pa cizwalo icikali, amuno icikamba ca mwenda uwupya cingalepula icizwalo icikali swinya vitange vikolane. 37 Swinya kusi wino akawika e waini iyipya mu vyola vyakusunjilamo ivikali, amuno nga wacita wo-o ivyakusunjilamo vingalepuka ne waini yingitika. 38 Lelo e waini iyipya, yizipizile ukuwikwa mu vyola vyakusunjilamo ivipya. 39 Kusi wino akalonda ukumwa e waini iyipya nga mwile kali iyikalipe, amuno akati: ‘iyikalipe ayili iyizima.’”