Ukulingana ne Luka
1 Awantu awavule walemba pa vintu vyo vyacitisile vino nasweswenye twazumila ukuti avyacisinka. 2 Ne wanji wano waweniko swinya wano wawizyanga izwi lya kwe Leza, nawonye watunena pe vyo-o ivintu. 3 Acino, tatakulu Teofile, mpitulusile mwe vyonsinyene vyo-o, naninye sonzilepo ukulemba pe vyo-o ivintu mulyanye muno vyakonkanizile ukufumilila pakutalika. 4 Cino nacitila wo-o, nkulonda umanye ukuti vino wakusambilizya avyacisinka.
5 Mu mpindi yino Herodi* walinji amfumu ya Yudeya, kwalinji e simapepo uwizina lyakuti Zekariya. Walinji mwi wumba lya simapepo lino witanga ukuti Abiya. Umuci walinji we Elizabeti wino wafumile mu wana awanaci wa kwe Aroni. 6 Wonsinye wowili, wakonkanga amasundo ya kwe Yehova* swinya wakonkanga vyonsinye vino wawanenanga. 7 Lelo watakwetipo umwana, amuno e Elizabeti walinji ang’umba* swinya wonsinye wowili walinji awakote.
8 Nomba e Zekariya walinji pa nkolelo ya kwe Leza akuwomba wusimapepo, amuno lwalinji aluti* lwi wumba lyakwe. 9 Swinya impindi yamuficizile iyakuti ayinjile mu ng’anda ya kwe Yehova* pakuti ape ivinuncile. 10 Pe yo-o impindi, lyo awantu awavule wali palonde wakupepa. 11 Umungeli wa kwe Yehova* walolecezile kwe weliwe, wimilile apakupelela ivinuncile, kwi kasa lya kwe ndilo. 12 Pano Zekariya waweni umungeli, wasakamile nkaninye swinya wivwile intete. 13 Lelo umungeli wamunenile ati: “Utakatine Zekariya, amuno vino ukulenga vivwisile. E wakwako Elizabeti alikukwatila umwana umonsi swinya uyize umwinike izina lyakuti Yohani. 14 Uliyivwa icete nkaninye swinya ulisecelela, na wantu awavule walisecelela pa nkwatwa yakwe, 15 amuno aliwa amukulu pankolelo ya kwe Yehova.* Lelo atazipizile ukumwa ipala ni vyakumwa vyonsinye vino vikakola, ne Leza alimupa umuzimu, na pano atani akwatwe. 16 Alilenga na wana wa kwe Israeli awavule ukunyocela kwe Yehova* Leza wawo. 17 Aliya pa nkolelo ya kwe Leza, nu mwezo na maka ndi vino Eliya walinji. Alilenga imyezo ya wakwasi awonsi ukuwa ngati aya wana, alilenga wano watawa ni civwila ukuwa na mano ya walungamane. Alicita wo-o pakuti apekanizizye Yehova* awantu.”
18 Nga Zekariya anena umungeli ati: “Ningasinincizya wuli ukuti vino ukulanda avya cisinka? Amuno nkosile, ne wakwanenye akuzile.” 19 Umungeli nawe amunena ati: “Ne Gabrieli, wino akakwimilila pankolelo ya kwe Leza, swinya ntumilwe ukuti njize nkunene pe lyo-o ilyasi lizima. 20 Nomba nkukunena nkuti, wandi uwe we ciwulu, utalitela ulandepo mpaka vyonsinye vyo-o vize vificiliswe pa mpindi yilyanye yino vyalandilwapo ukuti vilicitika.” 21 Awantu palonde watwalilizile ukulindilila Zekariya swinya wazungusile nkaninye wo-o vino wazimvile ukufuma mu ng’anda ya kwe Leza. 22 Pano wafumile palonde, waposilwe ukulanda nawo. Walile wantu wamulola, welenginye ukuti tewalola icizungusyo mwi tempile. Acino Zekariya wawomvyangavye amakasa pakulanda nawo. 23 Pano wamazile uluti* lwakwe ulwa kuwomba pi tempile, wanyocezile ku ng’anda ku mwakwe.
