Ukulingana ne Mateyo
6 “Mutacita ivizima pakuti vye awantu wamilole; amuno nga mukucita wo-o Umukwasi winu uwa mwi yulu atalimipa icilambu. 2 Fwandi nga mwacitila wanji ivizima* mutawilizya nge mukulizya ipenga pakuti wanji wamanye. Wonye wo-o avino awantu wano wakayipanga ukuwa awazima wakacita mu vifulo vyawo ivya kupepelamo* na mu misewo. Wakacita wo-o pakuti awantu wa walumbanya. Nkuminena nkuti, conye co-o acili icilambu cino walipocelela. 3 Nomba mwemwe ndi mwapa wumwi cimwi, mutanena wanji* 4 pa kuti vino mukupa vyawa avya mu nkama. Apano Umukwasi winu wino akalola vyonsinye, alimilambula.
5 “Pano mukupepa, mutati mwawa ngati awantu wano wakayipanga ukuwa awazima, amuno weni wakunda ukupepa lyo wimilile mu vifulo vya kupepelamo* na mu misewo pakuti vye awantu wawalole. Nkuminena nkuti conye acili icilambu cino walipocelela. 6 Lelo pano mukupepa, yinjilani mu ng’anda mwiyaleko ni cisakati nu kupepa ku mukwasi winu wino asiloleka. Apano umukwasi winu wino akalola umuvwame alimilambula. 7 Pano mukupepa mutanyocezyapo amazwi ayali yonganye, ndi vino awantu wa munsi wakacita, amuno wakalola ngati apano e Leza angawivwa nga cakuti wavuzya amazwi. 8 Mutati mwawakolanya, amuno umukwasi winu akamanya vino mukulonda na pano mutani mumulenge.
9 “Pano mukupepa, muwalanda mukuti:
‘“Tata wa kwi yulu, tukupepa ukuti awantu wacindika izina lyako. 10 Tukupepa ukuti Uwufumu wako wutalike ukuteka mu nsi. Swinya tukupepa ukuti ivintu mu nsi vize viwe ukulingana na vino ukalonda, ndi wulyanyene vino vyawa mwi yulu. 11 Twazina tupe ivyakulya* vya wanda wilelo, 12 swinya uwatutetela nga twaluvyanya ndi vino nasweswe tukatetela wano wakatuluvyanya. 13 Uwatwavwa pano twelezwa ukuti tucite iviwipe. Swinya uwatucinjilila na ku mulwani e ciwa.
14 Nga mukutetela wano wakumiluvyanya, nu mukwasi winu uwa kwi yulu alimitetela, 15 Lelo nga musitetela wanji, nu mukwasi winunye atalimitetela pe vino mukaluvyanya.
16 Nga mwaleka ukulya, mutawa nu wulanda ndi vino awantu wano wakayipanga ngati awazima wakacita, wakawifya* pa minso pakuti awantu wawalole ukuti walesile ukulya.* Nkuminena nkuti, wapocelela kali icilambu cawo. 17 Lelo mwemwe pano mwaleka ukulya, muwazifya inyele nu kusamba pa minso. 18 Lyo awantu watalimanya ukuti mulesile ukulya. Swinya apano Umukwasi winu wino akalola umuvwame alimilambula.
19 “Mutati mwawombesya pakutivye musunjile ivyuuma vinu mwe yo-o insi. Amuno vyo-o ivintu vingononeka, nu kuwola. Swinya awang’o wangamiwila. 20 Lelo mwawombesya ukucita ivintu vino e Leza uwa mwi yulu wacindamika, amuno vyeni vitanga vyononwe ku ngalawa na ku luswa swinya na wang’o nye watange wiwe. 21 Amuno icintu cino wacindamika sana, acino uliwakwelenganya penepo lyonsinye.
22 “Aminso yawa ngati aluswepo luno lukakukozezya. Nga cakuti aminso yako yakalolecesya pa vintu ivizima, lyo umuwili wako wonsinye wuliwa mu luswepo. 23 Lelo nga cakuti aminso yako yakulolecesya pa viwipe, lyo nu muwili wako wonsinye wuliwa mu mfinzi. Nga cakuti uluswepo luno lwawa mwe wewe lwapiluka amfinzi lyo yoyo imfinzi yilikula nkaninye!
24 “Kusi wino angawombela wa songo wa ncito wawili. Amuno nga watemwa wenga, angapata winji. Swinya angawa ni cisinka kwe wenga nu ku kanacindika winji. Fwandi indalama nga azino wacindamika sana mu wumi wako, utalitela uwombele Leza.
25 “Awuli umulandu wuno nkuminenela nkuti: Mutasakamala pe vino mwandi mulye, vino mwandi mumwe na vino mwandi muzwale. Uwumi winu wacindama sana ukucila ivyakulya, nu muwili winu ukucila ivizwalo vino mukazwala. 26 Te lolecesyani ivinyunyi. Visikomela imbeyu, visisombola nanti ukusunga ivyakulya. Lelo naponye Umukwasi winu uwa mwi yulu akavilisya. Uzye mutacindama ukuvilusya? 27 Weweni pa kwe mwemwe wino angalundako nanti ali awala* lyonga ku wumi wakwe nga akusakamala? 28 Amulandu ci wuno mukasakamalila pa vizwalo? Sambililaniko pe vino amaluwa ya mu mpanga yakakula. Yasiwombesya nanti ukupanga ivizwalo.* 29 Lelo nkuminena nkuti ni Mfumu Solomoni nye nanti yalinji ni vyuma wulyanye swinya yacindime, yisitela izwalepo ndi vino amaluwa yakaloleka ukuyemba. 30 Wo-o nga avino Leza akazwika amaluwa ya mu mpanga yano yakawako vye pa wanda wonga, uwaca ayakala awayoca na mu mulilo, lyo alicilapo ukumisakamala nanti acakuti isuwilo linu litawoma. 31 Fwandi mutati muwasakamala ukuti, ‘Twandi tulye cani?’ nanti, ‘Twandi tumwe cani?’ nanti, ‘Twandi tuzwale cani?’ 32 Amuno vyo-o avino awantu wano watamanya Leza wakalondesya. Umukwasi winu uwa mwi yulu wamanya kaali ukuti vyonsinyene vyo-o avino mukalonda.
33 “Acino, muwakolezya Uwufumu wa kwe Leza swinya muwamutontela lyonsinye, na vyonsinye vyo-o vino mukalonda, aliwamipa. 34 Mutasakamala pa vya wanda wuno wukonsilepo! Amuno wowo uwanda nawo wuliyiwela na masakamika. Amasakamika yano yakawako cila wanda yakayana mu wanda wowonye.