Ukulingana ne Mateyo

22 Na swinya, Yesu atalika ukuwanena ukuwomvya ivilanjililo, alanda ati: 2 “Uwufumu wa mwi yulu tungawukolanya ku mfumu yino yapekinye ivyakulya ivivule pa winga wa mwana wakwe umonsi. 3 Imfumu ayituma awawomvi ukuya mukwita wano walalisilwe ku winga, nomba wakanile ukwiza. 4 Ayinyoka ayituma awawomvi na wanji, iwanena ati, ‘Kanenani wano walalisilwe ku winga ukuti: “Mpekinye ivyakulya, nkomile ni ng’ombe zilyanye inzima zino natenjela. Mpekinye vyonsinye, mwemwe nzanjivye ku winga.”’ 5 Nomba wasuzile amazwi ya mfumu, wumwi aya ku vyalo vyakwe, nu muwuye aya mukukazya; 6 ne wanji walemile awawomvi wa mfumu awawuma nu kuwakoma.

7 “Imfumu yafuzilwe nkaninye, icakuti yatumile awasilika awaya wakoma wawo wacikoma nu koca umusumba wawo. 8 Apano imfumu ayinena awawomvi ukuti, ‘Tupekinye kaali uwinga nomba wano twalalisile ukwiza kwe wo-o uwinga walanjizizye apatiswenye ukuti watayanile ukuzanwako. 9 Acino yanji mu misewo mukite uwili wensinye wino mwazana ukuti ayize ku winga.’ 10 Awawomvi wacisile vino imfumu yawanenile. Wayile awita wensinyene wino wazanile mu musewo, umuzima nu muwipenye icakuti ni ng’anda yino mwawezile uwinga yizwile na wantu wano walyanga.*

11 “Pano imfumu yayile mukulola wano wayile ku winga, yazanile umonsi wino atazwite icizwalo ca pa winga. 12 Nga imfumu imunena ati: ‘Nga tewinjila wuli ukwasowa icizwalo ca pa winga?’ Nawe waposilwe ivyakwasuka. 13 Imfumu yanenile awawomvi wakwe ukuti, ‘Munyepani amakasa na manama mu musumbile panzi pa mfinzi. Palyanye apano wandi aye mukulila nu kulumanya amino.’

14 “Acino e Leza akakwita awavule, lelo akasolapovye watici.”

15 Awafalisi wivwine nu kuya kwe Yesu pakuti nga waluvyanya ukulanda, wamuleme. 16 Acino watumile awasambi wawo ni wumba lino lyatunjililanga e Herodi ukuya mukunena Yesu ukuti: “Musambilizya, twamanya ukuti lyonsinye ukalanda icisinka swinya ukasambilizya ivya cisinka pe Leza. Swinya usilonda awantu wakutemwe amuno usilolecesya pe vino awantu wakaloleka. 17 Ukutipo wuli? Uzye cazumilizwa,* ukulipila indalama zya musonko kwe Kateka* nanti awe? Tunene.” 18 Nomba pa mulandu wakuti e Yesu wamanyile cino wimililepo,* watili: “Nga cani cino mukanjelezezya mwe wantu wawufi mwe? 19 Ndanjizyani indalama yino mukasoncela umusonko.” Awamupa koini.* 20 Yesu awakolowozya ukuti: “Uzye icinso ni zina vino vili pe yo-o e koini, avya kwe weni?” 21 Nawo awamwasuka awati: “Avya kwe Kaisare.” Nawe awanena ukuti: “Fwandi ivya kwe Kaisare, muwapa Kaisare, ne ivya kwe Leza, muwapa Leza.” 22 Walile wivwa vyo-o vino Yesu walanzile, wazungusile, awamusya nu kupita.

23 Pe wulyanyene uwanda Awasaduki wano watazumizile mukuzyulupuka, wizile nu kumukolowozya ukuti: 24 “Musambilizya, e Mozesi watili: ‘Ngu monsi wafwa ukwasowa ukukwata umwana, lyo umunyina azipizile ukutwala mulamu* wakwe. Awana wano walikwata, waliwa awa muyazi.’ 25 Nomba kwalinji awanyina 7 wano wafumile ing’anda yonganye. E songo pe wonsinye watwazile, lelo wafwile nanti kukwata umwana, acino umunyina wasyazile atwala wakwakwe, lelo nawenye wafwile nanti kupapamo umwana. 26 Wonye avino calinji na ku waciti tatunye, mpaka nu waciti 7. 27 Mukulecelezya, nu mwanacinye wafwile. 28 Nomba pakuzyulupuka, we-e umwanaci aliwa we muka weni? Amuno wonsinye 7 wamutwitepo.”

29 Nga Yesu awasuka ukuti: “Mwasowa nkaninye, amuno mutamanya Amawaliko, nanti amaka ya kwe Leza. 30 Pano kuliwa ukuzyulupuka, awantu wataliwa watwala nanti ukutwalwa, amuno waliwavye ngati awangeli mwi yulu. 31 E Leza waminenile ukuti awafwe walizyulupuka. Uzye mutawazizye vino waminenile? Watili: 32 ‘Ne Leza wa kwe Abrahamu, uwa kwe Isaki ne Yakobi.’ Acino e Leza ase Leza wa wafwe, lelo we Leza wa wantu wa wumi.” 33 Walile awantu wivwa wo-o, wazungusile nkaninye pe vino wasambilizyanga.

34 Pano Awafalisi wivwile kuti Awasaduki waposilwe ivya kwasuka Yesu, awawungana ponga nu kuya kwe weliwe. 35 Pakwelezya Yesu, Umufalisi wino wamanyile sana Isundo wamukolowozizye ukuti: 36 “Musambilizya, alisundo ci ilikulu lino tuzipizile ukutontela?” 37 Nawe wamwasusile ukuti: “‘Uwakunda e Yehova* e Leza wako nu mwezo wako wonsinye, nu wumi* wako wonsinye na melenganyo yako yonsinye.’ 38 Lyo-o alili sundo lyakutalicila swinya ilikulu. 39 Ilya citi wili, lyakolana na lyo-o, alyakuti: ‘Wakunda umuwuyo ndi vino wayikunda.’ 40 Amasundo yonsinye na vino wakasesema walemvile, vyafuma pe yanye ya-a Amasundo yawili.”

41 Pano Awafalisi wacili wali palyanye, Yesu wa wakolowozizye ukuti: 42 “Uzye mwemwe mukatipo wuli pe Klistu? Uzye wafumile mu lupwa lwa kwe weni?” Nawo watili: “Mwe Devedi.” 43 Ne Yesu wawakolowozizye ukuti: “Lyo acani cino e Devedi pano watunguluzilwe nu muzimu wa kwe Leza wamwitizile ukuti Tatakulu, pano walemvile ukuti, 44 ‘Yehova* wanenile Tatakulu ukuti: “Yikala kwi kasa lyane ilya kwe ndilo mpaka njize mbike awalwani wako pansi pa matamba yako?”’ 45 Nga cakuti e Devedi, awino wamwita ukuti Tatakulu, lyo acani cino wawela amwana wakwe?” 46 Kutalinji nanti wenganye wino walinji ni zwi lya kumwasuka, swinya ukufumilila pe wulyanye uwanda, pasi wino akatela amukolowozyapo iwuzyo naswinya.