24 Mukupita kwa mpindi, e Elizabeti wizilewa pa wukulu swinya atafumanga mu ng’anda pa myezi 5, watinji: 25 “Lolani vino Yehova* ancitizile mwe ya-a amanda, andangulucizile pakuti afumye umukwelengula pe nene.
26 Pano Elizabeti walinji nu wula wa myezi 6, e Leza watumile umungeli uwizina lyakuti Gabrieli ku musumba wa mu Galili wuno witwanga ukuti Nazareti. 27 Wamutumile kwe Mariya wino walinji we mwali swinya wino wimazilwe kwe Jozefu uwa mu lupwa lwa kwe Devedi. 28 Walile umungeli winjila muno Mariya walinji, wamulamusile ati: “Umutende wuwe nawe, we mwanaci umupalwe ne Yehova.”* 29 Pano Mariya wivwile ya-a amazwi, wivwile intete nkaninye swinya walondanga ukwivwicisya uwupiliwulo we ya-a amazwi. 30 Umungeli wamunenile ati: “Utatina Mariya, amuno Leza akupazile. 31 Acino, uliwa pa wukulu swinya ulipapa umwana umonsi, uyize umwinike ukuti Yesu. 32 Aliwa amukulu swinya aliwakwitwa ukuti: “Umwana wa kwe Leza Umukulisye, swinya e Yehova* Leza alimuwika pa wufumu, ndi vino e yisi, e Devedi. 33 Aliwa Amfumu mu ng’anda ya kwe Yakobi umuyayaya swinya Uwufumu wakwe wutalitela wusile.”
34 Nge Mariya anena umungeli ati: “Nga vyonye vyo-o vingacitika wuli, wo-o vino nsitela ndalepo nu monsi?” 35 Umungeli nawe amwasuka ati: “Umukulisye alikutumila umuzimu wakwe na maka yakwe yalikuvwimba. Awuli umulandu wuno umwana atalikwatilwa nu luwembu swinya aliwakwitwa ukuti Umwana wa kwe Leza. 36 Yivwa! Ne Elizabeti nye e lupwa lwako umukote wino awantu watinji ang’umba, ali nu wula wa myezi 6 swinya alipapa umwana umonsi; 37 amuno vyonsinye vino Leza walanda vikaficiliswa.” 38 Nge Mariya ati: “Ne wa-a ne muzya wa kwe Yehova,* kaciwe ukulingana na vino walanda.” Paponye nu mungeli afumapo.
39 Pa nsizi ye vyo-o, e Mariya wayile ku nsi ya myamba, ku musumba wa mu Yuda, 40 wayile yinjila mu ng’anda ya kwe Zekariya nu kulamuka Elizabeti. 41 Pano Elizabeti wivwile Mariya wamulamuka, umwana munda yakwe wacenile, nu muzimu wa kwe Leza wizile pe weliwe. 42 Swinya walanzile ati: “Wapalwa pa wanaci wonsinye, nu mwananye wino ulikwata, wapalwa. 43 Nga ne weni ne wakuti e mama wa kwe wino aliwa we Tatakulu ayize mukundola? 44 Ulile wandamukavye, umwana munda tewacena ku nsansa. 45 Swinya awansansa umwanaci wino wazumizile vino wamunenile, amuno e Yehova* alificilisya vyonsinye.
46 Apano e Mariya alanda ati: “Nkulumbanya* Yehova,* 47 umwezo wane wutalileka ukusecelela pe vino e Leza e kapususya wane wancitila. 48 Wizuka umuzya wakwe umwanaci nanti acakuti amulanda swinya awantu wonsinye wandi wati napalwa. 49 Amuno e Leza wa maka Yonsi, ancitizile ivintu vyakuzunguka swinya izina lyakwe ilikulu lyayana ukucindikwa. 50 Alitwalilila ukulanjizya uluse umuyayaya kwe wonsinye wano wakamutina. 51 Wacita ivya maka ni kasa lyakwe; wasalanganya na wacilumba mu myezo yawo. 52 Wisya awa maka pa vilimba vya wufumu nu kucindamika awalanda, 53 wikusya awanzala ni vintu ivizima swinya walenga awavyuma ukupita makasa vye. 54 Ayavwizye umuwomvi wakwe, e Israeli, pakuti alanjizye ukuti lyonsinye akakwizuka vino walayile, 55 ukuti alilanjizya uluse kwe Abrahamu na ku wana wakwe umuyayaya. Ndi wulyanye vino wanenile awakwasi witu awakukali.” 56 E Mariya wisile kwe Elizabeti mupipi ni myezi yitatu apano anyocelamo ku mwawo.
