Ukulingana ne Mateyo
7 “Mutati muwapingula wanji pa kuti e Leza atize amipingule. 2 Walimipingula wulyanye vino mukapingula wanji, swinya vino mukacita kwe wanji avino walicita kwe mwemwe. 3 Acani cino ukalolecesya akalisote kano kali mwi linso lya muwuyo, lelo ukusya icimuti cino cili mwi linso lyako? 4 Nanti, unganena wuli umunyonko uti, ‘Leka nkufumye akalisote kano kali mwi linso,’ pano wewe uli ni cimuti mwi linso? 5 We cawufi we!* Te fumya icimuti cino cili mwi linso lyako, apano ungalola icete akalisote kano kali mwi linso lya muwuyo.
6 “Mutati muwapa wasimbwa ivya kwe Leza, swinya utazipizile ukusumbila wakapoli ivintu vyako ivya mutengo. Amuno nga wawapa, wangavilyatanya nu kuvyonona, wakupilucile nawewenye wakucise.
7 “Muwatwalilila ukulenga, mulipocelela; muwatwalilila ukuvwamba, mulizana; muwatwalilila ukukong’onsya; walimiyulila. 8 Wensinye wino akalenga walimupa, swinya wensinyene wino akavwamba, alivizana, na wensinyene wino akakong’onsya, walimwiyulila. 9 Uzye umwana winu nga wamilenga ivyakulya, mungasenda iliwe mumupe? 10 Nanti nga wamilenga inswi, mungamupa inzoka? 11 Nanti acakuti mukacita iviwipe ivivule nkaninye, mwamanya ukupa awana winu ivyawupe ivizima. Acino mungasuwila ukuti, Umukwasi winu uwa mwi yulu alipa ivizima kwe wonsinye wano wakamulenga!
12 “Vyonsinye, vino mukalonda awantu wanji wamicitila, avino namwenye mwawacitila. Monye amuno mwasula Amasundo na mazwi ya kwa Kasesema.
13 “Yinjililani pa mulyango uwutici, amuno umusewo wuno wukatwala ku mfwa wakula swinya awavule wano wakapitamo. 14 Lelo umulyango wacepa, ni nzila yino yikatwala ku wumi yafyenenkana, swinya awantu vye awatici awano wakayizana.
15 “Muwacenjela na wantu wano wakaloleka ngati wakalandilako Leza. Wakaloleka ngati ang’onzi pakwiza kwe mwemwe, lelo mukasi anyama zya mu mpanga izikalipe nkaninye zino zikalonda ukumicisa. 16 Muliwamanyila kwe vino wakacita. Mutanga muzane ivikomwa ivinone* vikomile ku myunga. 17 Icikomwa icizima cikafuma ku cimuti icizima, lelo icimuti iciwipe cikakoma ivikomwa iviwipe. 18 Icimuti icizima citange cikome ivikomwa iviwipe, ni cimuti iciwipe citange cikome ivikomwa ivizima. 19 Nga cakuti icimuti cisakukoma ivikomwa ivizima awantu wakacitema awacisumbila mu mulilo. 20 Wonye wo-o avino mwandi muwamanyila wakasesema wa wufi kwe vino wakacita.*
21 “Ase wonsi wano wakati wakambombela wano waliyinjila mu Wufumu mwi yulu. Awawo vye wano wakakwivwila Umukwasi wane uwa kwi yulu awano waliyinjila mwenemo. 22 Uwanda wuliyiza pano awavule waliti: ‘Tatakulu! Tatakulu! Twalandilanga wanji pe wewe! Twawomvyanga izina lyako pa kuwinga imizimu miwipe! Twacisile ivizungusyo ivivule ukuwomvya amaka yako! Uzye usakwizuka? 23 Nani ndiwanena ukuti: Ntamimanyile! Fumani pa-a, mwe wantu awawipe mwe!
24 Acino wensinye wino akakwivwa vino nkusambilizya nu kuvicita, aliwa ngati amuntu uwa mano wino wazenzile ing’anda yakwe pe lwala. 25 Pano imvula ya cimuza yatonyile nu kuma kwe yoyo ing’anda, swinya kwalinji ne mulamba, yoyo ing’anda yitaponile amuno yazenjezilwe pe lwala. 26 Umuntu uwili wensinye wino akakwivwavye vino nkusambilizya lelo asivicita, wakolana nu muntu iciwelewele wino wazenjezile ing’anda yakwe pe nsenga. 27 Yalile imvula ya cimuza yatonya, kwiza ne mulamba, yoyo ing’anda yaponile nu kononeka.
28 Walile Yesu wamala ukulanda, awantu wazungusile pa misambilizizye yakwe, 29 amuno wasambilizyanga na maka yano yafumile kwe Leza, ukupusanako na wano wa wasambilizyanga Amasundo.