57 Nomba impindi yafisile iyakuti e Elizabeti akwate umwana, swinya wapafile umwana umonsi. 58 Walile walupwa lwakwe na wantu wanji wivwa pe vino Yehova* wamulanjizizye uluse, wasecelezile ponga nawe. 59 Pa wanda wa citi 8, wizile mukuzembulula umwana, swinya walondanga ukumwita izina lya kwe yisi ilyakuti Zekariya. 60 Lelo e mama wakwe wakanile, alanda ati: “izina lyakwe we Yohani.” 61 Nawo wamunenile ukuti: “Nga weweni mu lupwa lwinu wino wakatela awinika lyo-o izina?” 62 Acino awantu walanzile ne yisi ukuwomvya amakasa, awamuwuzya ukuti awanene izina lino walinji nu kwita umwana. 63 Nawe walenzile ukuti wamupe apakulembela, nga alembapo ukuti: “izina lyakwe we Yohani.” Wonsinye wazungusile nkaninye. 64 Paponye, ululimi lwapepusile atalika nu kulanda, awalumbanya Leza. 65 Awantu wonsinye awivwa intete swinya watalisile ukulanda pe lyo-o ilyasi mu nsi yonsinye iya myamba iya mukaya ka Yudeya. 66 Wonsinye wano wivwile, watalisile ukwelenganya ukuti: “Uzye wenye umwana avyani vino alicita nga wakula? Walanzile wo-o pa mulandu wakuti amaka ya kwe Yehova* yalinji pe we-e umwana.
67 E Leza wapile umuzimu wakwe kwe Zekariya, e yisi wa mwana, swinya walanzile amazwi ukufuma kwe Leza, watili: 68 “Acindikwe Yehova* e Leza wa kwe Israeli, amuno alanjizizye uluse ku wantu wakwe pakuti awapususye. 69 Watukatusizya e kapususya* wa maka mu ng’anda ya kwe Devedi umuwomvi wakwe, 70 wulyanye vino walanzile ukupitila mwa kasesema wakwe awakukali, 71 pakuti atupususye ku walwani witu na ku makasa ye wonsinye wano watupata; 72 pakutulanjizya uluse pa mulandu wa wakwasi witu awakukali na pakulanjizya ukuti akakwizuka icipangano cakwe; 73 umulapo wuno walafile kwe Abrahamu umukwasi witu uwakukali. 74 Alila watupususya ku walwani witu, alilenga twawomba umulimo wakwe mukusipa 75 na pakuti tuwe awacisinka swinya awalungamane kwe weliwe mu wumi witu wonsinye. 76 Lelo wewe mwana wane, uliwakwitwa ukuti e kasesema wa Mukulisye, amuno ulikolelela e Yehova* kukupekanya inzila zyakwe, 77 nu kunena awantu wakwe ivyakupusuka nu kutetelwa pa membu zyawo. 78 E Leza witu alicita vyonsinye vyo-o pa mulandu wa luse lwakwe. Swinya pa mulandu we lonye uluse tulilola uluswepo ukufuma mwi yulu ngati aluswepo lwa mutondo tondo. 79 Pakuti luwalile wonsi wano wali mu mfinzi na wano wali mu cinzungwani ca mfwa nu kututungulula mu nzila ya mutende.”
80 Umwana wakuzile swinya umuzimu wa kwe Leza walenzile ukuti awome, watwalilizile nu kwikala mu mpanga mpaka pano impindi yafisile iya kuwizizya awina Israeli.